1 Dɩmʋŋ saŋa gana na, Juo Hɛrɔdɩ wʋŋ wʋ yɩɛ juo Galaliya tibi dʋɔ na nyii Yesu wʋsɛ dʋɔ wɩɛ, 2 sɛ wʋ tawɩ wʋ bɩnɩɛ sɛ, <<Wina n nyina Yohane Ɩsʋɔ Sɔrɛ wʋŋ wʋ feŋ lɩɩ sɩŋ naŋ na, dɩmʋŋ dʋɔ sɛ wʋ wɩɛna yikuo wʋ a yɩɛ adaŋgana ŋina.>>

3 Hɛrɔdɩ wina n cha yela sɛ ba chaŋ Yohane Ɩsʋɔ Sɔrɛ wʋŋ, sɛ ba mʋ dɩgbaraŋgbaraŋ pɔgʋ ɩ mʋ ɩ tɔ danɛ, akala takɩɛ Yohane n kpa sɛ wʋ n lɩɛ wʋ nabu Filipo alʋ Hɛrɔdɩya saa a. 4 Yohane a tawɩ ɩ saŋa kʋma sɛ, <<Mosesi mbara n fa gbɩɛ sɛ nyaŋ Hɛrɔdɩ n saa nnabu alʋ ʋ.>> 5 Hɛrɔdɩ cha wʋ a ja wʋ a kʋ Yohane ama wʋ a se bakpa baa, akala takɩɛ bakpa baa kpiniŋ lɩɛ Yohane di gʋ wʋ yɩɛ Ɩsʋɔ ɔja bɛ.

6 Gʋ Juo Hɛrɔdɩ lʋrʋ wɩɩ talɛ na, wʋ yagɛ asadi adiya di. Dɩmaŋ sɛ Hɛrɔdɩya bu galibie sʋɛ fa ba sɛ dɩ su Juo Hɛrɔdɩ asa fɔɩ 7 sɛ wʋ ka ntaŋ tawɩ galibie wʋŋ sɛ bʋrʋkʋma gaa wʋ a tasɛ ɩ na wʋ a fa ɩ. 8 Sɛ wʋnaa tawɩ ɩ sɛ ju ga tawɩ Juo Hɛrɔdɩ sɛ, <<Fa maŋ Yohane Ɩsʋɔ Sɔrɛ wʋŋ nyi taŋgiraŋ dʋɔ.>> 9 Juo Hɛrɔdɩ asa n lɩɛ ɛ, ama ntaŋ ŋii wʋ ka na baa wʋ lɔ pam yagɛ ba na dʋɔ, wʋ dʋ sɛ ba n yɩɛ ŋii galibie wʋŋ tasɛ na fa ɩ 10 sɛ wʋ yela sɛ ba ga kara Yohane nyi danɛ dɩtʋɔtɩŋ. 11 Sɛ ba ju ga kara wʋ nyi mʋ jaga taŋgiraŋ dʋɔ mʋ kɔna galibie wʋŋ. Sɛ wʋ mʋ ju ga fa wʋnaa. 12 Sɛ Yohane kpalɛnara baa kɔŋ gaa mʋ wʋ gɩtatɛ ga wuu. Sɛ ba ju ga tawɩ Yesu.

13 Gʋ Yesu nyii ŋii ŋɩ tibi na, wʋ jʋʋ buori naŋ ju ifuli dʋɔ. Gʋ jama baa nyii dɩmʋŋ na, ba pala lɩɩ akpie dʋɔ kpaŋ ɩ. 14 Gʋ Yesu tibi buori naŋ sɛ wʋ na bakpa fɔɩ baa na, ba wɩɛ yɩɛ ɩ gɩyɔŋ sɛ wʋ chɔ ba tɩba lʋmɩɛtina.

15 Gʋ dɩ tala bʋyanɔ na, wʋ kpalɛnara baa kɔŋ wʋ jaŋ gaa tawɩ ɩ sɛ, <<Jɩna yɩɛ ifuli dʋɔ bɛ tɩɛ dʋɔ tam. Lɩsɛ bakpa fɔɩ baa gbɩɛ na baa ju dɩɛsɛ bisi naŋ na ba tɩŋtɩŋ baa ju ga lɩɛ adiya di.>>

