1 ଆକେନ୍‌ ସାପା କାମ୍‌ ଆଃଡାକ୍ନେ ପରେ, ନେତାଇଂନେ ଡାଗ୍ରା ପାଙ୍ଗ୍‌ଚେ ବାସଙ୍ଗ୍‌କେ, "ଇସ୍ରାଏଲ୍‌ନେ ରେମୁଆଁଇଂ ବାରି ପୁଜାରିଇଂ ବାରି ଲେବୀୟଇଂ ବିନ୍‌ ଦେଶ୍‌ନେ ଜାତିଇଂନେ ବାନ୍‌ ଆପେକେ ଅଲ୍‌ଗା ମାରାଡିଂଚେ ମେଙ୍ଗ୍‌ନେ ଅର୍ଥାତ୍‌, କିଣାନୀୟ, ହିତ୍ତୀୟ, ପରିଷୀୟ, ଯିବୂଷୀୟ, ଅମ୍ମୋନୀୟ, ମୋୟାବୀୟ, ମିସର୍ ଦେସ୍‌ନେ ବାରି ଇମୋରୀୟଇଂନେ ଗ୍ରୁନା ଡିଙ୍ଗ୍‌ନେ କାମ୍‌ ରକମ୍ ସ୍ଲେ ଡିଂଆର୍‌କେ । 2 ମାତର୍‌ ମେଇଂ ନିଜର୍‌ ନ୍‌ସାଃ ନିଜର୍‌ ଉଂଡେଇଂନେ ଆତ୍‌ଲା ମେଙ୍ଗ୍‌ନେ ସେଲାଇଂକେ ସାଃକେ । ଦେକ୍‌ରକମ୍‌ ପବିତ୍ର ବଁସ୍‌ ବିନ୍‌ ଦେଶ୍‌ନେ ଜାତିଇଂନେ ଏତେ ଆପେକେ ଆଃମିସୁବକେ । ଆକେନ୍‌ ଅମାନି ଡିଙ୍ଗ୍‌ବକ୍ନେ କାମ୍‌ନ୍ନିଆ ମୁକିଆ ଆରି ସାସନ୍‌ ଡିଂଣ୍ଡ୍ରେନେ ନ୍ତି ଲାଏଃକେ ।" 3 ଉଡ଼ିବେଲା ନେଙ୍ଗ୍‌ ଆକେନ୍‌ ସାମୁଆଁ ଦ୍ରିଗ୍‌କେ । ନେଙ୍ଗ୍‌ ନେଙ୍ଗ୍‌ନେ ସକା ଆରି ଚ୍ଲେକ୍ନେ ସକା ସ୍ୟାଃଚେଃ ବାରି ବାଃଆ ଆରି କର୍‌ତାନେ ଉଗ୍‌ବ ଆଃକୁଆର୍‌ଚେ କାବା ଡିଂଚେ ଙ୍କକେ । 4 ଆତେନ୍‌ ବେଲା ବଟ୍‌ ବିଃବକ୍ନେ ରେମୁଆଁଇଂନେ ଅମାନି ନ୍‌ସାଃ ଇସ୍ରାଏଲ୍‌ନେ ପର୍‌ମେସର୍‌ନେ ସାମୁଆଁରେ ବୁଟକ୍ନେ ସାପା ରେମୁଆଁ ନେଙ୍ଗ୍ ଡାଗ୍ରା ରିସିଂଆର୍‌କେ । ବାରି ନେଙ୍ଗ୍‌ ଲମ୍‌ଡିଗ୍‌ ବେଲା ପସୁକେ ସିସିଃନେ ବେଲା ଜାକ କାବା ଡିଂଚେ ଙ୍କକେ ।

5 ଆକେନ୍‌ ପରେ ଲମ୍‌ଡିଗ୍‌ ବେଲା ପସୁକେ ସିସିନେ ବେଲା ନେଙ୍ଗ୍‌ ମନ୍‌ ଦୁକ୍‌ ଡିଂଚେ କନ୍ଲେକ୍ନେବାନ୍‌ ନ୍ତଃଡ଼୍ୟାଃକେ । ନେଙ୍ଗ୍ ଗାଗ୍‌ଡ଼େନିଆ ସେଗାର୍‌କ୍ନେ ସକା ବାରି ଚ୍ଲେକ୍ନେ ସକା ଲେଃଗେ । ବାରି ନେଙ୍ଗ୍‌ ଆଣ୍ଟୁମାଡ଼େଚେ ମାପ୍‌ରୁ ନେଙ୍ଗ୍‌ ପର୍‌ମେସର୍‌ନିଆ ନ୍ତି ଲମ୍ୱେଚେ ମ୍ୱାସଙ୍ଗ୍‌କେ, 6 ଅ ନେଙ୍ଗ୍‌ନେ ପର୍‌ମେସର୍‌, ନେଙ୍ଗ୍‌ ଗିଆସ ଡିଂନ୍ଲାଏକେ, ଅ ନେଙ୍ଗ୍‌ନେ ପର୍‌ମେସର୍‌, ନେଙ୍ଗ୍‌ ନା ଅରିଆ ସାର୍ମୁଆଃ ଆଃସୁଏନ୍‌ସା ଗିଆସ ଡିଂଣ୍ଡିଂ । ମେଃଡାଗ୍‌ଲା ନେନେ ପାପ୍‌ ନେନେ ବାଃଆ ବାନ୍‌ ଆରାତ୍ରା ଡିଂଲାଏକେ ବାରି ନେନେ ଦସ୍‌ କିତଂଇନିକେ ଲିଗ୍‌ ଲାଏକେ । 