1 ଆତ୍‌ବା ମୋଶା ଇସ୍ରାଏଲ୍‌ ଗଡ଼େଇଂନେ ସାପା ମଣ୍ଡଲିକେ ମୁଇଂତୁଗ୍‌ ରାସିଂଚେ ବାସଙ୍ଗ୍‌କେ, ମାପ୍‌ରୁ ଆପେକେ ଆକେନ୍‌ ସାପା ବ୍ନାଲିର୍‌ ପାଲେନ୍‌ସା ଆଦେସ୍‌ ବିଃବକେ । 2 ତୁର୍‌ ଦିନା କାମ୍‌ ପେଡିଂଏ, ମାତର୍‌ ଗୁ ଦିନା ପେ ଆତ୍‌ଲା ମୁଇଂ ପବିତ୍ର ଦିନା ଡିଂଏ; ଆତେନ୍‌ ମାପ୍‌ରୁନେ ଉଦେସ୍‌ରେ ମ୍ନା ପୁଣ୍ଡେନେ ଦିନ୍‌ ଡିଂଏ, ଜା ଜଦି ଆତେନ୍‌ ଦିନା କାମ୍‌ ଡିଂଏ, ମେଁ ଗୁଏଃଏ । 3 ପେ ପୁଣ୍ଡେନେ ଦିନ୍‌ ପେ ବାସା ପେଡ଼ିଂକ୍ନେ ଡୁଆନିଆ ସୁଆ ପେଃରାଡୁଆ ଣ୍ଡୁ ।

4 ବାରି, ମୋଶା ଇସ୍ରାଏଲ୍‌ ଗଡ଼େଇଂନେ ସାପା ମଣ୍ଡଲିକେ ବାରି ବାସଙ୍ଗ୍‌କେ, ମାପ୍‌ରୁ ଆକେନ୍‌ ସାପା ଆଦେସ୍‌ ବିଃବକେ । 5 ପେ ମାପ୍‌ରୁ ଆତ୍‌ଲା ପେ ବିତ୍‌ରେବାନ୍‌ ଉପହାର୍‌ ଆର୍ମେ ବପା; ଜାନେ ଜଦି ଇକ୍‌ଚା, ମେଁ ମାପ୍‌ରୁ ଆତ୍‌ଲା ସୁନା ଆରି ରୁପା ଆରି ପିତଲ୍‌, 6 ବାରି ନିଲି ବାନା ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ତୁଲୁଏ ବାରି ପାତଲ୍‌କ୍ନେ ସୁତା ଆରି ଉଂମିଃନେ ଉଗ୍‌ବ, 7 ବାରି ମ୍‌ମ୍ୟାଁ ଡିଂକ୍ନେ ମେଣ୍ଡା ଉକ୍‌ସା ବାରି ଉଂମିଃନେ ଉକ୍‌ସା ବାରି ଶିଟିମ୍‌ ସୁଆ, 8 ବାରି ଦିପ୍‌ ଆତ୍ଲା ଞ୍ଚୁ ଆରି ମୁଇଂ ପଦ୍‌ଅରିଆ ବନେ ବେଲା ବାଆଃ କିଗ୍‌ନେ ଞ୍ଚୁ ବାରି ନିମାଣ୍ଡାଃ ମଃନେ ଦୁପ୍‌, 9 ବାରି ଏଫୋଦ୍‌ ବାରି ଗ୍ରିନିଆ ସନେ ପାଟା ଆତ୍‌ଲା ଗୋମେଦକ ମଣୀ ରକମ୍‌ନେ ଆରେକ୍ନେ ବ୍ରି, ଆକେନ୍‌ ସାପା ମାପ୍‌ରୁନେ ଉପହାର୍‌ ଡୁଂପେପାଂଏ ।

