1 ଆକେନ୍‌ ଇଡ଼ିଂ ବନ୍ଦି ଡିଂଲେଃକ୍ନେ ଗଡ଼େଇଂ ମାପ୍‌ରୁ ଇସ୍ରାଏଲ୍‌ନେ ପର୍‌ମେସର୍‌ନେ ମ୍ନିରେ ମୁଇଂ ମନ୍ଦିର୍‌ ଆଃରେଆର୍‌ଡିଂକେ ଡାଗ୍‌ଚେ ଯିହୁଦାନେ ବାରି ବିନ୍ୟାମୀନ୍ ରେମୁଆଁଇଂକେ ବିରଦ୍‌ ଡିଂଣ୍ଡ୍ରେ ଅଁ ଆର୍‌କେ । 2 ଆତେନ୍‌ ବେଲା ମେଇଂ ଯିରୁବ୍ବାବିଲ୍‌ ବାରି ଆବାନେ ବଂସନେ ମ୍ନାଃରେଇଂନେ ଡାଗ୍ରା ପାଙ୍ଗ୍‌ଚେ ଆମେଇଂକେ ବାସଙ୍ଗ୍‌କେ, ନେ ପେ ଏତେ କୁଡ଼େଚେ ଆଃରେନ୍‌ସା ଆଦେସ୍‌ ବିଃଲାପା । ମେଁ ଡାଗ୍‌ଲା ଡିରକମ୍‌ ପେ, ଦେତ୍‌ରକମ୍‌ ନେ ପେନି ପର୍‌ମେସର୍‌ନେ ପାର୍‌ତନା ଡିଂନେଡିଂ । ଆରି,ଅଶୂରନେ ଇଃସାଙ୍ଗ୍‌ ଏସରହଦ୍ଦୋନ୍‌, ଜା ଆନେକେ ଆକ୍‌ଅରିଆ ଡୁଂପାଂବକେ, ମେଁ ଡିଂନେ ବେଲାବାନ୍‌ ନେ ମେଁନେ ମ୍ନିରେ ବଲିଦାନ୍‌ ବିଃନେଡିଂକେ ।

3 ମାତର୍‌ ଯିରୁବ୍ବାବିଲ୍‌ ବାରି ଯେଶୂୟ ବାରି ଇସ୍ରାଏଲ୍‌ନେ ବିନ୍‌ ଆବାନେ ବଂସ ମ୍ନାଃ ଡକ୍ରାଡୁକ୍ରି ରେମୁଆଁଇଂ ଆମେଇଂକେ ବାସଙ୍ଗ୍‌କେ, ନେନେ ପର୍‌ମେସର୍‌ନେ ମ୍ନିରେ ଡୁଆ ଆଃରେନେ ବିସ‍ଏରେ ନେ ଏତେ ପେନି ମେଃଡିଗ୍‌ ସମ୍ପର୍କ ଣ୍ଡୁ । ମାତର୍‌ ନେ ବାନ୍‌ ପାରସ୍ୟନେ ରାଜା କୋରସ୍‌ ରାଜାନେ ଆଦେସ୍‌ ଇସାବ୍‌ରେ ନେ ନିଜେ ମୁଇଂତୁଗ୍‌ ରିସିଂଚେ ଇସ୍ରାଏଲ୍‌ନେ ପର୍‌ମେସର୍‌ ମାପ୍‌ରୁନେ ମ୍ନିରେ ନେଃରାରେପା ।

4 ଆକେନ୍‌ ଇଡ଼ିଂ ଦେଶ୍‌ନେ ରେମୁଆଁଇଂ ଯିହୁଦାନେ ରେମୁଆଁଇଂନେ ନ୍ତିକେ ଦୁର୍ବଲ୍‌ ଆଃଡିଂସା ବାରି ଆଃରେନେ ବେଲା ଆମେଇଂକେ କସ୍‌ଟ ବିଃଆର୍‌କେ । 5 ବାରି, ମେଙ୍ଗ୍‌ନେ ଜଜ୍‌ନା ସରାଃ ଆଃଡିଂସା ପାରସ୍ୟନେ ରାଜା କୋରସ୍‌ନେ କ୍ଲିଗ୍‌ ଜିବନ୍‌ ବାରି ପାରସ୍ୟ ଇଃସାଙ୍ଗ୍‌ ଦାରୀୟାବସନେ ଅଦିକାର୍‌ ଜାକ ମେଙ୍ଗ୍‌ନେ ଡାଗ୍ରା କୁଟ୍‌ ଡିଂମ୍ୟାଃଣ୍ଡ୍ରେକେ ଆଜ୍‌ରିଡାବୁ ବିଃଚେ ବକେ ।

