1 ଆକେନ୍‌ ବେଲା ହାଗୟ ବବିସତ୍‌ ବକ୍ତା ବାରି ଇଦ୍ଦୋନେ ଉଂଡେ ଜିଖରିୟ, ଆକେନ୍‌ ବବିସତ୍‌ ବକ୍ତାଇଂ ଯିହୁଦା ବାରି ଯିରୂଶାଲମ ଡାଗ୍ରା ବାସାଲେଃକ୍ନେ ଯିହୁଦୀ ରେମୁଆଁଇଂନେ ଡାଗ୍ରା ବବିସତ୍‌ ସାମୁଆଁ ବାସଙ୍ଗ୍‌ଆର୍‌କେ । ମେଇଂ ଇସ୍ରାଏଲ୍‌ନେ ପର୍‌ମେସର୍‌ନେ ମିନିରେ ମେଇଂ ଡାଗ୍ରା ସାମୁଆଁ ବାସଙ୍ଗ୍‌ଆର୍‌କେ । 2 ଆତେନ୍‌ସା ଶଲ୍‌ଟୀୟେଲନେ ଉଂଡେ ଯିରୁବ୍ବାବିଲ ବାରି ଯୋଷାଦକନେ ଉଂଡେ ଯେଶୂୟ ମେଇଙ୍ଗ୍‌ ଏତେ ଯିରୂଶାଲମନ୍ନିଆ ପର୍‌ମେସର୍‌ନେ ଡୁଆ ଆଃରେନ୍‌ସା ଲାଗେଆର୍‌କେ । ବାରି, ପର୍‌ମେସର୍‌ନେ ବବିସତ୍‌ ବକ୍ତାଇଂ ମେଇଙ୍ଗ୍‌ ଏତେ ଲେଃଚେ ଆମେଇଂକେ ସାଇଜ ଡିଂକେ ।

3 ଆତେନ୍‌ ବେଲା ତତ୍ତନୟ, ଲଣ୍ଡିଆ ଇନୁମେତା ଲେଃକ୍ନେ ଦେସ୍‌ନେ ରାଜ୍ୟପାଲ୍‌ ବାରି ଶଥର ବୋଷଣୟ ବାରି ମେଙ୍ଗ୍‌ନେ ସାଙ୍ଗଡ଼େଇଂ ପାଙ୍ଗ୍‌ଚେ ଆମେଇଂକେ ସାଲିଆକୁକେ, ଆକେନ୍‌ ଡୁଆ ଆଃରେନ୍‌ସା ବାରି ଆକେନ୍‌ କାନ୍ଥ କାମ୍‌ ଆଃଲୁଗ୍‌ ନ୍‌ସାଃ ଜା ଆପେକେ ଆଦେସ୍‌ ବିଃକେ ? 4 ତେଲା ନେ ଆମେଇଂକେ ଆତେନ୍‌ ଇସାବ୍‌ରେ ଉତର୍‌ ନେବିଃକେ । ମେଇଂ ସାଲିଆକୁକେ, ଆକେନ୍‌ ଆଃରେଣ୍ଡ୍ରେନେ ମିନି ମେଁନେ ? 5 ମାତର୍‌ ଯିହୁଦୀ ରେମୁଆଁଇଂ ମ୍ନାରେଇଂନେ ଆରାତ୍ରା ମେଙ୍ଗ୍‌ନେ ପର୍‌ମେସର୍‌ନେ ଦୟା ଲାଏଃଗେସାଃ ଦାରୀୟାବସ ଡାଗ୍ରା ଆକେନ୍‌ ସାମୁଆଁ ମାପାଙ୍ଗ୍‌ ଜାକ ବାରି ଚିଟି ଏତେ ଆତେନ୍‌ ବିସ‍ଏରେ ଉତର୍‌ ବାର୍‌ମୁଇଂତର୍‌ ମାପାଙ୍ଗ୍‌ ଜାକ ସତ୍ରୁଇଂ ଆମେଇଂକେ ସ୍ଲେନେ ବାନ୍‌ ମନା ଆଡିଙ୍ଗ୍‌କେ ଣ୍ଡୁ ।

6 ତତ୍ତନୟ, ଲଣ୍ଡିଆ ଇନୁମେତା ଲେଃକ୍ନେ ଦେସ୍‌ନେ ରାଜ୍ୟପାଲ୍‌ ବାରି ଶଥର ବୋଷଣୟ ବାରି ଲଣ୍ଡିଆ ଇନୁମେତାନେ ମେଁନେ ସାଙ୍ଗଡ଼େ ଅଫର୍ସଖୀୟଇଂନେ ଦାରୀୟାବସ ରାଜା ଡାଗ୍ରା ପାଙ୍ଗ୍‌ଲେଃକ୍ନେ ଉଲିଆନେ ଗ୍ନୁଆର୍‌ ।

