1 Gʋ Yesu tawɩ wɩɛ ŋina kpiniŋ taŋ na, wʋ tawɩ wʋ kpalɛnara baa sɛ, 2 <<takɩɛ ganaŋkʋ ɩ jiŋ na, ɩ jiŋ gʋ dɩ kakaa wɩɛ ala na Yudatina nyiŋi asadi adiya di a tala na. Baa lɩsɛ Wʋkpa Bu wʋŋ fa na baa jɔ ɩ daŋ gasagasa dʋɔ.>>

3 Saŋa gana naŋ na, Ɩsʋɔ sei bɩnɩɛ na dɩɛ bɩnɩɛ jaŋi Kayifasi wʋŋ wʋ yɩɛ Ɩsʋɔ sei bɩnɩɛ naŋ bɩnɛ na juorigbɩɛ 4 sɛ ba jɔ dɩkɔŋ gaa baa mʋna dʋɔ wɩsɛ chaŋ Yesu na baa kʋ ɩ. 5 Ama ba tawɩ sɛ, <<N baa yela dɩ chaŋ ɩ nyiŋi asadi adiya di ŋina naŋ, naa dɩmʋŋ na, ŋii kɔna siŋii dɩɛ naŋ.>>

6 Gʋ Yesu wɩɛ Batani Simoŋ wʋŋ wʋ cha kili gɩchalaŋa waa dʋɔ 7 wʋ a di na, alʋ wʋrʋ kɔŋ wʋ jaŋ wʋ chamɩna alabasita sapɩɛ bie garɛ yela naadɩ* nuŋ alifeŋsa ŋii ŋɩ yawʋ wɩɛ doŋ wɩɛ ga tɩba sɛ wʋ chɩɛgɩ wʋrʋgɩ Yesu nyinaŋ.

8 Gʋ wʋ kpalɛnara baa na ŋina na sɛ ba kara biŋbira, sɛ ba tasɛ sɛ, <<Be n yɩɛ sɛ wʋ a warɩɛ nuŋ alifeŋsa ŋina? 9 Nafʋɔ baa dɩlɛ yaa nuŋ alifeŋsa ŋina na baa yu aterembie fɔɩ na baa mʋ fa ayɔŋtina.>>

10 Gʋ Yesu jiŋ bʋrʋ gaa ba tawɩ na sɛ wʋ tasɛ ba sɛ, <<Be n yɩɛ sɛ ɩ nyala alʋ wina dɩmʋŋ? Wʋ yɩɛ bʋrʋ gabam fa maŋ bɛ. 11 Ayɔŋtina bɩrɛ, ba wɩɛ amɩɛ jaŋ saŋa kʋma. Ama maŋ bɩrɛ, ma taŋ amɩɛ jaŋ saŋ kʋma a. 12 Wʋ chɩɛgɩ nuŋ alifeŋsa ŋii wʋrʋgɩ ma wʋsɛ mʋ desina maŋ si daa ma wuu bɛ. 13 Maa tawɩ sɛ n nyii na dieli sɛ dulunya naŋ gapɩlɛkʋma gaa baa tawɩ Ɩsʋɔ wɩɛ abama ŋii na, baa tawɩ ŋii alʋ wʋŋ yɩɛ na mʋ nyiŋi ɩ.>>

14 Sɛ Yudasi Isikariyoti, wʋŋ wʋ yɩɛ kpirida gifi bala baa tɩba wʋrʋ na ju Ɩsʋɔ sei bɩnɩɛ jaŋ 15 ga tasɛ ba sɛ, <<Sɛ ma lɩsɛ Yesu fa amɩɛ na, be sɛ ɩɩ fa maŋ?>> Sɛ ba kala diterembi fʋlʋm bie nkuo na sala fa ɩ. 16 Lɩɩ dɩmʋŋ saŋa gana mʋ a ju na, Yudasi fara wʋ a ja gbɩɛ gaa wʋ a mʋna dʋɔ lɩsɛ Yesu fa ba.

