1 ଅର୍ତ୍ତକ୍ଷସ୍ତ ଇଃସାଙ୍ଗ୍‌ନେ ସାସନ୍‌ କାଲା ନିଜର୍‌ ନିଜର୍‌ନେ ନ୍ତାଇଂନେ ବଂସନେ ମୁକିଆଇଂ ଏଃତେ ବାବିଲ୍‌ବାନ୍‌ ପାଂଆର୍‌କେ, ମେଙ୍ଗ୍‌ନେ କୁଟୁମ୍‌ ରେମୁଆଁ ଦେକ୍‌ରକମ୍‌ । 2 ପୀନହସ୍‌ନେ ଉଂଡେଇଂନେ ବାନ୍‌ ଗେର୍ଶୋମ୍‌, ଇଥାମରନେ ଉଂଡେଇଂନେ ବାନ୍‌ ଦାନିୟେଲ । ଦାଉଦନେ ଉଂଡେଇଂନେ ବାନ୍‌ ହଟୂଶ୍‌ । 3 ଶକନିୟନେ ଉଂଡେଇଂ ବାନ୍‌ ପରିୟୋଶନେ ଉଂଡେଇଂନେ ବାନ୍‌ ଜିଖରିୟ ବାରି ଶହେ ପଚାସ୍‌ ରୁଆ ଙ୍ଗିରେ ମେଇଙ୍ଗ୍‌ ଏତେ ମିନି ଆଃଗୁଆର୍‌ ବଃଗେ । 4 ପହତ୍‌ ମୋୟାବନେ ଉଂଡେଇଂନେ ବାନ୍‌ ସରହିୟନେ ଉଂଡେ ଇଲିହ-ଐନିୟ ବାରି ମେଁ ଏତେ ମ୍ୱାର୍‌ ଶହ ରୁଆ ଙ୍ଗିରେ । 5 ଶକନିୟନେ ଉଂଡେଇଂନେ ବାନ୍‌ ଯହଶିୟେଲନେ ଉଂଡେ ବାରି ମେଁ ଏଃତେ ଞ୍ଜିଶହ ରୁଆ ଙ୍ଗିରେ । 6 ଆରି ଆଦୀନନେ ଉଂଡେଇଂନେ ବାନ୍‌ ଯୋନାଥନନେ ଉଂଡେ ଏବଦ ବାରି ମେଁ ଏଃତେ ପଚାସ୍‌ ରୁଆ ଙ୍ଗିରେ । 7 ବାରି ଏଲମନେ ଉଙ୍ଗ୍‌ଡେଇଂବାନ୍‌ ଅଥଲୀୟନେ ଉଂଡେ ଯିଶାୟାହ ବାରି ମେଁ ଏଃତେ ସତୁରି ରୁଆ ଙ୍ଗିରେ । 8 ବାରି ଶଫଟୀୟନେ ଉଂଡେଇଂନେ ବାନ୍‌ ମିକାୟେଲନେ ଉଂଡେ ସବଦିୟ ବାରି ମେଁ ଏଃତେ ଅଶେ ରୁଆ ଙ୍ଗିରେ । 9 ଯୋୟାବନେ ଉଂଡେଇଂନେବାନ୍‌ ଯିହୀୟେଲନେ ଉଂଡେ ଓବଦୀୟ ବାରି ମେଁ ଏଃତେ ମ୍ୱାର୍‌ ଶହ ଅଟର ରୁଆ ଙ୍ଗିରେ । 10 ବାରି ଶଲୋମୀତାନେ ଉଂଡେଇଂନେ ବାନ୍ ଯୋଷିଫିୟନେ ଉଂଡେ ବାରି ମେଁ ଏଃତେ ମୁଇଂ ଶହ ସାଟିଏ ରୁଆ ଙ୍ଗିରେ । 