1 ଆତ୍‌ବା ମିସର୍‌ ଦେସ୍‌ନିଆ ମାପ୍‌ରୁ ମୋଶା ଆରି ହାରୋଣକେ ବାସଙ୍ଗ୍‌କେ, 2 "ଆକେନ୍‌ ଆର୍କେ ପେନି ମେନ୍‌ ଆର୍କେ ବାରି ମେମୁଆଁନେ ପର୍‌ତୁମ୍‌ ଆର୍କେ ଡିଂଏ । 3 ପେ ଇସ୍ରାଏଲ୍‌ନେ ସାପା ମଣ୍ଡଲିକେ ଆକେନ୍‌ ସାମୁଆଁ ବାସଙ୍ଗ୍‌ପା, ଆକେନ୍‌ ଆର୍କେନେ ଗୁଆ ଦିନା ପେନି ସାପା ରେମୁଆଁ ନ୍ତାକେଲାନେ ଡୁଆ ଇସାବ୍‌ରେ ସାପା ଡୁଆଣ୍ଡ୍ରେ ଆତ୍‌ଲା ମୁଇଂ ମୁଇଂ ଉଂମେଣ୍ଡା ଡୁଙ୍ଗ୍‌ପେୱେଏ । 4 ବାରି, ମୁଇଂ ଉଂମେଣ୍ଡା ଡୁଂୱେ ନ୍‌ସା ଜଦି ଜାଣ୍ଡେନେ କୁଟୁମ୍‌ ଗଣ୍ଡାଃଏ, ତେଲା ମେଁ ଆରି ମେଁନି ଡୁଆଡାଗ୍ରାଣ୍ଡ୍ରେ ଆତ୍‌ଲା, ପ୍ରାନିଇଂନେ ଇସାବ୍‌କିତାବ୍‌ ଇସାବ୍‌ରେ ମୁଇଂ ଉଂମେଣ୍ଡା ରାଙ୍ଗ୍‌ୱେଆର୍‌ଏ; ପେ ସାପାରେନେ ଆତ୍‌ଲା ଚଙ୍ଗ୍‌ନେ ବପୁ ଅନୁସାରେ ଉଂମେଣ୍ଡା ଉଃଡ଼ି ଡିଂଏ, ଆତେନ୍‌ ଇସାବ୍‌ ପେଡିଂଏ । 5 ପେ ମେଣ୍ଡା ରାସି ଆରି ଗିମିଃ ରାସି ବିତ୍‌ରେ ଡିୟାମିଃ ରାଙ୍ଗ୍‌ପେୱେଏ; ଆତେନ୍‌ କାନା ଚଟା ଡିଂ ଆଲେଣ୍ଡୁ, ବାରି ମୁଇଂ ମୁଆଁନେ ପାଃଡ଼ିମି ଡିଂଲେଃଏ; 6 ଆତେନ୍‌ ଆର୍କେନେ ଗଅଁ ଦିନା ଜାକ ଆମେକେ ଡାପେବଏ; ଏନ୍‌ଇଡ଼ିଂ ଇସ୍ରାଏଲ୍‌ ମଣ୍ଡଲିନେ ସାପା ରେମୁଆଁ ଲମ୍‌ଡିଗ୍‌ କେଲା ଆତେନ୍‌ ଉଂମିକେ ପେବାଗୁଏଃଏ । 7 ବାରି ରେମୁଆଁଇଂ ମେଁନି ମ୍‌ମ୍ୟାଁ ରାଂୱେଚେ ଆଣ୍ଡି ଆଣ୍ଡିନେ ଡୁଆଣ୍ଡ୍ରେ ଗିମିଃଚି ଚଙ୍ଗ୍‌ଆର୍‌ଏ, ଆତେନ୍‌ ଡୁଆନେ ଦୁଆର୍‌ବନ୍ଦ୍‌ ମ୍ୱାର୍‌ ପାକା ବାରି ଦର୍‌ବନ୍ଦ୍‌ ଆଡ଼ାତ୍ରା ଆତେନ୍‌ ପେଲାଗାଏ । 