1 Fɩɛsɛ wɩɩ wʋrʋgbɩɛ wɩɩ gaa ga dɔŋ soji asanaŋ tafɩlɛ na, Mariya Magadalini na Mariya wʋ baŋbaŋ wʋŋ ju ga kɩɛ bʋɔ gaa.

2 Gʋ ba tala dɩmaŋ na, kɩɛ gabʋanaŋ sɛ tibi jigisi na doŋ, akala takɩɛ Ɩsʋɔ gabʋɔ tibi lɩɩ Ɩsʋɔ adugbe gaa gbiliti bʋɩ janɛ gaa ga fuwei akpanaŋ bʋɔ gaa nʋɔ na, sɛ wʋ cha ga dʋɔ. 3 Wʋ wʋsɛ a ŋalagi takɩɛ duoni ŋmaŋi sɛ wʋ abʋrɩ afuusa fʋlʋmɩɛɩ ŋii ŋalagi takɩɛ dɩkalala na. 4 Gʋ gachaŋ kɩɛra baa na Ɩsʋɔ gabʋɔ wʋŋ na sɛ nyɩŋtɩɛ chaŋ ba, sɛ ba selesi sɛ ba lɩɩ sala takɩɛ atatina na.

5 Sɛ Ɩsʋɔ gabʋɔ wʋŋ tawɩ ala baa sɛ, <<N baa yela nyɩŋtɩɛ a chaŋ amɩɛ. Ma jiŋ gʋ Yesu wʋŋ ba jɔ ɩ daŋ gasagasa dʋɔ na sɛ ɩ jawʋ. 6 Wʋ taŋ jɩna a. Wʋ feŋ lɩɩ sɩŋ naŋ ganaŋkʋ wʋ fɩla tawɩ na. N gaa kɩɛ diele gaa ba cha mʋ wʋ gɩtatɛ si na. 7 N ju bileŋ ga tawɩ wʋ kpalɛnara baa sɛ, <N kɩɛ, wʋ feŋ lɩɩ sɩŋ naŋ sɛ wʋ pala amɩɛ asanaŋ wʋ a ju Galaliya, dɩmaŋ sɛ ɩ ga na ɩ.> N nyii, dɩtɩɛna ma tawɩ amɩɛ.>>

8 Dɩmʋŋ dʋɔ ala baa kpala lɩɩ gachaŋ gaa jaŋ. Nyɩŋtɩɛ chaŋ ba bɩrɛ, ama ba mʋ asadi se ga tawɩ wʋ kpalɛnara baa. 9 Kɩɛ, gabʋanaŋ sɛ Yesu jaŋina ba tawɩ sɛ, <<Maa yɩlɩ amɩɛ,>> sɛ ba kɔŋ wʋ jaŋ gaa luuŋ ba dʋna dʋɔ sɛ ba tʋŋ ɩ. 10 Sɛ Yesu tawɩ ba sɛ, <<N baa yela na nyɩŋtɩɛ achaŋ amɩɛ. N ju ga tawɩ ma dɔŋa sɛ ba n ju Galaliya dɩmaŋ sɛ baa ga na maŋ.>>

11 Gʋ ala baa a ju na, kɩɛ yuora baa barɛ ju dɩɛ janɛ gaa naŋ ga tawɩ sei bɩnɩɛ baa ŋii ŋɩ tibi na kpiniŋ. 12 Sɛ sei bɩnɩɛ na dɩɛ bɩnɩɛ baa gaa jaŋi jɔ dɩkɔŋ sɛ ba fa yuora baa aterembie fɔɩ, 13 sɛ ba tawɩ ba sɛ n yɩɛ akarɩɛ sɛ, <<N tawɩ sɛ, <Wʋ kpalɛnara baa kɔŋ gaa ŋmɩɛlɛ wʋ gɩtatɛ gʋ dɩ duo yuluma na.> 14 Sɛ Pilato nyii wɩɛ ŋina na, daa tɩŋtɩŋ dɩɩ tawɩ ɩ sɛ ɩ ba jiŋ wɩɛ ŋina dʋɔ bʋrʋ ʋ ganaŋkʋ ɩɩ yu wɩɛ na.>> 15 Dɩmʋŋ dʋɔ yuora baa lɩɛ aterembie ŋii sɛ ba yɩɛ ganaŋkʋ ba tawɩ ba na. Sɛ dɩmʋŋ akarɩɛ ŋina yasɩŋ jʋʋ Yudatina tɩba gaa lɩɩ jaŋ.

16 Sɛ kpalɛnara gifi darɛ baa ju bʋrɔŋ garɛ dʋɔ Galaliya diele gaa Yesu cha tawɩ ba sɛ ba n ju na. 17 Gʋ ba na Yesu na ba tʋŋ ɩ, ama barɛ dʋɔ lɩɛ noro sɛ naa wʋŋ bɛ ɛ. 18 Sɛ Yesu kɔŋ ba jaŋ gaa tawɩ sɛ, <<Ɩsʋɔ mʋ Ɩsʋɔ adugbe na tie dʋɔ yikuo kpiniŋ fa maŋ. 19 Dɩmʋŋ dʋɔ n ju atawɩ yɩrɩ kpiniŋ jaŋ ga yɩɛ ba ma kpalɛnara. N sɔ ba Ɩsʋɔ sɔ Juo wʋŋ na Bu wʋŋ na Ɩsʋɔ Feliŋ yɩrɛ naŋ, 20 na ɩ kalaa ba na baa kpaŋ bʋrʋkʋma gaa ma dʋ amɩɛ na dʋɔ. N nyii takɩɛ ma wɩɛ amɩɛ jaŋ saŋa kʋma ga tala dulunya dɩtamtɩŋ.>>