Luka 20

Yesu yikuo dʋɔ wɩɛ tasɛ

1 Gɩyɩɛ gʋrʋ, Yesu cha wʋ wɩɛ Ɩsʋɔ tʋm danɛ naŋ wʋ a kalaa Ɩsʋɔ wɩɛ yela wʋ a tawɩ Ɩsʋɔ Wɩɛ Abama ŋii. Sɛ Ɩsʋɔ sei Bɩnɩɛ, Mosesi mbara bakalaasa na dɩɛ bɩnɩɛ kɔŋ wʋ jaŋ. 2 Sɛ ba tasɛ ɩ sɛ, <<Tawɩ daa, yikuo gamʋɔ sɛ nya wɩɛna sɛ nyaa yɩɛ abʋrɩ ŋina? Mmʋɔ n fa nyaŋ dɩmʋŋ yikuo gana?>>

3 Sɛ Yesu lɩsɛ ba nʋɔ sɛ, <<Maŋ gba maa tasɛ amɩɛ wɩɛ a dʋŋdʋlʋŋ. N tawɩ maŋ, 4 Yohane Ɩsʋɔ Sɔrɛ wʋŋ Ɩsʋɔ sɔ lɩɩ Ɩsʋɔ bɛ yaa wʋkpa?>> 5 Sɛ ba tawɩ ba nyiŋeŋ-nyiŋeŋ sɛ, <<Dɩ lɩsɛ nʋɔ sɛ ŋɩ lɩɩ Ɩsʋɔ na, wʋ a tasɛ daa sɛ be n yɩɛ sɛ dɩ n lɩɛ Yohane Ɩsʋɔ Sɔrɛ wʋŋ di? 6 Ama sɛ dɩ lɩsɛ nʋɔ sɛ ŋɩ lɩɩ bakpa na, bakpa baa kpiniŋ aja lɔ bʋɛ kʋ daa, akala takɩɛ ba lɩɛ di gʋ Yohane cha wʋ yɩɛ Ɩsʋɔ ɔja bɛ.>>

7 Dɩmʋŋ dʋɔ, ba lɩsɛ ɩ nʋɔ sɛ, <<Dɩ ba jiŋ diele gaa ga lɩɩ na a.>>

8 Sɛ Yesu tawɩ ba sɛ, <<Maŋ gba, maa tawɩ amɩɛ yikuo gaa maa mʋ maa yɩɛ ŋina kpiniŋ na a.>>

Fʋɔ kɩɛra barɛ dʋɔ diduu

9 Sɛ Yesu ju dʋɔ jɔ bakpa bana diduu sɛ, <<Baalɛ wʋrʋ n cha fara girepi fʋɔ sɛ wʋ mʋ dʋ kɩɛra barɛ pamɩɛ naŋ. Sɛ wʋ ju gbɩɛ ga taŋgɩlɛ. 10 Gʋ girepi bie karɩŋ saŋa talɛ na, sɛ girepi fʋɔtɛ wʋŋ kpiri wʋ tʋmɩrɛ fʋɔ kɩɛra baa jaŋ sɛ wʋ n ju ga lɩɛ wʋ teri kɔna ɩ. Ama fʋɔ kɩɛra baa tugu ɩ sɛ ba gɩŋ ɩ bɔsɩna pamɩɛ kpaŋ. 11 Sɛ girepi fʋɔtɛ wʋŋ ti kpiri tʋmɩrɛ wʋfɔlɛ. Wʋŋ gba, ba tugu ɩ sɛ ba du ɩ asaju sɛ ba gɩŋ ɩ bɔsɩna pamɩɛ kpaŋ. 12 Sɛ wʋ ti kpiri batoro-tɛ sɛ wʋŋ gba ba tugu laragi ɩ sɛ ba gɩŋ ɩ lɩɩ fʋɔ gaa naŋ.>>

13 Sɛ girepi fʋɔtɛ wʋŋ tawɩ sɛ, <<Be sɛ maa yɩɛ? Maa kpiri ma tɩŋtɩŋ mabu baalɛ jaŋ wʋŋ maa ja wʋ wɩɛ, akʋtɔfɩɛ wʋŋ bɩrɛ, baa bu ɩ.>>

14 Sɛ wʋ ju dʋɔ tawɩ sɛ, <<Ama fʋɔ kɩɛra baa tawɩ dɔŋa sɛ wina n nyina gapatɩɛ diiri wʋŋ. N kɔŋ na dɩ kʋ ɩ na gapatɩɛ gaa a yɩɛ daa teri.>> 15 Dɩmʋŋ dʋɔ, ba fɔŋɩ ɩ lɩɩ girepi fʋɔ gaa naŋ sɛ ba kʋ ɩ. Sɛ Yesu tasɛ sɛ, <<Be sɛ fʋɔtɛ wʋŋ aja wʋ a yɩɛ fʋɔ kɩɛra baa? 16 Wʋ a kɔŋ gaa kʋ fʋɔ kɩɛra baa na wʋ a mʋ fʋɔ gaa dʋ kɩɛra ba fɔlɩɛ pamɩɛ naŋ.>>

17 Sɛ Yesu kɩɛ ba sɛ wʋ tasɛ ba sɛ dɩmʋŋ bɩrɛ, sɩnɛ sɛ ɩ nyii wɩɛ ŋii ba sabɩɛ Sabɩɛwɩɛ ŋii naŋ sɛ ŋii tawɩ sɛ,

<<<Bʋɩ gaa danɛ mara pɩɛ ga na,

gaa aaŋ ja gaa chaŋ danɛ gaa dɩkɔŋ naŋ na doŋ.>✝20:17 Num 118:22.