11 ବାରି ବେବୟନେ ଉଂଡେଇଂନେ ବାନ୍‌ ବେବୟନେ ଉଂଡେ ଜିଖରିୟ ବାରି ମେଁ ଏଃତେ ଅଟାଇଶ୍‌ ରୁଆ ଙ୍ଗିରେ । 12 ଅସ୍‌ଗଦନେ ଉଂଡେଇଂନେ ବାନ୍ ହକାଟନନେ ଉଂଡେ ଯୋହାନନ ବାରି ମେଁ ଏଃତେ ମୁଇଂ ଶହ ଗୁଆ ରୁଆ ଙ୍ଗିରେ । 13 ବାରି ଅଦୋନୀକାମନେ ଉଂଡେଇଂନେ ବାନ୍‌ ଡାଆଁରେଇଂ ବାରି ମେଙ୍ଗ୍‌ନେ ମିନି ଦେକ୍‌ରକମ୍‌, ଇଲୀଫେଲଟ୍‍, ଯିୟୁୟେଲ୍‌ ବାରି ଶମୟୀୟ । ମେଙ୍ଗ୍‌ନେ ଏତେ ସାଟିଏରୁଆ ଙ୍ଗିରେ । 14 ବାରି ବିଗ୍‌ବୟନେ ଉଂଡେଇଂନେ ବାନ୍‌ ଊଥୟ ବାରି ସବୁଦ୍‌ ବାରି ମେଇଙ୍ଗ୍‌ ଏତେ ସତୁରି ରୁଆ ଙ୍ଗିରେ ।

15 ବାରି ନେଙ୍ଗ୍‌ ଆକ୍ମେଇଂକେ ଅହବା ଇନି ୱେନେ ଲଣ୍ଡିଆଃ ଡାଗ୍ରା ମୁଇଂତୁଗ୍‌ ଣ୍ଡ୍ରାସିଂକେ । ବାରି ଆତ୍‌ଅରିଆ ନେ କୁଡ଼ିଆ ଆଃରେଚେ ଜିର୍‌ସି ଦିନା ନେଲେଗେ । ଆତ୍‌ଅରିଆ ନେଙ୍ଗ୍‌ ରେମୁଆଁଇଂ ବାରି ପୁଜାରିଇଂକେ କେଚେଃ ଲେବୀନେ ଉଂଡେଇଂନେ ବାନ୍‌ ଆଜାକେ ଡିଗ୍‌ ନାଅବାକେ ଣ୍ଡୁ । 16 ଆତେନ୍‌ସାଃ ନେଙ୍ଗ୍‌ ଇଲୀୟେଜର, ଅରୀୟେଲ, ଶମୟୀୟ ବାରି ଇଲ୍‌ନାତନ୍‌ ବାରି ଯାରିବ ବାରି ଇଲ୍‌ନାତନ୍‌ ବାରି ନାଥନ ବାରି ଜିଖରିୟ ବାରି ମଶୁଲ୍ଲମ୍‌, ଆକେନ୍‌ ମୁକିଆ ରେମୁଆଁଇଂକେ ଡିଗ୍‌ ଯୟାରିବ୍‌ ବାରି ଇଲ୍‌ନାତନ୍‌ ଗ୍ରଇଂକେ ୱାନ୍‌ସା ରେମୁଆଁ ମ୍ୱେକେ । 17 ଆକେନ୍‌ ଇଡ଼ିଙ୍ଗ୍‌ ନେଙ୍ଗ୍‌ ଆମେଇଂକେ କାସିଫିଆ ମିନିନେ ମୁଇଂ ଜାଗାନେ ମ୍ନା ରେମୁଆଁକେ ଇଦ୍ଦୋ ଡାଗ୍ରା ମ୍ୱେକେ । ବାରି ନେ ପର୍‌ମେସର୍‌ନେ ଡୁଆ ଆତ୍‌ଲା ନେ ଡାଗ୍ରା ବାସଙ୍ଗ୍‌ ଅଲେଙ୍ଗ୍‌ଣ୍ଡ୍ରେକେ ଡୁଙ୍ଗ୍‌ପାଂଲାପା ଡାଗ୍‌ଚେ କାସିଫିଆ ଜାଗାନ୍ନିଆ ଲେଃକ୍ନେ ଇଦ୍ଦୋକେ ବାରି ମେଁନେ ବୟାଁଣ୍ଡେଇଂକେ ନଥନିୟଇଂକେ ବାସଙ୍ଗ୍‌ସା ନେଙ୍ଗ୍‌ ଆମେଇଂକେ ଆଦେସ୍‌ ମ୍ୱିକେ । 