7 ମେଇଂ ମେଁ ଡାଗ୍ରା ଆଣ୍ଡିନେ ଉଲିଆ ବେଆର୍‌କେ, ଆତ୍‌ଅରିଆ ଦେକ୍‌ରକମ୍‌ ଗୁଆର୍‌ବଗେ । ମ୍ନାଃ ଇଃସାଙ୍ଗ୍‌ ଦାରୀୟାବସନେ ସାପା ସାନ୍ତି ଡିଂଲେ ।

8 ନେ ଇଃସାଙ୍ଗ୍‌କେ ଆକେନ୍‌ ଆଃମ୍ୟାଃନେ ଚାଏ ନେଡିଂକେ ଜେ, ନେ ଯିହୁଦା ପ୍ରଦେଶ୍‌ନିଆ ମ୍ନା ପର୍‌ମେସର୍‌ନେ ଡୁଆନିଆ ୱେନେଲେଗେ, ଆତେନ୍‌ ମ୍ନା ମ୍ନାନେ ବ୍ରି ଏତେ ଆଃରେଆର୍‌ଡିଂକେ ବାରି କୁଗ୍‌ଡାସାଃନିଆ ତ୍ନୁ ଆଃକଆର୍‌ଡିଂକେ, ବାରି ଆକେନ୍‌ କାମ୍‌ ଯତ୍ନରେ ଡିଂଆର୍‌ଙ୍କେ ବାରି ମେଙ୍ଗ୍‌ନେ ନ୍ତିରେ କାମ୍‌ ସାପା ସିଦ୍‌ ଡିଙ୍ଗ୍‌ଡିଂକେ ।

9 ତେଲା ନେ ଆତେନ୍‌ ମ୍ନାଃଡାଆଁ ରେମୁଆଁଇଂକେ ସାଲିଆକୁଚେ ଦେକ୍‌ରକମ୍‌ ନେବାସଙ୍ଗ୍‌କେ, ଆକେନ୍‌ ଡୁଆ ଆଃରେନ୍‌ସା ବାରି ଆକେନ୍‌ କୁଗ୍‌ଡାସାଃନେ କାମ୍‌ ଆଲୁଗ୍‌ସା ଜା ଆପେକେ ଆଦେସ୍‌ ବିଃକେ ? 10 ଏଲେଡିଗ୍‌ ନେ ଆନାକେ ଆଃମ୍ୟାଃନ୍‌ସାଃ ମେଇଂନେ ମ୍ନାଃରେଇଂନେ ମ୍ନି ଗୁଆର୍‌ଚେ ଡୁଙ୍ଗ୍‌ୱେନେନ୍‌ସାଃ ମେଇଂନେ ମ୍ନି ନେସାଲ୍ୟାଃକୁକେ ।

