1 ଅ ବୟାଁ ଆରି ତନାଇଂ, ଏନ୍‌ ସାପା ପାର୍‌ମାନ୍‌ ନେ ଇସ୍‌ପର୍‌ନେ ବାନ୍ ବାନେଲେଃକେ । ତେସା ପାଙ୍ଗ୍‌ଲାପା ଗାଗ୍‌ଡ଼େ ବାରି ଆତ୍ମାକେ ଦଦ୍ୟା ଡିଙ୍ଗ୍‌ମ୍ୟାକ୍ନେ ସାପା ବିସୟ୍‌ବାନ୍‌ ନିଜେ ନିଜେକେ ପର୍‌ଚଲ୍‌ ନେଡିଙ୍ଗ୍‌ପା । ବାରି ଇସ୍‌ପର୍‌କେ ବୁଟଚେ ସମାନ୍ ପବିତ୍ର ରକମ୍‌ ବାସା ନେଃଲେପା ।

2 ପେଇଂନେ ଗାଗ୍‌ଡ଼େନ୍ନିଆ ଆନେକେ ଜାଗା ବିଃପା । ନେନେ ଜାଣ୍ଡେନେ ଆଡ଼ାତ୍ରା ଅନ୍ୟାୟ୍ ନେଡିଙ୍ଗ୍‌କେ ଣ୍ଡୁ, ଜାଣ୍ଡେନେ ମେଃଡିଗ୍‌ ନସ୍ଟ ନେଡିଙ୍ଗ୍‌କେ ଣ୍ଡୁ ଣ୍ଡୁଲା ଜାଣ୍ଡେନେବାନ୍‌ ମେଃଡିଗ୍‌ ପାଇଦା ଉଟେନ୍‌ସା ଚେସ୍‌ଟା ନେଡିଙ୍ଗ୍‌କେ ଣ୍ଡୁ । 3 ଆପେକେ ଦସ୍ ବିନ୍‌ସା ନେଙ୍ଗ୍ ଏନ୍‌ ସାମୁଆଁ ବାସଙ୍ଗ୍‌ ନାଡିଙ୍ଗ୍‌କେ ଣ୍ଡୁ । ନେଙ୍ଗ୍ ସେନୁଗ୍‌ ବାସଙ୍ଗ୍‌ମ୍ୱକେ, ପେଇଂ ନେନେ ଅଃକେନ୍ ଇକ୍‌ଚା ଜେ ନେଃ ନେଃମ୍ୱ୍ରଲା ମୁଇଂଅରିଆ ନେଃମ୍ୱ୍ରପା ବାରି ଗୁଏଃଲା ମୁଇଂଅରିଆ ନେଃଗୁଏଃପା । 4 ପେଇଂନେ ଆଡ଼ାତ୍ରା ନେଙ୍ଗ୍‌ନେ ମାଲେ ବିସ୍‌ବାସ୍‌ ଲେଃକେ । ପେଇଂନେ ସା ନେଙ୍ଗ୍‌ନେ ଗରବ୍‌ ଡିଗ୍ ଜାବର୍ । ଦୁକ୍ କସ୍ଟ ବେଲା ନେଙ୍ଗ୍ ଗୁଲୁଏ ସାହାସ୍ ଆଃସୁଏମ୍ୱକେ । ସାର୍ଦାରେ ଲାଡ଼୍ୟା ୱେଣ୍ଡିଙ୍ଗ୍‌ ।

5 ✝ଦେକ୍‌ରକମ୍ କି ମାସିଦୋନିଆନିଆ ୱେଚାଚେ ଡିଗ୍ ନେପୁଣ୍ଡେକେ ଣ୍ଡୁ । ସାପା ଡାଗ୍ରା ସାନ୍ତି ଣ୍ଡୁ ବାରି ବିତ୍‌ରେ ବୁଟମେଗ୍‌, ଡେକ୍‌ରକମ୍‌ ସାପା ରକମ୍‌ କଲ୍‌କଲା ଲାଗେ ଲେଃଗେ, ତେସା ନେନେ ଗାଗ୍‌ଡ଼େନ୍ନିଆ ସାନ୍ତି ଆଲେଃଗେ ଣ୍ଡୁ । 6 ମାତର୍‌ ଗାଡ଼୍‌ସୁ ରେମୁଆଁକେ ସାନ୍ତି ବିମ୍ୟାକ୍ନେ ଇସ୍‌ପର୍ ତିତସ୍‌କେ ବେଚେ ଆନେକେ ସାନ୍ତି ବିବକେ । 