1 Fɩɛsɛ wɩɩ wʋrʋgbɩɛ wɩɩ gaa ga dɔŋ soji asanaŋ na nafo fuu, ala baa mʋ wuu fʋagɩɛ tii alifeŋsa ŋii ba cha kʋla si na mʋ ju akpanaŋ bʋɔ gaa jaŋ. 2 Sɛ ba na gʋ bʋɩ janɛ gaa ga fuwei akpanaŋ bʋɔ gaa nʋɔ na gbiliti ga duo laraŋ. 3 Gʋ ba jʋʋ akpanaŋ bʋɔ gaa naŋ na, ba n na Kpaŋjuo Yesu gɩtatɛ ɛ. 4 Gʋ baa yɩyɩɛ ŋina dʋɔ na, gabʋanaŋ sɛ ba na baala bala barɛ ba fuona gagbasɛ ŋii ŋalagi takɩɛ duoni ŋmaŋi na gaa sɩŋ ba jaŋ. 5 Sɛ nyɩŋtɩɛ chaŋ ba sɛ ba luuŋ mʋ ba asa wuu. Sɛ baala baa tasɛ ba sɛ, <<Be n yɩɛ sɛ ɩ ja wʋŋ wʋ chaɩ nkpa naŋ na atatina naŋ? 6 Wʋ taŋ jɩna a, wʋ feŋ lɩɩ sɩŋ naŋ. N nyiŋi wɩɛ ŋii wʋ tawɩ amɩɛ saŋa gaa wʋ wɩɛ amɩɛ jaŋ Galaliya na.>> 7 Sɛ, <<Ŋɩ tiri gʋ ba n lɩsɛ Wʋkpa Bu wʋŋ dʋ dɩsʋbʋ yɩɛra pamɩɛ naŋ na baa jɔ ɩ daŋ gasagasa dʋɔ na wʋ a sɩŋ, wɩɛ atorotɛ na, wʋ a feŋ lɩɩ sɩŋ naŋ.>> 8 Sɛ ba nyiŋi wɩɛ ŋii wʋ tawɩ ba na.

9 Gʋ ba lɩɩ bʋɔ gaa jaŋ kɔŋ na, ba tawɩ bʋrʋkʋma gana fa kpirida gifi darɛ baa na baa ba kakaa na kpiniŋ. 10 Ala bana n nyina Mariya Magadalini, Yowana, Mariya wʋŋ wʋ yɩɛ Jamesi wʋnaa na baa ba kpi ba dʋɔ na n tawɩ ŋina fa kpirida baa. 11 Ama ba n lɩɛ ala baa wɩɛ ŋii di i. Akala takɩɛ ba wɩɛ ŋii yɩɛ wɩɛ a jaga bɛ. 12 Ama Petero bɩrɛ, wʋ kʋlʋ se ju akpanaŋ bʋɔ gaa jaŋ. Gʋ wʋ luuŋ kɩɛ na, wʋ na dɩkalala atabaŋ gaa ba mʋ pɔgʋ ɩ na nyiŋeŋ n duona. Sɛ wʋ bɔrɛ ju dɩɛ wʋ a fa nfɩɛrɛ ŋii ŋɩ tibi na dʋɔ.

13 Dɩmʋŋ wɩɩ gana Yesu kpalɛnara baa tɩba bala cha baa ju dɩɛ bie garɛ gaa baa yagɛ sɛ Emawusi. Lɩɩ Yerusalem mʋ ju dɩmaŋ aja yɩɛ takɩɛ mayili lɩkaarɛ. 14 Gʋ baa ju na yela baa tawɩ ŋii ŋɩ tibi na kpiniŋ dʋɔ wɩɛ baa fa dɔŋa. 15 Gʋ ba dɔŋ baa tawɩ ŋina dʋɔ wɩɛ baa fa dɔŋa na, Yesu tɩŋtɩŋ kɔŋ gaa kpi ba dʋɔ yela wʋ na ba dɔŋ baa ju. 16 Ama Ɩsʋɔ n yela baa jiŋ sɛ Yesu mɩnaŋ ŋ.

