1 Saŋa gana naŋ na, jama baa gaa jaŋi Yesu jaŋ, ba bɔla hali baa chicha dɔŋa dʋɔ. Sɛ Yesu fara wʋ a tawɩ wʋ kpalɛnara baa sɛ, <<N kɩɛ amɩɛ wʋsɛ dʋɔ na dieli lɩɩ Farasitina yiisi ŋii ŋɩ yɩɛ aluguusi na dʋɔ. 2 Bʋrʋkʋma gaa ba fu ga dʋɔ na, gaa fulu dʋɔ na baa na. Dɩmʋŋ sɛ wɩɛ ŋii ŋɩ wɩsaɩ na, aja lɩɩ na baa na. 3 Wɩɛ kʋma ŋii ɩ tawɩ gɩbɩrɩ naŋ na, ŋii lɩɩ ifuli. Wɩɛ ŋii baa muni dʋ amɩɛ dɩlɛ naŋ danɛ lori naŋ na, baa jɔ ŋɩ dʋɔ dawuta.>>

4 Sɛ Yesu ju dʋɔ tawɩ sɛ, <<Ma dɩɛtina, maa tawɩ amɩɛ sɛ, n baa se baa baa kʋ wʋsɛ nanɛ gaa, wʋrʋgbɩɛ na baa ti dɩlɛ yɩɛ bʋrʋ ʋ. 5 Ama maa kalaa amɩɛ wʋŋ n se ɩ na. N se wʋŋ wʋ kʋ wʋsɛ nanɛ taŋ na, wʋ wɩɛna yikuo wʋ a dɩlɛ lɔ amɩɛ dʋ awʋrʋfʋɔ bʋala naŋ. Maa tawɩ amɩɛ wʋŋ sɛ n se. 6 Naa kpaŋnyɔ ala sɛ baa mʋ lɩɛ tʋra jimbisi banʋŋ? Ama Ɩsʋɔ n solo ba wʋrʋ dʋɔ ɔ. 7 Ama amɩɛ bɩrɛ, wʋ jiŋ amɩɛ nyi nyʋɔsɛ kpiniŋ nʋɔ. Dɩmʋŋ dʋɔ n baa se nyɩŋtɩɛ, akala takɩɛ ɩ yɩɛ ba kpari kii tʋra jimbisi fɔɩ.>>

8 Sɛ Yesu tawɩ sɛ, <<Maa tawɩ amɩɛ sɛ, wʋkʋma wʋŋ wʋ a tawɩ bakpa asanaŋ sɛ wʋ yɩɛ ma wʋrʋgbɩɛtɛ na, Wʋkpa Bu wʋŋ gba wʋ a lɩsɛ tawɩ sɛ wʋ yɩɛ ma wʋrʋgbɩɛtɛ Ɩsʋɔ gabʋɔsɛ asanaŋ. 9 Ama wʋkʋma wʋŋ wʋ pɩɛ maŋ bakpa asanaŋ na, maŋ gba, maa pɩɛ ɩ Ɩsʋɔ gabʋɔsɛ asanaŋ. 10 Wʋkʋma wʋŋ wʋ a tawɩ wɩɛ baŋ Wʋkpa Bu wʋŋ na, Ɩsʋɔ aja mʋ chɩɛ ɩ. Ama wʋkʋma wʋŋ wʋ a tawɩ mbusu wɩɛ baŋ Ɩsʋɔ Feliŋ na bɩrɛ, wʋ aa mʋ chɩɛ ɩ.>>

11 Sɛ Yesu ju dʋɔ tawɩ sɛ, <<Ba chaŋ amɩɛ kɔŋ Yudatina tʋm danɛ naŋ gaa sɩŋ juoneŋ na dɩɛ bɩnɩɛ baa ba wɩɛna yikuo sɛ ba n di amɩɛ wɩɛ na, n baa nyala amɩɛ wʋsɛ ŋii ɩ tawɩ lɩɛ amɩɛ wʋsɛ na yaa ŋii ɩ tawɩ na dʋɔ. 12 Akala takɩɛ saŋa gana naŋ, Ɩsʋɔ Feliŋ aja kalaa amɩɛ ŋii n tawɩ na.>>