7 ମାତର୍‌ ମେଁନେ ପାଙ୍ଗ୍‌ନେ ବାନ୍ ଣ୍ଡୁ ମାତର୍‌ ମେଁ ପେଇଂନେ ଡାଗ୍ରା ୱେଚେ ଆଣ୍ଡିନେ ସାନ୍ତି ବାଲେଃକେ ଆତ୍‌ବାନ୍ ନେନେ ସାର୍ଦା ଡିଙ୍ଗ୍‌ନେଲେଃକେ । ଆନେଙ୍ଗ୍ କେନ୍‌ସା ପେଇଂନେ ଉଡ଼ି ଇକ୍‌ଚା ନେଙ୍ଗ୍ ନ୍‌ସା ପେନେ ଉଡ଼ି ଦୁକ୍ ଆନେଙ୍ଗ୍ ସାପଟ୍‌ ଡିଙ୍ଗ୍‌ନ୍‌ସା ପେ ଉଡ଼ି ତେରେପେତେ ଏନ୍‌ ସାପା ବିସୟ୍ ମେଁ ଆନେଙ୍ଗ୍ ଆମ୍ୟାବକେ । ଇଡ଼ିଙ୍ଗ୍ ନେଙ୍ଗ୍ ଜାବର୍ ସାର୍ଦା ଣ୍ଡିଙ୍ଗ୍‌କେ ।

8 ନେଙ୍ଗ୍‌ନେ ଚିଟି ପଡ଼େଚେ ପେଇଂ ଦୁକ୍ ଡିଙ୍ଗ୍‌ପେଲେଃଲା ଡିଗ୍ ଆତେନ୍‌ ଉଲିଆଃ ଗୁଆର୍‌ ବଲା ନେଙ୍ଗ୍ ମନ୍‌ନ୍ନିଆ ମେଃଡିଗ୍‌ ଦୁକ୍ ଣ୍ଡୁ । ଉଲିଆଃ ଆପେକେ ପ୍ରେଗ୍‌ ନ୍‌ସା ଦୁକ୍ ଡିଗ୍ ବଲା ନେଙ୍ଗ୍ ଦୁକ୍ ମ୍ପାଡିଙ୍ଗ୍‌ । 9 ମାତର୍‌ ପେନେ ମନ୍‌ନ୍ନିଆ ଦୁକ୍ ବିବଲା ଣ୍ଡୁ ମାତର୍‌ ଏନ୍‌ ଦୁକ୍ ପେଇଂନେ ଜିବନ୍‌ନେ ମନ୍ ବଦ୍ଲେ ବିବଲା ଏବେ ନେଙ୍ଗ୍ ସାର୍ଦା ଡିଙ୍ଗ୍‌ଣ୍ଡିଂକେ । ଇସ୍‌ପର୍‌ନେ ଇକ୍‌ଚା ରକମ୍‌ ପେଇଂ ଏନ୍‌ ଦୁକ୍ ବାପେଲେକେ । ତେସା ନେନେ ବାନ୍ ପେଇଂ ମେଃଡିଗ୍‌ ରକମ୍‌ ନସ୍ଟ ପେଡିଙ୍ଗ୍‌କେ ଣ୍ଡୁ । 10 ଡାଗ୍ଲା ଇସ୍‌ପର୍‌ନେ ଇକ୍‌ଚା ଅନୁସାରେ ଆଣ୍ଡିନେ ଦୁକ୍ ବାନ୍ ଉଦାର୍ ପେବାକେ ବାରି ମନ୍ ବଦ୍ଲେ ପେଡିଙ୍ଗ୍‌କେ ଆତେନ୍‌ସା ଦୁକ୍ ଡିଙ୍ଗ୍‌ନେ ଦର୍‍କାର୍‌ ଣ୍ଡୁ । ମାତର୍‌ ସଂସାର୍‌ନେ ଦୁକ୍ ଗୁଏନେ ଡୁଙ୍ଗ୍‌ପାଙ୍ଗ୍‌ଏ । 11 କେଲାପା, ଇସ୍‌ପର୍‌ନେ ଇକ୍‌ଚା ଅନୁସାରେ ପେଇଂ ଆଣ୍ଡିନେ ଦୁକ୍ ପେବାକେ ଆତେନ୍‌ ପେଇଂନେ ମନ୍‌ନ୍ନିଆ ଉଡ଼ି ଇକ୍‌ଚା ଉଡ଼ି ବୁଟ ଉଡ଼ି ସାର୍ଦା ନେନେ ଏତେ ମିସେନ୍‌ସା ପେଇଂନେ ବିତ୍ରେ ଇକ୍‌ଚା ଜାଗ୍ରତ୍ ଡିଙ୍ଗ୍ ବକେ । ଏନ୍‌ ଆପେକେ ଜାବର୍ ଅପେଃ ଡିଂକେ । ଏନ୍‌ ଆପେକେ ନ୍ୟାୟ୍ ବିବକେ । ପେଇଂ ସାପା ସାମୁଆଁକେ ପର୍‌ମାନ୍‌ ଡିଙ୍ଗ୍ ବିପେବକେ ଜେ ପେଇଂ ଆତେନ୍‌ ଜାମ୍‌ଲାନେ ମେଃଡିଗ୍‌ ଇଃକୁଡ଼ା ନ୍‌ସା ଡିଗ୍ ଦସ୍ ଣ୍ଡୁ ଡାଗ୍‌ଚେ ପାର୍‌ମାନ୍ ବିଃପେବକେ ।

12 ପେଇଂନେ ବିତ୍ରେ ଜା ଅନ୍ୟାୟ୍ ଡିଙ୍ଗ୍‌ବକେ ବା ଜା ଅନ୍ୟାୟ୍ ସାମ୍ୱାଲେକେ ମେଁନେ ଉଦେସ୍‌ରେ ନେଙ୍ଗ୍ ଆତେନ୍‌ ଚିଟି ଗୁଆର୍‌ ନାବକେ ଣ୍ଡୁ । ବାରି ଇସ୍‌ପର୍‌ନେ ମୁଆଃନ୍ନିଆ ନେନେ ଆଡ଼ାତ୍ରା ପେନେ ବକ୍‌ତି ଉଡ଼ି ସ୍ରି ବାରି । 13 ଆତେନ୍‌ସା ନେନେ ଉଡ଼ି ସାର୍ଦା ଆତେନ୍‌ ଆମ୍ୟାବିନ୍‌ସା ନେଙ୍ଗ୍ ଆତେନ୍‌ ଚିଟି ଗୁଆର୍‌ମ୍ୱକ୍ନେ ମାତର୍‌ ସାର୍ଦା ନେଡିଙ୍ଗ୍‌କେ ଣ୍ଡୁ । ପେଇଂ ତିତସ୍‌କେ ସାପା ରକମ୍‌ ସାଇଜ ଡିଙ୍ଗ୍‌ଚେ ଡିରକମ୍ ବାବ୍‌ରେ ସାର୍ଦା ଡିଙ୍ଗ୍‌ପେବକେ ଆତେନ୍‌ ଆନେକେ ଜାବର୍ ସାର୍ଦା ବିବକେ । 14 ମେଁନେ ଡାଗ୍ରା ପେଇଂନେ ସା ନେଙ୍ଗ୍ ବଡ଼୍‌ପନ୍‌ ଡିଙ୍ଗ୍‌ମ୍ୱକେ । ବାରି ଆତେନ୍‌ସା ନେଙ୍ଗ୍ ବାଆଃ ଆଲ ଡିଙ୍ଗ୍ ଆୱେକେ ଣ୍ଡୁ । ଡିରକମ୍ ପେଇଂନେ ଡାଗ୍ରା ନେନେ କାଲାଆଃ ସତ୍ ବାସଙ୍ଗ୍‌ ପାଙ୍ଗ୍‌ନେଡିଙ୍ଗ୍‌କେ ଦେତ୍‌ରକମ୍ ତିତସ୍‌ନେ ଡାଗ୍ରା ନେନେ ଡିଙ୍ଗ୍ ନେବକ୍ନେ ବଡ଼୍‌ପନ୍‌ ମିଚ୍ ଡାଗ୍‌ଚେ ପର୍‌ମାନ୍‌ ଆଡିଙ୍ଗ୍‌କେ ଣ୍ଡୁ । 15 ପେଇଂ ସାପାରେ ଡିରକମ୍ ବାବ୍‌ରେ ମେଁନେ ବାଦ୍ୟ ଡିଙ୍ଗ୍‌ପେଲେକେ ବାରି ବୁଟ ବାରି ଜୁର୍‌ଚେ ଗାଗ୍‌ଡ଼େନ୍ନିଆ ଆମେକେ ଗ୍ର‍ଅନ୍‌ ଡିଙ୍ଗ୍‌ପେବକେ ଏନ୍‌ ସାମୁଆଁ ଏତେଚେ ପେଇଂନେ ଆଡ଼ାତ୍ରା ମେଁନେ ଆଲାଦ୍‌ ବାରି ମ୍ନା ୱେଗେ । 16 ପେଇଂନେ ଆଡ଼ାତ୍ରା ଆସା ବନେ ୟାଲା ନେଙ୍ଗ୍ ଉଡ଼ି ସାର୍ଦା ।