8 ବାରି ଆତେନ୍ ମିଡିଗ୍‌ବ ମେଁନେ ଚିଲି ପେଚଂଏ; ସୁଆନିଆ ବାଲଃ ସିର୍‌ଚେ ଖମୀର ଆମିସୁକ୍ନେ ରୁଟି ବାରି ବିସେଃ ଆମାଃ ଏତେ ଆତେନ୍‌ ପେଚଂଏ । 9 ପେ ଆତେନ୍‌ ଚିଲିକେ କାଚା ଣ୍ଡୁଲା ଣ୍ଡିଆନିଆ ଆନ୍‌ସିଂଚେ ପେଚଙ୍ଗ୍‌ ଣ୍ଡୁ, ମାତର୍‌ ସୁଆନିଆ ମେଁନି ବାଆଃ ବାରି ଞ୍ଚ, ଗାଗ୍‌ଡ଼େ ବିତ୍ରେନେ ସାପା ଚିଲି ସିର୍‌ଚେ ପେଚଙ୍ଗ୍‌ଏ । 10 ବାରି ଞ୍ଜିର୍‌ ଜାକ ଆତେନ୍ ପେବ ଣ୍ଡୁ; ଜଦି ଞ୍ଜିର୍‌ ଜାକ ମେଃଡିଗ୍‌ ପେବଏ, ତେଲା ଆମେକେ ସୁଆନିଆ ଆଃଗି ପେବିଏ । 11 ଦେକ୍‌ରକମ୍‌ ପେ ଆମେକେ ଜିଆ ଜିଆ ପେଚଂଏ, ବା ନ୍ସାନିଆ ଗାଗ୍‌ଚେ ଞ୍ଚନିଆ ପାଣ୍ଡୟ୍‌ ତାଙ୍ଗ୍‌ଚେ ନ୍ତିନିଆ ଡୁଡୁ ସାଚେ ଜିଆ ଆମେକେ ପେଚଂଏ; ଆକେନ୍‌ ମାପ୍‌ରୁନେ ନିସ୍ତାର୍‌ ପାଣ୍ଡୁଏଃ ।

12 ମେଃଡାଗ୍‌ଲା ନେ ଏ ମିଡିଗ୍ ମିସର୍‌ ଦେସ୍‌ ବିଚେ ନେୱେଏ ବାରି ମିସର୍‌ ଦେସ୍‌ନେ ରେମୁଆଁ ବାରି ପସୁନେ ସର୍‌ତେ ପର୍‌ତୁମ୍‌ ଜନମ୍‌ ଡିଂକ୍ନେ ଗଡ଼େଅକେ ନେବାଗୁଏଃଏ; ବାରି ମିସର୍‌ନେ ସାପା ଦେବତାନେ ବିଚାର୍ ଡିଂଚେ ଡଣ୍ଡ୍‌ ନେବିଏ; ନେ ମାପ୍‌ରୁ । 13 ଆତେନ୍‌ସା ପେ ଆଣ୍ଡି ଆଣ୍ଡିନେ ଡୁଆନିଆ ପେଲେଏ, ଆତେନ୍‌ ଡୁଆନିଆ ଆତେନ୍‌ ମ୍‌ମ୍ୟାଁ ଚିନ୍‌ ରକମ୍‌ ଡିଂଚେ ଲେଃଏ; ଆରି ନେ ମିସର୍‌ ଦେସ୍‌କେ ଡଣ୍ଡ୍‌ ବିଃନେ ବେଲା ଆତେନ୍‌ ମ୍‌ମ୍ୟାଁକେ କେଲା, ଆପେକେ ଆନ୍ତାର୍‌ଚେ ଆରି ବିନ୍‌ଅରିଆ ୱେଏ, ବିନାସ୍‌ ଆଃଡିଂନେ ମାଃସ ମୁଇଂ ମିସର୍‌ ଆଡ଼ାତ୍ରା ଡିଂଏ, ଆପେକେ ମାଡ୍‌ ଆଡିଙ୍ଗ୍‌ ଣ୍ଡୁ । 14 ଆରି ଆତେନ୍‌ ଦିନା ପେନି ମନେ ତ୍ଲାଗ୍‌ନେ ଦିନା ଡିଂଏ, ବାରି ପେ ଆତେନ୍‌ ଦିନାକେ ମାପ୍‌ରୁନେ ପାଣ୍ଡୁଏଃ ରକମ୍‌ ପେପାଲେଏ; ପେନି କୁଲ୍‌ ଲେଃନେ ଜାକ କାଲାଆଃ ନ୍‌ସା ଆକେନ୍‌ ପାଣ୍ଡୁଏଃ ପେପାଲେଏ ।

