1 Mhela awo, ikugusi lya wanhu wenji naliting'hana kahi, chilyo nachowawele nacho nachimala. Lelo Yesu nakawachema walanguswa wa heye, na kuwalonjela, 2 "Ndanguwonela isungu wanhu kwa vila natikala hamwe kwa mazuwa gadatu, chilyo chowawelenacho nachimala. 3 Wone ndiwalonjele walute kaye ne kulya, wanji wozilika mnzila kwa vila wanji nawalawa kutali ng'hatu."

4 Walanguswa nawamuuza, "Hano twa kisolo, topata kohi chilyo cha kuhega kwa wanhu weng'ha awa?" 5 Yesu nakawauza, "Mwanajo mibumunda jilinga?" Hewo nawamwidichila, "Saba."

6 Yesu nakawalonjela wanhu wekalise hanyi, nakajihola jila mibumunda saba, nakalonga malumbo kwa Nguluwi, nakajimogola, nakawapa walanguswa wawape wanhu, walanguswa nawadita ahyo. 7 Nakwali na tusomba tuchefu, Yesu nakatuhola, nakalonga malumbo kwa Nguluwi, nakawapa walanguswa wawape wanhu walye. 8 Wanhu weng'ha nawalya, naweguta. Nawalokoteza usanyangwa, navimema vidoto saba. 9 Wanhu wadile nawali wanhu elufu zine. Yesu nakawalaga, 10 nakakwina kuli itumbwi hamwe na walanguswa wa heye, nakaluta kuli wilaya ya Dalimanuta.

11 Mafalisayo nawoya kwa Yesu, nawaluka kilewa naye. Nawagana kumjeza Yesu, yawalajile ulajilo kulawa kilanga. 12 Yesu nakesinza mnhumbula, nakalonga, "Lekachoni lulelo alu lwangugana ulajilo? Hebu! Ndanguwalonjela ndikomya! Lulelo alu halupegwa ulajilo woneche wula." 13 Nakawaleka, nakenjila kahi kuli itumbwi, nakaluka majendo kuluta kumwambu mwa ilamba.

14 Walanguswa nawasemwa kigala mibumunda minji kuli itumbwi lyawo, nawahola limwe hela. 15 Yesu nakawalonjela, "Milolele na usaso wa Mafalisayo na usaso wa Helodi." 16 Walanguswa naweuza waliyeka walonga, "Kangulonga hino kwa vila twahela mibumunda" 17 Yesu nakagazela majesa gawo, nakawalonjela, "Lekachoni mwangijesa vyomlihela mibumunda? Ndaze, mng'hali kuvizela? Ndaze, nhumbula za hemwe nazilemwela kuvizela? 18 Ndaze, mna meho na hamlingulola? Mna makutu na hamlinguhulika? Hambe mkumbuche 19 mhela hondiwamogolele mibumunda jihano, kwa wanhu elufu zihano, na mlokoteza vidoto vilinga vya usanyangwa?" Nawedichila, "Kumi na vili." 20 Yesu nakawauza, "Ndaze, londijimogole jila mibumunda saba na kuwapa wanhu elufu zine, namlokoteza vidoto vilinga vya upumunizo?" Wedichila, "Saba." 21 Lelo nakawauza, "Ndaze, mng'hali kuvizela?"

22 Nawoya Betisaida, ako wanhu nawamigala munhu yohambe yalole kwa Yesu na kumlanda yamibate. 23 Yesu nakamibata moko yula munhu, nakaluta naye kutali na hala honhu, nakamtemela mite kumeho, hamba Yesu nakawika moko kumeho kwa heye nakamuuza, "Ndaze, kwangona choni?" 24 Yula munhu nakalola kuchanya na kulonga, "Ena, ndanguwona wanhu wokoneka kota migodi jijenda." 25 Yesu nakahiluchila kuwika moko kumeho kwa munhu yula. Sambi nakagubula ng'hatu meho, meho gake nagahiluka kulola kota katali. Chila chinhu nayali yochona goya. 26 Yesu nakamhilusa kaye kuno yomlonjela, "Uleche kuhiluka kuli chijiji."

27 Yesu na walanguswa wa heye nawaluta kuli vijiji habehi na Kaisalia Filipo. Nalowawele mnzila, Yesu nakawauza walanguswa wa heye, "Mndonjele, wanhu wangulonga heni nda whaani?" 28 Nawamwidichila, "Wanji wangulonga hegwe kwa, Yohani Mbatiza, wanji wangulonga kwa Eliya na wanji kahi wangulonga hegwe kwa yumwe wa waloli wa Nguluwi." 29 Yesu nakawauza, "Na hemwe ndaze, mwangulonga heni nda whaani?" Petili nakedichila, "Hegwe ndo Kilistu Mlohozi yahaguligwe na Nguluwi." 30 Hamba Yesu nakawalemeza, "Mleche kumlonjela munhu kota, heni nda whaani."

31 Hamba Yesu nakaluka kuwalangusa walanguswa wa heye, "Mwana wa munhu koganigwa kugazigwa na kulemigwa na wakulu na watambika wakulu na walangusa wa malajizo ga Musa. Kota kokopoligwa na logopuluta mazuwa gadatu kulawa hoyabagame, kozilipuka." 32 Yesu nakawalonjela mbuli ayi hazelu. Aho, Petili nakamhola hafungo, nakaluka kumng'hanuchila. 33 Ila Yesu nakahinduka, nakawalola walanguswa wa heye, nakamng'hanuchila Petili yolonga, "Uche kwa heni Limazoga! Majesa ga hegwe hagawele ga Chinguluwi ila ndo ga chiwunhu hela."

34 Hamba nakachema ikugusi lya wanhu hamwe na walanguswa wa heye, na kuwalonjela, "Wone munhu yoneche yogana kumbinza heni, imgana yeleme yuye, yahole msalaba wa heye, yambinze. 35 Wone munhu yogana kulohola ukomu wa heye, kowajiliza, ila munhu yalingwajiliza ukomu wa heye, kwa chiwalo cha Mbuli Inojile, koulohola. 36 Ndaze, munhu kowa na choni chinojile wone koihalila isi yeng'ha na kwajiliza ukomu wa heye? Ndita hebu! 37 Kuduhu ne chinhu munhu choyodita leka yauhiluse ukomu wa heye kahi. 38 Wone munhu yoneche kuli lulelo alu lwihile na hambe lumdumbe Nguluwi, yalingumbonela soni heni na malanguso ga heni, na heni Mwana wa munhu ndomonela soni munhu ayo, mhela hoyokuya muli ukulu wa Mhaza wa heye hamwe na wahilisi wa kilanga welile wa Nguluwi."