18 ଆତେନ୍‌ସା ନେ ଆରାତ୍ରା ନେନେ ପର୍‌ମେସର୍‌ନେ ମଙ୍ଗଲମୟ ନ୍ତିନେ ଆସାବର୍‌ସାରେ ମେଇଂ ଇସ୍ରାଏଲ୍‌ନେ ଏଗ୍‌ଲେଣ୍ଡେଇଂ, ବାରି ଲେବୀନେ ଉଂଡେ ମହଲିନେ ଉଂଡେଇଂ ବାନ୍‌ ମୁଇଂ ଜ୍ଞାନି ରେମୁଆଁକେ ବାରି ଶେରେବୀୟ ବାରି ମେଁନେ ଉଂଡେ ବାରି ବୟାଁଇଂ ଏତେ ଅଟର ରୁଆକେ, 19 ବାରି ହଶବିୟ ବାରି ମେଁ ଏଃତେ ମରାରି ଉଂଡେଇଂନେ ବାନ୍‌ ଯିଶାୟାହ, ମେଁନେ ବୟାଁଣ୍ଡେ ବାରି ମେଙ୍ଗ୍‌ନେ ଉଂଡେଇଂ ଏତେ କୁଡ଼ିଏ ରୁଆକେ, 20 ବାରି ଦାଉଦ ବାରି ନେତାଇଂ ମୁଡ଼ି ସେବା ଡିଙ୍ଗ୍‌ନେ ରେମୁଆଁଇଂକେ ଲେବୀୟଇଂନେ ସେବାକାମ୍‌ ଆତ୍‌ଲା ବିଃବଗେ, ମେଙ୍ଗ୍‌ନେ ବାନ୍‌ ମ୍ୱାର୍‌ ଶହ କୁଡ଼ିଏ ରୁଆ ଆରି ଜାଣ୍ଡେଇଂ ଲେବୀୟଇଂନେ ପାର୍‌ତନା ଡୁଆନିଆ ସେବା ଡିଡିଙ୍ଗ୍‌ନେ ରେମୁଆଁଇଂ ଡୁଙ୍ଗ୍‌ପାଙ୍ଗ୍‌ଆର୍‌କେ । ଆକେନ୍‌ ସାପାରେନେ ମିନି ଆତ୍‌ଅରିଆ ଗୁଆର୍‌ ଆର୍‌କେ ।

21 ଆକେନ୍‌ ଇଡ଼ିଂ ନେ ଆତ୍‌ଲା, ନେନେ ଗୋ ଗିସିଆ ଆତ୍‌ଲା, ନେନେ ସାପା ଦନ୍‌ସମ୍ପତ୍ତି ଆତ୍‌ଲା ମୁଇଂ ସିଦା ଗାଲି ଆତ୍‌ଲା ପାର୍‌ତନା ଡିଂନେସା ନେନେ ପର୍‌ମେସର୍‌ନେ ଡାଗ୍ରା ନିଜେକେ ଦରମ୍‌ ଆଃଡିଂନେସା ନେ ଅହବା ଇନିନେ ଲଣ୍ଡିଆ ଡାଗ୍ରା ଉପାସ୍‌ ଡିଂ ନ୍‌ସା ନେବାସଙ୍ଗ୍‌କେ । 