17 Sɛ wʋ tasɛ ba sɛ, <<Be wɩɛ sɛ ɩ dɔŋ ɩ tawɩ?>> 18 Sɛ ba tɩba wʋrʋ wʋŋ baa yagɛ sɛ Kilopasi tasɛ ɩ sɛ, <<N nyiŋeŋ n nyina mʋɔrɛ Yerusalem sɛ n ba jiŋ wɩɛ ŋii ŋɩ tibi dɩmaŋ wɩɛ ala ŋina naŋ?>>

19 Sɛ Yesu tasɛ ba sɛ, <<Be wɩɛ n tibi bɛ?>> Sɛ ba lɩsɛ ɩ nʋɔ sɛ wɩɛ ŋii ŋɩ tibi lɩɩna Yesu Nasarati wʋkpa wʋŋ dʋɔ na. Ɩsʋɔ na bakpa kpiniŋ lɩɛ ɩ dʋ gʋ wʋ yɩɛ Ɩsʋɔ ɔja yikuotɛ wʋ dɩtawɩ naŋ na wʋ ayɩɛsa dʋɔ.

20 Ɩsʋɔ sei bɩnɩɛ na daa dɩɛ naŋ bɩnɩɛ mʋ ɩ fa sɛ ba n fu ɩ sɩŋ dɩpʋɛ sɛ ba jɔ ɩ daŋ gasagasa dʋɔ. 21 Ama daa bɩrɛ, nafʋɔ dɩ wɩɛna tamaa gʋ wʋŋ aaŋ ja wʋ a lɩɛ Isiralitina. Ama ŋina kpiniŋ wʋrʋgbɩɛ na, wɩɛ atorotɛ gʋ ŋina kpiniŋ tibi. 22 Sɛ ŋii ŋɩ ti kpi na, ala baa ba kpi daa dʋɔ na tɩba barɛ tawɩ daa wɩɛ ŋarɛ sɛ dɩ yɩɛ daa doba. Ba kʋlʋ nafo fuu ju gachaŋ gaa jaŋ 23 ama ba n na Yesu gɩtatɛ ɛ. Sɛ ba bɔrɛ kɔŋ gaa tawɩ daa sɛ ba na Ɩsʋɔ lɩsɛ kalaa sɛ ba na Ɩsʋɔ gabʋɔsɛ sɛ ba tawɩ daa sɛ Yesu chaɩ nkpa naŋ. 24 Sɛ daa dɔŋa barɛ ju gachaŋ gaa jaŋ ga na ganaŋkʋ ala baa gaa tawɩ na, ama Yesu bɩrɛ, ba n na ɩ.

25 Yesu tawɩ ba sɛ, <<Amɩɛ bamalaŋpʋna, amɩɛ agela wɩɛ doŋ na ɩ lɩɛ wɩɛ ŋii Ɩsʋɔ bajana tawɩ na kpiniŋ di. 26 Ŋɩ tiri gʋ Kirisito wʋŋ a na awʋrʋfʋɔ ŋina pɔɩ na wʋ a yu jilima?>> 27 Sɛ Yesu fara lɩɩ Mosesi sabɩɛ na Ɩsʋɔ bajana baa sabɩɛ wɩɛ kpiniŋ lɩsɛ tie fa ba bʋrʋkʋma gaa ba sabɩɛ Sabɩɛwɩɛ ŋii kpiniŋ naŋ lɩɩ wʋ wʋsɛ dʋɔ na.

28 Gʋ baa tirina dɩɛ bie gaa na, Yesu yɩɛ takɩɛ wʋ a ju wʋ asanaŋ. 29 Ama ba sʋlʋ ɩ sɛ, <<Cha daa jaŋ bʋyanɔ gana, akala takɩɛ tɩɛ tam.>> Dɩmʋŋ dʋɔ wʋ ju ga cha ba jaŋ.

30 Gʋ wʋ cha na wʋ na ba baa di na, wʋ mʋ bodobodo sɛ wʋ yɩlɩ Ɩsʋɔ sɛ wʋ jaɩ tɩba mʋ fa ba. 31 Dɩmaŋ sɛ ba asa fulu sɛ ba jiŋ gʋ Yesu bɛ sɛ wʋ ŋaŋdɛ ba asa dʋɔ. 32 Sɛ ba tasɛ dɔŋa sɛ, <<Daa asa n lɩɛ daa agela naŋ, saŋa gaa wʋ a tawɩ wʋ a fa daa yela dɩ dɔŋ gbɩɛ naŋ dɩ kɔnɛ, sɛ wʋ lɩsɛ Ɩsʋɔ Sabɩɛwɩɛ ŋii tie kalaa daa naa?>>

33 Gabʋanaŋ sɛ ba kʋlʋ ju Yerusalem, sɛ ba ga na kpirida gifi darɛ baa na baa ba kpi ba dʋɔ na sila dikulie, 34 sɛ ba tawɩ sɛ, <<Ŋɩ yɩɛ gasiŋteŋ bɛ! Kpaŋjuo wʋŋ feŋ lɩɩ sɩŋ naŋ sɛ wʋ lɩsɛ wʋ wʋsɛ kalaa Simoŋ.>> 35 Sɛ baala bala baa tawɩ ba ŋii ŋɩ tibi gbɩɛ naŋ na ganaŋkʋ ba na ɩ jiŋ ɩ saŋa gaa wʋ a jaɩ bodobodo gaa na.