13 Wʋrʋ lɩɩ jama baa naŋ tawɩ Yesu sɛ, <<Wʋkalaasa, tawɩ ma ŋmɩɛtɩ na dɩ kpara daa juo gapatɩɛ.>>

14 Sɛ Yesu lɩsɛ ɩ nʋɔ sɛ, <<Ma dɩɛtɛ, n Mmʋɔ n lɩsɛ maŋ wɩɛ diri yaa gapatɩɛ kparɩdɛ?>> 15 Sɛ wʋ tawɩ ɩ sɛ, <<N kɩɛ na dieli na ɩ duo amɩɛ wʋsɛ dʋɔ na dieli lɩɩna dɩsɛchɩbɛ sʋbʋ dʋɔ, akala takɩɛ na akpaŋta fɔɩ ŋii wʋkpa wɩɛna na, aaŋ ja fa ɩ nkpa a.>>

16 Sɛ Yesu jɔ ba diduu sɛ, <<Baalɛ aterembie-tɛ wʋrʋ n cha wʋ wɩɛna. Wʋ wɩɛna tibi bam gaa gaa yɩɛ adiya na dieli. 17 Sɛ wʋ tawɩ wʋ nyinaŋ sɛ be sɛ maa yɩɛ? Akala takɩɛ gbɩɛ taŋ ma dichonkon naŋ na maa ti mʋ ma adiya dʋ ʋ.>>

18 Sɛ wʋ tawɩ sɛ, <<N na sɛ maa yɩɛ. Maa warɩɛ ma dichonkon na maa baŋ gajanɛ. Dɩmaŋ sɛ maa si ma adiya na ma akpaŋta kpiniŋ.>> 19 Sɛ wʋ tawɩ wʋ wʋsɛ sɛ, <<Ma si akpaŋta fɔɩ ŋii tala maŋ bɩŋsɛ-bɩŋsɛ. Dɩmʋŋ dʋɔ ma sʋbʋ fɩɛsɛ, di, nyʋɔ na nyaa lɩɛ nya asa.>>

20 Ama Ɩsʋɔ tawɩ ɩ sɛ, <<Nyaŋ wʋmalaŋpʋ! Yuluma gana maa lɩɛ nya nkpa lɩɩ n pamɩɛ naŋ. Abʋrɩ ŋii n ja si n wʋsɛ na aja yɩɛ Mmʋɔ teri?>>

21 Sɛ Yesu tawɩ ba sɛ, <<Dɩmʋŋ sɛ aja yɩɛ fa wʋkʋma wʋŋ wʋ a kʋla akpaŋta si fa wʋ wʋsɛ, ama Ɩsʋɔ asa dʋɔ bɩrɛ, wʋ ba yɩɛ akpaŋtatɛ ɛ.>>

22 Sɛ Yesu tawɩ wʋ kpalɛnara baa sɛ, <<Dɩmʋŋ dʋɔ, maa tawɩ amɩɛ sɛ n baa nyala amɩɛ wʋsɛ amɩɛ nkpa dʋɔ bʋrʋ gaa ɩ di yaa amɩɛ wʋsɛ ŋii ɩ fu na dʋɔ. 23 Akala takɩɛ nkpa kii adiya sɛ wʋsɛ gba kii abʋrɩ afuusa. 24 N kɩɛ kuakuadabi, baa duu sɛ baa karɛwʋ ʋ. Ba tana adiya disiitiŋ sɛ ba tana dichonkon n. Ama Ɩsʋɔ adisi ba. Ɩ ba yɩɛ ba kpari kii jimbisi? 25 Amɩɛ tɩba wʋ Mmʋɔ sɛ wʋ ga nyala naŋ a dɩlɛ mʋ saŋa pii kpi wʋ nkpa dʋɔ.>> 26 Gʋ ɩɩ dɩlɛ yɩɛ pii ŋina gba a, be n yɩɛ sɛ ɩ nyala amɩɛ wʋsɛ ŋii ŋɩ kakaa na dʋɔ?