7 ନେନେ ନ୍ତାଞ୍ଜାଇଂନେବାନ୍‌ ଏ ଜାକ ନେ ଜାବର୍‌ ଦସ୍‌ ଡିଂନେବକେ । ନେନେ ପାପ୍‌ ଆତ୍‌ଲା ଆକେନ୍‌ ନିଆୟ୍‌ ନିଆ ନେ ତୁଆଁ ନେଲାଏକେ, ନେନେ ରାଜାଇଂ ବାରି ନେନେ ପୁଜାରିଇଂ ବାରି ବିନ୍‌ ବିନ୍‌ ଦେଶ୍‌ନେ ରାଜାଇଂନେ ନ୍ତିନିଆ, କାଣ୍ଡା ଏତେ, ବନ୍ଦି ଆଃଡିଂଚେ ବାରି ଅପମାନ୍‌ ଡିଂ ନ୍‌ସା ମେଇଂ ଡାଗ୍ରା ୱେନେଲେଃକେ । 8 ବାରି ନେନେ ପର୍‌ମେସର୍‌ ଡିରକମ୍ ନେନେ ମ୍‌ମୁଆଃକେ ରଃବିଏ ବାରି ନେ ବନ୍ଦି ଅବସ୍ତାରେ ଲେଃକେଲା ଆନେକେ ସାନ୍ତି ବିଃଏ । ଆତେନ୍‌ସା ଆନେକେ ରକ୍ୟା ଡିଂ ନ୍‌ସା ମେଁନେ ପବିତ୍ର ଜାଗାନ୍ନିଆ ଆନେକେ ମୁଇଂ କୁଟି ବିନ୍‌ସା ଏବେ ମାପ୍‌ରୁ ଆନେକେ ପର୍‌ମେସର୍‌ନେ ବାନ୍‌ ଉଃଡ଼ି ଦିନ୍‌ ନ୍‌ସାଃ ଦୟା ବାନେଃଲାଏଃକେ । 9 ମେଃଡାଗ୍‌ଲା ନେ ବନ୍ଦି ରେମୁଆଁ । ଏଲେଡିଗ୍‌ ନେନେ ବନ୍ଦି ଅବସ୍ତାରେ ନେନେ ପର୍‌ମେସର୍‌ ଆନେକେ ଆନ୍ତାର୍‌ ଆବକେ ଣ୍ଡୁ, ମାତର୍‌ ଆନେକେ ସାନ୍ତି ବିଃନେ ନ୍‌ସାଃ, ନେନେ ପର୍‌ମେସର୍‌ନେ ଡୁଆ ଆଃରେନେ ନ୍‌ସାଃ ଆରି ଆତ୍‌ନେ ପାକ୍‌ଚିଃକ୍ନେ ଜାଗା ବାର୍‌ମୁଇଂତର୍‌ ଆଃରେନେ ନ୍‌ସାଃ, ବାରି ଯିହୁଦା ଆରି ଯିରୂଶାଲମଅରିଆ ଆନେକେ ମୁଇଂ କୁଗ୍‌ଡାସା ଆଃରେନ୍‌ସା ମେଁ ପାରସ୍ୟ ରାଜାଇଂନେ ସାମ୍‌ନେ ନେ ଆଡ଼ାତ୍ରା ଦୟା ଆଃସୁଏଃବକେ ।

10 ଏବେ ଅ ନେନେ ପର୍‌ମେସର୍‌, ଆକେନ୍‌ ପରେ ନେ ଆରି ମେଁ ନେବାସଙ୍ଗ୍‌ଏ ? 