15 ପେ ଗୁ ଦିନ୍‌ ଜାକ ଖମୀର ଆମିସୁଃକ୍ନେ ରୁଟି ପେଚଙ୍ଗ୍‌ଏ; ବିଶେଷ୍‌କରି ପର୍‌ତୁମ୍‌ ଦିନା ପେ ପେନି ଡୁଆବାନ୍‌ ଖମୀର ଆମିସୁକ୍ନେ ରୁଟିକେ ଦୁର୍‌ ପେରାଡିଂଏ, ମେଃଡାଗ୍‌ଲା ଆଣ୍ଡିନେ ରେମୁଆଁ ପର୍‌ତୁମ୍‌ ଦିନା ବାନ୍‌ ଗୁ ଦିନା ଜାକ ଖମୀର ମିସୁଃକ୍ନେ ରୁଟି ଚଂଏ, ଆତେନ୍ ରେମୁଆଁ ଇସ୍ରାଏଲ୍‌ବାନ୍‌ ଅଲ୍‌ଗା ଡିଂଏ । 16 ଆରି ପର୍‌ତୁମ୍‍ ଦିନାକେଲା ପେନି ପବିତ୍ର କୁକପାର୍‌ ଡିଂଏ, ବାରି ଗୁ ଦିନା କେଲା ଡିଗ୍‌ ପେନି ପବିତ୍ର କୁକପାର୍‌ ଡିଂଏ; ଆରି ଆତେନ୍‌ ମ୍ୱାର୍‌ ଦିନା ଜାକ ସାପା ରେମୁଆଁ ଆତ୍‌ଲା ଚଙ୍ଗ୍‌ନ୍‌ସା ବେବସ୍ତା ଡିଂନେ ପଡ଼େଏ ଆମେକେ ଆନ୍ତାର୍‌ଚେ ବାରି ମେଃଡିଗ୍‌ କାମ୍‌ ଆଡିଂଆର୍‌ ଣ୍ଡୁ, ମୁଇଂ ଆତେନ୍‌ କାମ୍‌ ଆଃ ପେ ଡିଂପେୟାଏ । 17 ଦେକ୍‌ସୁଗୁଆ ପେ ଖମିର ଆମିସୁକ୍ନେ ରୁଟିନେ ପାଣ୍ଡୁଏଃ ପେପାଲେଏ, ମେଃଡାଗ୍‌ଲା ଆତେନ୍‌ ଦିନା ଆଃ ନେ ପେନି ସନ୍ୟଇଂକେ ମିସର୍‌ ଦେସ୍‌ବାନ୍‌ ଆଃତାର୍‌ ଡୁଂନେପାଙ୍ଗ୍‌ଏ; ଆତେନ୍‌ସା ପେ ପିଡ଼ି ପିଡ଼ି ସାଚେ କାଲାଆଃ ଆକେନ୍‌ ବିଦି ଆକେନ୍ ଦିନା ପାଲନ୍‌ ପେଡିଙ୍ଗ୍‌ଏ । 18 ପେ ପର୍‌ତୁମ୍‌ ଆର୍କେନେ ଚଉଦ ଦିନ୍‌ନେ ଲମ୍‌ଡିଗ୍‌ ବେଲାବାନ୍‌ ଏକୁଇସ୍‌ ଦିନ୍‌ନେ ଲମ୍‌ଡିଗ୍‌ ଜାକ ଖମିର ଆମିସୁକ୍ନେ ରୁଟି ପେଚଙ୍ଗ୍‌ଏ । 