1 ଆତେନ୍‌ ବେଲା ଦାରୀୟାବସ ଇଃସାଙ୍ଗ୍‌ ଆଦେସ୍‌ ଡିଂଲା ବାବିଲନିଆ ଲେଃକ୍ନେ ବଇ ଲେକ୍ନେ ଗୁଦାମ୍‌ ଡୁଆନିଆ ଗୁଆର୍‌ଚେ ବକ୍ନେ ଦନ୍‌ ଆର୍ଜେ ବଆର୍‌ଗେ, ଆତେନ୍‌ ତୁର୍‌ଆର୍‌କେ । 2 ବାରି ମାଦୀୟ ପ୍ରଦେଶ୍‌ନେ ଅକ୍ଷ୍ମଥା ମିନିକ୍ନେ ଇଃସାଙ୍ଗ୍‌ ଡୁଆନିଆ ମୁଇଂ ୱେଁକ୍ନେ ବଇ ବାକେ । ଆତ୍‌ଅରିଆ ମନେ ତ୍ଲାଗ୍‌ ନ୍‌ସାଃ ଦେକ୍‌ରକମ୍‌ ଗୁଆର୍‌ ବଗେ ।

3 କୋରସ୍‌ ରାଜା ସାସନ୍‌ନେ ପର୍‌ତୁମ୍‌ ମୁଆଁ ବେଲା କୋରସ୍‌ ରାଜା ଯିରୂଶାଲମନ୍ନିଆ ଲେଃକ୍ନେ ପର୍‌ମେସର୍‌ନେ ଡୁଆ ବିସ‍ଏରେ ଆକେନ୍‌ ଆଦେସ୍‌ ବିଃକେ । ରେମୁଆଁଇଂ ମୁଇଂ ପସୁକେ ସିସିନେ ଜାଗା ଡୁଆ ମୁଇଂ ଆଃରେ ଆର୍‌ଲେ ବାରି ମେଁନେ କୁନାଦି ସ୍ରି ଗଃଚେ ଆଃରେ ଆର୍‌ଲେ । ମେଁନେ ଉଚା ଷାଟିଏ ନ୍ତି ବାରି ମେଁନେ ଅସାର୍‌ ଷାଟିଏ ନ୍ତି ଡିଂଲେ । 4 ଆତେନ୍‌ ଞ୍ଜି ଦାଡ଼ି ମ୍ନା ମ୍ନାନେ ବ୍ରି ଏତେ ବାରି ମୁଇଂ ଦାଡ଼ି ତ୍ମିକ୍ନେ ତ୍ନୁ ସୁଆ ଏତେ ସଜେ ଆର୍‌କେ । ଆରି, ଇଃସାଙ୍ଗ୍‌ନେ ଡୁଆବାନ୍‌ ମେଙ୍ଗ୍‌ନେ କୁଲି ବିଃଆର୍‌ଲେ । 5 ବାରି, ପର୍‌ମେସର୍‌ ଡୁଆନେ ସାପା ଜିନିସ୍‌ ସୁନା ବାରି ରୁପାନେ ତାଲି ମୁତା ନବୂଖଦ୍‌ନିତ୍ସର ଯିରୂଶାଲମନ୍ନିଆ ଲେଃକ୍ନେ ମନ୍ଦିର୍‌ବାନ୍‌ ରାଙ୍ଗ୍‌ୱେଚେ ବାବିଲନିଆ ଡୁଂପାଂବଗେ, ଆତେନ୍‌ସାପା ଆଃଆଣ୍ଡେ ବିଃପା । ବାରି ସାପା ତାଲି ମୁତା ବାରି ଯିରୂଶାଲମ ନିଆ ଲେଃକ୍ନେ ପାର୍‌ତନା ଡୁଆନେ ନିଜେ ନିଜେନେ ଜାଗାନ୍ନିଆ ଡୁଂପାଂଆର୍‌ଲେ । ବାରି ପେ ପର୍‌ମେସର୍‌ନେ ଡୁଆ ବିତ୍ରେ ଆତେନ୍‌ ସାପା ବପା ।