10 ଆରି ପେ ବିତ୍‌ରେବାନ୍‌ ଜା ସାପା କାମ୍‌ ମ୍ୟାଃଲେଆର୍‌କ୍ନେ ରେମୁଆଁଇଂ ପାଙ୍ଗ୍‌ଚେ ମାପ୍‌ରୁନେ ଆଦେସ୍‌ରେ ସାପା କିଚି ତିଆର୍‌ ଡିଂଆର୍‌ଲେ । 11 ଡୁଆ ବାରି ଆତ୍‌ଅରିଆନେ କୁଡ଼ିଆ ବାରି ସ୍ଲାପ୍‌ ଆରି ଆକୁଡ଼ି ଆରି ପାଟା ଆରି ଗାଡ଼ା ଆରି ଡେଲି ଆରି କଟ୍‌ଲା, 12 ବାରି ନିଅମ୍‌ ପେଡ଼ି ଆରି ଆତ୍‌ଅରିଆନେ ଟେଙ୍ଗ୍‌ ଆରି ପାପ୍‌କେ ଆଗୁଡ଼େନେ ଆରି ଆଗୁଡ଼େକ୍ନେ ପର୍‌ଦା ପାଟେଇ, 13 ବାରି ଟେବୁଲ୍‌ ଆରି ଆତ୍‌ଅରିଆନେ ଟେଙ୍ଗ୍‌ ବାରି ତାଲି‍ଇଙ୍ଗ୍‌ ଆରି ଦର୍ସନ୍ ଡିଂନେ ରୁଟି, 14 ଆରି ତାର୍କିଗ୍‌ ବିଃନ୍‌ସା ଦିପ୍, ଆତ୍ଅରିଆନେ ତାଲି, ଦିପ୍‌ ବାରି ଦିପ୍‌ ଆତ୍‌ଲା ଞ୍ଚୁ, 15 ବାରି ଦୁପ୍‌ ବେଦି ବାରି ଆତ୍‌ଅରିଆନେ ଟେଙ୍ଗ୍‌ ବାରି ମୁଇଂ ପଦ୍‌ଅରିଆ ବନେ ବେଲା ବାଆଃ କିଗ୍‌ନେ ଞ୍ଚୁ ବାରି ବାସ୍ନାବିଃନେ ଦୁପ୍‌ ବାରି ଡୁଆନେ ମେନ୍‌ କାପାଟ୍‌ନିଆ ଡାନେ ପାଟେଇ, 16 ବାରି ସୁଆ ବଲି ବେଦି ବାରି ଆତ୍‌ନେ ପିତ୍ତଲ୍‌ ଜାଲି ବାରି ଟେଙ୍ଗ୍‌ ବାରି ତାଲିଇଙ୍ଗ୍‌ ବାରି ଞ୍ଚଙ୍ଗ୍‌ତି ପାକାନେ ଞ୍ଚ ନ୍ତି ଗୁଏଚଗୁଇତିନେ ମୁତା ବାରି ଆତ୍‌ଅରିଆ ଲେଃକ୍ନେ ବାଲା । 17 ବାରି ପ୍ଲେଡ଼ିଆନେ ପର୍‌ଦା ବାରି ଆତ୍‌ଅରିଆନେ ଡେଲି ବାରି ଜାଲି ପ୍ଲେଡ଼ିଆନେ କାପାଟ୍‌କେ ଡାଃନେ ପାଟେଇ, 18 ବାରି ଡୁଆନେ କୁଟି ବାରି ପ୍ଲେଡ଼ିଆନେ କୁଟି ବାରି ମ୍ୱାର୍‌ ପାକାନେ ଗେହେଃ, 19 ବାରି ପବିତ୍ର ଜାଗାନ୍ନିଆ ସେବା ଡିଂନ୍‌ସା ସବାକ୍ନେ ପାଟେଇ, ଆକେନ୍‌ ସାପା ପାଟେଇ ପୁଜାରି ହାରୋଣ ଆତ୍‌ଲା, ମେଁନେ ଉଂଡେଇଂ ସଃନ୍‌ସା ଆକେନ୍‌, ଉଡ଼ିବେଲା ମେଇଂ ପୁଜାରି ରକମ୍‌ ସେବା ଡିଂଆର୍‌ଏ । ଆତେନ୍‌ ବେଲା ମେଇଂ ସଃଆର୍‌ଏ ।