19 ମୁଇଂ ସାନ୍ତା ଜାକ ପେନେ ଡୁଆନିଆ ଖମିର୍ ଇକୁଡ଼ା ଡିଗ୍‌ ଆଲେଃଲେ । ମେଃଡାଗ୍ଲା ବିଦେସ୍‌ ଡିଂଲେ ନେ ଦେସ୍‌ନେ ରେମୁଆଁ ଡିଂଲେ, ମୁଡ଼ି ରେମୁଆଁ ଖମିର ମିସୁକ୍ନେ ଜିନିସ୍‌ ଚଙ୍ଗ୍‌ଏ, ଆତେନ୍‌ ରେମୁଆଁ ଇସ୍ରାଏଲ୍‌ ମଣ୍ଡଲିବାନ୍‌ ତାର୍‌ୱେଏ । 20 ପେ ଖମିର ମିସୁକ୍ନେ ମେଃଡିଗ୍‌ ଜିନିସ୍‌ ପେଚଂ ଣ୍ଡୁ, ପେ ପେନି ବାସାଲେକ୍ନେ ଜାଗାନ୍ନିଆ ଖମିର ଆମିସୁକ୍ନେ ରୁଟି ପେଚଂଏ ।"

21 ଆତେନ୍‌ ବେଲା ମୋଶା ଇସ୍ରାଏଲ୍‌ନେ ମ୍ନାରେକେ ୱାଚେ ବାସଙ୍ଗ୍‌କେ, "ପେ ପେ ଆତ୍‌ଲା ପେ ପେନି ବଂସ ଅନୁସାରେ ମୁଇଂ ମୁଇଂ ଗିମିଃ ଡୁଙ୍ଗ୍‌ରାଂୱେଚେ ନିସ୍ତାର୍‌ ପାଣ୍ଡୁଏଃ ଆତ୍‌ଲା ସିଃପା । 22 ବାରି ମୁଇଂବିଡ଼ା ଏସୋବ୍‌ କେନ୍ଦା ରାଙ୍ଗ୍‌ୱେଚେ ତାଲିନିଆ ଲେକ୍ନେ ମ୍‌ମ୍ୟାଁନିଆ ଜଣ୍ଡିଆଚେ ର୍ଣ୍ଣସାଙ୍ଗ୍‌ନେ ଆଡ଼ାତ୍ରା ବାରି ମ୍ୱାର୍‌ ପାକା ଦୁଆର୍‌ ବନ୍ଦ୍‌ ଆଡ଼ାତ୍ରା ତାଲିନିଆ ଲେକ୍ନେ ମ୍‌ମ୍ୟାଁକେ ଲିଗ୍‌ ବିଃପା ବାରି ଞ୍ଜିର୍‌ନୁଗ୍‌ ଜାକ ପେ ବିତ୍‌ରେ ଜା ଡିଗ୍‌ ଡୁଆନେ ପ୍ଲେଡ଼ିଆବାନ୍ ବାଏରେ ଆତାର୍‌ଲେ । 23 ମେଃଡାଗ୍‌ଲା ମାପ୍‌ରୁ ମିସର୍ ରେମୁଆଁକେ ବାଗୁଏନ୍‌ସା ମେଙ୍ଗ୍‌ବାନ୍‌ ବିଚେ ୱେଏ; ଆତ୍‌ବା ର୍ଣ୍ଣସାଙ୍ଗ୍‌ନେ ଆଡ଼ାତ୍ରା ବାରି ଦୁଆର୍‌ ବନ୍ଦ୍‌ନେ ମ୍ୱାର୍‌ ପାକା ଲିଗ୍‌ବକ୍ନେ ଆତେନ୍‌ ମ୍‌ମ୍ୟାଁକେ କେଲା, ମାପ୍‌ରୁ ଆତେନ୍‌ ର୍ଣ୍ଣସାଙ୍ଗ୍ ଆନ୍ତାର୍‌ଚେ ସିସେ ୱେଏ, ପେ ଡୁଆନିଆ ଆତେନ୍‌ ବିନାସ୍‌ ଡିଂନେ ମାଃସ ଆଃଗାଚେ ବିନାସ୍‌ ଆଃଡିଂ ନ୍‌ସା ଆବି ଣ୍ଡୁ । 24 ଆରି ପେ ବାରି ଜୁଗ୍‌ କେଚେ ପେନି ଗଡ଼େଇଂ ନିଅମ୍‌ ନ୍‌ସା ଆକେନ୍‌ ନିଅମ୍‌ ପାଲେଆର୍‌ଏ । 