6 ଆକେନ୍‌ ପରେ ଅକ୍ଷଶ୍ୱେରଶନେ ସମୟ୍‌ କେଲା ମେଁନେ ଅଦିକାର୍‌ନେ ମୁଲେବାନ୍‌ ମେଇଂ ଯିହୁଦା ବାରି ଯିରୂଶାଲମନିଆ ବାସାଲେକ୍ନେ ରେମୁଆଁଇଂନେ ବିରଦ୍‌ରେ ମୁଇଂ ଅପମାନ୍‌ନେ ଉଲିଆଃ ଗୁଆର୍‌ବଗେ ।

7 ଆକେନ୍‌ ପରେ ଅର୍ତ୍ତକ୍ଷସ୍ତନେ ଅଦିକାର୍‌ ବେଲା ବିଶ୍ଲମ୍‌, ମିତ୍ରଦାତ୍‌, ଟାବେଲ ବାରି ମେଁନେ ବିନ୍ ସାଙ୍ଗଡ଼େଇଂ ପାରସ୍ୟ ରାଜା ଅର୍ତ୍ତକ୍ଷସ୍ତ ଡାଗ୍ରା ଗୁଆର୍‌ ଆର୍‌କେ । ଆତେନ୍‌ ଉଲିଆ ଅରାମୀୟ ଅକ୍ୟର୍‌ ଏଃତେ ଗୁଆର୍‌ବଗେ ବାରି ଅରାମୀୟ ବ୍ନାସାରେ ଅନୁବାଦ୍‌ ଡିଂବଗେ ।

8 ରହୂମ୍‌ ମନ୍ତ୍ରୀ ବାରି ଶିମ୍‌ଶୟ ଗୁଆର୍‌ଣ୍ଡ୍ରେ ଅର୍ତ୍ତକ୍ଷସ୍ତ ରାଜା ଡାଗ୍ରା ଯିରୂଶାଲମ ବିରୁଦ୍‌ରେ ଦେକ୍‌ ରକମ୍‌ ଉଲିଆ ଗୁଆର୍‌ ଆର୍‌କେ ।

9 ରହୂମ୍‌ ମନ୍ତ୍ରୀ ବାରି ଶିମ୍‌ଶୟ ଗୁଆର୍‌ଣ୍ଡ୍ରେ ବାରି ମେଙ୍ଗ୍‌ନେ ବିନ୍‌ ସାଙ୍ଗଡ଼େଇଂ ସାପାରେ, ଆତେନ୍‌ଇଂ, ଦୀନୀୟ ବାରି ଅଫର୍ସ୍ତଖୀୟ, ଟର୍ପଲିୟ, ଅଫର୍ସୀୟ, ଅର୍କବୀୟ, ବାବିଲୀୟ, ଶୂଶନୀୟ, ଦେହ୍ୱୀୟ, ଏଲମୀୟ ରେମୁଆଁଇଂ । 10 ବାରି, ମ୍ନା ସକ୍‌ତିଶାଲି ଅସ୍ନପ୍‌ପନେ ବାନ୍‌ ପାଙ୍ଗ୍‌ଲାଏଃକ୍ନେ ରେମୁଆଁଇଂ, ବାରି ଶମରିୟା ଇନିନିଆ ବାରି ଫରାତ୍‌ ଲଣ୍ଡିଆ ଇନୁମେତା ଲେଃକ୍ନେ ଦେଶ୍‌ନେ ବିନ୍‌ ବିନ୍‌ ଜାଗାନ୍ନିଆ ବାସାଲେଃଆର୍‌କ୍ନେ ରେମୁଆଁଇଂ ଡିଗ୍‌ ଆକେନ୍‌ ଗୁଆର୍‌ ଆର୍‌କେ ।

11 ମେଇଂ ଅର୍ତ୍ତକ୍ଷସ୍ତ ରାଜା ଡାଗ୍ରା ଆଣ୍ଡିନେ ଉଲିଆ ବେବଆର୍‌ଗେ, ଆତ୍‌ ଅରିଆ ଗୁଆର୍‌ବକ୍ନେ ଗ୍ନୁଆର୍‌ ଦେକ୍‌ ରକମ୍‌ ଲେଃଗେ । ଫରାତ୍‌ ଲଣ୍ଡିଆ ଇନୁମେତାପାକା ଲେକ୍ନେ ରେମୁଆଁ ନାଡାଗ୍ରା ସେବା ଡିଙ୍ଗ୍‌ନେ ରେମୁଆଁ ସାପାରେ,

