1 Yesu nakaluka kuwalangusa wanhu hafungo mwa ilamba. Wanhu wenji nawammemelela mbaka naimgana yenjile mitumbwi na kikalisa. Wanhu weng'ha nawali wekale musangalaza hafungo mwa ilamba. 2 Nayali yowalangusa menji kwa nhelo, na kuli malanguso ga heye nakawalonjela, 3 "Mhulichize, mnyalaji nakaluta kunyala nyhadikwa. 4 Loyali yonyala nyhadikwa, zinji nazigwa mnzila, videje navyuya navilya. 5 Zinji nazigwa honhu hawele na italawe, hawele hela misanga minji. Nazota himahima kwa vila misanga najali michefu. 6 Isanya lolilawile, nazilakala kwa vila mizabi jake najali mchanya hela, nazikala. 7 Zinji nazigwa hali migodi ja miwa, na jila miwa jikula nazipilinjila zila nyhadikwa nazo hazilelile nyhule. 8 Ila zinji nazigwa hali misanga jinojile, zota zikula zilela imwe mala makumi gadatu, na imwe mala makumi sita na imwe mala miya." 9 Yesu nakawalonjela, "Yawele na makutu ga kuhulika na yahuliche."

10 Yesu vyoyawele yaliyeka, wamwe wa wala wamhuliche nawamlutila hamwe na wala kumi na weli, nawamuuza mbuli ya ayo nhelo. 11 Na heye nakawalonjela, "Hemwe mpegwa kuuzela uviso wa undewa wa Nguluwi, ila wanji wala wawele kunze wolonjelwa chila chinhu kwa nhelo, 12 leka,

" ‘Walole ng'hatu, ila waleche kona.

Wahuliche ng'hatu, ila waleche kuvizela.

Ama wahamhiluchile Nguluwi,

naye yahawosele gehile ga hewo.’ "

13 Hamba Yesu nakawalonjela, "Ndaze, hemwe hamuizelele nhelo ayi? Modita ndaze lelo, kuizela nhelo yoneche yila? 14 Mnyalaji kangunyala ulonzi wa Nguluwi. 15 Wanhu wanji ndo kota zila nyhadikwa zinyaligwe mnzila hawele ulonzi hounyaligwe. Ila bahala du lowohulika, Limazoga lyunguyaga na kusa ulonzi awo unyaligwe mgati mwa hewo. 16 Wanhu wanji ifanda kota nyhadikwa inyaligwe hali italawe. Baho du lowouhulika awo ulonzi, hubochela kwa kusangalala ng'hatu. 17 Ila hambe winjile na kuwa na mizabi mgati mwa hewo, hulutilila kibatilila hado hela, na mhela wa ugayo ama wihe houlawila kwa mbuli ya ulonzi awo, baho wangugozola. 18 Wanhu wanji ndo kota zila nyhadikwa zigwile hali migodi jiwele na miwa. Ahyo ndo kiwhana na wanhu wala walinguhulika awo ulonzi, 19 ila lunhwinhwi lwa isi ino na kunojezwa na lufufu na maya kuwenjila na kuwifyanga ulonzi awo, nawo haulela mafuza. 20 Ila wanji ifanda kota zila nyhadikwa zinyaligwe kuli misanga jinojile. Awa wohulika ulonzi awo, woubochela, wolela mafuza, wanji mala makumi gadatu, na wanji mala makumi sita, na wanji mala miya imwe."

21 Yesu nakalonga kahi, "Ndaze, wanhu wangubwinaga chenje na kigala mng'handa na kugubika na chidoto ama kuwika mlukweme? Hebu! Wanguchiwikaga honhu ha kuwichila chenje. 22 Chila chinhu chivisigwe chowichigwa hazelu na chila chinhu chigubikwe chogubuligwa. 23 Ahyo, yawele na makutu ga kuhulika yahuliche."

24 Nakawalonjela kahi, "Mhulichize goya chomhulika! Chipimilo chichila chomlinguwapimila wanhu wanji ndo chicho Nguluwi kowapimila namwe, kahi mokonjezelwa ng'hatu. 25 Yawele na chinhu kopegwa mzidi, ila yalihela chinhu kosukulwa mbaka chila chido choyalingijesa kota kanacho."

26 Yesu nakalonga, "Undewa wa Nguluwi ufanda kota hino, munhu nakanyala nyhadikwa kumgunda. 27 Nechilo kanguwasa na nemisi kangulola na nyhadikwa zangulutilila kukula, ila heye havizelele chilingukoleka. 28 Misanga jangudita mizuchila kukula na kulela mafuza, mwaluko kuzuka mahamba madeche, hamba liso na mwiso nyhule mgati mwa liso. 29 Aho wone nyhule ipye, munhu ayo kokwaluka kuhilika chimaje kwa vila mhela wa mbena naufika."Munhu yalingubena kwa chimaje cha kubenela

30 Yesu nakawauza, "Tuuwhanize Undewa wa Nguluwi na chinhu chachi? Tudamle kwa nhelo yachi? 31 Ufanda kota hino, munhu nakahola nyhadikwa ya haladali iwele ndodo ng'hatu kusinda zeng'ha na kuinyala mmisanga. 32 Mhela udo hela, yokota na kuwa igodi likulu kusinda migodi jeng'ha kumgunda. Nhagala ziwaga ng'hulu videje vya kuulanga vyuyaga kuzenga vimvulila vyawo mlubehelo lwa nhagala za alyo igodi."

33 Yesu nakawadamlila usenga wa heye kwa nhelo nyinji, nakadamla na hewo kota vila vyowawezile kuhulika. 34 Yesu halonjile choneche na hewo ne kuwika nhelo, ila loyawele na walanguswa wa heye nakawatang'hulila chila chinhu.

35 Vyoliswele, zuwa lilyo Yesu nakawalonjela walanguswa wa heye, "Tuloche kumwambu mwa ilamba." 36 Lelo nawawaleka wanhu wamemile, walanguswa nawenjila amo kuli itumbwi, nakwali na mitumbwi jinji aho. 37 Baho du nakwali na mbeho, na kutiguka kwa mazi kuli ilamba, itumbwi nalyaluka kumema mazi.Itumbwi kuli nhigu ya ilamba 38 Yesu nakawasa yawichile mutwi mchegamo, wala walanguswa nawamwinula nawamlonjela, "Mlangusa, ndaze, hambe wijese kota twangudumigwa?" 39 Lelo nakenuka nakaing'hanuchila yila mbeho na kuilonjela nhigu "Nyamalile! Usindamale!" Baho mbeho naileka kuputa, nakwali tulu. 40 Yesu nakawalonjela awala walanguswa wa heye, "Lekachoni mwangudumba? Ndaze, mng'hali hela makundo?" 41 Na hewo nawadumba heko walonga, "Ayu munhu wachi lelo, mbaka nhigu na mbeho vyangumuhulichiza?"