11 ଆକେନ୍‌ ଇଡ଼ିଂ ମେଇଂ ଆନେକେ ଆକେନ୍‌ ଉତର୍‌ ବିଃକେ, ନେ ସରଗ୍‌ ବାରି ପୁର୍‌ତିବିନେ ପର୍‌ମେସର୍‌ନେ ସେବା ଡିଙ୍ଗ୍‌ଣ୍ଡ୍ରେ, ନେ ଆକେନ୍‌ ଆଣ୍ଡିନେ ପାର୍‌ତନା ଡୁଆ ଆଃରେ ନେଃଡିଂକେ, ଆକେନ୍‌ ଗୁଲେ ମୁଆଁ ଅଃସେ ଆଃରେ ବଃଗେ । ଇସ୍ରାଏଲ୍‌ନେ ମୁଇଂ ମ୍ନାଃ ଇଃସାଙ୍ଗ୍‌ ଆତେନ୍‌ ପାର୍‌ତନା ଡୁଆକେ ଆଃରେଚେ ଆଃଡା ବଗେ । 12 ମାତର୍‌ ନେନେ ନ୍ତା ଞ୍ଜାଇଂ ସର୍‌ଗନେ ପର୍‌ମେସର୍‌କେ ରିସା ଆଃଡିଂବଗେ । ଆତେନ୍‌ସା ମେଁ ଆମେଇଂକେ ବାବିଲନେ ରାଜା କଲଦୀୟ ନବୂଖଦ୍‌ନିତ୍ସର୍‌ନେ ନ୍ତିନିଆ ସର୍ପେ ବିକେ । ଆତେନ୍‌ସା ମେଁ ଆକେନ୍‌ ଡୁଆ ନସ୍‌ଟ ଆଃଡିଂଚେ ରେମୁଆଁଇଂକେ ବାବିଲ୍‌ ଡୁଂୱେକେ । 13 ମାତର୍‌ ବାବିଲନେ ଇଃସାଙ୍ଗ୍‌ କୋରସ୍‌ନେ ସାସନ୍‌ କାଲା ପର୍‌ତୁମ୍‌ ମୁଆଁ ପର୍‌ମେସର୍‌ନେ ଆକେନ୍‌ ଡୁଆ ଆଃରେନ୍‌ସା କୋରସ୍‌ ଇଃସାଙ୍ଗ୍‌ ଆଦେସ୍‌ ବିଃକେ । 14 ବାରି, ନବୂଖଦ୍‌ନିତ୍ସର ପର୍‌ମେସର୍‌ ଡୁଆନେ ସାପା ଜିନିସ୍‌ ସୁନାନେ ବାରି ରୁପାନେ ତାଲି ମୁତାଇଂ ଯିରୂଶାଲମ୍‌ନେ ପାର୍‌ତନା ଡୁଆ ବାନ୍‌ ରାଙ୍ଗ୍‌ୱେଚେ ବାବିଲ ଦେସ୍‌ନିଆ ଡୁଂପାଂବଗେ, ଆତେନ୍‌ସାପା କୋରସ୍‌ ଇଃସାଙ୍ଗ୍‌ ବାବିଲନ୍ନିଆ ଲେଃକ୍ନେ ମନ୍ଦିର୍‌ବାନ୍‌ ଆଃତାର୍‌ ବିକେ । ବାରି ଆତେନ୍‌ସାପା ଶେଶବସର ମିନିନେ ମେଁ ବାନ୍‌ ପାଙ୍ଗ୍‌ଲାଏଃକ୍ନେ ସାସନ୍‌ ଡିଂଣ୍ଡ୍ରେନେ ନ୍ତିନିଆ ବିଃଜଗ୍‌ତ୍ଲାଗ୍‌କେ । 15 ଆରି, ମେଁ ଆମେକେ ବାସଙ୍ଗ୍‌କେ, "ଆକେନ୍‌ ସାପା ଜିନିସ୍‌ ରାଙ୍ଗ୍‌ୱେଚେ ଯିରୂଶାଲମନ୍ନିଆ ଲେଃକ୍ନେ ପାର୍‌ତନା ଡୁଆନିଆ ବପା ବାରି ପର୍‌ମେସର୍‌ନେ ଡୁଆ ଆତେନ୍‌ ଜାଗାନ୍ନିଆ ଆଃରେଆର୍‌ଲେ ।" 16 ଆକେନ୍‌ ପରେ ଆତେନ୍‌ ଶେଶବସର ପାଙ୍ଗ୍‌ଚେ ଯିରୂଶାଲମନ୍ନିଆ ପର୍‌ମେସର୍‌ନେ ପାର୍‌ତନା ଡୁଆନେ କୁନାଦି ଆଃରେକେ । ବାରି, ଆତେନ୍‌ ଦିନାବାନ୍‌ ଏବେ ଜାକ ଆତେନ୍‌ ଆଃରେ ଆର୍‌ ଡିଂକେ, ଏଲେଡିଗ୍‌ ଆତେନ୍‌ ଏଃଜାକ ଆଡାକେ ଣ୍ଡୁ ।

17 ଆତେନ୍‌ସା ଜଦି ମହାରାଜାକେ ମାଣ୍ଡା ତ୍ନାଏ, ତେଲା କୋରସ୍‌ ରାଜା ଯିରୂଶାଲମନ୍ନିଆ ପର୍‌ମେସର୍‌ନେ ଆକେନ୍‌ ଡୁଆ ଆଃରେନେ ଆଦେସ୍‌ ବିଃବକ୍ଲେ ଣ୍ଡୁ, ଆତେନ୍‌ ବାବିଲନେ ମହାରାଜାନେ କିଆ ଲେଃକ୍ନେ ଡୁଆନିଆ ତୁର୍‌କେଲାପା । ବାରି ଆକେନ୍‌ ବିସ‍ଏରେ ମ୍ନାଃ ରାଜା ନେ ଡାଗ୍ରା ମେଁନେ ଇକ୍‌ଚା ମେଃନେ ଆତେନ୍‌ ବେଲେଃ ।