17 Wɩɩ gaa ga doŋ asanaŋ fa Bodobodo gaa ga Tana Yiisi Asadi Adiya di talɛ na, Yesu kpalɛnara baa kɔŋ wʋ jaŋ gaa tasɛ ɩ sɛ, <<Le sɛ nyaa ja sɛ dɩ ju ga desina fa nyaŋ na nyaa ga di nyiŋi asadi adiya di adiya?>>

18 Sɛ Yesu lɩsɛ ba nʋɔ sɛ, <<Ba n ju baalɛ wʋrʋ jaŋ dɩɛ janɛ gaa naŋ ga tawɩ ɩ sɛ, wʋkalaasa wʋŋ sɛ, ma saŋa tirina gʋ maŋ na ma kpalɛnara dɩ di nyiŋi asadi adiya di adiya ŋii n waa dʋɔ.>> 19 Dɩmʋŋ dʋɔ wʋ kpalɛnara baa yɩɛ ganaŋkʋ Yesu tawɩ ba na. Sɛ ba yɩɛ nyiŋi asadi adiya di adiya ŋii dɩmaŋ.

20 Gʋ bʋyanɔ talɛ na, Yesu na wʋ kpirida gifi bala baa chaɩ baa di adiya. 21 Gʋ baa di na, sɛ wʋ tawɩ ba sɛ, <<Maa tawɩ sɛ n nyii na dieli sɛ amɩɛ tɩba wʋrʋ aja lɩsɛ maŋ fa.>>

22 Sɛ kpalɛnara baa bɔtaa fɔɩ, sɛ ba fara baa tasɛ dɔŋa garɛ-garɛ sɛ, <<Kpaŋjuo, maŋ bɛ yaa?>>

23 Sɛ Yesu lɩsɛ ba nʋɔ sɛ, <<Wʋŋ maŋ na ɩ dɩɩ di nyɩna garɛ naŋ na aaŋ ja wʋ a lɩsɛ maŋ fa. 24 Wʋkpa Bu wʋŋ aja sɩŋ ganaŋkʋ ba sabɩɛ wʋ wʋsɛ dʋɔ wɩɛ Ɩsʋɔ Wɩɛ naŋ na. Ama wʋkpa wʋŋ wʋ a lɩsɛ Wʋkpa Bu wʋŋ fa na, wʋŋ lakʋ! Nafʋɔ ba n lʋrʋ ɩ gba bɔ.>>

25 Sɛ Yudasi wʋŋ wʋ a lɩsɛ Yesu fa na gba tasɛ ɩ sɛ, <<Wʋkalaasa, maŋ bɛ yaa?>>

Sɛ Yesu lɩsɛ nʋɔ sɛ, <<Ɛɛŋ, nyaŋ.>>*

26 Gʋ Yesu na wʋ kpalɛnara baa a di na, wʋ mʋ bodobodo sɛ wʋ yɩlɩ Ɩsʋɔ sɛ wʋ jaɩ-jaɩ tɩba mʋ fa wʋ kpalɛnara baa tawɩ ba sɛ, <<Ma wʋsɛ mɩnaŋ, n lɩɛ di.>>

27 Sɛ wʋ mʋ gafie bie gaa wayɩŋ sʋlʋŋ wɩɛ tɩba sɛ wʋ yɩlɩ Ɩsʋɔ sɛ wʋ mʋ fa wʋ kpalɛnara baa tawɩ sɛ, <<Amɩɛ kpiniŋ n lɩɛ nyʋɔ fa dɔŋa. 28 Ma asima mɩnaŋ, ŋii n nyina dɩkɔŋ fɔlɛ gaa Ɩsʋɔ na bakpa jʋɔ ŋii ŋɩ chɩɛgɩ wʋrʋgɩ fa bakpa kpiniŋ na baa yu dɩsʋbʋ mʋ chɩɛ 29 Maa tawɩ amɩɛ sɛ, maa ti nyʋɔ wayɩŋ sʋlʋŋ ŋina ŋarɛ ɛ, lɩɩ saŋa gana mʋ ga tala wɩɩ gaa maŋ na amɩɛ aja nyʋɔ ŋɩ afɔlɩɛ Majuo Juori naŋ.>>

30 Gʋ ba kpie numba yɩlɩ Ɩsʋɔ taŋ na, ba lɩɩ dɩmaŋ ju Olifi dasɛ bʋrɔŋ dʋɔ.

31 Gʋ Yesu na wʋ kpalɛnara baa wɩɛ Olifi dasɛ bʋrɔŋ dʋɔ na, wʋ tawɩ ba sɛ ma dʋɔ, amɩɛ kpiniŋ ɩ puseŋ yela maŋ yuluma gana. Ganaŋkʋ ba sabɩɛ Ɩsʋɔ Wɩɛ naŋ sɛ, Ɩsʋɔ tawɩ sɛ,

