1 Sɛ Yesu tawɩ sɛ, <<N baa fu dɩpʋɛ na Ɩsʋɔ gba n baa fu amɩɛ dɩpʋɛ. 2 Akala takɩɛ ganaŋkʋ ɩ di wʋrʋ wɩɛ na, dɩmʋŋ sɛ Ɩsʋɔ a ja di amɩɛ wɩɛ. Mudu gaa ɩ mʋ kalaa bʋrʋ darɛ fa wʋrʋ na, gaa sɛ Ɩsʋɔ gba aja wʋ a mʋ kalaa fa amɩɛ.>>

3 <<Be n yɩɛ sɛ nyaa kɩɛ kabie gaa ga jagaɩ n dɩɛtɛ dɩsɛ dʋɔ, ama dakpie gaa ga jagaɩ n tɩŋtɩŋ n dɩsɛ dʋɔ na bɩrɛ, nyaa na a? 4 Sɩnɛ sɛ nyaa dɩlɛ tawɩ n dɩɛtɛ sɛ, <Yela na maa lɩsɛ kabie gaa ga jagaɩ n dɩsɛ dʋɔ,> yela dakpie jagaɩ n tɩŋtɩŋ n dɩsɛ dʋɔ? 5 Nyaŋ aluguusitɛ, chɩŋkpɩɛ lɩsɛ dakpie n tɩŋtɩŋ n dɩsɛ dʋɔ na nyaa na na dieli, na nyaa dɩlɛ lɩsɛ kabie n dʋɔ dɩsɛ dʋɔ.>>

6 <<N baa mʋ bʋrʋ gaa ga yɩɛ chɩrɩchɩrɩ na fa paasɛ, dɩmʋŋ sɛ n baa mʋ bʋɛ abama lɔ fa ɔvaaba. Ɩ yɩɛ dɩmʋŋ na baa chicha ŋɛ na paasɛ baa gba a fu amɩɛ dʋɔ na baa tawʋ amɩɛ.>>

7 Sɛ Yesu ju dʋɔ tawɩ sɛ, <<N tasɛ Ɩsʋɔ na wʋ a fa amɩɛ, n ja na ɩ na. N jɔ ɩ bʋɔlɛ na wʋ a tʋlʋ amɩɛ. 8 Akala takɩɛ wʋkʋma wʋŋ wʋ tasɛ Ɩsʋɔ na, wʋ a fa ɩ. Wʋŋ wʋ a jawʋ na, wʋ a na. Dɩmʋŋ sɛ wʋŋ wʋ a jɔ ɩ bʋɔlɛ na, wʋ a tʋlʋ ɩ.>>

9 Sɛ wʋ ju dʋɔ tawɩ sɛ, <<Amɩɛ tɩba wʋ Mmʋɔ bu n tasɛ ɩ bodobodo na sɛ wʋ a fa ɩ bʋɩ? 10 Yaa wʋ tasɛ ɩ diji na wʋ a fa ɩ dʋm? 11 Amɩɛ baa ɩ yɩɛ dɩsʋbʋ yɩɛra na gba jiŋ ganaŋkʋ ɩ mʋ abʋrɩ abama ɩ fa amɩɛ bie, be n yɩɛ sɛ amɩɛ Juo wʋŋ wʋ wɩɛ Ɩsʋɔ adugbe na baa mʋ abʋrɩ abama fa baa baa tasɛ ɩ naa?>> 12 Dɩmʋŋ dʋɔ bʋrʋkʋma naŋ na, n yɩɛ fa amɩɛ dɔŋa takɩɛ ganaŋkʋ ɩ ja sɛ ba n yɩɛ fa amɩɛ na. Ŋina n nyina Mosesi mbara na Ɩsʋɔ bajana baa kalaa ŋii.