11 ନା ନାନେ ଚାକର୍‌କେ ବବିସତ୍‌ ବକ୍ତାଇଂନେବାନ୍‌ ଆଦେସ୍‌ ବିଃଚେ ବାସଙ୍ଗ୍‌ନାବଗେ, ପେ ଆଣ୍ଡିନେ ଦେସ୍‌ ଅଦିକାର୍‌ ଡିଂ ନ୍‌ସା ୱେପେଡିଂକେ । ଆତେନ୍‌ ବିନ୍‌ ଦେଶ୍‌ନେ ଜାତିଇଂନେ ଅପବିତ୍ର ବାନ୍‌ ଅପବିତ୍ର ଦେସ୍‌, ମେଙ୍ଗ୍‌ନେ ଗ୍ରୁନା ରକମ୍‌ନେ କାମ୍‌ ଦେଶ୍‌କେ ମୁଇଂ ଏରିଆବାନ୍‌ ବାରିମୁଇଂ ଏରିଆ ଜାକ ମେଙ୍ଗ୍‌ନେ ଅପବିତ୍ରରେ ପୁର୍‌ତି ଡିଙ୍ଗ୍‌ଲାଏକେ । 12 ଆତେନ୍‌ସା ପେ ପେନି ସେଲାଇଂକେ ମେଙ୍ଗ୍‌ନେ ଉଂଡେଇଂନେ ଏତେ ବିଏନ୍‌ସାଃ ଆବିଃଗ୍‌ପା, କି ପେନି ଉଂଡେଇଂନେ ଆତ୍‌ଲା ମେଙ୍ଗ୍‌ନେ ସେଲାଇଂକେ ଆସାଗ୍‌ପା, ଲେଃ ମେଙ୍ଗ୍‌ନେ ସାନ୍ତି ବାରି ଉନ୍ନତି ଅଃନାଡିଗ୍‌ ଚେସ୍‌ଟା ଆଃଡିଂପା । ତେଲା ପେ ବପୁ ରେମୁଆଁ ପେଡିଂଏ ବାରି ଦେଶ୍‌ନେ ନିମାଣ୍ଡା ଜିନିସ୍‌ ପେଚଙ୍ଗ୍‌ଏ ବାରି କାଲାଆଃ ପେନି ଗଡ଼େଇଂନେ ଅଦିକାର୍‌ ଆତ୍‌ଲା ଆତେନ୍‌ ବଚେଃ ପେୱେଏ । ମାତର୍‌ ନେ ନାନେ ଆକେନ୍‌ ଆଦେସ୍‌ ସାପା ଆନ୍ତାର୍‌ନେବକେ । 13 ଆତେନ୍‌ସା ଅ ନେନେ ପର୍‌ମେସର୍‌, ନେନେ କରାପ୍‌ କାମ୍‌ ବାରି ମ୍ନାଃନେ ଦସ୍‌ ଆତ୍‌ଲା ନେ ଆରାତ୍ରା ଆକେନ୍‌ ସାପା ଗଟେଲା ଡିଗ୍‌ ନା ଜେ, ନେନେ ପାପ୍‌ ଡିଙ୍ଗ୍‌ନେଃବକ୍ନେ ଉଚିତ୍‌ ଡଣ୍ଡ୍‌ବାନ୍‌ ଗଣ୍ଡା ଡଣ୍ଡ୍‌ ଆନେକେ ବିଃନାବକେ ବାରି ନେନେ ଦେକ୍‌ରକମ୍‌ ଉଡ଼ିରୁଆକେ ଜିବନ୍‌ ଆଃଡିଂଚେ ନାବକେ । 14 ଆକେନ୍‌ କେଚେଃ ନେ ମେଁନେ ବାର୍‌ମୁଇଂତର୍‌ ଦେକ୍‌ରକମ୍‌ ବୁଲ୍‌ ନେଡିଂଏ । ଆକେନ୍‌ ଗ୍ରୁନା ରକମ୍‌ନେ କାମ୍‌ ଡିଂଣ୍ଡ୍ରେ ବିନ୍‌ ଜାତିଇଂନେ ଏତେ କୁଟୁମ୍‌ ନେଡିଙ୍ଗ୍‌ଏ ? ଫେଡିଂଲା ପେ ମେଃନେ ଆନେକେ ସାପାରେକେ ବିନାସ୍‌ ଡିଂନେ ଜାକ ରିସା ନାଡିଂଏ ? ତେଲା ଜାଡିଗ୍‌ ବାରି ରକ୍ୟା ଆବାଆର୍‌ ଣ୍ଡୁ । 15 ଅ ମାପ୍‌ରୁ, ଇସ୍ରାଏଲ୍‌ନେ ପର୍‌ମେସର୍‌, ନା ଦରମ୍‌ । ଆଣ୍ଡିନ୍‌ ସାକିରେ ନେ ଏବେ ଜାକ ରକ୍ଷା ବାନେଲେକେ । ନେ ନା ସାମ୍‌ନାରେ ନେ ନିଜେନେ ପାପ୍‌ଅରିଆ ଦସି ଡିଂନେଲାଏକେ । ଆତେନ୍‌ସା ଜା ଡିଗ୍‌ ନା ଡାଗ୍ରା ତୁଆଁ ଆୟାଆର୍‌ ଣ୍ଡୁ ।