25 ଆରି ମାପ୍‌ରୁ ନିଜର୍‌ ପାର୍‌ମାନ୍‌ ଅନୁସାରେ; ଆପେକେ ଆଣ୍ଡିନେ ଦେସ୍‌ ବିଃଏ, ଆତ୍‌ଅରିଆ ପେୱେଲା, ଆକେନ୍‌ ସେବା ପୁରନ୍‌ ଡିଙ୍ଗ୍‌ଏ । 26 ବାରି ପେନେ ଗଡ଼େଇଂ ଆକେନ୍‌ ସେବା ଡିଂନେ କାରନ୍‌ ମେଃନି ? ଡାଗ୍‌ଚେ ସାଲିଆକୁଲା, 27 ପେ ପେବାସଙ୍ଗ୍‌ଏ, ଆକେନ୍‌ ମାପ୍‌ରୁନେ ମ୍ନିରେ ନିସ୍ତାର୍‌ ପାଣ୍ଡୁଏଃନେ ବଲିଦାନ୍‌, ମେଃଡାଗ୍‌ଲା ମିସ୍ରିୟଇଂକେ ବିନାସ୍‌ ଡିଂନେ ବେଲା ମେଁ ମିସର୍‌ନିଆ ବାସାଲେକ୍ନେ ଇସ୍ରାଏଲ୍‌ ଗଗିସିଆଇଂନେ ଡୁଆ ସାପା ଆନ୍ତାର୍‌ଚେ ସିସେ ୱେଚେ ଆନେକେ ରକ୍ଷା ଡିଂବଗେ ।" ଆତେନ୍‌ ବେଲା ରେମୁଆଁଇଂ ବାଆଃ ଆଲ ଆଡିଂଚେ ସାର୍‌ଲ ଆର୍‌କେ । 28 ଆତ୍‌ବା ଇସ୍ରାଏଲ୍‌ନେ ଗଗିସିଆଇଂ ୱେଚେ ଦେତ୍‌ରକମ୍‌ ଡିଂଆର୍‌କେ; ବାରି ମେଇଂ ମୋଶା ଆରି ହାରୋଣ ଆଡ଼ାତ୍ରା ମାପ୍‌ରୁନେ ଆଦେସ୍‌ ଇସାବ୍‌ରେ କାମ୍‌ ଡିଂଆର୍‌କେ ।

29 ଏନ୍‌ଇଡ଼ିଂ ମିଡିଗ୍‌ବ ବେଲା ମାପ୍‌ରୁ ସିଂଆଁସନ୍‌ ଡାଗ୍ରା କଲେଃକ୍ନେ ଫାରୋନେ ପର୍‌ତୁମ୍‌ ଜନମ୍‌ ଡିଂକ୍ନେ ଚିର୍‌ଲାଃଅବାନ୍‌ ଜେଲ୍‌ ଡୁଆନ୍ନିଆ ଲେକ୍ନେ ବନ୍ଦିଆନେ ପର୍‌ତୁମ୍‌ ଜନମ୍‌ ଡିଂକ୍ନେ ଚିର୍‌ଲାଃଅ ଜାକ ମିସର୍‌ ଦେସ୍‌ନେ ସାପା ପର୍‌ତୁମ୍‌ ଜନମ୍‌ ଡିଂକ୍ନେ ଚିର୍‌ଲାଅଇଂକେ ଆରି ପସୁଇଂନେ ପର୍‌ତୁମ୍‌ ଜନମ୍‌ ଡିଂକ୍ନେ ବାଚିଇଂକେ ବିନାସ୍‌ ଆଡିଂକେ । 