1 Hamba nhanzi zeng'ha za Isilaeli naziluta kwa Daudi ako Hebuloni na kumlonjela, "Ulole, hetwe ndo ivyazi lya Abulahamu. 2 Katali, mhela uwele Sauli loyawele mndewa wa hetwe, hegwe ndo nawali uwalongoza Waisilaeli kuli ngondo, Mkulu Nguluwi nakakulonjela, ‘Kowa mdimi wa wanhu wa heni Waisilaeli na kowa chilongozi wa hewo.’ " 3 Lelo wasekulu weng'ha wa Isilaeli nawaluta kwa mndewa Daudi ako Hebuloni, naye mndewa Daudi nakadita ilagano na hewo hali Mkulu Nguluwi. Hamba wasekulu awo nawambakaliza mafuta Daudi yawe mndewa wa Isilaeli.

4 Daudi nakaluka kulongoza loyawele na miyaka makumi gadatu, nakalongoza kwa mhela wa miyaka makumi gane. 5 Ako Hebuloni nakawalongoza wanhu wa Yuda kwa mhela wa miyaka saba na myezi sita. Ako Yelusalemu nakawalongoza wanhu weng'ha wa Isilaeli hamwe na wanhu wa Yuda kwa mhela wa miyaka makumi gadatu na jidatu.

6 Hamba mndewa na wanhu wa heye nawaluta Yelusalemu kuwatowa Wayebusi wawele wochikala amo. Wayebusi nawamlonjela, "Hambe winjile amo kuli muji, kwa vila mbaka wohambe walole na walichete woweza kukuwinga." Nawamlonjela ahyo kwa vila nawejesa kota Daudi howeza kwinjila amo kuli muji. 7 Daudi nakauhola muji awo na ngome ya Siyoni, iwele ndo muji wa Daudi.

8 Zuwa alyo Daudi nakalonga, "Munhu yoneche wone yawatowe Wayebusi, yakole mli vikolola vya mazi leka kuwatowa awo wapoka walingiwhana na walichete na wohambe walole, wawele ndo wang'honyo wa Daudi." Ndo mina wanhu wangulongaga, "Wohambe walole na walichete hambe wenjile kuli ng'handa ya mndewa." 9 Daudi nakekala kuli ngome ayo na kuichema, "Muji wa Daudi." Daudi nakauzenga muji kuuzunguluta, kwaluchila Milo kulutila mgati. 10 Daudi nakalutilila kuwa na mong'ho ng'hatu kwa vila Mkulu Nguluwi, Nguluwi Yawele na Mong'ho, nayali hamwe na heye.

11 Hamba mndewa Hilamu wa Tilo nakalajiza wasenga kwa mndewa Daudi, nakamhilichila kahi migodi ja mbawo jichemigwe mielezi na wawanzi wa kugongomanya vinhu vya mbawo na wawanzi wa kuzenga ng'handa kwa maganga, nawamzenjela Daudi ng'handa ya mndewa. 12 Lelo Daudi nakavizela kota Mkulu Nguluwi nakamuwika nzinzili yawe mndewa wa Isilaeli, kahi undewa wa heye nauditigwa uwe ukulu kwa chiwalo cha Waisilaeli, wanhu wa heye.

13 Mhela Daudi loyochile Hebuloni, nakeholela waha na wache mzidi wa ako mujini Yelusalemu. Wache awo nawampondela wana wenji, walume na wadala. 14 Wano ndo wana wa heye walume wapondigwe na wachewake ako Yelusalemu, Shamuwa na Shobabu na Natani na Solomoni 15 na Ibihali na Elishuwa na Nefegi na Yafiya 16 na Elishama na Eliyada na Elifeleti.

17 Wafilisti lowahuliche kota Daudi nakabakalizwa mafuta leka yawe mndewa wa Isilaeli, weng'ha nawalawa kuluta kumpala, ila heye nakavizela, nakenjila mgati mwa ngome. 18 Wafilisti nawafika na kusambaluka hali ibindi lya Lefaimu. 19 Daudi nakamuuza Mkulu Nguluwi, "Ndaze, ndute kuwatowa Wafilisti? Ndaze, kowawika mmoko mwangu?" Mkulu Nguluwi nakamwidichila Daudi, "Ulute, kwa vila ndowawika Wafilisti mmoko mwako." 20 Lelo Daudi nakafika Baali-pelasimu na kuwasumya Wafilisti, hamba nakalonga, "Kota mazi tendema vyogalinguwifya, Mkulu Nguluwi nakawaditila hihyo wang'honyo wa heni hali heni." Ahyo honhu aho nahachemigwa Baali-pelasimu*. 21 Wafilisti nawajileka jimalukolo ja milungu ja hewo, Daudi na wanhu wa heye nawajihola.

22 Hamba Wafilisti nawafika kahi na kwenela kuli ibindi lya Lefaimu. 23 Daudi loyamlandile Mkulu Nguluwi, Mkulu Nguluwi nakamlonjela, "Uleche kuwatowa kulawa aho houwele, ila uwazungulute na kuwatowa kulawila kumwando mwa migodi ja mifolosadi. 24 Hamba, louhulika lizi kuli vinhembenhembe vya mifolosadi, lizi lya wamizi walingujenda kwa magulu, aho ulute himahima kuwatowa, kwa vila heni Mkulu Nguluwi nandikulongola leka kuwatowa wamizi wa Wafilisti." 25 Daudi nakadita kota vyoyalajizwe na Mkulu Nguluwi, ahyo nakawatowa Wafilisti kulawa Geba mbaka Geseli.