18 Wʋkʋma wʋŋ wʋ sala bʋɩ gaa dʋɔ na, gaa karɩɛ-karɩɛ ɩ aguŋda-aguŋda. Sɛ wʋkʋma wʋŋ bʋɩ gaa sala wʋ dʋɔ na, gaa patɩɛ ɩ.>>

Lampo tɔ dʋɔ wɩɛ tasɛ

19 Sɛ Mosesi mbara bakalaasa na sei bɩnɩɛ baa ja gbɩɛ gaa baa mʋna dʋɔ na baa chaŋ ɩ dɩmaŋ gana, akala takɩɛ ba jiŋ gʋ wʋ jɔ diduu baŋ ba. Ama baa se bakpa baa.

20 Sɛ ba fara baa kɩɛ Yesu na dieli. Dɩmʋŋ dʋɔ ba kpiri pɩɛtɩra baa ba yɩɛ ba wʋsɛ takɩɛ ba yɩɛ bachirigisa na, sɛ ba n ga yii ɩ gʋdʋ ganaŋkʋ baa yu wʋ nʋɔ naŋ wɩɛ na baa chaŋ ɩ mʋ dʋ Romatina tibi kɩɛrɛ wʋŋ pamɩɛ naŋ. 21 Dɩmʋŋ dʋɔ, pɩɛtɩra baa tasɛ ɩ sɛ, <<Wʋkalaasa, dɩ jiŋ gʋ nyaa tawɩ sɛ nyaa kalaa ŋii ŋɩ wɩɛ dieli sɛ nyaa tɔɔsɩ tɩba a, ama nyaŋ bɩrɛ, nyaa kalaa Ɩsʋɔ wɩɛ ŋii ŋɩ yɩɛ gasiŋteŋ ŋɩ gbɩɛ dʋɔ. 22 Tawɩ daa, Mosesi mbara fa gbɩɛ sɛ dɩ n tɔ lampo fa Kayisa yaa dɩ n baa tɔ?>>

23 Ama Yesu jiŋ gʋ baa ja baa yii ɩ gʋdʋ, wʋ tawɩ ba sɛ, 24 <<N mʋ diterembi dinari garɛ kɔna maŋ na maa kɩɛ.>> Sɛ ba mʋ kɔna ɩ sɛ wʋ tasɛ ba sɛ, <<Mmʋɔ nyi na wʋ yɩrɛ n jaga na ga dʋɔ?>> 25 Sɛ ba lɩsɛ nʋɔ sɛ, <<Juo Kayisa teri.>> Sɛ Yesu tawɩ ba sɛ, <<Dɩmʋŋ bɩrɛ, n mʋ ŋii ŋɩ yɩɛ Juo Kayisa teri na fa Juo Kayisa na ɩ mʋ ŋii ŋɩ yɩɛ Ɩsʋɔ teri na fa Ɩsʋɔ.>>

26 Pɩɛtɩra baa n dɩlɛ yu wɩɛ ŋarɛ sɩŋ dʋɔ chaŋ ɩ lɩɩ ŋii wʋ tawɩ na bakpa baa tɩba dɩmaŋ ŋ. Gʋ wʋ lɩsɛ ba nʋɔ na, dɩ yɩɛ ba doba sɛ ba fu ba nʋɔsɛ dʋɔ.

Feŋ lɩɩ sɩŋ naŋ dʋɔ wɩɛ tasɛ

27 Sɛ Sadukitina baa baa lɩɛ baa di sɛ feŋ lɩɩ sɩŋ naŋ wɩɛ na barɛ kɔŋ Yesu jaŋ gaa tasɛ ɩ sɛ, 28 <<Wʋkalaasa, Mosesi mbara ŋii naŋ na, wʋ sabɩɛ fa daa Yudatina sɛ, baalɛ sɩŋ yela wʋ alʋ sɛ ba n lʋrʋ na, ŋɩ tiri gʋ wʋnabu n saa okulapu wʋŋ na wʋ a lʋrʋ bie fa wʋ ŋmɩɛtɩ wʋŋ wʋ sɩŋ na. 29 Juo lʋrʋbie baala jaŋ lɩkaarɛ barɛ n cha ba wɩɛna. Sɛ ba tɩba bɩnɛ jaŋ wʋŋ saa alʋ, wʋ n lʋrʋ ʋ sɛ wʋ sɩŋ. 30 Wʋnabu balatɛ saa okulapu wʋŋ. Wʋŋ dʋɔ, wʋ n lʋrʋ ʋ sɛ wʋ sɩŋ. 31 Dɩmʋŋ sɛ dɩ mɩɛna batoro-tɛ wʋŋ. Baala lɩkaarɛ baa kpiniŋ saa alʋ wʋŋ ama ba n lʋrʋ ʋ sɛ ba sɩŋ. 32 Wʋrʋgbɩɛ na, sɛ alʋ wʋŋ gba sɩŋ. 33 Dɩmʋŋ dʋɔ, feŋ lɩɩ sɩŋ naŋ wɩɩ na, ba tɩba Mmʋɔ alʋ n nyina alʋ wʋŋ?>> Akala takɩɛ juo lʋrʋbie lɩkaarɛ baa kpiniŋ saa ɩ.

