ଯାତ୍ରା 18

ଯିଥ୍ରୋ ମୋଶାନେ ଡାଗ୍ରା ୱେକେ

1 ଏନ୍‌ଇଡ଼ିଂ ପର୍‌ମେସର୍‌ ମୋଶା ଆତ୍‌ଲା ଆରି ମେଁ ରେମୁଆଁ ଇସ୍ରାଏଲ୍‌ ଆତ୍‌ଲା ମେଃ ମେଃ କାମ୍‌ ଡିଂବକେ, ଆରି ଇସ୍ରାଏଲ୍‌ ବଂଶକେ ମିସର୍‌ବାନ୍‌ ଡିରକମ୍‌ ଆଃତାର୍‌ ଡୁଂପାଂବକେ, ଆକେନ୍‌ ସାପା ସାମୁଆଁ ମୋଶାନେ ମ୍‌ମଙ୍ଗ୍‌ଡେ ମିଦିୟନୀୟନେ ପୁଜାରି ଯିଥ୍ରୋ ଅଁକେ । 2 ତେଲା ମୋଶାନେ ମ୍‌ମଙ୍ଗ୍‌ଡେ ଆତେନ୍‌ ଯିଥ୍ରୋ ମେଁ ଡୁଆନିଆ ବାରି ସିସେ ମେଁ ଏତେ ବେବକ୍ନେ ମୋଶାନେ କୁନେଡ଼େ ସିପ୍‌ପରାକେ ଆରି ମେଁନେ ମ୍ୱାକ୍ଲିଗ୍‌ ଉଂଡେଇଂକେ ସାଚେ ରାଙ୍ଗ୍‌ୱେକେ । 3 ଆତେନ୍‌ ମ୍ୱାକ୍ଲିଗ୍‌ ଉଂଡେଇଂ ବିତ୍‌ରେ ମୁଇଂଜାନେ ମିନି ଗେର୍ଶମ୍‌, ମେଃଡାଗ୍‌ଲା ମେଁ ବାସଙ୍ଗ୍‌ବଗେ, "ନେଙ୍ଗ୍‌ ବିଦେସ୍‌ ମ୍ୱାସାକେ ।" 4 ବାରି ମୁଇଂଜାନେ ମିନି ଇଲୀୟେଜର ଡାଗ୍‌ଲା ମେଁ ବାସଙ୍ଗ୍‌ବଗେ, "ନେଙ୍ଗ୍‌ ଆବାନେ ପର୍‌ମେସର୍‌ ଆନେକେ ସାଆଜ୍ୟ ଡିଂଚେ ଫାରୋନେ କାଣ୍ଡାବାନ୍‌ ଆନେକେ ଆବଞ୍ଚେକେ ।" 5 ତେଲା ମୋଶାନେ ମ୍‌ମଙ୍ଗ୍‌ଡେ ଯିଥ୍ରୋ, ମୋଶାନେ ଆତେନ୍‌ ମ୍ୱାୟା ଉଂଡେ ଆରି କୁନେଡେକେ ସାଚେ କଣ୍ଡା ଆଡ଼ାନିଆ ମୋଶା ଡାଗ୍ରା ବା, ପର୍‌ମେସର୍‌ନେ କଣ୍ଡାନିଆ ଆଣ୍ଡିନେ ଜାଗାନ୍ନିଆ ମେଁ ଆଃରେବଗେ, ଆତେନ୍‌ ଜାଗାନ୍ନିଆ ପାଂଆର୍‌କେ । 6 ବାରି ମେଁ ମୋଶାକେ ଆମ୍ୟାଃକେ, "ପେମଂ ଯିଥ୍ରୋ, ନେଙ୍ଗ୍‌ ଆରି ନାକୁନେଃ, ମେଙ୍ଗ୍‌ ଏତେ ଆରି ନାନେ ମ୍ୱାର୍‌ ଉଂ, ନେ ସାପାରେ ନା ଡାଗ୍ରା ପାଂନେଲାଏକେ ।" 7 ଆତେନ୍‌ ବେଲା ମୋଶା ମ୍‌ମଂଡେ ଏତେ ମିସୁନ୍‌ସା ବାଏରେ ୱେଚେ ଆମେକେ ସାର୍‌ଲକେ ଆରି ବୟ୍‌ନ୍ତାକେ; ବାରି ମେଙ୍ଗ୍‌ ମେଙ୍ଗ୍‌ ବିତ୍‌ରେ ବଲ୍‌ ମନ୍ଦ୍‌ ସାମୁଆଁ ସାଲ୍ୟାଃକୁକ୍ନେ ଇଡ଼ିଙ୍ଗ୍‌ ମେଇଂ କୁଡ଼ିଆନିଆ ଗାଆର୍‌କେ । 8 ଏନ୍‌ଇଡ଼ିଂ ମାପ୍‌ରୁ ଇସ୍ରାଏଲ୍‌ ଆତ୍‌ଲା ବାରି ଫାରୋ ଆଡ଼ାତ୍ରା ଆରି ମିସ୍ରିୟଇଂନେ ଆଡ଼ାତ୍ରା ମେଃ ମେଃନି ଡିଂବକେ, ଗାଲିନିଆ ମେଙ୍ଗ୍‌ନେ ଆଡ଼ାତ୍ରା ମେଃ ସାପା କସ୍‌ଟ ଗଟେଲେକେ ଆରି ମାପ୍‌ରୁ ଡିରକମ୍‌ ଆମେଇଂକେ ଉଦାର୍‌ ଡିଂବକେ, ଆକେନ୍‌ ସାପା ସାମୁଆଁ ମୋଶା ମେଁ ମ୍‌ମଂଡେକେ ଆମ୍ୟାକେ । 9 ଆତ୍‌ବା ମାପ୍‌ରୁ ମିସ୍ରିୟଇଂନେ ନ୍ତିବାନ୍‌ ଇସ୍ରାଏଲ୍‌କେ ଉଦାର୍‌ ଡିଂଚେ ମେଃ ସାପା ନିମାଣ୍ଡା ସାମୁଆଁ ବିବକେ, ଆତେନ୍‌ସା ଯିଥ୍ରୋ ଜାବର୍‌ ସାର୍‌ଦା ଡିଂକେ । 10 ବାରି ଯିଥ୍ରୋ ବାସଙ୍ଗ୍‌କେ, "ମୁଡ଼ି ମାପ୍‌ରୁ ମିସ୍ରିୟଇଂନେ ଆରି ଫାରୋନେ ନ୍ତିବାନ୍‌ ଆପେକେ ଉଦାର୍‌ ଡିଂବକେ, ଆରି ମିସ୍ରିୟଇଂନେ ଦାସ କାମ୍‌ବାନ୍‌ ରେମୁଆଁଇଂକେ ଉଦାର୍‌ ଡିଂବକେ, ମେଁ ଦନ୍ୟ । 11 ମାପ୍‌ରୁ ସାପା ଦେବ୍‌ତାଇଂନେବାନ୍‌ ଜାବର୍‌ ମ୍ନା, ଆକାନ୍‌ ନେଙ୍ଗ୍‌ ଏବେ ମ୍‌ମ୍ୟାଃକେ । ଅଃଅଁ, ମେଇଂ ମୁଃଡ଼ି ବିସ‍ଏରେ ମେଙ୍ଗ୍‌ନେ ବିରୁଦ୍‌ରେ ଗର୍ବ ଡିଂବଗେ, ଆତେନ୍‌ ବିସ‍ଏରେ ମେଁ ମ୍ନା ।" 12 ଏନ୍‌ଇଡ଼ିଂ ମୋଶାନେ ମ୍‌ମଂଡେ ଯିଥ୍ରୋ ପର୍‌ମେସର୍‌ନେ ମ୍ନିରେ ସୁଆ ବଲି ଆରି ବଲି ଜିନିସ୍‌ ବିକେ; ବାରି ହାରୋଣ ଆରି ଇସ୍ରାଏଲ୍‌ନେ ସାପା ମ୍ନା ରେମୁଆଁଇଂ ପାଙ୍ଗ୍‌ଚେ ପର୍‌ମେସର୍‌ନେ ସାମ୍‌ନେ ମୋଶାନେ ମ୍‌ମଂଡେ ଏତେ ଚଙ୍ଗ୍‌ଆର୍‌କେ ।

