1 Dɩ kɔŋ takɩɛ lampo lɩɛra na dɩsʋbʋ yɩɛra kpiniŋ jaŋi Yesu jaŋ na baa nyii wʋ wɩɛ. 2 Ama Farasitina na Mosesi mbara bakalaasa baa fʋlʋ sɛ, <<Baalɛ wina a lɩɛ dɩsʋbʋ yɩɛra sɛ wʋ na ba a di.>>

3 Sɛ Yesu jɔ ba diduu sɛ, 4 <<Dɩ n mʋ takɩɛ amɩɛ wʋrʋ wɩɛna feŋ gafie (100) sɛ wʋrʋ tʋsʋ. Wʋ aa yela ŋɩnara sala na saŋgʋ (99) baa si kasɛnaŋ dɩmaŋ na wʋ a ju ga ja wʋdʋŋdʋlʋŋ wʋŋ wʋ tʋsʋ na ga tala gʋ wʋ a na ɩ? 5 Wʋ na ɩ na, aja yɩɛ ɩ jʋŋ na wʋ a mʋ ɩ baa 6 na wʋ a ju waa dʋɔ. Na wʋ a yagɛ wʋ dɩɛtina na baa wʋ na ba cha ɩ tirina gaa jaŋi wʋ jaŋ, na wʋ a tawɩ ba sɛ, <N kpi ma dʋɔ na dɩ lɩɛ daa asa, akala takɩɛ ma na ma fie wʋŋ wʋ tʋsʋ na.> 7 Maa tawɩ amɩɛ sɛ, dɩmʋŋ sɛ asadi aja kɔŋ Ɩsʋɔ adugbe lɩɩna dɩsʋbʋ yɩɛrɛ wʋ dʋŋdʋlʋŋ wʋŋ wʋ biliŋi lɩɩ wʋ dɩsʋbʋ naŋ kii gʋ bakpa ba chirigisa ŋɩnara sala na saŋgʋ (99) baa ba n tiri sɛ baa biliŋi lɩɩ ba dɩsʋbʋ naŋ.>>

8 Sɛ Yesu ju dʋɔ tawɩ sɛ, <<Yaa dɩ n mʋ takɩɛ alʋ wʋrʋ wɩɛna diterembi fʋlʋm bie gifi sɛ ŋɩ tɩba garɛ tʋsʋ na, wʋ aa tʋʋ fitila na wʋ a kpa waa dʋɔ dɩmaŋ na wʋ a kɩɛ na dieli ga tala gʋ wʋ a na ga?. 9 Wʋ na ga na, wʋ a yagɛ wʋ dɩɛtina na baa wʋ na ba chaɩ tirina na gaa jaŋi wʋ jaŋ na wʋ a tawɩ sɛ n kpi ma dʋɔ na dɩ lɩɛ daa asa, akala takɩɛ ma na ma diterembi fʋlʋm gaa ga tʋsʋ na. 10 Maa tawɩ amɩɛ sɛ, dɩmʋŋ sɛ Ɩsʋɔ gabʋɔsɛ gba asa aja lɩɛ lɩɩna dɩsʋbʋ yɩɛrɛ wʋ dʋŋdʋlʋŋ wʋŋ wʋ biliŋi lɩɩ wʋ dɩsʋbʋ naŋ dʋɔ.>>

11 Sɛ Yesu ju dʋɔ tawɩ sɛ, <<Baalɛ wʋrʋ cha wʋ wɩɛ wʋ wɩɛna bie baala bala. 12 Wɩɩ darɛ, wʋ pii jaŋ wʋŋ tawɩ wʋ juo sɛ, <Majuo, kpara nya akpaŋta naŋ na nyaa mʋ ma teri fa maŋ.> Dɩmʋŋ dʋɔ wʋ kparɛ wʋ akpaŋta ŋii fa baa bala.>>

13 Gɩyɩɛnɩŋ pii ŋarɛ wʋrʋgbɩɛ na, wʋ pii jaŋ wʋŋ yaa wʋ akpaŋta ŋii wʋ yu na kpiniŋ sɛ wʋ mʋ aterembie ŋii ju gbɩɛ ga cha dɩɛ taŋasɛ garɛ dʋɔ. Dɩmaŋ sɛ wʋ mʋ wʋ aterembie ŋii ga yɩɛ gɩjaga wɩɛ. 14 Gʋ wʋ di wʋ a aterembie ŋii kpiniŋ taŋ na. Sɛ dusoŋ janɛ gaa ga nʋɔ wɩɛ doŋ kɔŋ tibi gaa dʋɔ. Sɛ wʋ wʋsɛ fara ŋii chaŋ ɩ. 15 Dɩmʋŋ dʋɔ wʋ ju dɩɛsɛ bu wʋrʋ jaŋ sɛ wʋ n fa ɩ dɩtʋm. Sɛ wʋ mʋ ɩ ju wʋ fʋɔnaŋ sɛ wʋ n ga kɩɛ wʋ ɔvaaba dʋɔ. 16 Dusoŋ a kʋ ɩ nafʋɔ wʋ yu na wʋ a di ɔvaaba adiya, ama wʋrʋ n fa ɩ ŋarɛ na wʋ a di i.