22 ମାତର୍‌ ଗାଲି ଅରିଆ ସତ୍ରୁ ବିରୁଦ୍‌ରେ ଆନେକେ ସାଇଜ ଡିଂନ୍‌ସାଃ ରାଜାନେ ମୁଇଂ ଦଲ୍‌ ସନ୍ୟ ବାରି ଗଡ଼ାକେ ସାଲିଆନ୍‌ସା ଆନେକେ ଗିଆସ ଲାଗେକେ । ନେଙ୍ଗ୍‌ ରାଜାକେ ଆକେନ୍‌ ସାମୁଆଁ ମ୍ୱାସଙ୍ଗ୍‌କେ, ଜାଣ୍ଡେଇଂ ନେନେ ପର୍‌ମେସର୍‌କେ ତୁର୍‌ଆର୍‌ଏ, "ମେଙ୍ଗ୍‌ନେ ମଙ୍ଗଲ୍‌ ନ୍‌ସା ମେଙ୍ଗ୍‌ନେ ଆରାତ୍ରା ମେଁନି ନ୍ତି ଲେଃକେ । ମାତର୍‌ ଜାଣ୍ଡେଇଂ ଆମେକେ ଆନ୍ତାର୍‌ ଆର୍‌ଏ, ମେଁନି ବପୁ ବାରି ରିସା ମେଙ୍ଗ୍‌ନେ ବିରୁଦ୍‌ରେ ଲେଃଏ ।" 23 ଆତେନ୍‌ସା ନେ ଉପାସ୍‌ ନେଡିଂକେ ବାରି ନେନେ ପର୍‌ମେସର୍‌ ଡାଗ୍ରା ଗୁଆରି ନେଡିଂକେ ବାରି ମେଁ ନେନେ ପାର୍‌ତନା ନିଆ ଉତର୍‌ ବିଃକେ ।

24 ଆତେନ୍‌ସା ନେଙ୍ଗ୍‌ ପୁଜାରିଇଂନେ ବିତ୍‌ରେବାନ୍‌ ଗମ୍ୱାର୍‌ ରୁଆ ମ୍ନାଃ ରେମୁଆଁଇଂନେ ବାନ୍‌ ଶେରେବୀୟ, ହଶବିୟ ବାରି ମେଇଙ୍ଗ୍‌ ଏତେ ମେଙ୍ଗ୍‌ନେ ଗୁଆରୁଆ ବୟାଁକେ ଡିଗ୍‌ ଅଲ୍‌ଗା ନ୍ନାଃଡିଂକେ । 25 ବାରି ଇଃସାଙ୍ଗ୍‌ ଆରି ମେଁନେ ମନ୍ତ୍ରୀଇଂ ବାରି ମେଁନେ ମ୍ନାଃ ରେମୁଆଁଇଂ ବାରି ପାଙ୍ଗ୍‌ଲାଏଃକ୍ନେ ଇସ୍ରାଏଲ ରେମୁଆଁଇଂ ସାପାରେ ନେନେ ପର୍‌ମେସର୍‌ନେ ଡୁଆ ଆତ୍‌ଲା ଆଣ୍ଡିନେ ରୁପା ବାରି ସୁନା ବାରି ସାପା ଜିନିସ୍‌ଇଂ ଟିକା ବିଃ ଆର୍‌ଗେ । ଆତେନ୍‌ ଆମେଇଂକେ ଅଜନ୍‌ ଆଡିଙ୍ଗ୍‌ଚେ ମ୍ୱିକେ । 26 ନେଙ୍ଗ୍‌ ମେଇଂନେ ନ୍ତିନିଆ ତୁର୍‌ ଶହ ପଚାସ୍‌ କେଜି ରୁପା ବାରି ଶଏ କେଜି ରୁପାନେ ତାଲି ମୁତା ବାରି ଶଏ କେଜି ସୁନା, 27 ମୁଇଂ ଅଜାର୍‌ ମାଲ୍‌ ଶହ ଦାମ୍‌ନେ ମୁଇଂକୁଡ଼ି ସୁନାନେ ତାଲି ମୁତା, ବାରି ସୁନା ରକମ୍‌ ଦାମ୍‌ନେ ମାଣ୍ଡା ତ୍ନାକ୍ନେ ପିତ୍ତଲ୍‌ନେ ମ୍ୱାକ୍ଲିଗ୍‌ ତାଲି ମୁତା ଅଜନ୍‌ ଆଡିଙ୍ଗ୍‌ଚେ ମ୍ୱିକେ ।