20 ଏନ୍‌ଇଡ଼ିଂ ଇସ୍ରାଏଲ୍‌ ଗଡ଼େଇଂନେ ସାପା ମଣ୍ଡଲି ମୋଶାନେ ଡାଗ୍ରାବାନ୍ ଲାଗ୍‌ଡଆର୍‌କେ । 21 ବାରି ଜାନେ ମନ୍‌ ଆଜାକେ ବାସଙ୍ଗ୍‌କେ ବାରି ଜାନେ ଆତ୍ମା ଆଜାକେ ଇକ୍‌ଚା ଡିଂକେ । ମେଇଂ ମାପ୍‌ରୁ ଏତେ କୁକପାର୍‌ କୁଡ଼ିଆ ତିଆର୍‌ ଡିଂନ୍‌ସା ବାରି ଆତ୍‌ ବିତ୍‌ରେ ଲେଃକ୍ନେ ସାପା କାମ୍‌ ଆତ୍‌ଲା ବାରି ପବିତ୍ର ପାଟେଇ ଆତ୍‌ଲା ମାପ୍‌ରୁନେ ଉପହାର୍‌ ରାଙ୍ଗ୍‌ପାଂଆର୍‌କେ । 22 ବାରି ଙ୍ଗିର୍‌ବୁଏ ଆରି ସେଲାମ୍ବୁଏଃ ଉଡ଼ିରୁଆନେ ଇକ୍‌ଚା ଲେଃଗେ, ମେଙ୍ଗ୍‌ ସାପାରେ ପାଙ୍ଗ୍‌ଚେ ଲୁଗଃନେ ମାଲା ବାରି ଚ୍ନଗ୍‌ମୁ ବାରି ୱାର୍ତି ବାରି ତ‍ଅଁ ରକମ୍‌ନେ ସୁନା ଅଳଙ୍କାର୍‌ ସାପା ରାଙ୍ଗ୍‌ପାଂଆର୍‌କେ; ସାପାରେ ମାପ୍‌ରୁନେ ମ୍ନିରେ ସୁନାନେ ଦାନ୍‌ ବିଃଆର୍‌କେ । 23 ବାରି ଜା ଡାଗ୍ରା ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ତୁଲୁଏ ପାତଲ୍‌କ୍ନେ ସୁତା ଆରି ଗିମିଃନେ ଉଗ୍‌ବ ଆରି ମିୟାଁ ଡିଂଲାଏକ୍ନେ ମେଣ୍ଡା ଉକ୍‌ସା ଆରି ଉଙ୍ଗ୍‌ମିଃନେ ଉକ୍‌ସା ଲେଃଗେ, ମେଇଂ ସାପାରେ ଆତେନ୍ ରାଙ୍ଗ୍‌ପାଂଆର୍‌କେ । 24 ବାରି ଜା ରୁପାନେ କି ପିତ୍ତଲ୍‌ନେ ଇନାମ୍ ବିଃକେ, ମେଁ ମାପ୍‌ରୁନେ ଦାନ୍‌ ରାଙ୍ଗ୍‌ପାଂକେ; ଆରି ଜା ଡାଗ୍ରା ସେବା ଡିଂନ୍‌ସା ମେଃଡିଗ୍‌ କାମ୍‌ରେ ଆଲାଗେ ନ୍‌ସା ଶିଟିମ୍‌ ସୁଆ ଲେଃଗେ, ମେଁ ଆତେନ୍‌ ଡୁଂପାଂକେ । 25 ବୁଦି ଲେକ୍ନେ ସେଲାମ୍ବୁଏଃଇଂ ନିଜେ ନିଜେନେ ନ୍ତି ଏତେ ସୁତା ଗୁଆଃଚେ ନିଲି, କଃଡ଼େଆଁ ବାନା, ସିନ୍ଦୁର୍‌ ବାନା ଆରି ପାତଲ୍‌କ୍ନେ ସୁତା ଡୁଂପାଂଆର୍‌କେ । 26 ବାରି ମୁଡ଼ି ସେଲାମ୍ବୁଏଃଇଂନେ ମନ୍‌ ବିତ୍‌ରେ ବୁଦି ଲେଃଗେ, ମେଇଂ ସାପାରେ ଗିମିଃ ଉକ୍‌ସାନେ ସୁତା ଗୁଆଃଆର୍‌କେ । 27 ବାରି ନେତାଇଂ ଏଫୋଦ୍‌ ଆରି ଗ୍ରି ସଃନେ ପାଟା ଆତ୍‌ଲା ଗୋମେଦକ ମଣୀ ଗ୍ନଗ୍‌ ଏତେ ଗଗ୍‌ଚେ ଆରେବକ୍ନେ ମଣୀ, 28 ବାରି ଦିପ୍‌ ଆରି ବାଆଃନିଆ କିଗ୍‌ନେ ଞ୍ଚୁ ଆରି ନିମାଣ୍ଡା ବାସ୍ନା ବିଃନେ ଦୁପ୍‌ ଆତ୍‌ଲା ମଃନେ ଜିନିସ୍‌ ଆରି ଞ୍ଚୁ ଡୁଂପାଂକେ । 