6 ଆତେନ୍‌ସା ଅ ତତ୍ତନୟ, ଲଣ୍ଡିଆ ଇନୁମେତା ଲେଃକ୍ନେ ଦେସ୍‌ନେ ରାଜ୍ୟପାଲ୍‌, ଅ ଶଥର ବୋଷଣୟ, ପେ ବାରି ପେନି ସାଙ୍ଗଡ଼େଇଂ ଲଣ୍ଡିଆ ଇନୁମେତା ଲେଃକ୍ନେ ଅଫର୍ସଖୀୟଇଂ, ଆତ୍‌ବାନ୍‌ ସୁଲ ଲାଲାପା । 7 ପର୍‌ମେସର୍‌ନେ ଆକେନ୍‌ ଡୁଆନେ କାମ୍‌ନ୍ନିଆ ନ୍ତି ଆବିଃଗେ ନାମଃ । ଯିହୁଦୀଇଂନେ ରାଇଜପାଲ୍‌ ବାରି ଯିହୁଦୀ ରେମୁଆଁଇଂନେ ମ୍ନାରେଇଂ ପର୍‌ମେସର୍‌ନେ ଆକେନ୍‌ ଡୁଆ ଆତେନ୍‌ ଜାଗାନ୍ନିଆ ଆଃରେ ଆର୍‌ଲେ । 8 ବାରି, ପର୍‌ମେସର୍‌ନେ ଆକେନ୍‌ ଡୁଆ ଆଃରେନ୍‌ସା ପେନି ଆକେନ୍‌ ଯିହୁଦୀ ରେମୁଆଁଇଂନେ ମ୍ନାରେଇଂନେ ଆଡ଼ାତ୍ରା ମେଃ ଡିଂଏ, ଆତେନ୍‌ ନେ ଆଦେସ୍‌ ଡିଂନେଡିଂକେ । ମେଙ୍ଗ୍‌ନେ କସ୍‌ଟ ଯେନ୍ତିକି ଆଡିଂ, ଆତେନ୍‌ସା ଆତେନ୍‌ ରେମୁଆଁଇଂକେ ରାଜାନେ ସମ୍ପତ୍ତିବାନ୍‌, ବା ଲଣ୍ଡିଆ ଇନୁମେତା ଲେଃକ୍ନେ ରାଜାନେ ସିସ୍ତୁ ଡାବୁବାନ୍‌ ଜାବର୍‌ ଜତନ୍‌ରେ କର୍‌ଚ ଡିଙ୍ଗ୍‌ଆର୍‌ଲେ । 9 ବାରି, ସର୍‌ଗେ ଲେକ୍ନେ ପର୍‌ମେସର୍‌ନେ ମୁଇଂ ପସୁକେ ସୁଆନିଆ ଯଜ୍ଞ ବିନ୍‌ସା ଯିରୂଶାଲମ ଡାଗ୍ରା ଲାଏଃକ୍ନେ ପୁଜାରିଇଂନେ ବ୍ନାଲିର୍‌ ଇସାବ୍‌ରେ ଗ୍ଲେ ବାରି ମେଣ୍ଡା ବାରି ଉଂମେଣ୍ଡାଇଂ, ଗହମ, ବିତିଗ୍‌, ଅଙ୍ଗୁର୍‌ରସ୍‌ ବାରି ଞ୍ଚୁ, ମେଁ ମେଁନେ ଆମେଇଂକେ ଦର୍‌କାର୍‌, ଆତେନ୍‌ ସାପା ଦିନ୍‌କେ ଦିନ୍‌ କସ୍‌ଟ ମାଡିଂଚେ ଆମେଇଂକେ ବିଃଆର୍‌ଲେଃ । 