12 ନେ ରାଜାକେ ବାସଙ୍ଗ୍‌ନେ ଚାଏ ନେଡିଂକେ ଯେ, ନା ଡାଗ୍ରା ବାନ୍‌ ପାଙ୍ଗ୍‌ଲାଏଃକ୍ନେ ଯିହୁଦୀୟ ରେମୁଆଁଇଂ ଯିରୂଶାଲମନିଆ ନେ ଡାଗ୍ରା ପାଙ୍ଗ୍‌ଲାଏଃକେ । ମେଇଂ ଆତେନ୍‌ ବିରଦ୍‌ରେ ବାରି କରାପ୍ ଇନି ଆଃରେ ଆର୍‌ଡିଂକେ । ମେଇଂ କୁଗ୍‌ଡାସା ବାରି ମୁଇଂତର୍‌ ଆଃରେନେ ଆଃଡାଚେ କୁନାଦି ଗଃବଆର୍‌କେ । 13 ନେ ରାଜାକେ ବାସଙ୍ଗ୍‌ନେ ଚାଏ ନେଡିଂକେ ଯେ, ଉଃଡ଼ିବେଲା ଆକେନ୍‌ ଇନି ଆଃରେନେ ବାରି କୁଗ୍‌ଡାସା ଆଃତଃଡ଼୍ୟାଃନେ କାମ୍‌ ଡାଏ, ଆତେନ୍‌ ବେଲା ଆତେନ୍‌ ରେମୁଆଁଇଂ ସିସ୍ତୁ, ସର୍‌କାର୍‌କେ ସିସ୍ତୁ ଗାଗ୍‌ନେ ରସିଦ୍‌ ବା ଚାନ୍ଦା ଆବିଃଆର୍‌ ଣ୍ଡୁ । ବାରି ସାରାସାରିକେଲା ଆତେନ୍‌ ରାଜାନେ ବୁଡ଼େୱେଏ । 14 ନେ ଇଃସାଙ୍ଗ୍‌ ଡୁଆନେ ବିତିଗ୍‌ ଚଙ୍ଗ୍‌ନେଡିଂ ବାରି ମହାରାଜାନେ ଅପମାନ୍‌ କେନେ ନେନେ ଉଚିତ୍‌ ଣ୍ଡୁ । ଆତେନ୍‌ସା ନେ ରେମୁଆଁ ବେଃଚେ ମହାରାଜାକେ ଆକେନ୍‌ ନେରାଃମ୍ୟାଃକେ । 15 ପେନି ନ୍ତା ଞ୍ଜାଇଂନେ ଇତିହାସ୍‌ ବଇନିଆ ତୁର୍‌ଚେ କେଲାପା । ତେଲା ଆତେନ୍‌ ଇତିହାସ୍‌ ବଇନିଆ ନା ନାକେଏ ବାରି ନାମ୍ୟାଃଏ ଯେ, ଆକେନ୍‌ ନଗର ରିରଦ୍‌ ଡିଙ୍ଗ୍‌ନେ ଇନି, ବାରି ରାଜାଇଂନେ ଆରାତ୍ରା ବାରି ପ୍ରଦେଶ୍‌ଇଂନେ ଆରାତ୍ରା ନସ୍‌ଟ ଆଡିଂବକେ, ବାରି ମେଇଂ ଅଃସେ କାଲ୍‌ କେଲା ଆତ୍‌ଅରିଆ ୱିଙ୍ଗ୍‌ଆଃରିଙ୍ଗ୍‌ଆଃ ଆଃଗଟେ ବକେ । ଆତେନ୍‌ସା ଆକେନ୍‌ ନଗର ନସ୍‌ଟ ଡିଂଲାଏକେ । 16 ନେ ମ୍ନାଃ ଇଃସାଙ୍ଗ୍‌କେ ଆଃମ୍ୟାଃନେଡିଂକେ ଯେ, ଆକେନ୍‌ ଇନି ଆଃରେନେ ଡାଲା ବାରି କୁଗ୍‌ଡାସା ଆଃତଃଡ଼୍ୟାଃନେ କାମ୍‌ ଡାଲା, ଲଣ୍ଡିଆ ଇନୁମେତାପାକା ନାନେ ମେଃଡିଗ୍‌ ବାଗ୍‌ ଆଲେଃଣ୍ଡୁ ।

17 ଆକ୍‌ବାନ୍‌ ରାଜା ମନ୍ତ୍ରୀ ରହୂମନେ ବାରି ଗୁଗୁଆର୍‌ଣ୍ଡ୍ରେ ଶିମ୍‌ଶୟନେ ବାରି ମେଙ୍ଗ୍‌ନେ ଶମରିୟା ନିଆ ବାସାଲେଃକ୍ନେ ବାରି ବିନ୍‌ ସାଙ୍ଗଡ଼େଇଂନେ, ବାରି ଲଣ୍ଡିଆ ଇନୁମେତା ଲେକ୍ନେ ଦେଶ୍‌ନେ ରେମୁଆଁଇଂ ବିନ୍‌ ବିନ୍‌ ରେମୁଆଁଇଂ ଡାଗ୍ରା ଉତର୍‌ ବେଃକେ । ବାରି, ପେନି ମଙ୍ଗଲ୍‌ ଡିଂଲେ ।