29 ଇସ୍ରାଏଲ୍‌ନେ ଗଡ଼େଇଂ ନିଜର୍‌ ଇକ୍‌ଚାରେ ମାପ୍‌ରୁନେ ମ୍ନିରେ ଦାନ୍‌ ଡୁଂପାଂଆର୍‌କେ; ମାପ୍‌ରୁ ମୋଶାବାନ୍‌ ମେଃ ମେଃନି ଡିଂନ୍‌ସା ଆଦେସ୍‌ ବିଃବକେ, ଆତ୍‌ଅରିଆ ମେଁ ରକମ୍‌ନେ କାମ୍‌ନ୍ନିଆ ଲାଗେନ୍‌ସା ମୁଃଡ଼ି ଙ୍ଗିର୍‌ବୁଏ ଆରି ସେଲାମ୍ବୁଏଃଇଂନେ ମନ୍‌ ଆମେଇଂକେ ଇକ୍‌ଚା ଆଃଡିଂକେ, ବାରି ମେଇଂ ସାପାରେ ଦାନ୍‌ ଡୁଂପାଂଆର୍‌କେ ।

30 ଏନ୍‌ଇଡ଼ିଂ ମୋଶା ଇସ୍ରାଏଲ୍‌ ରେମୁଆଁଇଂକେ ବାରି ବାସଙ୍ଗ୍‌କେ, କେଲା, ମାପ୍‌ରୁ ଯିହୁଦା ବଂସନେ ହୂରନେ ଏଗ୍‌ଲେ ଉରିନେ ଉଂଡେ ବତ୍ସଲେଲକେ ମିନି ସାଃଚେ ୱାକେ । 31 ବାରି ଆମେକେ ଗିଆନ୍‌, ବୁଦି, ବିଦ୍ୟା ଆରି ସାପା ରକମ୍‌ନେ କାମ୍‌ ବିଃଣ୍ଡ୍ରେ ପର୍‌ମେସର୍‌ନେ ଆତ୍ମାଅରିଆ ବର୍ତି ଆଃଡିଂଚେ, 32 ଚିତ୍ର କାମ୍‌ ଡିଂନେ ବାରି ସୁନା, ରୁପା ବାରି ପିତ୍ତଲ୍‌ ଗଦେନେ, 33 ବାରି ଗଗ୍‌କ୍ନେ ମଣୀ ଆଃରେବକ୍ନେ ଆରି ନାନା ରକମ୍‌ନେ ବାଡ଼େଇ କାମ୍‌ ଡିଂନ୍‌ସା ସୁଆ ଗ୍ନଗ୍‌, ଆକେନ୍‌ ସାପା ବାଡ଼େଇ କାମ୍‌ ଡିଂନ୍‌ସା ଆମେକେ ଆଃସିକେ ବକେ । 34 ବାରି ଆଃସିକେ ନ୍‌ସା ମେଁନି ଆରି ଦାନ ବଂସନେ ଅହୀଷାମକନେ ଉଂଡେ ଅହଲୀୟାବନେ ମନ୍‌ଅରିଆ ସାପା କିଚି ବିଃକେ । 35 ଆରି ଗଦେନ୍‌ସା ବାରି ବାଡ଼େଇ କାମ୍‌ ଡିଂନ୍‌ସା, ବାରି ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ତୁଲୁଏ ସୁତା ଏତେ ସୁନ୍ନତ୍‌ କାମ୍‌ ଆରି ତଗ୍‌ନେ କାମ୍‌ ଡିଂନ୍‌ସା, ତେନ୍‌ଇଂ, ସାପା ମିସ୍ତୁରି କାମ୍‌ ବାରି ରୁପ୍‌ କାମ୍‌ ଡିଂନ୍‌ସା ମେଙ୍ଗ୍‌ନେ ମନ୍‌କେ ଗିଆନ୍‌ଅରିଆ ବର୍ତି ଆଃଡିଂଆର୍‌କେ ।