28 ବାରି ନେଙ୍ଗ୍‌ ଆମେଇଂକେ ମ୍ୱାସଙ୍ଗ୍‌କେ, ପେ ମାପ୍‌ରୁନେ ମ୍ନିରେ ପବିତ୍ର ବାରି ତାଲି ମୁତା ସାପା ପବିତ୍ର, ଆରି ଆକେନ୍‌ ରୁପା ବାରି ସୁନା ପେନି ନ୍ତାଞ୍ଜାଇଂନେ ପର୍‌ମେସର୍‌ ମାପ୍‌ରୁନେ ମ୍ନିରେ ନିଜର୍‌ ଇକ୍‌ଚାରେ ବିଃବକ୍ନେ ଆକେନ୍‌ ଟିକା । 29 ମାପ୍‌ରୁନେ ଯିରୂଶାଲମ ଡାଗ୍ରା ଲେକ୍ନେ ଡୁଆନେ ବାକ୍ରାନିଆ ମ୍ନାଃ ପୁଜାରିଇଂ ବାରି ଲେବୀୟଇଂନେ ବାରି ଇସ୍ରାଏଲ୍‌ ବଂସନେ ନେତାଇଂନେ ସାମ୍‌ନାରେ ଆକେନ୍‌ ସାପା ମାବିଃ ଜାକ ପେ ତରକ୍‌ ଡିଂପା ବାରି ଆକେନ୍‌ ସାପାକେ ରକ୍ୟା ଡିଂପା । 30 ଆତ୍‌ବା ପୁଜାରିଇଂ ବାରି ଲେବୀୟଇଂ ନେନେ ପର୍‌ମେସର୍‌ନେ ଯିରୂଶାଲମ ଡାଗ୍ରା ଲେକ୍ନେ ଡୁଆନିଆ ରାଙ୍ଗ୍‌ପାଂନେସା ଆତେନ୍‌ ଅଜନ୍‌ ଆଡିଙ୍ଗ୍‌ଚେ ବିଃକ୍ନେ ରୁପା ବାରି ସୁନା ବାରି ତାଲି ମୁତା ସାପା ସାଃଆର୍‌କେ ।

31 ଆକେନ୍‌ ଇଡ଼ିଙ୍ଗ୍‌ ନେ ଯିରୂଶାଲମ ୱେନ୍‌ସା ପର୍‌ତୁମ୍‌ ଆର୍କେନେ ଗମ୍ୱାର୍‌ ଦିନାକେଲା ଅହବା ଇନିନେ ଲଣ୍ଡିଆବାନ୍‌ ନେୱେକେ । ନେନେ ପର୍‌ମେସର୍‌ନେ ନ୍ତି ଆନେକେ ସାହା ଡିଂକେ । ବାରି ଗାଲି ଅରିଆ ମେଁ ସତ୍ରୁକେ ବାରି ବୁଡ଼ିଚେ ବଗ୍‌ନେ ରେମୁଆଁଇଂନେ ନ୍ତି ବାନ୍‌ ଆନେକେ ଉଦାର୍‌ ଡିଂକେ । 