30 ଆତ୍‌ବା ଫାରୋ ଆରି ମେଁନି ଚାକର୍‌ଇଂ ଆରି ମିସ୍ରିୟ ରେମୁଆଁଇଂ ସାପାରେ ମିଡିଗ୍‌ବ ତଡ଼ିଆଆର୍‌କେ; ବାରି ମିସର୍‌ ଦେସ୍‌ନିଆ ବୟଙ୍କାର୍‌ ଅଃନେ ଦ୍ରିଗ୍‌ଆର୍‌କେ; ମେଃଡାଗ୍‌ଲା ଦେକ୍‌ରକମ୍‌ ଡୁଆ ଆଲେଗେ ଯେ ଆଣ୍ଡିନେ ଡୁଆନିଆ ଜା ଆଗୁଏକେ, ଦେକ୍‌ରକମ୍‌ ଡୁଆ ମୁଇଂଡିଗ୍‌ ବାକି ଆଲେଃଗେ ଣ୍ଡୁ । 31 ଆତେନ୍‌ସା ମିଡିଗ୍‌ ବେଲା ଫାରୋ, ମୋଶା ବାରି ହାରୋଣକେ ୱାଚେ ବାସଙ୍ଗ୍‌କେ, "ପେ ଆରି ଇସ୍ରାଏଲ୍‌ ବଁସ୍‌ ତଡ଼ିଆଚେ ନେ ରେମୁଆଁଇଂନେ ବିତ୍‌ରେବାନ୍‌ ତାର୍‌ଲାପା, ପେନି ବ୍ନାଲିର୍‌ ଇସାବ୍‌ରେ ମାପ୍‌ରୁନେ ସେବା ଡିଂନେସା ୱେଲାପା । 32 ପେନି ବ୍ନାଲିର୍‌ ଇସାବ୍‌ରେ ଗିମିଃ ବାରି ଅରେଃ ରାସି ସାପାରେକେ ସାଚେ ଲାଗ୍‌ଡଲାପା ଆରି ଆନେକେ ଡିଗ୍‌ ଆସିର୍ବାଦ୍‌ ଡିଂ ।"

33 ଆତେନ୍‌ ବେଲା ମିସ୍ରିୟଇଂ ରେମୁଆଁଇଂକେ ଜିଆ ଦେସ୍‌ବାନ୍ ବେବିନ୍‌ସା ଇକ୍‌ଚା ଡିଂଆର୍‌କେ; ମେଃଡାଗ୍‌ଲା ମେଇଂ ବାସଙ୍ଗ୍‌ଆର୍‌କେ, "ନେ ସାପାରେ ଗୁଏଃନେଲେକେ ।" 34 ଆତ୍‌ବା ଲାଃମାର୍‌କ୍ନେ ମଇଦା ଖମୀର ଆମିସୁଃନେ ସିସେ, ରେମୁଆଁଇଂ ଆତେନ୍‌ ଡୁଙ୍ଗ୍‌ୱେଚେ ମଇଦା ଚକ୍‌ଟେକ୍ନେ ତାଲି ସାପା ନିଜର୍‌ ନିଜର୍‌ନେ ପାଟାଇନିଆ ଗାଗ୍‌ଚେ ଜେବାନିଆ ଡୁଙ୍ଗ୍‌ ରାଙ୍ଗ୍‌ୱେଆର୍‌କେ । 35 ବାରି ଇସ୍ରାଏଲ୍‌ ଗଗିସିଆଇଂ ମୋଶାନେ ବ୍ନାଲିର୍‌ ଇସାବ୍‌ରେ ମିସ୍ରିୟଇଂକେ ରୁପା ତ‍ଅଁ, ସୁନା ତ‍ଅଁ ବାରି ପାଟାଇ ସାଲ୍ୟାଃଆର୍କେ । 36 ଆତ୍‌ବା ମାପ୍‌ରୁ ମିସ୍ରିୟଇଂନେ ସାମ୍‌ନେ ରେମୁଆଁଇଂକେ ଦୟା ଆସୁଏକେସା ମେଇଙ୍ଗ୍‌ ଆମେଇଂକେ ମେଃନି ସାଲ୍ୟାଃଆର୍କେ, ମେଇଙ୍ଗ୍‌ ଆତେନ୍‌ ବିଃଆର୍‌କେ । ଦେକ୍‌ରକମ୍‌ ମେଇଂ ମିସ୍ରିୟ‍ଇଂନେ ଦନ୍‌ ସମ୍ପତ୍ତି ଡୁଙ୍ଗ୍‌ଡଆର୍କେ ।