<<Maa kʋ feŋ kparɛ wʋŋ

na feŋ dikpeŋ gaa a puseŋ.>>✝

32 Ama ma feŋ lɩɩ sɩŋ naŋ wʋrʋgbɩɛ na, maa pala amɩɛ asanaŋ ju Galaliya.

33 Sɛ Petero tawɩ Yesu sɛ, <<Sɛ ba kpiniŋ baa puseŋ yela nyaŋ na, maŋ bɩrɛ, maa yɩɛ dɩmʋŋ ŋ.>>

34 Sɛ Yesu tawɩ Petero sɛ, <<Maa tawɩ sɛ n nyii na dieli sɛ yuluma gana pɔɩ na dijimba akɔlɛ bʋla na, nyaa pɩɛ maŋ butoro sɛ n ba jiŋ maŋ ŋ.>>

35 Ama Petero tawɩ ɩ sɛ, <<Dɩkɔŋ sɛ maŋ na nyaŋ dɩɩ sɩŋ gba, maa tawɩ sɛ ma ba jiŋ nyaŋ ŋ.>> Dɩmʋŋ sɛ wʋ kpalɛnara baa ba kakaa na gba tawɩ.

36 Sɛ Yesu na wʋ kpalɛnara ju diele gaa baa yagɛ sɛ Gesemani, sɛ wʋ tawɩ ba sɛ, <<N cha jɩna na maa ju gatʋŋgʋrʋ ga jɔ dɩga.>> 37 Sɛ Yesu mʋ Petero na Sebedi bie baala jaŋ bala baa kpaŋ wʋ wʋsɛ. Dɩmaŋ sɛ wʋ fara wʋ a bɔtaa sɛ wʋ jʋʋ gayɩyɩɛ. 38 Sɛ Yesu tawɩ ba sɛ, <<Bɔtaa gaa ga nʋɔ wɩɛ doŋ su ma digela gʋ ŋii dɩlɛ mʋ maŋ ju sɩŋ naŋ.>> N cha jɩna gie na maŋ na n baa duo.

39 Gʋ Yesu ju wʋ asanaŋ chonii na, sɛ wʋ laŋ fu sɛ wʋ jɔ dɩga sɛ, <<Majuo, nafʋɔ aja yɩɛ dieli na, yela na awʋrʋfʋɔ ŋina a giligi maŋ. Ama naa ŋii maa jawʋ ʋ, ama ŋii nyaa jawʋ na.>>

40 Sɛ Yesu bɔrɛ kɔŋ wʋ kpalɛnara batoro baa jaŋ gaa na gʋ ba duo. Sɛ Yesu tasɛ Petero sɛ, <<Ɩŋ dɩlɛ cha gie na maŋ karafɩɛ darɛ yela ɩŋ duo? 41 N gie na ɩ jɔ dɩga na n ba jʋʋ lɔ tɩba naŋ. Amɩɛ sʋbʋ a jawʋ, ama amɩɛ wʋsɛ bɩrɛ fʋʋ.>>

42 Sɛ Yesu bɔrɛ ju bʋlatɛ ga jɔ dɩga sɛ, <<Majuo, sɛ awʋrʋfʋɔ ŋina baa giligi maŋ ŋ, amʋɔ dɩ daga na maa na na, yela n jawʋ a yɩɛ.>>

43 Sɛ Yesu bɔrɛ kɔŋ gaa na gʋ wʋ kpalɛnara batoro baa duo akala takɩɛ asoroŋ a kʋ ba fɔɩ. 44 Sɛ Yesu lɩɩ ba jaŋ ju wʋ a ga jɔ dɩga butoro-tɛ sɛ wʋ tawɩ dɩtawɩ gadʋŋdʋlʋŋ gana.

45 Sɛ Yesu bɔrɛ kɔŋ wʋ kpalɛnara baa jaŋ, sɛ wʋ tawɩ ba sɛ, <<Ɩ saŋ ɩ duo yela ɩ fɩɛsɛ? N kɩɛ, saŋa gaa tirina, baa lɩsɛ Wʋkpa Bu wʋŋ dʋ dɩsʋbʋ yɩɛra pamɩɛ naŋ. 46 N kʋlʋ na dɩ ju! N kɩɛ, wʋŋ wʋ a lɩsɛ maŋ fa na aaŋ kɔnɛ na!>>

47 Gʋ Yesu saŋ wʋ a tawɩ wʋ a fa wʋ kpalɛnara baa na, Yudasi wʋŋ wʋ yɩɛ wʋ kpirida gifi bala baa tɩba wʋrʋ na, wʋ na jama baa ba kpamɩna ɩ ba chamɩna yuo dabɩlasɛ na akolie na kɔŋ dɩmaŋ. Na sei bɩnɩɛ na dɩɛ bɩnɩɛ n kpiri ba. 48 Sɛ Yudasi lɩsɛrɛ wʋŋ kalaa ba daasɛ sɛ, <<Wʋŋ maa puga ɩ na, na wʋŋ mɩnaŋ. N chaŋ ɩ.>> 49 Gabʋanaŋ sɛ Yudasi ju Yesu jaŋ sɛ wʋ tawɩ sɛ, <<Wʋkalaasa, maa yɩlɩ nyaŋ.>> Sɛ wʋ puga ɩ.

