1 Yesu naloyali habehi kwinjila Yelusalemu, nawafika Betifage na Betaniya, habehi na chidunda cha Mizeituni. Yesu nakawalajiza walanguswa wa heye weli, 2 nakawalonjela, "Mlute kuli chijiji chiwele kumwando kwa hemwe. Lomkwinjila amo, molifika idogowi lyana liwohigwe, ling'hali kukola mijito joneche. Mlichumulile mligale. 3 Wone munhu yawauze, lekachoni mwangudita ahyo? Mumlonjele, Mkulu kanguligana, kolihilusa hamba."

4 Baho, nawaluta, nawalifika idogowi lyana limwe liwohigwe hali lwizi. Lowawele wolidohola, 5 wanhu wamwenga wawele hala nawawauza, "Lekachoni mwangulidohola alyo idogowi lyana?" 6 Walanguswa nawawedichila kota vyowalonjelwe na Yesu, nawo nawawaleka nawaluta nalyo. 7 Nawamhilichila Yesu alyo idogowi lyana, nawaliwika goya alyo idogowi kwa mivalo ja hewo naye nakakwina. 8 Wanhu wenji nawawika nguwo za hewo mzila, wanji nawawika miputi ja migodi jowajitemile kuli migunda. 9 Wanhu weng'ha walongole na wawele kumbele nawakwiniza lizi wolonga, "Lutogo! Yatambichizwe ayo yalinguya kwa itagwa lya Mkulu! 10 Utambichizwe Undewa ulinguya wa mhaza wa hetwe Daudi. Yatogoligwe Nguluwi kuchanya kilanga."

11 Yesu nakenjila Yelusalemu nakaluta mbaka kuli Ng'handa ya Nguluwi, nakalola goya chila chinhu. Kwa vila nayali matinazo, nakaluta Betaniya hamwe na wala kumi na weli.

12 Hamitondo, nalowali wolawa Betaniya, Yesu nakona nzala. 13 Lelo nakalyona kwa kutali igodi lya misada liwele na mahamba menji, nakalihejelela habehi leka yalole kota lina mafuza goneche. Loyalifichile, nakalyona lilihela mafuza, ila mahamba yeka, kwa vila hauwele mhela wa kulela mafuza. 14 Baho nakalilonjela lila igodi, "Kwaluchila lehano na mazuwa gose munhu yoneche yaleche kulya mafuza ga hegwe." Walanguswa wa heye nawahulika ulonzi awo.

15 Lelo nawafika Yelusalemu, Yesu nakenjila kuli Ng'handa ya Nguluwi nakaluka kuwawinga wanhu wawele woguza na kugula vinhu amo. Nakakutula vinhu viwele kuli visaga vya wala wawele wovunza sendi na wala wawele woguza ng'hunda. 16 Nahamkundile munhu yoneche kukolela mijito kuli Ng'handa ya Nguluwi yaholile chinhu. 17 Hamba nakawalangusa, "Yandichigwa kuli Maandiko Matakatifu, Nguluwi nakalonga, ‘Ng'handa ya heni yochemigwa ng'handa ya kulandila kwa chiwalo cha nhanzi zeng'ha.’ Ila hemwe muigalula iwa mhalika ya wabokaji!"

18 Watambika wakulu na walangusa wa malajizo ga Musa lowahuliche ago, nawaluka kupala nzila ya kumkopola, ila nawamdumba kwa vila wanhu wenji nawabubuwala na malanguso ga heye. 19 Loliswele, Yesu na walanguswa wa heye nawoka honhu hala.

20 Mitondo kung'hali lufuku, nalowali wokola, nawalyona lila igodi lya mafuza nalikala ng'ong'ona lyeng'ha, mbaka mizabi. 21 Petili nakakumbuchila gala gakoleche, nakamlonjela Yesu, "Mlangusa, ulole lila igodi lya misada lyoulipanjile, vyolikalile."

22 Yesu nakawalonjela, "Muwe na makundo kwa Nguluwi. 23 Ndanguwalonjelani ndikomya, munhu yochilonjela chidunda achi, ‘Ung'humbuche ukagwe kuli bahali,’ ne kona majesa mnhumbula ya heye, ila yokunda kota mbuli zeng'ha zoyolonga zokoleka, koditilwa mbuli ayo. 24 Lelo ndanguwalonjelani, homumlanda chinhu Nguluwi, mkunde kota mchibochela, na hemwe mopegwa. 25 Homumlanda Nguluwi, mumlechele chila munhu yawaditileni vibi, leka Mhaza wa hemwe yawele kilanga yawosele hemwe gehile gomditile." 26 "Ila wone hamlinguwalechela wanji, Mhaza wa hemwe yawele kilanga howolechela gehile ga hemwe gomditile."

27 Lelo nawafika kahi Yelusalemu. Yesu naloyali yojenda kuli Ng'handa ya Nguluwi, watambika wakulu na walangusa wa malajizo ga Musa na wasekulu wamlutila, 28 nawamuuza, "Kwangudita mbuli zino kwa ludali lwachi? Yalikohi yakupele ludali lwa kukola mbuli azi?"

29 Ila Yesu nakawalonjela, "Ndowauzani chinhu chimwe, lomkwidichila, nani kahi ndowalonjelani ndangudita mbuli azi kwa ludali lwachi. 30 Ndaze, ludali lwa Yohani lwa kubatiza nalulawa kilanga ama kwa wanhu? Mnyidichile."

31 Nawaluka kiwuza hewo kwa hewo, wolonga, "Hotulonga, ‘Nalulawa kilanga,’ kotuuza, ‘Lelo lekachoni hamumkundile?’ 32 Ila hotulonga, ‘Nalulawa kwa wanhu.’ " Nawadumba lung'hongola lwa wanhu wamemile kwa vila weng'ha nawakunda kota Yohani nayali mloli wa Nguluwi. 33 Lelo nawamwidichila Yesu, "Hetwe hatuvizelele." Naye Yesu nakawalonjela, "Siwalonjela ndangudita mbuli zino kwa ludali lwachi."