17 Gʋ dɩ ŋmaŋi wʋ asa dʋɔ na, sɛ wʋ fara wʋ a fa nfɩɛrɛ chawʋ gaa wʋ wɩɛ ga tɩba na, sɛ wʋ tawɩ sɛ, <<Majuo tʋmɩra wɩɛna adiya baa di baa kaa, yela ma wɩɛ jɩna dusoŋ a kʋ maŋ. 18 Maa bɔrɛ ju majuo jaŋ, na maa ga tawɩ ɩ sɛ, Majuo, ma yɩɛ dɩsʋbʋ chicha Ɩsʋɔ na nyaŋ. 19 Ma n daga na nyaa yagɛ maŋ sɛ n bu u, mʋ maŋ yɩɛ n tʋmɩra baa tɩba wʋrʋ.>> 20 Dɩmʋŋ dʋɔ wʋ kʋlʋ wʋ a ju wʋjuo jaŋ. Gʋ wʋ saŋ wʋ wɩɛ taŋasɛ wʋ a kɔnɛ na, wʋjuo na ɩ sɛ wʋ wɩɛ yɩɛ ɩ gɩyɔŋ, sɛ wʋ se ga jaŋi na ɩ sɛ wʋ puga ɩ.

21 Sɛ bu baalɛ jaŋ wʋŋ tawɩ sɛ, <<Majuo, ma yɩɛ dɩsʋbʋ chicha Ɩsʋɔ na nyaŋ. Ma n ti daga na nyaa yagɛ maŋ sɛ n bu u.>>

22 Ama wʋjuo wʋŋ tawɩ wʋ tʋmɩra baa sɛ, <<N yɩɛ bileŋ, na ɩ mʋ adugbe gagba jalɩŋtɛ gabam mʋ fu ɩ. Ɩ mʋ kɔrɔ dʋ wʋ pam nyiŋbie na ɩ mʋ asibita dʋ wʋ nafara tie. 23 N ju ga chaŋ naa baalie nuŋtɛ na ɩ kʋ ɩ mʋ yɩɛ adiya na dɩ di na dɩ lɩɛ daa asa. 24 Akala takɩɛ mabu baalɛ jaŋ wina dɩ yɩɛ takɩɛ wʋ sɩŋ sɛ wʋ feŋ. Dɩ yɩɛ takɩɛ wʋ tʋsʋ sɛ dɩ na ɩ. Dɩmʋŋ dʋɔ ba fara baa lɩɛ ba asa.>>

25 Gʋ ŋina kpiniŋ a ju dʋɔ na, wʋbu bɩnɛ jaŋ wʋŋ wɩɛ fʋɔnaŋ. Gʋ wʋ lɩɩ fʋɔ wʋ a tirina waa na, wʋ nyii numbasɛ na sʋɔrɛ a ju dʋɔ. 26 Dɩmʋŋ dʋɔ wʋ yagɛ tʋmɩra baa wʋrʋ sɛ wʋ tasɛ ɩ sɛ, be aaŋ ju dʋɔ bɛ? 27 Sɛ wʋ tawɩ ɩ sɛ, <<Nnabu wʋŋ n bɔrɛ kɔŋ sɛ njuo kʋ ɩ naa baalie nuŋtɛ, akala takɩɛ wʋ kɔŋ na nkpa na alaŋfiya.>>

28 Gʋ bu bɩnɛ jaŋ wʋŋ nyii dɩmʋŋ na, <<Wʋ kara biŋbira sɛ wʋ pɩɛ wʋ aa jʋʋ waa gaa dʋɔ ɔ. Sɛ wʋjuo ga sʋlʋ ɩ sɛ wʋŋ jʋʋ. 29 Ama wʋ lɩsɛ wʋjuo nʋɔ sɛ nyii, bɩŋsɛ ŋina kpiniŋ ma tʋm nyaŋ takɩɛ tʋmɩrɛ sɛ ma n yɩɛ dɩla naŋ doŋ n wɩɛ dʋɔ ɔ. Ama nyaŋ fa ta maŋ ajala gba na maŋ na ma dɩɛtina dɩ mʋ lɩɛ daa asa a. 30 Ama nbu wina wʋŋ wʋ ga warɩɛ nya akpaŋta ala jaga dʋɔ kɔŋ dɩɛ na bɩrɛ, nya kʋ naa baalie nuŋtɛ fa ɩ.>>

31 Sɛ wʋjuo wʋŋ tawɩ ɩ sɛ, <<Mabu, nyaŋ bɩrɛ n wɩɛ ma jaŋ saŋa kʋma sɛ bʋrʋkʋma gaa ma wɩɛna na yɩɛ n teri. 32 Ama ŋɩ tiri gʋ dɩ di asadi adiya di na dɩ lɩɛ daa asa, akala takɩɛ n nabu wina wʋ sɩŋ sɛ wʋ feŋ, wʋ tʋsʋ sɛ dɩ na ɩ.>>