50 Sɛ Yesu tawɩ ɩ sɛ, <<Ma dɩɛtɛ, yɩɛ ŋii n kɔŋ ŋɩ dʋɔ na.>>

Dɩmaŋ sɛ bakpa baa lɩɩ gaa chaŋ ɩ na doŋ.

51 Kɩɛ, Yesu dɔŋa ba tɩba wʋrʋ lɩsɛ yuo dabɩla kara Ɩsʋɔ sei bɩnɩɛ naŋ bɩnɛ wʋŋ tʋmɩrɛ dɩlɛ lɩsɛ.

52 Sɛ Yesu tawɩ ɩ sɛ, <<Bɔsɩna n yuo dabɩla gaa dʋ ga furu naŋ. Akala takɩɛ wʋkʋma wʋŋ wʋ a lɩsɛ yuo dabɩla na, wʋ a sɩŋ yuo dabɩla nʋɔ. 53 N ba jiŋ sɛ maa dɩlɛ yagɛ Majuo na wʋ a kpiri gabʋɔsɛ kɔrʋɔsɛ-kɔrʋɔsɛ dʋɔ gabʋanaŋ na baa gaa yuo fa maŋ? 54 Ama sɛ dɩ kɔŋ dɩmʋŋ na, aja yɩɛ sɩnɛ na wɩɛ ŋii ba sabɩɛ Ɩsʋɔ Sabɩɛwɩɛ naŋ sɛ ŋɩ tiri gʋ ŋina a tibi na, a kɔŋ tɩba?>>

55 Dɩmʋŋ saŋa gana na, Yesu tasɛ jama baa sɛ, <<Ma yɩɛ ŋmɩɛlɛ wʋŋ wʋ chamɩna doŋ wʋ a lɩɛ bakpa abʋrɩ bɛ, sɛ ɩ mʋ yuo dabɩlasɛ na akolie ɩ kɔŋ ɩ chaŋ maŋ?>> Wɩɩ kʋma ma wɩɛ Ɩsʋɔ tʋm danɛ naŋ maa kalaa amɩɛ, ama ɩŋ chaŋ maŋ ŋ. 56 Ama ŋina kpiniŋ tibi ganaŋkʋ Ɩsʋɔ bajana baa wɩɛ ŋii ba sabɩɛ Ɩsʋɔ Sabɩɛwɩɛ ŋii naŋ na, a kɔŋ tɩba. Sɛ wʋ kpalɛnara baa kpiniŋ puseŋ se yela ɩ.

57 Sɛ bakpa baa ba chaŋ Yesu na mʋ ɩ ju Kayifasi wʋŋ wʋ yɩɛ sei bɩnɩɛ naŋ bɩnɛ na waa dʋɔ diele gaa mbara bakalaasa na dɩɛ bɩnɩɛ sila. 58 Na Petero cha wʋ kpamɩna Yesu nafarɛ-nafarɛ ga jʋʋ sei bɩnɩɛ naŋ bɩnɛ wʋŋ waa gaa naŋ. Sɛ wʋ cha kɩɛra baa jaŋ na wʋ a kɩɛ ŋii ŋii tibi na.

59 Sei bɩnɩɛ naŋ bɩnɩɛ na dɩɛ naŋ bɩnɩɛ naŋ bɩnɩɛ dikpeŋ baa kpiniŋ aja akarɩɛ seriya ŋii baa di mʋ sʋɔ Yesu na baa kʋ ɩ. 60 Ama ba n yu u. Ŋɩ wɩɛ takɩɛ akarɩɛ seriyatina fɔɩ kɔŋ gaa yɩɛ akarɩɛ jaga wʋ dʋɔ. Wʋrʋgbɩɛ na, sɛ baala bala barɛ kʋlʋ sɩŋ 61 tawɩ sɛ, <<Baalɛ wina cha tawɩ sɛ maa dɩlɛ salɛ Ɩsʋɔ tʋm danɛ gaa, na maa mʋ wɩɛ atoro ma ga.>>