34 Sɛ Yesu lɩsɛ ba nʋɔ sɛ, <<Dulunya gana naŋ bɩrɛ, bakpa a saa 35 Ama baa ba daga baa cha dulunya gaa gaa kɔŋ na naŋ, na Ɩsʋɔ a feŋsi ba feŋ lɩɩ sɩŋ naŋ na, baa saa a, 36 sɛ baa ti sɩŋ ŋ, akala takɩɛ baa kɩɛna bɛ takɩɛ Ɩsʋɔ gabʋɔsɛ na. Baa yɩɛ Ɩsʋɔ bie bɛ, akala takɩɛ ba feŋ lɩɩ sɩŋ naŋ bɛ. 37 Dɩtɩɛna, lɩɩna atatina feŋ lɩɩ sɩŋ naŋ na, ɩŋ karaŋ Mosesi tanɛ naŋ ganaŋkʋ bʋala a chaŋ dɩpʋnfa naa? Dɩmaŋ sɛ Ɩsʋɔ tawɩ Mosesi sɛ, <Maŋ n nyina Abiraham Ɩsʋɔ, Isaki Ɩsʋɔ na Yakubu Ɩsʋɔ.> 38 Wʋ ba yɩɛ atatina Ɩsʋɔ ɔ, ama wʋ yɩɛ bakpa ba kɩɛnasa Ɩsʋɔ bɛ, akala takɩɛ Ɩsʋɔ jaŋ na, ba kpiniŋ ba chaɩ nkpa naŋ bɛ.>>

39 Sɛ Mosesi mbara bakalaasa baa barɛ tawɩ sɛ, <<Wʋkalaasa, n lɩsɛ nʋɔ na dieli.>> 40 Ganaŋkʋ Yesu lɩsɛ nʋɔ na dʋɔ, wʋrʋ n ti dɩlɛ yu digela tasɛ ɩ wɩɛ ŋarɛ ɛ.

Kirisito dʋɔ wɩɛ tasɛ

41 Sɛ Yesu tasɛ ba sɛ, <<Be dʋɔ ɩ tawɩ sɛ Kirisito*20:41 Kirisito tie akala sɛ nkpalɩɛrɛ. Girikitina a yagɛ sɛ Kirisito sɛ Yudatina a yagɛ sɛ Mesaya wʋŋ yɩɛ Dawidi ganana bie? 42 Sɛ Dawidi tɩŋtɩŋ tawɩ Kirisito wʋsɛ dʋɔ wɩɛ Numba tanɛ naŋ sɛ,

<<Ɩsʋɔ wʋŋ tawɩ ma Kpaŋjuo sɛ,

cha ma pam jɩsaŋ dʋɔ

43 ga tala gʋ maa mʋ n badʋŋna mʋ yɩɛ n nafara dɩjagatɩŋ.>>✝20:43 Num 110:1.

44 Dawidi tɩŋtɩŋ a yagɛ Kirisito sɛ, <<Kpaŋjuo. Dɩmʋŋ dʋɔ, sɩnɛ sɛ Kirisito wʋŋ a ti dɩlɛ yɩɛ Dawidi ganana bie?>>

N kɩɛ na dieli mbara bakalaasa baa dʋɔ

45 Gʋ bakpa baa kpiniŋ kaŋ dɩlɛ baa nyii Yesu wɩɛ na, wʋ tawɩ wʋ kpalɛnara baa sɛ, 46 <<N kɩɛ amɩɛ wʋsɛ dʋɔ mbara bakalaasa baa dʋɔ. Baa fu gagbasɛ ajalɩŋtina ba dɔŋ ba dɔŋ, na bakpa a luuŋ yɩlɩ ba gɩyɩɛnɩŋ naŋ. Baa ja achaatɩŋ ajanɩɛ Yudatina tʋm danɛ naŋ, na achaatɩŋ ŋii ŋɩ wɩɛ jilima na asadi adiya di tie. 47 Baa mʋna kpiŋjim gbɩɛ dʋɔ baa lɩɛ bakʋlapʋna gapatɩɛ. Baa jɔ dɩga jalɩŋtɛ takɩɛ ba yɩɛ bakpa ba bama. Dɩmʋŋ dʋɔ, Ɩsʋɔ aja fɔŋɩ dɩmʋŋ bakpa bana dɩlɛ fɔɩ.>>