27 Sɛ Yesu tawɩ sɛ, <<N kɩɛ ganaŋkʋ kasɛ fʋɩrasɛ a bɩɩ ŋɩ wɩɛ dieli, ŋii yɩɛ dɩtʋm sɛ ŋii lʋʋ abʋrɩ afuusa a. Ama maa tawɩ amɩɛ sɛ, Juo Solomoŋ na wʋ jilima naŋ kpiniŋ gba n dɩlɛ desina wʋsɛ na wʋ a yɩɛ dieli takɩɛ fʋɩrasɛ ŋina naŋ garɛ ɛ. 28 Sɛ dɩmʋŋ sɛ Ɩsʋɔ a fu kasɛ ŋii ɩ na ŋɛ jaŋ na chifuo ɩ tʋ ŋɛ bʋala na, be n yɩɛ sɛ wʋ aa fu amɩɛ? O amɩɛ baa amɩɛ lɩɛdi n bɔla a. 29 Dɩmʋŋ dʋɔ n baa ja bʋrʋ gaa ɩ di yaa ɩ nyʋɔ. N baa nyala amɩɛ wʋsɛ ŋɩ dʋɔ. 30 Akala takɩɛ bakpa baa ba ba jiŋ Ɩsʋɔ na, aja dɩmʋŋ abʋrɩ ŋina kpiniŋ. Ama amɩɛ Juo jiŋ gʋ ŋina kpiniŋ tiri amɩɛ. 31 Dɩmʋŋ dʋɔ n ja Ɩsʋɔ Juori gaa na wʋ a mʋ ŋina kpiniŋ kpi amɩɛ.>>

32 Sɛ Yesu ju dʋɔ tawɩ sɛ, <<Ma kpalɛnara baa ɩ kɩɛna takɩɛ feŋ dikpeŋ bie, n baa yɩɛ nyɩŋtɩɛ, akala takɩɛ dɩ su amɩɛ Juo asa sɛ wʋ a mʋ wʋ juori gaa fa amɩɛ. 33 N yaa amɩɛ akpaŋta na ɩ mʋ aterembie fa ayɔŋtina. N ja aterembie takpe gaa gaa chati na akpaŋta ŋii ŋɩ wɩɛ Ɩsʋɔ adugbe sɛ ŋɩ dʋɔ baa kɔgɩ ɩ. Dɩmaŋ sɛ ŋmɩɛla baa dɩlɛ jʋʋ ga ŋmɩɛlɛ, sɛ tabɩrɩta aba baa dɩlɛ warɩɛ ŋɛ ɛ. 34 Akala takɩɛ diele gaa nya akpaŋta wɩɛ na, dɩmaŋ sɛ n digela wɩɛ.>>