10 ଆତ୍‌ବା ମେଇଂ ସର୍‌ଗେ ଲେଃକ୍ନେ ପର୍‌ମେସର୍‌ନେ ଉଦେସ୍‌ରେ ଗ୍ରହନ୍‌ ଡିଙ୍ଗ୍‌ନେ ବଲି ବିଃଆର୍‌ଏ, ବାରି ଇଃସାଙ୍ଗ୍‌ନେ ବାରି ମେଁନେ ଉଂଡେଇଂନେ ଜିବନ୍‌ ଲେଃନ୍‌ସା ପାର୍‌ତନା ଡିଂଆର୍‌ଏ । 11 ବାରି ନେଙ୍ଗ୍‌ ଆଦେସ୍‌ ବିଃଣ୍ଡିଙ୍ଗ୍‌କେ ଜେ, ଜଦି ଆକେନ୍ ସାମୁଆଁକେ ଅମାନି ଡିଂଏ, ମେଁନେ ଡୁଆବାନ୍‌ ମୁଇଂ ତ୍ନୁ ଜଗ୍‌ଡୁଂପାଙ୍ଗ୍‌ଚେ ଆତେନ୍‌ ସୁଆନିଆ ଆମେକେ ଗାଗ୍‌ଚେ ଆୱେଜଙ୍ଗ୍‌ ବିଃଆର୍‌ଲେ । ବାରି, ମେଁ ଆତ୍‌ଲା ମେଁନେ ଡୁଆ କତ୍‌ଗାଦି ସୁଗୁଆ ଆଃଡିଂଆର୍‌ଲେଃ । 12 ଆରି, ମୁଃଡ଼ି ରାଜାଇଂ ବାରି କୁଟୁମ୍‌ ରେମୁଆଁଇଂ ପର୍‌ମେସର୍‌ନେ ଯିରୂଶାଲମନ୍ନିଆ ଲେଃକ୍ନେ ଆକେନ୍‌ ଡୁଆକେ ବିନାସ୍‌ ଆଃଡିଂନେ ଚିନ୍ତାରେ ଆତେନ୍‌ ସାମୁଆଁକେ ଅମାନି ଡିଂ ନ୍‌ସା ବାସଙ୍ଗ୍‌ଆର୍‌ଏ, ଆତେନ୍‌ ସାପାରେକେ ଯିରୂଶାଲମନ୍ନିଆ ନିଜେନେ ମିନି ବନ୍‌ସାଃ ପର୍‌ମେସର୍‌ ଚିନ୍‌ଚତର୍‌ ଆଃଡିଂଲେଃ । ନେଙ୍ଗ୍‌ ଦାରୀୟାବସ ଆକେନ୍‌ ଆଦେସ୍‌ ବିଃମ୍ୱକେ । ଆକେନ୍‌ ଜାବର୍‌ ଜତନ୍‌ରେ କାମ୍‌ ଡିଂଆର୍‌ଲେଃ ।

13 ଆତ୍‌ବା ଦାରୀୟାବସ ରାଜା ଆକେନ୍‌ ଆଦେସ୍‌ ବେଲା ତତ୍ତନୟ, ଲଣ୍ଡିଆ ଇନୁମେତା ଲେଃକ୍ନେ ଦେସ୍‌ନେ ରାଇଜପାଲ୍‌ ବାରି ଶଥର ବୋଷଣୟ ବାରି ମେଙ୍ଗ୍‌ନେ ସାଙ୍ଗଡ଼େଇଂ ଜାବର୍‌ ଯତ୍ନରେ ଆତେନ୍‌ ଇସାବ୍‌ରେ କାମ୍‌ ଡିଂଆର୍‌କେ । 