18 ପେ ନେ ଡାଗ୍ରା ଆଣ୍ଡିନେ ଉଲିଆ ବେପେବକେ, ଆତେନ୍‌ ନେ ସେଃମନିଆ ନିମାଣ୍ଡା ବାବ୍‌ରେ ପଡ଼େବକେ । 19 ବାରି. ନେ ନେବାସଙ୍ଗ୍‌ଲା ମେଇଂ ତୁର୍‌ଲା, ତ୍ନାକେ ଯେ, ଅଃସେ କାଲ୍‌ ବେଲା ଆକେନ୍‌ ଇନି ରାଜାଇଂନେ ବିରଦ୍‌ରେ ବିରୁଦ୍‌ ଡିଂବକେ ବାରି ଆତ୍‌ବିତ୍‌ରେ ଇଃସାଙ୍ଗ୍‌କେ ଡିଗ୍‌ ବିରୁଦ୍‌ ଡିଙ୍ଗ୍‌ବ ବାରି କିରମର ଡିଂବଆର୍‌କେ । 20 ବାରି ଯିରୂଶାଲମନିଆ ସକ୍‌ତିସାଲି ରାଜାଇଂ ଲେଃଆର୍‌ଗେ । ମେଇଂ ଲଣ୍ଡିଆ ଇନୁମେତା ପାକା ଲେଃକ୍ନେ ସର୍‌ତେ ଦେସ୍‌ନିଆ ସାସନ୍‌ ଡିଂଆର୍‌କେ । ବାରି ଆମେଇଂକେ ସିସ୍ତୁ ବିଃଆର୍‌କେ, ସର୍‌କାର୍‌କେ ସିସ୍ତୁ ଗାଗ୍‌ଆର୍‌କେ ବାରି ଚାନ୍ଦା ବିଃଆର୍‌କେ । 21 ଆତେନ୍‌ସା ନେବାନ୍‌ ଆଦେସ୍‌ ମାବିଃ ଜାକ ଆତେନ୍‌ ଇନି ଯେନ୍ତିକି ଆରାଃରେଆର୍‌ ଆତେନ୍‌ସା ଆତେନ୍‌ ରେମୁଆଁଇଂକେ ଆଦେସ୍‌ ବିଃପା, ମେଇଂ କାମ୍‌ ଡିଂନେ ଆନ୍ତାର୍‌ବିଃଏ । 22 ତରକ୍ ଲାଲାପା, ପେ ଆକେନ୍‌ ବିସ‍ଏରେ ହେଳା ଡିଙ୍ଗ୍‌ଚେ ଆଲେଗ୍‌ପା । ରାଜାଇଂନେ ଆତ୍‌ଲା ଲସ୍‌ ଆଃଡିଙ୍ଗ୍‌ସା ମେଃନ୍‌ସାଃ ପେ ନସ୍‌ଟ ପେରାଃଡିଂଏ ।

23 ଆକେନ୍‌ ଇଡ଼ିଂ ରହୂମନେ ବାରି ଗୁଆର୍‌ଣ୍ଡ୍ରେ ଶିମ୍‌ଶୟନେ ବାରି ମେଙ୍ଗ୍‌ନେ ସାଙ୍ଗଡ଼େଇଂନେ ଡାଗ୍ରା ଅର୍ତ୍ତକ୍ଷସ୍ତ ରାଜାନେ ଉଲିଆନିଆ ଗ୍ନୁଆର୍ ବକ୍ନେ ଲଃଆର୍‌କେ ମେଇଂ ଜିଆ ଯିରୂଶାଲମନିଆ ଯିହୁଦୀ ରେମୁଆଁଇଂନେ ଡାଗ୍ରା ୱେଚେ ବପୁ ବାରି ଅଦିକାର୍‌ରେ ଆମେଇଂକେ କାମ୍‌ ଡିଂନେବାନ୍‌ ବନ୍ଦ୍ ଆଃଡିଂଆର୍‌କେ ।

24 ଆତେନ୍‌ସା ଯିରୂଶାଲମନ୍ନିଆ ପର୍‌ମେସର୍‌ନେ ମନ୍ଦିର୍‌ କାମ୍‌ ବନ୍ଦ୍‌ ଡିଂକେ । ବାରି ପାରସ୍ୟନେ ରାଜା ଦାରୀୟାବସନେ ସାସନ୍‌ ବେଲା ବାର୍‌ମୁଆଁ ଜାକ ଆତେନ୍‌ ବନ୍ଦ୍‌ ଡିଂଚେ ଲେଃଗେ ।