35 Sɛ Yesu ju dʋɔ tawɩ sɛ, <<N mʋ amɩɛ wʋsɛ na ɩ kʋla daa dɩtʋm, na ɩ yela amɩɛ fitila aba a ŋmaŋi, 36 takɩɛ gʋ tʋmɩra dana ba kpaŋjuo wʋŋ wʋ bɔrɛ lɩɩ sarɛ asa di tie wʋ a kɔnɛ, wʋ gaa jɔ bʋɔlɛ na baa tʋlʋ ɩ bileŋ. 37 Tʋmɩra baa ba kpaŋjuo aja kɔŋ gaa mɩɛna ba yela baa gie na, baa yu asadi. Maa tawɩ sɛ n nyii na dieli sɛ wʋ a mʋ wʋ wʋsɛ na wʋ a yela baa cha na wʋ a fa ba adiya. 38 Tʋmɩra baa ba kpaŋjuo kɔŋ tɩɛtɩtɩba yaa tafɩlɛ yela baa gie na, ba yu asadi. 39 Ama n nyii ŋina tie na dieli sɛ, nafʋɔ waatɛ jiŋ saŋa gaa ŋmɩɛlɛ aja kɔŋ na, nafʋɔ wʋ a gie na wʋ n baa salɩɛ jʋʋ. 40 Amɩɛ gba ŋɩ tiri gʋ n desina amɩɛ wʋsɛ ɩ dana, akala takɩɛ Wʋkpa Bu wʋŋ aja kɔŋ saŋa gaa ɩ ba kɩɛna wʋ gbɩɛ ɛ.>>

41 Sɛ Petero tasɛ Yesu sɛ, <<Kpaŋjuo, daa nyiŋeŋ sɛ nya jɔ diduu gana yaa wʋkʋma bɛ?>>

42 Sɛ Kpaŋjuo lɩsɛ nʋɔ sɛ, <<N Mmʋɔ n nyina kɩɛrɛ gasiŋteŋ-tɛ na kɩɛrɛ wɩɛ jɩmɩrɛ? Wʋŋ n nyina wʋŋ wʋ kpaŋjuo yela sɛ wʋ a kɩɛ wʋ tʋmɩra ba baŋbaŋ dʋɔ sɛ wʋ a fa ba adiya saŋa bam naŋ. 43 Asadi n nyina tʋmɩrɛ wʋŋ wʋ kpaŋjuo aja bɔrɛ kɔŋ gaa mɩɛna ɩ yela wʋ a tʋm wʋ dɩtʋm ga gbɩɛ dʋɔ. 44 Maa tawɩ sɛ n nyii na dieli sɛ kpaŋjuo wʋŋ aja mʋ wʋ akpaŋta kpiniŋ dʋ wʋ pamɩɛ naŋ sɛ wʋ n kɩɛ dʋɔ. 45 Ama dɩ n mʋ takɩɛ tʋmɩrɛ wʋŋ tawɩ wʋ nyinaŋ sɛ, <Ma kpaŋjuo aja taŋgɩlɛ pɔɩ na wʋ a kɔŋ,> sɛ wʋ fara wʋ a tugu wʋ tʋmɩra baala na tʋmɩra ala jaŋ, na wʋ a di na wʋ a nyʋɔ, na wʋ a dɩɛsɛ. 46 Dɩmʋŋ tʋmɩrɛ wina wʋ kpaŋjuo wʋŋ aja wʋ a purugi ɩ wɩɩ gaa wʋ aa kɩɛ wʋ gbɩɛ na saŋa gaa wʋ ba jiŋ ŋ. Wʋ a fɔŋɩ wʋ dɩlɛ na dieli na wʋ a mʋ ɩ kpi baa ba lɩɛ ba di na dʋɔ.>>

47 Sɛ Yesu tawɩ sɛ, <<Tʋmɩrɛ kʋma wʋŋ wʋ jiŋ wʋ kpaŋjuo jawʋ sɛ wʋ n kʋla wʋ wʋsɛ na wʋ a yɩɛ ŋii wʋ a jawʋ na, wʋ kpaŋjuo wʋŋ aja ta ɩ dɩchʋchʋ na dieli 48 Ama tʋmɩrɛ kʋma wʋŋ wʋ ba jiŋ wʋ kpaŋjuo jawʋ na, sɛ wʋ yɩɛ bʋrʋ gaa ga daga dɩlɛ fɔŋɩwʋ na, wʋ kpaŋjuo wʋŋ aja ta ɩ dɩchʋchʋ chonii. Wʋkʋma wʋŋ ba fa ɩ abʋrɩ fɔɩ na, baa tasɛ fɔɩ lɩɩ wʋ jaŋ. Sɛ wʋkʋma wʋŋ ba mʋ fɔɩ dʋ wʋ pamɩɛ naŋ sɛ wʋŋ kɩɛ dʋɔ na, baa tasɛ fɔɩ lɩɩ wʋ jaŋ.>>

