1 Ŋina n nyina Yesu Kirisito, Ɩsʋɔ Bu* wʋŋ wʋsɛ wɩɛ abama dɩ faratɩŋ.

2 Ɩsʋɔ ɔja Yisaya chɩŋkpɩɛ sabɩɛ Ɩsʋɔ wɩɛ si sɛ,

<<Maa kpiri ma gabʋɔ pala nya asanaŋ

na wʋ a desina gbɩɛ si fa nyaŋ.>>✝

3 Lofu garɛ a kuusi ifuli dʋɔ sɛ,

<<Desina gbɩɛ si fa Kpaŋjuo wʋŋ,

na ɩ chirigi gbɩɛ fa ɩ.>>✝

4 Dɩmʋŋ dʋɔ sɛ Yohane Ɩsʋɔ Sɔrɛ kɔŋ ifuli dʋɔ wʋ a gaa sɔ bakpa Ɩsʋɔ sɔ, sɛ wʋ jɔ Ɩsʋɔ wɩɛ dawuta sɛ, <<N biliŋi lɩɩ amɩɛ dɩsʋbʋ naŋ na ɩ kɔŋ Ɩsʋɔ jaŋ na maa sɔ amɩɛ Ɩsʋɔ sɔ, na wʋ a mʋ amɩɛ dɩsʋbʋ chɩɛ amɩɛ.>> 5 Bakpa lɩɩ Yudiya tibi dʋɔ na Yerusalem dɩɛ naŋ kɔŋ wʋ jaŋ baa gaa nyii wʋ wɩɛ. Gʋ ba kɔnɛ na ba tawɩ ba dɩsʋbʋ sɛ wʋ sɔ ba Ɩsʋɔ sɔ Yodaŋ buo naŋ. 6 Yohane gagba gaa wʋ cha wʋ fuona na, nyɔma fʋŋda sɛ ba mʋ lʋ ga, wʋ cha mʋ nam tanɛ tɩŋa naŋ ganya pɔgʋ wʋ tɩŋa naŋ. Wʋ adiya ŋii wʋ a di na yɩɛ aforo na tɩbʋɔ lɩŋ. 7 Wʋ tawɩ bakpa baa sɛ, <<Wʋŋ wʋ a kɔŋ ma wʋrʋgbɩɛ na yɩɛ wʋ janɛ kii maŋ, ma n daga na maa luuŋ buoli wʋ asibita ganyasɛ ɛ. 8 Maŋ bɩrɛ, maa mʋ lɩŋ sɔ amɩɛ Ɩsʋɔ sɔ, ama wʋŋ bɩrɛ Ɩsʋɔ Feliŋ sɛ wʋ a mʋ sɔ amɩɛ.>>

9 Saŋa gaa Yohane a sɔ bakpa Ɩsʋɔ sɔ na, Yesu lɩɩ Nasarati gaa ga wɩɛ Galaliya tibi dʋɔ kɔŋ sɛ wʋ n sɔ ɩ Ɩsʋɔ sɔ Yodaŋ buo naŋ. 10 Gʋ Yesu a lɩɩ lɩŋ naŋ na, kɩɛ gabʋanaŋ, sɛ Ɩsʋɔ adugbe fulu sɛ wʋ na gʋ Ɩsʋɔ Feliŋ tibi a kɔŋ wʋ dʋɔ takɩɛ juori gakuo na 11 sɛ lofu lɩɩ Ɩsʋɔ adugbe kɔŋ sɛ, <<Nyaŋ n nyina Mabu wʋŋ maa ja n wɩɛ, ma asa su n dʋɔ.>>

12 Gabʋanaŋ sɛ Ɩsʋɔ Feliŋ ŋii mʋ ɩ ju ifuli dʋɔ. 13 Dɩmaŋ sɛ wʋ cha wɩɛ ŋɩla (40) sɛ Sɩtanɩ gaa yɩɛ ɩ lɔ tɩba. Diele gaa wʋ wɩɛ na kasɛ naŋ namɩɛ wɩɛ dɩmaŋ sɛ Ɩsʋɔ gabʋɔsɛ kɔŋ gaa kɩɛ wʋ dʋɔ.