37 ଏନ୍‌ଇଡ଼ିଂ ଇସ୍ରାଏଲ୍‌ନେ ରେମୁଆଁଇଂ ଚିର୍‌ଲାଃଅକେ ଆନ୍ତାର୍‌ଚେ ପ୍ରାୟ୍‌ ଛଅ ଲକ୍ଷ ଙ୍ଗିର୍‌ବୁଏଇଂ ଅଲେଙ୍ଗ୍‌ ଅଲେଙ୍ଗ୍‌ଚେ ରାମିଷେଷ୍‌ବାନ୍‌ ସୁକ୍‌କତା ଜାକ ୱେଆର୍କେ । 38 ବାରି ମିସୁଃକ୍ନେ ରେମୁଆଁଇଂନେ ମୁଇଂ ମ୍ନା ମାନ୍ଦା ଆରି ଅରେଃ ଗିମିଃଇଂ ଗ୍ଲୁଏ ପସୁଇଂ ମେଙ୍ଗ୍‌ ଏତେ ୱେଆର୍କେ । 39 ଏନ୍‌ଇଡ଼ିଂ ମେଇଂ ମିସର୍‌ବାନ୍‌ ଚକ୍‌ଟେଚେ ଡୁଙ୍ଗ୍‌ପାଙ୍ଗ୍‌ବକ୍ନେ ମଇଦା ଏତେ ଖମିର ଆମିସୁକ୍ନେ ରୁଟି ଆଃରେଆର୍କେ; ମେଃଡାଗ୍‌ଲା ଆତେନ୍‌ ଖମିର ମିସୁଃ ଆଲେଗେ; ଡାଗ୍‌ଲା ମେଇଂ ମିସର୍‌ବାନ୍‌ ତାର୍‌ଲେଆର୍‌ଗେ, ଆତେନ୍‌ସା ତଙ୍ଗାର୍‌ ୱେଲେଃଲା ପେ ଆତ୍‌ଲା ମେଃଡିଗ୍‌ କାଦି ଆଃରେ ଆବଗେ ଣ୍ଡୁ ।

40 ଇସ୍ରାଏଲ୍‌ ବଁସ୍‌ ଅଁ ସ‍ଅ ତିରିସ୍‌ ମୁଆଁ ଜାକ ମିସର୍‌ ଦେସ୍‌ନିଆ ବାସା ଲେଃଆର୍‌ଗେ । 41 ଆତେନ୍‌ ଅଁ ସ‍ଅ ତିରିସ୍‌ ମୁଆଁ ଇଡ଼ିଙ୍ଗ୍‌ ଆତେନ୍‌ ଦିନା ମାପ୍‌ରୁନେ ସନ୍ୟଇଂ ମିସର୍‌ବାନ୍‌ ତାର୍‌ଆର୍କେ । 42 ମିସର୍‌ ଦେସ୍‌ବାନ୍‌ ମେଇଂ ତାର୍‌କ୍ନେ ଦିନାବାନ୍‌ ଆତେନ୍‌ ମାପ୍‌ରୁନେ ମ୍ନିରେ ମୁଇଂ ପାଲନ୍‌ ଡିଂନେ ମିଡିଗ୍‌; ଆତେନ୍‌ ମାପ୍‌ରୁନେ ମିଡିଗ୍‌ ଡାଗ୍‌ଚେ ଇସ୍ରାଏଲ୍‌ ଗଡ଼େଙ୍ଗ୍ଇଂନେ ପିଡ଼ି ପିଡ଼ି ଜାକ ପାଲନ୍‌ ଡିଂଆର୍‌ଏ ।

43 ଆରି ମାପ୍‌ରୁ ମୋଶା ବାରି ହାରୋଣକେ ବାସଙ୍ଗ୍‌କେ, "ନିସ୍ତାର୍‌ ପାଣ୍ଡୁଏଃନେ ଆକେନ୍‌ ନିଅମ୍‌; ମୁଃଡ଼ି ବିଦେସ୍‌ ରେମୁଆଁ ଆତେନ୍‌ ଆଚଙ୍ଗ୍‌ ଣ୍ଡୁ । 44 ମାତର୍‌ ରୁପା ଡାବୁ ବିଚେ ବିଆର୍‌ ବକ୍ନେ ସାପାରେନେ ଚାକର୍‌ ସୁନ୍ନତ ଡିଂଲା ଚଙ୍ଗ୍‌ ୟାଆର୍‌ଏ । 