16 Sɛ Yesu lɩsɛ nʋɔ sɛ, <<Ŋɩ n daga baa laŋ ŋ. Amɩɛ tɩŋtɩŋ n fa ba adiya na baa di.>>

17 Sɛ wʋ kpalɛnara baa lɩsɛ ɩ nʋɔ sɛ, <<Bodobodo anʋŋ na aji bala nyiŋeŋ sɛ dɩ wɩɛna.>>

18 Sɛ wʋ tawɩ ba sɛ, <<N mʋ ŋɛ kɔna maŋ jɩna.>> 19 Sɛ wʋ yela sɛ bakpa baa cha kasɛ ŋii dʋɔ. Sɛ wʋ mʋ bodobodo anʋŋ ŋii na aji bala baa, sɛ wʋ kɩɛ Ɩsʋɔ adugbe yɩlɩ Ɩsʋɔ. Sɛ wʋ jaɩ mʋ fa wʋ kpalɛnara baa sɛ ba n mʋ fa bakpa baa. 20 Sɛ wʋkʋma di sɛ wʋ pawʋ. Sɛ wʋ kpalɛnara baa tɔɔsɩ ŋii ba di kakaa na gachaŋasɛ gifi ala. 21 Baala baa ba di adiya ŋii na nʋɔ yɩɛ kɔrʋɔsɛ sɩ nʋŋ (5,000) yela ala na bachaasɛ n kpi i.

22 Sɛ Yesu yela sɛ wʋ kpalɛnara baa jʋʋ buori naŋ pala wʋ asanaŋ ju lɩɩ gatɩɛsa. Sɛ wʋ dʋɔ wʋrʋgbɩɛ tii jama baa gbɩɛ. 23 Gʋ wʋ tii ba gbɩɛ taŋ na, sɛ wʋ ju bʋrɔŋ dʋɔ wʋ nyiŋeŋ na wʋ a ga jɔ dɩga. Gʋ dɩ tala bʋyanɔ na, wʋ wɩɛ dɩmaŋ wʋ nyiŋeŋ. 24 Dɩmʋŋ saŋa gana na, buori gaa tala lɩɩ gaa tɩtɩba, sɛ feliŋ janɛ na apaa jɔ sɛ dɩ cheŋkpeŋ buori gaa.

25 Aja yɩɛ Tafɩlɛ karafɩɛ anara saŋa na sɛ Yesu pala lɩŋ ŋii dʋɔ wʋ a kɔŋ ba jaŋ. 26 Gʋ wʋ kpalɛnara baa na ɩ wʋ pala lɩŋ ŋii dʋɔ wʋ a kɔnɛ na, nyɩŋtɩɛ chaŋ ba, sɛ ba kuusi nyɩŋtɩɛ naŋ tawɩ sɛ, <<Gɩtatɩrɛ bɛ.>> 27 Gabʋanaŋ sɛ Yesu tawɩ ba sɛ, <<N yu digela. Maŋ bɛ. N baa yɩɛ nyɩŋtɩɛ.>>

28 Sɛ Petero lɩsɛ ɩ nʋɔ sɛ, <<Kpaŋjuo, sɛ ŋɩ yɩɛ nyaŋ na, yela maa pala lɩŋ ŋii dʋɔ kɔŋ n jaŋ.>>

29 Sɛ wʋ tawɩ sɛ, <<Kɔŋ.>> Sɛ Petero tibi lɩɩ buori gaa naŋ pala lɩŋ ŋii dʋɔ wʋ a ju Yesu jaŋ.

30 Ama gʋ wʋ na feliŋ janɛ a jɔ na, nyɩŋtɩɛ chaŋ ɩ, sɛ wʋ fara wʋ a muru. Sɛ wʋ kuusi sɛ, <<Kpaŋjuo, mɔlɔgɩ maŋ!>>

31 Gabʋanaŋ sɛ Yesu tɩɛŋɩ wʋ pam chaŋ wʋ tɩba tawɩ ɩ sɛ, <<Nyaŋ, n lɩɛdi n bɔla a. Be n yɩɛ sɛ nya n lɩɛ maŋ di?>>

32 Gʋ ba jʋʋ buori gaa naŋ na sɛ feliŋ janɛ ŋii yeli. 33 Sɛ wʋ kpalɛnara baa ba wɩɛ buori gaa naŋ na luuŋ tʋŋ ɩ tawɩ sɛ, <<Gasiŋteŋ, nya yɩɛ Ɩsʋɔ Bu wʋŋ bɛ.>>

34 Sɛ Yesu na wʋ kpalɛnara baa tɩɛsɛ lɩɩ kɔŋ Jenesareti tibi dʋɔ. 35 Gʋ dɩɛ gana bakpa jiŋ Yesu na, ba kpiri tawɩ dɩɛsɛ ŋii ŋɩ logo tibi gaa dʋɔ na kpiniŋ. Sɛ bakpa mʋ ba lʋmɩɛtina kpiniŋ kɔŋ wʋ jaŋ 36 gaa sʋlʋ ɩ sɛ wʋ n yela na lʋmɩɛtina a mʋ ba pamɩɛ tapʋ wʋ adugbe gagba nʋɔ. Sɛ baa ba tapʋ ɩ na kpiniŋ yu lʋm chʋɔ.