32 ଆତେନ୍‌ସା ନେ ଯିରୂଶାଲମନିଆ ୱେଚାଚେ ଆତ୍‌ଅରିଆ ଜିର୍‌ସି ଦିନା ନେପୁଣ୍ଡେକେ । 33 ଆକେନ୍‌ ଇଡ଼ିଂ ଗୁ ଦିନ୍‌କେଲା ଆତେନ୍‌ ରୁପା ବାରି ସୁନା ବାରି ତାଲି ମୁତା ସାପା ନେନେ ପର୍‌ମେସର୍‌ନେ ଡୁଆନିଆ ଅଜନ୍‌ ଆଡିଙ୍ଗ୍‌ଚେ ଊରୀୟ ପୁଜାରିନେ ଉଂଡେ ମରେମୋତ୍‌ ନ୍ତିନିଆ ବିଃକେ । ମେଁ ଏତେ ପୀନହସ୍‌ନେ ଉଂଡେ ଇଲୀୟାସର ଲେଃଗେ । ବାରି ମେଇଙ୍ଗ୍‌ ଏତେ ଯେଶୂୟନେ ଉଂଡେ ଯୋଷାବଦ୍‌ ବାରି ବିନ୍ନୁୟିନେ ଉଂଡେ ନୋୟଦୀୟ ବାରି ଲେବୀୟଇଂ ଲେଃଗେ । 34 ସାପା ଜିନିସ୍‌ ଏଜେଚେ ବାରି ଅଜନ୍‌ ଆଃଡିଂଚେ ବିଃଆର୍‌କେ ବାରି ଆତେନ୍‌ ବେଲା ଆତେନ୍‌ ସାପାନେ ଅଜନ୍‌ ଡିଙ୍ଗ୍‌ଚେ ଗୁଆର୍‌ଆର୍‌କେ ।

35 ଚାକର୍‌ କାମ୍‌ ବାନ୍‌ ପାଙ୍ଗ୍‌ଲାଏଃକ୍ନେ ବନ୍ଦି ଡିଂଲେକ୍ନେ ରେମୁଆଁଇଂ ସାପା ଇସ୍ରାଏଲ୍‌ ଆତ୍‌ଲା ପର୍‌ମେସର୍‌ନେ ମ୍ନିରେ ସୁଆ ବଲି ଡିଂଚେଃ ଗୋମ୍ବାର୍‌କ୍ଲିଗ୍‌ ଅରେଃ, ଛୟାନବେଟା ମେଣ୍ଡା, ସତସ୍ତୁରିଟା ଉଂମେଣ୍ଡାଇଂକେ, ପାପ୍‌ ଡିଙ୍ଗ୍‌ବକ୍ନେ ବଲି ବିନ୍‌ସା ଗୋମ୍ବାର୍‌କ୍ଲିଗ୍‌ ଉଙ୍ଗ୍‌ମିଃ ବିଃଆର୍‌କେ । ଆକେନ୍‌ ସାପା ମାପ୍‌ରୁନେ ମ୍ନିରେ ସୁଆ ବଲି ରକମ୍‌ ଲାଏଃଗେ । 36 ଆକେନ୍‌ ଇଡ଼ିଙ୍ଗ୍‌ ମେଇଂ ଲଣ୍ଡିଆ ଇନୁମେତା ଲେଃକ୍ନେ ରାଜା ଆଲ ଲେଃଚେ କାମ୍‌ଡିଂଣ୍ଡ୍ରେଇଂକେ ବାରି ଦେସ୍‌ନେ ନେତାଇଂକେ ଇଃସାଙ୍ଗ୍‌ ଆଦେସ୍‌ ବିଃବକ୍ନେ ଉଲିଆ ବିଃଆର୍‌କେ । ବାରି ମେଇଂ ରେମୁଆଁଇଂନେ ବାରି ପର୍‌ମେସର୍‌ନେ ଡୁଆ କାମ୍‌ନ୍ନିଆ ସାଇଜ ଡିଂଆର୍‌କେ ।