45 ନିଜର୍‌ ଦେସ୍‌ ବାସାଲେକ୍ନେ ରେମୁଆଁ କି ଦର୍‌ମା ବାଚେ ବ୍ରୁଆଣ୍ଡ୍ରେ ଆତେନ୍‌ ଚଙ୍ଗ୍‌ ଆୟା ଣ୍ଡୁ । 46 ମୁଇଂ ଡୁଆନିଆ ଆମେକେ କଚେ ଚଙ୍ଗ୍‌ ପଡ଼େଏ; ପେ ଆତେନ୍‌ ଚିଲିକେ ଇକୁଡ଼ା ଡିଗ୍‌ ଡୁଆ ବାଏରେ ରାଙ୍ଗ୍‌ପେୱେ ଣ୍ଡୁ; ବାରି ମେଁନି ଞ୍ଚିୟାକେ ଆପାକ୍‌ଚି ଣ୍ଡୁ । 47 ଇସ୍ରାଏଲ୍‌ନେ ସାପା ମଣ୍ଡଲି ଆତେନ୍‌ ପାଲନ୍‌ ଡିଂଆର୍‌ଏ । 48 ବାରି ପେ ଏତେ ଜଦି ନିଜର୍‌ ଦେସ୍‌ ବାସା ଲେକ୍ନେ ରେମୁଆଁ ଣ୍ଡୁଲା ବିଦେସ୍‌ ରେମୁଆଁ ଜଦି ମାପ୍‌ରୁନେ ନିସ୍ତାର୍‌ ପାଣ୍ଡୁଏଃ ପାଲନ୍‌ ଡିଙ୍ଗ୍‌ନ୍‌ସା ଚାଏଁଏଁ, ତେଲା ମେଁନି ଡୁଆଣ୍ଡ୍ରେନେ ସାପା ଙ୍ଗିରେ ସୁନ୍ନତ ଡିଂଆର୍‌ଲେ, ତେନ୍‌ଇଡ଼ିଂ ମେଁ ଡାଗ୍ରା ପାଙ୍ଗ୍‌ଚେ ପାଣ୍ଡୁଏଃ ପାଲେଲେଃ; ତେଲା ମେଁ ଇସ୍ରାଏଲ୍‌ ଦେସ୍‌ନେ ରେମୁଆଁ ରକମ୍‌ ଡିଂଏ; ମାତର୍‌ ମେଃଡିଗ୍‌ ଅସୁନ୍ନତ୍‌ ରେମୁଆଁ ଆତେନ୍‌ ଆଚଙ୍ଗ୍‌ଆର୍‌ ଣ୍ଡୁ । 49 ଆରି ଇସ୍ରାଏଲ୍‌ ଦେସ୍‌ନେ ରେମୁଆଁ ବାରି ପେ ବିତ୍‌ରେ ବାସାକ୍ନେ ରେମୁଆଁ ବିଦେସ୍‌ ରେମୁଆଁ ଆତ୍‌ଲା ମୁଇଂ ନିଅମ୍‌ ଡିଂଏ ।" 50 ଆତ୍‌ବା ଇସ୍ରାଏଲ୍‌ନେ ସାପା ଗଡ଼େଙ୍ଗ୍‌ଇଂ ଦେକ୍‌ରକମ୍‌ ଡିଂଆର୍‌କେ; ମୋଶା ଆରି ହାରୋଣ ଆଡ଼ାତ୍ରା ମାପ୍‌ରୁନେ ଆଦେସ୍‌ ଡିରକମ୍‌ ଲେଃଗେ, ଦେତ୍‌ରକମ୍‌ ମେଇଂ ଡିଂଆର୍‌କେ । 51 ଦେକ୍‌ରକମ୍‌ ମାପ୍‌ରୁ ଆତେନ୍‌ ଦିନା ସନ୍ୟ ଦଲ୍‌ ଲେଆର୍‌କ୍ନେ ଇସ୍ରାଏଲ୍‌ନେ ଗଡ଼େଙ୍ଗ୍‌ଇଂକେ ମିସର୍‌ ଦେସ୍‌ବାନ୍‌ ଆତାର୍‌ ଡୁଙ୍ଗ୍‌ପାଙ୍ଗ୍‌କେ ।