14 Yohane danɛ tʋɔ wʋrɩgbɩɛ na, Yesu ju Galaliya tibi dʋɔ ga tawɩ Ɩsʋɔ Wɩɛ Abama ŋii. 15 Wʋ tawɩ sɛ, <<Saŋa gaa kɔnɛ, Ɩsʋɔ juori gaa tirina. N biliŋi lɩɩ amɩɛ dɩsʋbʋ naŋ na ɩ lɩɛ Ɩsʋɔ Wɩɛ Abama ŋii di.>>

16 Gʋ Yesu cha wʋ dɔŋ Galaliya lɩɩ nʋɔ na, wʋ na aji chamara bala, Simoŋ na wʋ nabu Andurusi baa alɔ disawu. 17 Sɛ Yesu tawɩ ba sɛ, <<N kɔŋ gaa kpaŋ maŋ na maa kalaa amɩɛ na ɩ lɩsɛ bakpa fa Ɩsʋɔ.>> 18 Gabʋanaŋ sɛ ba yela ba asawu si sɛ ba kpaŋ ɩ.

19 Gʋ Yesu ju asanaŋ chonii na wʋ ti na Sebedi bie bala, Jamesi na wʋ nabu Yohane wɩɛ buori naŋ baa desina ba asawu. 20 Gabʋanaŋ sɛ Yesu yagɛ ba, sɛ ba yela ba juo Sebedi na paa dira baa buori gaa naŋ sɛ ba kpaŋ Yesu.

21 Yesu na wʋ kpalɛnara kɔŋ Kapeniyum dɩɛ naŋ. Gʋ Fɩɛsɛ wɩɩ talɛ na, Yesu ju Yudatina tʋm danɛ naŋ ga kalaa Ɩsʋɔ wɩɛ. 22 Bakpa baa nyii wʋ kalaa ŋii na dɩ yɩɛ ba doba. Akala takɩɛ, wʋ kalaa-kalaa ba takɩɛ wʋkpa wʋŋ wʋ wɩɛna yikuo na, ama naa takɩɛ mbara bakalaasa a, 23 Dɩmaŋ gana na, baalɛ wʋrʋ feliŋ sʋbʋ wɩɛ wʋ tɩba wʋ wɩɛ Yudatina tʋm danɛ gaa naŋ sɛ wʋ kuusi sɛ, 24 <<Nyaŋ, Yesu Nasarati wʋkpa, be sɛ nyaa ja daa jaŋ? Nya kɔŋ na nyaa warɩɛ daa bɛ? Ma jiŋ wʋkpa wʋŋ nya yɩɛ na. Nya yɩɛ wʋŋ wʋ yɩɛ dɩchɩrɩchɩrɩ wʋŋ wʋ lɩɩ Ɩsʋɔ jaŋ na bɛ.>>

25 Yesu fuba feliŋ sʋbʋ wʋŋ dʋɔ sɛ, <<Fu n nʋɔ dʋɔ na nyaa lɩɩ baalɛ wʋŋ tɩba.>> 26 Feliŋ sʋbʋ wʋŋ jigisi baalɛ wʋŋ sɛ wʋ kuusi na doŋ sɛ wʋ lɩɩ wʋ tɩba.

27 Bakpa baa kpiniŋ na dɩmʋŋ na, ba wʋsɛ yɔgɔsɛ ba. Sɛ ba fara baa tasɛ dɔŋa sɛ, <<Kalaa afɔlɩɛ amʋɔ mɩnaŋ sɛ yikuo wɩɛ tɩba nna? Baalɛ wina a fuba feliŋ basʋbʋɛ dʋɔ sɛ baa nyii wʋ jaŋ.>> 28 Dɩ lɩɩ takɩɛ Yesu wʋsɛ dʋɔ wɩɛ ŋii nyii Galaliya tibi dʋɔ gapɩlɛkʋma.

29 Gʋ Yesu na wʋ kpalɛnara baa lɩɩ Yudatina tʋm danɛ gaa naŋ na, ba ju Simoŋ na Andurusi waa dʋɔ na Jamesi na Yohane kpi ba dʋɔ. 30 Gʋ ba tala dɩmaŋ na, Simoŋ awu a kili gibirima wʋ duwei waa dʋɔ. Dɩmaŋ sɛ ba tawɩ Yesu. 31 Wʋ ju wʋ jaŋ sɛ wʋ chaŋ wʋ pam sɛ wʋ chɔna ɩ sɛ wʋ kʋlʋ. Dɩmaŋ gana sɛ gibirima gaa yela ɩ sɛ wʋ kʋlʋ fa ba adiya.