36 Gʋ kpalɛnara bala baa cha baa tawɩ ŋii ŋɩ tibi na dʋɔ wɩɛ baa fa gifi darɛ baa na, gabʋanaŋ sɛ Yesu tɩŋtɩŋ gaa sɩŋ ba jaŋ sɛ wʋ tawɩ sɛ, <<Wʋsɛfɩɛ n kɔŋ amɩɛ dʋɔ.>>

37 Sɛ ba yiŋii sɛ nyɩŋtɩɛ chaŋ ba, akala takɩɛ ba jiŋ sɛ ba na gɩtatɩrɛ bɛ. 38 Sɛ Yesu tawɩ ba sɛ, <<Be n yɩɛ sɛ nyɩŋtɩɛ chaŋ amɩɛ sɛ be n yɩɛ sɛ ɩ saŋ ɩ di noro amɩɛ nfɩɛrɛ naŋ? 39 N kɩɛ ma pam taŋtaŋ na ma nafara taŋtaŋ naŋ. Maŋ mɩnaŋ! N tapʋ maŋ kɩɛ. Gɩtatɩrɛ tana wʋsɛ tanɛ na ŋmaba takɩɛ ganaŋkʋ ɩ na ma wɩɛna na a.>>

40 Gʋ wʋ tawɩ ŋina taŋ na, wʋ kalaa ba wʋ pam taŋtaŋ na wʋ nafara taŋtaŋ naŋ. 41 Ama ba n lɩɛdi i, akala takɩɛ dɩ yɩɛ ba doba sɛ ba asadi ga laŋ. Dɩmaŋ sɛ Yesu tasɛ ba sɛ, <<Ɩ wɩɛna adiya jɩna?>> 42 Sɛ ba fa ɩ diji ga ŋansisa gaguŋ garɛ, 43 sɛ wʋ lɩɛ ga tawʋ ba asanaŋ.

44 Sɛ wʋ tawɩ ba sɛ, <<Ŋina sɛ ma tawɩ amɩɛ saŋa gaa ma wɩɛ amɩɛ jaŋ, sɛ ŋɩ tiri gʋ wɩɛ kʋma ŋii ba sabɩɛ Mosesi mbara, Ɩsʋɔ bajana baa sabɩɛ na Numba tanɛ naŋ lɩɩna ma dʋɔ na a kɔŋ tɩba.>>

45 Sɛ wʋ fulu ba nfɩɛrɛ sɛ ba nyii Sabɩɛwɩɛ ŋii tie. 46 Sɛ wʋ tawɩ ba sɛ, <<Ba sabɩɛ sɛ Kirisito wʋŋ aja na awʋrʋfʋɔ na wʋ a sɩŋ, wɩɛ atoro tɛ na wʋ a feŋ lɩɩ sɩŋ naŋ. 47 Wʋ yɩrɛ naŋ, baa tawɩ biliŋi lɩɩ dɩsʋbʋ naŋ na dɩsʋbʋ mʋ chɩɛ wɩɛ fa atawɩ yɩrɩ kpiniŋ. Ŋii fara lɩɩ Yerusalem. 48 Amɩɛ n nyina ŋina kpiniŋ seriyatina. 49 Maa kpiri ŋii Majuo tawɩ si sɛ wʋ a mʋ fa amɩɛ na a kɔŋ amɩɛ dʋɔ. Ama n cha Yerusalem dɩɛ gana naŋ ga tala gʋ Ɩsʋɔ aja yela wʋ Feliŋ doŋ a kɔŋ amɩɛ dʋɔ.>>

50 Sɛ Yesu mʋ wʋ kpalɛnara baa lɩɩ Yerusalem dɩɛ naŋ mʋ ju Betaniya dɩɛ bie gaa naŋ. Dɩmaŋ sɛ wʋ jiŋna wʋ pamɩɛ adugbe sɛ wʋ yɩɛ ba kusee. 51 Gʋ wʋ a yɩɛ ba kusee na, sɛ Ɩsʋɔ mʋ ɩ lɩɩ ba jaŋ ju Ɩsʋɔ adugbe. 52 Ba tʋm ɩ sɛ ba mʋ asadi fɔɩ bɔrɛ ju Yerusalem. 53 Sɛ saŋa kʋma baa ju Ɩsʋɔ tʋm danɛ naŋ baa kalɩɛ Ɩsʋɔ.