14 ଆତ୍‌ବାନ୍‌ ହାଗୟ ବବିସତ୍‌ ବକ୍ତାନେ ବାରି ଇଦ୍ଦୋନେ ଉଂଡେ ଜିଖରିୟନେ ବବିସତ୍‌ନେ ସାମୁଆଁ ଇସାବ୍‌ରେ ଯିହୁଦୀ ରେମୁଆଁଇଂ ବିତ୍‌ରେ ମ୍ନାରେଇଂ ମନ୍ଦିର୍‌ ଆଃରେ ଆର୍‌କେ ବାରି ଡିଂବ୍ନ କାମ୍‌ ଡିଂଆର୍‌କେ । ଆରି, ମେଇଂ ଇସ୍ରାଏଲ୍‌ନେ ପର୍‌ମେସର୍‌ନେ ଆଜ୍ଞା ଅନୁସାରେ ବାରି ପାରସ୍ୟ ଇଃସାଙ୍ଗ୍‌ କୋରସ୍‌ ବାରି ଦାରୀୟାବସ ବାରି ଅର୍ତ୍ତକ୍ଷସ୍ତନେ ଆଦେସ୍‌ ଅନୁସାରେ ଆଃରେଚେ ଆଃଡାଆର୍‌କେ । 15 ଦାରୀୟାବସ ଇଃସାଙ୍ଗ୍‌ନେ ସାସନ୍‌ନେ ତୁର୍ ମୁଆଁ କାଲା ଅଦର ମିନିକ୍ନେ ଆର୍କେନେ ତୃତୀୟ ଦିନାକେଲା ଆକେନ୍ ଡୁଆ ଡାକେ । 16 ଆକେନ୍‌ ଇଡ଼ିଂ ଇସ୍ରାଏଲ୍‌ନେ ରେମୁଆଁଇଂ, ପୁଜାରିଇଂ ବାରି ଲେବୀୟଇଂ ବାରି ବନ୍ଦି ଡିଂଲେକ୍ନେ ବାକି ରେମୁଆଁଇଂ ସାର୍‌ଦାରେ ପର୍‌ମେସର୍‌ନେ ଆକେନ୍‌ ଡୁଆ ଉଦ୍‌ଗାଟନ୍‌ ଡିଙ୍ଗ୍‌ନେ ପାଣ୍ଡୁଏ ପାଲେ ଆର୍‌କେ । 17 ବାରି, ପର୍‌ମେସର୍‌ନେ ଆକେନ୍ ଡୁଆନେ ଉଦ୍‌ଗାଟନ୍‌ କେଲା ମେଇଂ ମୁଇଂ ଶହ ଗ୍ଲେ, ମ୍ୱାର୍‌ ଶହ ମେଣ୍ଡା, ଚାରି ଶହେଟା ଉଂମେଣ୍ଡା ଉଂଡେଇଂକେ ବିଃ ଆର୍‌କେ । ଆରି, ସାପା ଇସ୍ରାଏଲ୍‌ଇଂନେ ପାପ୍‌ ଡିଙ୍ଗ୍‌ବକ୍ନେ ବାନ୍ ଉଦାର୍ ବାନ୍‌ସା ବଲି ବିନ୍‌ସା ଇସ୍ରାଏଲ୍‌ନେ କୁଟୁମ୍‌ନେ ସଂଖ୍ୟା ଅନୁସାରେ ଚାର୍‌ଟା ବକାମି ବିଃ ଆର୍‌କେ । 18 ବାରି, ମେଇଂ ମୋଶାନେ ବଇନିଆ ଗୁଆର୍‌ବକ୍ନେ ଇସାବ୍‌ରେ ଯିରୂଶାଲମନ୍ନିଆ ପର୍‌ମେସର୍‌ନେ ସେବା ଡିଂନ୍‌ସାଃ ପୁଜାରିଇଂକେ ମେଙ୍ଗ୍‌ନେ ଜାଗା ଇସାବ୍‌ରେ ବାରି ଲେବୀୟଇଂକେ ମେଙ୍ଗ୍‌ନେ ବଇନିଆ ଗୁଆର୍‌ବକ୍ନେ ପାଲି ଅନୁସାରେ ସ୍ରି ଆର୍‌କେ ।

