1 Saŋa gana naŋ Yohane Ɩsʋɔ Sɔrɛ kɔŋ Yudiya ifuli dʋɔ gaa jɔ Ɩsʋɔ wɩɛ dawuta 2 sɛ, <<N biliŋi lɩɩ amɩɛ dɩsʋbʋ naŋ na ɩ kɔŋ Ɩsʋɔ jaŋ akala takɩɛ Ɩsʋɔ Juori gaa tirina.>> 3 Yohane wina sɛ Ɩsʋɔ pala na ɔja Yisaya dʋɔ chɩŋkpɩɛ sabɩɛ Ɩsʋɔ wɩɛ si sɛ,

Lofu garɛ a kuusi ifuli dʋɔ sɛ,

<<Desina gbɩɛ si fa Kpaŋjuo wʋŋ,

na ɩ chirigi gbɩɛ fa ɩ.>>✝

4 Yohane gagba gaa wʋ cha wʋ fuona na, nyɔma fʋŋda sɛ ba mʋ lʋ ga, sɛ wʋ mʋ nam tanɛ tɩŋa naŋ ganya pɔgʋ wʋ tɩŋa naŋ. Wʋ adiya ŋii wʋ a di na yɩɛ aforo na tɩbʋɔ lɩŋ. 5 Bakpa lɩɩ Yerusalem dɩɛ naŋ, Yudiya tibi dʋɔ kpiniŋ na tibi gaa ga tirina Yodaŋ buo na kpiniŋ kɔŋ wʋ jaŋ. 6 Gʋ ba kɔnɛ na ba tawɩ ba dɩsʋbʋ sɛ wʋ sɔ ba Ɩsʋɔ sɔ Yodaŋ buo naŋ.

7 Gʋ Yohane na Farasitina na Sadukitina baa kpiniŋ kɔŋ wʋ jaŋ sɛ wʋŋ sɔ ba Ɩsʋɔ sɔ na, sɛ wʋ tawɩ ba sɛ, <<Dʋmɩɛ sɔrɛtina, Mmʋɔ n jɔ amɩɛ nyienaŋ sɛ n se lɩɩ Ɩsʋɔ biŋbira ŋii wʋ chamɩna wʋ a kɔŋ amɩɛ dʋɔ na?>> 8 N yela na amɩɛ ayɩɛsa a kalaa takɩɛ ɩ biliŋi lɩɩ amɩɛ dɩsʋbʋ naŋ. 9 N baa fa nfɩɛrɛ na ɩ tawɩ amɩɛ wʋsɛ sɛ, <<Abiraham yɩɛ daa duluŋ bɛ.>> Maa tawɩ amɩɛ sɛ, Ɩsʋɔ a dɩlɛ mʋ bʋɛ ŋina yɩɛ ganana bie fa Abiraham. 10 Ba fɩla mʋ dɩkpaŋfa ga jaga dasɛ ŋii lira dʋɔ, daŋ kʋma gaa gaa si bie abama na, baa wʋŋ ga lɔ na baa mʋ lɔ dʋ bʋala naŋ.

11 Wʋ tawɩ bakpa baa sɛ, <<Maŋ bɩrɛ, ma mʋ lɩŋ bɛ sɔ amɩɛ Ɩsʋɔ sɔ na ŋii kalaa sɛ ɩ biliŋi lɩɩ amɩɛ dɩsʋbʋ naŋ. Ama wʋŋ wʋ a kɔŋ ma wʋrʋgbɩɛ na yɩɛ wʋ janɛ kii maŋ, ma n daga na maa sɩlɛ wʋ asibita a. Wʋŋ bɩrɛ, Ɩsʋɔ Feliŋ ŋii na bʋala sɛ wʋ a mʋ sɔ amɩɛ.>> 12 Wʋ chamɩna bʋrʋ gafalɩsa wʋ pam naŋ na wʋ a mʋ fala lɩsɛ gamɩsɛ lɩɩ duofu naŋ ŋɩ dɩkpalaŋ naŋ, na wʋ a kui bie ŋii dʋ wʋ dichonkon naŋ. Ama duofu ŋii bɩrɛ, wʋ a tʋ ŋɛ bʋala gaa gaa dum na naŋ.

13 Yesu lɩɩ Galaliya tibi dʋɔ kɔŋ Yohane Ɩsʋɔ Sɔrɛ wʋŋ jaŋ sɛ wʋ n sɔ ɩ Ɩsʋɔ sɔ Yodaŋ buo naŋ. 14 Ama Yohane pɩɛ sɛ wʋ tawɩ sɛ, <<Maŋ n daga na nyaa sɔ maŋ Ɩsʋɔ sɔ sɛ nyaŋ n kɔŋ ma jaŋ?>>

15 Ama Yesu lɩsɛ nʋɔ sɛ, <<Saŋa gana yela na a yɩɛ dɩmʋŋ. Dɩ daga na dɩɩ yɩɛ ŋina ganaŋkʋ Ɩsʋɔ jawʋ a kɔŋ tɩba. Sɛ Yohane nyii tie.>>

16 Gʋ Yohane sɔ Yesu Ɩsʋɔ sɔ taŋ sɛ wʋ lɩɩ lɩŋ ŋii naŋ na, kɩɛ gabʋanaŋ sɛ Ɩsʋɔ adugbe fulu sɛ wʋ na gʋ Ɩsʋɔ Feliŋ tibi a kɔŋ wʋ dʋɔ takɩɛ juori gakuo na duoni ŋmaŋi. 17 Sɛ lofu lɩɩ Ɩsʋɔ adugbe kɔŋ sɛ, <<Wina n nyina mabu wʋŋ maa ja wʋ wɩɛ, ma asa su wʋ dʋɔ.>>