32 Bʋyanɔ gʋ wiita a ju wʋ a ga sala na, bakpa mʋ lʋmɩɛtina kpiniŋ na baa feliŋ sʋbʋ wɩɛ ba tɩba na kɔŋ Yesu jaŋ. 33 Kapeniyumtina galaga gaa sila waa gaa asanaŋ. 34 Yesu chɔ bakpa fɔɩ baa baa kili lʋmɩɛ ngoriŋ-ngoriŋ na. Sɛ wʋ ti geŋ feliŋ sʋbʋ lɩɩ bakpa tɩba. Ama wʋ n kpa na feliŋ sʋbʋ wʋŋ a tawɩ ɩ, dɩ lɩɩ takɩɛ ba jiŋ wʋkpa wʋŋ wʋ yɩɛ na.

35 Tafɩlɛ garɛ, Yesu kʋlʋ lɩɩ waa dʋɔ ju diele gaa galaŋba taŋ na, na wʋ a ga jɔ dɩga. 36 Na Simoŋ na wʋ dɔŋa ju baa ja ɩ. 37 Gʋ ba na ɩ na, ba tawɩ ɩ sɛ, <<Wʋkʋma wina aja nyaŋ.>>

38 Sɛ Yesu lɩsɛ nʋɔ sɛ, <<N yela dɩ ju dɩɛsɛ bisi ŋii ŋɩ tirina daa na naŋ na dɩ ga tawɩ Ɩsʋɔ Wɩɛ Abama fa baa gba, akala takɩɛ, dɩmʋŋ dʋɔ sɛ ma kɔnɛ.>> 39 Dɩmʋŋ dʋɔ, wʋ ju Galaliya tibi dʋɔ gapɩlɛkʋma ga tawɩ Ɩsʋɔ Wɩɛ Abama Yudatina tʋm danɛ naŋ sɛ wʋ geŋ feliŋ sʋbʋ lɩɩ bakpa naŋ.

40 Baalɛ wʋrʋ wʋŋ wʋ a kili gɩchalaŋa* kɔŋ Yesu jaŋ, wʋ luuŋ wʋ dʋna dʋɔ wʋ asanaŋ sʋlʋ ɩ sɛ, <<Nyaa jawʋ na, nyaa dɩlɛ chɔ maŋ.>>

41 Sɛ lʋmtɛ wʋŋ wɩɛ yɩɛ Yesu gɩyɔŋ, sɛ wʋ tɩɛŋɩ wʋ pam jaga wʋ dʋɔ tawɩ sɛ, <<Maa jawʋ, n wʋsɛ n yɩɛ dɩchɩrɩchɩrɩ.>> 42 Gabʋanaŋ sɛ gɩchalaŋa gaa lam sɛ wʋ yu lʋm chʋɔ.

43 Sɛ Yesu tawɩ ɩ sɛ wʋŋ pala sɛ wʋ jɔ wʋ nyinaŋ sɛ, 44 <<Nyaŋ, kɩɛ na dieli na nya n baa tawɩ wʋrʋ. Ama mʋ n wʋsɛ ju ga kalaa Ɩsʋɔ sei, na nyaa diesi gadiesa ganaŋkʋ Mosesi mbara akala na, na ŋii di seriya takɩɛ nya yu lʋm chʋɔ.>> 45 Ama baalɛ wʋŋ lɩɩ dɩmaŋ na, wʋ n fu wʋ nʋɔ dʋɔ ɔ sɛ wʋ tawɩ yalagi ŋii Yesu yɩɛ na kpiniŋ fa bakpa. Dɩmʋŋ dʋɔ, Yesu n ti dɩlɛ jʋʋ dɩɛ garɛ naŋ na bakpa a na ɩ ɩ. Dɩmʋŋ dʋɔ, wʋ ga cha diele galamba taŋ na. Ama bakpa saŋ baa lɩɩ akpie dʋɔ baa kɔŋ wʋ jaŋ.