13 Sɛ Yesu tawɩ sɛ, <<N mʋna buonɔ mɔmɔkyɩ gaa naŋ. Akala takɩɛ buonɔ ga yalagisa na gbɩɛ ga yalagisa aaŋ ju dɩwarɩɛ naŋ. Dɩmʋŋ dʋɔ bakpa fɔɩ aaŋ mʋna ga baa jʋʋ. 14 Ama buonɔ pii na gbɩɛ mɔmɔkyɩ aaŋ ju nkpa naŋ. Dɩmʋŋ dʋɔ bakpa pii barɛ aaŋ na ga baa mʋna.>>

15 Sɛ Yesu ju dʋɔ tawɩ sɛ, <<N kɩɛ amɩɛ wʋsɛ dʋɔ na dieli akarɩɛ bajana dʋɔ. Baa kɔŋ amɩɛ jaŋ takɩɛ feŋ, ama ba tɩba bɩrɛ ba kɩɛna bɛ takɩɛ gbogboo aba baa ba libi na. 16 Ba ayɩɛsa sɛ ɩ mʋ jiŋ ba. Bakpa a kɔ ponponsi bie lɩɩ sɔba daŋ dʋɔ yaa dikutu lɩɩ didiŋpo daŋ dʋɔ? 17 Dɩmʋŋ sɛ daŋ bam kʋma a si bie abama, sɛ daŋ sʋbʋ kʋma dʋɔ a si bie asʋbʋɛ. 18 Daŋ bam baa dɩlɛ si bie asʋbʋɛ ɛ, sɛ daŋ sʋbʋ dʋɔ baa dɩlɛ si bie abama a. 19 Daŋ kʋma gaa gaa si bie abama na, baa wʋŋ ga bɛ lɔ na baa mʋ ga dʋ bʋala naŋ. 20 Dɩmʋŋ dʋɔ ba ayɩɛsa sɛ ɩ mʋ jiŋ ba.>>

21 Sɛ Yesu ju dʋɔ tawɩ sɛ, <<Naa wʋkʋma wʋŋ wʋ a yagɛ maŋ sɛ Kpaŋjuo, kpaŋjuo na aaŋ ja wʋ a ju Ɩsʋɔ Juori gaa naŋ ŋ, amʋɔ wʋŋ wʋ a yɩɛ Majuo wʋŋ wʋ wɩɛ Ɩsʋɔ adugbe jawʋ na.>> 22 Bakpa fɔɩ aja tawɩ maŋ Ɩsʋɔ dɩpʋɛ fuu wɩɩ sɛ, <<Kpaŋjuo, Kpaŋjuo, naa n yɩrɛ naŋ sɛ dɩ tawɩ Ɩsʋɔ wɩɛ ɛ, naa n yɩrɛ naŋ sɛ dɩ geŋ feliŋ sʋbʋ lɩɩ bakpa tɩba, sɛ dɩ yɩɛ adaŋgana fɔɩ? 23 Ama maa tawɩ tʋlʋ ba sɛ, ma ba jiŋ amɩɛ ɛ. N lɩɩ ma jaŋ, amɩɛ dɩsʋbʋ yɩɛra!>>

24 Sɛ Yesu ju dʋɔ tawɩ sɛ, <<Dɩmʋŋ dʋɔ, wʋkʋma wʋŋ wʋ a nyii ma wɩɛ ŋina sɛ wʋ a di ŋɩ dʋɔ na kɩɛna bɛ takɩɛ baalɛ wɩɛ jɩmɩrɛ wʋŋ wʋ ma wʋ danɛ jaga bʋɛ dʋɔ. 25 Duoni janɛ nɩɛ sɛ buosɛ suu, sɛ feliŋ janɛ jɔ danɛ gaa ama ga n sala a, akala takɩɛ ba si tie dɩpɔrɛ jaga bʋɛ dʋɔ. 26 Ama wʋkʋma wʋŋ wʋ a nyii ma wɩɛ ŋina, sɛ wʋ aa di ŋɩ dʋɔ na kɩɛna bɛ takɩɛ baalɛ wʋmalaŋpʋ wʋŋ wʋ ma wʋ danɛ jaga tɩɛra dʋɔ. 27 Duoni janɛ nɩɛ sɛ buosɛ suu, sɛ feliŋ janɛ jɔ dɩmʋŋ danɛ gana sɛ ga salɩɛ kpiniŋ-kpiniŋ.>>

28 Gʋ Yesu tawɩ ŋina taŋ na, wʋ kalaa ŋii yɩɛ bakpa baa doba. 29 Akala takɩɛ wʋ kalaa-kalaa ba takɩɛ wʋkpa wʋŋ wʋ wɩɛna yikuo, ama naa takɩɛ ba mbara bakalaasa baa a.