19 ଆକେନ୍‌ ଇଡ଼ିଂ ପର୍‌ତୁମ୍‌ ଆର୍କେନେ ଗଅଁ ଦିନ୍‌ କେଲା ବନ୍ଦି ଡିଂଚେଃ ଲେକ୍ନେ ଉଂଡେଇଂ ଉଦାର୍‌ ପାଣ୍ଡୁଏ ପାଲେ ଆର୍‌କେ । 20 ମାତର୍‌ ପୁଜାରିଇଂ ବାରି ଲେବୀୟଇଂ ମୁଇଂତୁଗ୍‌ ରିସିଂଚେ ନିଜେ ନିଜେକେ ପବିତ୍ର ଆଃଡିଂଆର୍‌କେ । ମେଇଂ ସାପାରେ ପବିତ୍ର ଡିଂଲେ ଆର୍‌ଗେ । ଆତେନ୍‌ସା ମେଇଂ ବନ୍ଦି ଡିଂଲେକ୍ନେ ସାପାରେ ଗଡ଼େଇଂ ଆତ୍‌ଲା, ମେଙ୍ଗ୍‌ନେ ପୁଜାରି ବୟାଁଇଂ ଆତ୍‌ଲା ବାରି ନିଜେ ଆତ୍‌ଲା ଉଦାର୍‌ ପାଣ୍ଡୁଏନେ ଆତ୍‌ଲା ମୁଇଂ ପସୁକେ ସିଃଆର୍‌କେ । 21 ଆରି, ବନ୍ଦି ଡିଙ୍ଗ୍‌ଚେଃ ଲେକ୍ନେ ବାରି ମୁଇଂତର୍‌ ପାଙ୍ଗ୍‌ଲେ ଆର୍‌କ୍ନେ ଇସ୍ରାଏଲ୍‌ ଉଂଡେଇଂ ବାରି ଜାଣ୍ଡେଇଂ ମେଙ୍ଗ୍‌ ଏତେ କୁଡ଼େଚେ ଇସ୍ରାଏଲ୍‌ନେ ପର୍‌ମେସର୍‌ ମାପ୍‌ରୁକେ ପ୍ଲା ପ୍ଲା ୱେନ୍‌ସା ଦେଶ୍‌ନିଆ ବାସାଲେକ୍ନେ ରେମୁଆଁଇଂ ବାରି ବିନ୍‌ ଦେଶ୍‌ନିଆ ବାସା ଲେଃକ୍ନେ ରେମୁଆଁଇଂନେ ଅଶୁଚି କାମ୍‌ ବାନ୍‌ ନିଜେକେ ଅଲ୍‌ଗା ଆଃଡିଂବଗେ, ମେଇଂ ସାପାରେ ଚଙ୍ଗ୍‌ ଆର୍‌କେ । 22 ବାରି, ଗୁ ଦିନା ସାର୍‌ଦାରେ ଖମୀର୍‌ ଆମିସୁଃକ୍ନେ ରୁଟିନେ ପାଣ୍ଡୁଏ ପାଲନ୍‌ ଡିଂଆର୍‌କେ । ମାତର୍‌ ମାପ୍‌ରୁ ଆମେଇଂକେ ସାର୍‌ଦା ଆଃଡିଂବଗେ ବାରି ଇସ୍ରାଏଲ୍‌ନେ ପର୍‌ମେସର୍‌, ପର୍‌ମେସର୍‌ନେ ଡୁଆ କାମ୍‌ ଡିଙ୍ଗ୍‌ ବେଲା ମେଙ୍ଗ୍‌ନେ ନ୍ତିକେ ଡାଟ୍‌ ଆଃଡିଂସା ମେଙ୍ଗ୍‌ନେ ଆରାତ୍ରା ଅଶୂରୀୟ ରାଜାନେ ମନ୍‌ଅରିଆ ଆଃଚେତା ବିକେ ।