49 Yesu ju dʋɔ tawɩ sɛ, <<Ma kɔŋ maa dʋ bʋala tibi gana dʋɔ bɛ. Ma yu na nafʋɔ ga taŋ gaa chaŋ. 50 Ama ŋɩ daga maa mʋna awʋrʋfʋɔ Ɩsʋɔ sɔ naŋ yela maa yɩyɩɛ ga tala gʋ ŋii laŋ. 51 Ɩ jiŋ sɛ wʋsɛfɩɛ naŋ sɛ ma kɔŋ tibi dʋɔ? Aye, maa tawɩ amɩɛ sɛ, ma gaa kpara bakpa tɩba bɛ. 52 Lɩɩ jaŋ mʋ a ju, waa ga dʋŋdʋlʋŋ dʋɔ bakpa ba nʋŋ aja kpara tɩba, batoro aja kʋlʋ bala dʋɔ, na bala a kʋlʋ batoro dʋɔ. 53 Bakpa aja kpara tɩba. Juo a kʋlʋ bu baalɛ jaŋ dʋɔ, na bu baalɛ jaŋ dʋɔ a kʋlʋ wʋjuo dʋɔ, naa a kʋlʋ bu alʋ jaŋ dʋɔ, na bu alʋ jaŋ a kʋlʋ wʋnaa dʋɔ, awu a kʋlʋ bu baalɛ jaŋ alʋ dʋɔ, na bu baalɛ jaŋ alʋ a kʋlʋ wʋ awu dʋɔ.>>

54 Sɛ Yesu tawɩ jama baa sɛ, <<Ɩ na gʋ duoni tanɩɛ lɩɩ dɩsalɩtɩŋ na, gabʋanaŋ sɛ ɩ tawɩ sɛ duoni aja wʋ a nɩɛ sɛ wʋ a nɩɛ. 55 Sɛ ɩ na feliŋ jɔ lɩɩ tie sɛ ŋɩ tɩba wɩɛ dimi na, ɩ tawɩ sɛ difiŋ aja kɔŋ sɛ ŋii kɔnɛ. 56 Amɩɛ aluguusitina, ɩ dɩlɛ ɩ kɩɛ tie na Ɩsʋɔ adugbe na ɩ lɩsɛ tie, be n yɩɛ sɛ ɩɩ dɩlɛ kalaa ŋii Ɩsʋɔ aja wʋ a yɩɛ saŋa gana naŋ na tie?>>

57 Sɛ Yesu ju dʋɔ tawɩ sɛ, <<Be n yɩɛ sɛ amɩɛ tɩŋtɩŋ ɩɩ dɩlɛ jiŋ bʋrʋ gaa ga wɩɛ dieli naa? 58 N chamɩna wʋrʋ kɩm sɛ wʋ juna nyaŋ wɩɛ didiitiŋ na, gʋ ɩ dɔŋ gbɩɛ naŋ ɩ ju na, chɩdɩsɛ na ɩ desina wɩɛ ŋii pɔɩ na ɩ tala dɩmaŋ. Sɛ nya n yɩɛ dɩmʋŋ na, wʋ a mʋ nyaŋ ga fa wɩɛ diri na wʋ a fu nyaŋ dɩpʋɛ na wʋ a mʋ nyaŋ fa gagbasɛ anyaŋnyaŋtina na baa mʋ nyaŋ ga tɔ danɛ 59 Maa tawɩ amɩɛ sɛ, baa lɩsɛ nyaŋ lɩɩ danɛ dɩtʋɔtɩŋ ŋ, ga tala gʋ nyaa tɔ kɩm gaa taŋ.>>