1 Yesu vyoyawele yolawa kuli Ng'handa ya Nguluwi yumwe wa walanguswa wa heye nakamlonjela, "Mlangusa, ulole ng'handa vyoizenjigwe goya na maganga aga vyoganojile mlukanzi." 2 Yesu nakamlonjela, "Ndaze, kwanguzona ng'handa azi ng'hulu? Kuduhu iganga ne limwe liwele lyopona mchanya mwa liyage, chila chinhu chobomoligwa."

3 Yesu loyawele yekale mchanya mwa chidunda cha Mzeituni yolola kuli Ng'handa ya Nguluwi, Petili na Yakubu na Yohani na Andeleya nawamuuza kwa uviso. 4 Nawamlonjela, "Utulonjele mbuli azi zolawila nili? Ulajilo wachi wotulajila kota mbuli zabehi kulawila?"

5 Yesu nakawalonjela, milolele, mleche kuhadigwa na munhu. 6 Kwa vila wenji wokuya kwa itagwa lya heni, chila yumwe yolonga heye ndo heni. Nawo wowajiliza wanhu wenji. 7 Lomhulika mbuli ya ngondo na uhesi wa ngondo, mleche kisinza. Mbuli azo zolawila, ila kuduma kung'hali. 8 Nhanzi imwe yochitowa na iyage na undewa umwe wochitowa na undewa uyage, ahyo kowa na limachinyina na lufemba. Mbuli azi ndo kota vila usungu wa mwaluko wa mamo kuponda mwana.

9 Ila hemwe milolele. Kwa vila wanhu wowahilika hemwe kuli vitala na kuwatowa kuli masunagogi. Mohilikwa kwa vilongozi na wandewa kwa chiwalo cha heni leka mlavye ulolezi kwa hewo. 10 Ila lokung'hali kufika kuduma Mbuli Inojile yodamligwa kwa wanhu weng'ha. 11 Nawo howowawika hemwe mmoko na kuwahilika kuli chitala, mleche kuwa na lunhwinhwi kwa gala gomlonga, mhela wula houfika, mlonje choneche chompegwa, kwa vila ulonzi womlonga haulawa kwa hemwe ila wolawa kwa Muhe Yelile. 12 Wanhu wowahilika wang'holozawo wakopoligwe, na wahaza wodita hihyo kwa wana wawo. Wana wowabelenhuka wawapondile leka wakopoligwe. 13 Wowazudilani kwa chiwalo cha heni, ila munhu yula yokwimilila mbaka kuduma ndo yoloholigwa.

14 "Lomkona ‘Izudizo lilinguwifya’ limile honhu kuli honhu halilinguganigawa. Yalingusoma yavizele vyoilinguzeleka, aho wawele Yudeya wabilimile kuli vidunda. 15 Yawele kuli chinduwiko cha ng'handa, yaleche kidulika kwinjila mng'handa ya heye kuhola chinhu. 16 Yawele kumgunda yaleche kuhiluka kaye kuhola igwanda lyake. 17 Wochona wa mamo walingonyeza kuli mazuwa ago! 18 Mumlande Nguluwi leka mbuli azo zileche kulawila mhela wa mbeho. 19 Kwa vila mhela awo kowa na kugaya hakunawahika kulawila kwaluchila Nguluwi loyalumbile isi mbaka lehano na hailawila kahi. 20 Wone Mkulu nahawapunguzile mazuwa ago, haduhu munhu yahawele yoloholigwa. Ila kwa chiwalo cha wahaguligwe na Nguluwi, nakagapunguza mazuwa ago.

21 "Lelo munhu hoyowalonjela hemwe, ‘Mlole, Kilistu Mlohozi ka hano,’ ama ‘Mlole ka hala,’ mleche kukunda. 22 Kwa vila wokuya Kilistu wa udesi na waloli wa udesi. Wodita ulajilo na vinduzanduza wojeza kuwajiliza wala wahaguligwe na Nguluwi. 23 Ila hemwe milolele, heni nandiwalonjela mbuli yeng'ha loing'hali kulawila.

24 "Ila kuli mazuwa ago, hokumala kugaya ako, isanya lyowichigwa jiza na nyelezi haibunguzuka. 25 Nhondwe zolagala kulawa kilanga na mong'ho ubatilile vinhu avyo vyeng'ha wotigaswa! 26 Aho wanhu womona Mwana wa munhu yokuya kuli ng'hungugu kwa ludali lwinji na ukulu. 27 Hamba kowalajiza wahilisi wa heye wa kilanga wawakungajize wahaguligwe na Nguluwi kulawa nzingo zeng'ha zine, kulawila kuli isi yeng'ha na kilanga kweng'ha.

28 "Kwa ikuyu milanguse nhelo ayi, hala nhagala lozikwaluka kubahula, mwanguvizela kota mhela wa nhonya wa habehi. 29 Hihyo namwe homkona mbuli azo zangulawila, mvizele kota ka habehi kuya. 30 Ndikomya ndanguwalonjelani, mbuli azi zeng'ha zolawila kung'hali lulelo alu kubagama. 31 Ulanga na isi vyopuluta ila ulonzi wa heni haupuluta.

32 "Ila, kwa mbuli ya zuwa ama saa kuduhu ne yumwe yavizelele kokuya nili ne wahilisi wa kilanga ne Mwana, ila Mhaza yaliyeng'ha ndo yavizelele. 33 Milolele na kikala meho kwa vila hamvizelele mhela awo wokuya nili. 34 Yowa kota munhu yalinguka hakaye na kwinula majendo kuwalechela vitumagwa wa heye ludali, chila yumwe na mijito ja heye, nakamlonjela mwamizi wa lwizi yawe meho. 35 Lelo mikale meho ka vila hamvizelele mkulu wa ng'handa kohiluka nili, hanji yowa matinazo ama nechilo ama lufuku ama mitondo. 36 Milolele leka hoyokuya ne hemwe kuvizela yaleche kuwafika muwasile. 37 Gondilinguwalonjela hemwe, ndanguwalonjela wanhu weng'ha, mikale meho!"