62 Sɛ sei bɩnɩɛ naŋ bɩnɛ wʋŋ kʋlʋ sɩŋ tasɛ Yesu sɛ, <<Seriya ŋii baa di baa chicha nyaŋ n na, nya tana ŋɩ nʋɔ lɩsɛ?>> 63 Ama Yesu n tawɩ bʋrʋ ʋ. Sɛ sei bɩnɩɛ naŋ bɩnɛ wʋŋ tawɩ ɩ sɛ, <<Ka Ɩsʋɔ wʋkɩɛnasa wʋŋ ntaŋ, tawɩ daa sɛ nyaŋ n nyina Kirisito, Ɩsʋɔ Bu wʋŋ na.>>

64 Sɛ Yesu lɩsɛ nʋɔ sɛ, <<Ɛɛŋ, ŋii sɛ nya tawɩ na. Ama maa tawɩ amɩɛ kpiniŋ sɛ lɩɩ saŋa gana mʋ a ju, ɩ na Wʋkpa Bu wʋŋ wʋ chaɩ Ɩsʋɔ Doŋ-tɛ wʋŋ pam jɩsaŋ dʋɔ wʋ lɩɩ Ɩsʋɔ tanɩɛ naŋ wʋ a kɔnɛ.>>

65 Sɛ sei bɩnɩɛ naŋ bɩnɛ wʋŋ chati wʋ gagba, sɛ wʋ tawɩ sɛ, <<Wʋ tawɩ mbusu wɩɛ baŋ Ɩsʋɔ. Be dʋɔ sɛ dɩ ti dɩ ja seriyatina barɛ? Dɩtɩɛna, ɩ nyii mbusu wɩɛ ŋii wʋ tawɩ na.>> 66 Sɩnɛ n nyina amɩɛ nfɩɛrɛ?

Sɛ ba lɩsɛ nʋɔ sɛ, <<Wʋ daga sɩŋ.>>

67 Sɛ ba tɔ mɩtalɩŋ dʋ wʋ a asanaŋ sɛ ba jɔ ɩ dikuntunkuŋ, sɛ barɛ dʋɔ kpa ɩ gabasɛ. 68 Sɛ ba tawɩ ɩ sɛ, <<Sɛ nyaŋ nyina Kirisito wʋŋ na, gbala kalaa daa wʋŋ wʋ jɔ nyaŋ na.>>

69 Saŋa gana na, Petero chaɩ waa gaa naŋ, dɩmaŋ sɛ tʋmɩrɛ galibie wʋrʋ kɔŋ wʋ jaŋ gaa tawɩ ɩ sɛ, <<Nyaŋ gba nya kpi Yesu Galaliya wʋkpa wʋŋ dʋɔ.>>

70 Ama Petero pɩɛ ŋɛ ba kpiniŋ ba asanaŋ sɛ, <<Ma ba jiŋ wɩɛ ŋii nyaa tawɩ na a.>>

71 Sɛ Petero lɩɩ ju waa buonɔ, dɩmaŋ sɛ galibie wʋrʋ ti na ɩ, sɛ wʋ tawɩ fa baa ba wɩɛ dɩmaŋ na sɛ, <<Baalɛ wina kpi Yesu Nasarati wʋkpa wʋŋ dʋɔ.>>

72 Sɛ Petero ti bɔrɛ pɩɛ ka ntaŋ sɛ, <<Ma ba jiŋ baalɛ wina a!>>

73 Gʋ dɩ yɩɛ chonii na, baa ba sɩmɩɛɩ dɩmaŋ na kɔŋ Petero jaŋ gaa tawɩ ɩ sɛ, <<Gasiŋteŋ, nya yɩɛ ba tɩba wʋrʋ bɛ. Akala takɩɛ nya dɩtawɩ aaŋ kalaa.>>

74 Sɛ Petero fara wʋ a tawɩ wʋ wʋsɛ nʋɔsɛ sɛ wʋ ka ntaŋ sɛ, <<Ma ba jiŋ baalɛ wina a!>>

Gabʋanaŋ sɛ dijimba kɔlɛ. 75 Sɛ Petero nyiŋi wɩɛ ŋii Yesu tawɩ ɩ na sɛ, <<Pɔɩ na dijimba a kɔlɛ na, nyaa pɩɛ butoro sɛ n ba jiŋ maŋ ŋ.>> Sɛ Petero lɩɩ ju asʋŋ ga wii fɔɩ.