ବିଚାର୍‌ ଡିଂଣ୍ଡ୍ରେକେ ବାଚେନେ

13 ତେନ୍‌ ଞ୍ଜଡ଼େ ମୋଶା ରେମୁଆଁଇଂନେ ବିଚାର୍‌ ଡିଂନେସା କକେ, ରେମୁଆଁଇଂ ଞ୍ଜିର୍‌ବାନ୍‌ ଲମ୍‌ଡିଗ୍‌ ଜାକ ମେଁ ସାମ୍‌ନେ ତୁଆଁ ଲେଃଆର୍‌ଗେ । 14 ଆତେନ୍‌ ବେଲା ମୋଶା ରେମୁଆଁଇଂନେ ବିସ‍ଏରେ ମେଃ ମେଃ ଡିଂବଗେ, ମେଁ ମ୍‌ମଂଡେ ଆତେନ୍‌ କେଚେ ବାସଙ୍ଗ୍‌କେ, "ନା ରେମୁଆଁଇଂନେ ଆଡ଼ାତ୍ରା ଆକେନ୍‌ ଡିରକମ୍‌ ବେବଆର୍‌ ଡିଂନାଡିଂକେ ? ନା ଏବେ ମୁଇଂଜା କଲା ଆରି ସାପା ରେମୁଆଁ ଞ୍ଜିର୍‌ବାନ୍‌ ଲମ୍‌ଡିଗ୍‌ ଜାକ ନା ପିତୁର୍‌ ପାକା ମେଃନ୍‌ସା ତୁଆଁ ଲେଃମ୍ୟାଆର୍‌କେ ?"

15 ଆତ୍‌ବା ମୋଶା ମେଁ ମ୍‌ମଂଡେକେ ବାସଙ୍ଗ୍‌କେ, "ରେମୁଆଁଇଂ ପର୍‌ମେସର୍‌ନେ ବିଚାର୍‌ ଦ୍ରିଗ୍‌ନେସା ନେଙ୍ଗ୍‌ ଡାଗ୍ରା ପାଂମ୍ୟାଆର୍‌କେ । 16 ଆରି ମେଙ୍ଗ୍‌ନେ ମେଃଡିଗ୍‌ ଉଇଂଆରିଂଆଲା, ନେଙ୍ଗ୍‌ ଡାଗ୍ରା ପାଂମ୍ୟାକେ, ଆତ୍‌ବା ନେଙ୍ଗ୍‌ ମେଇଂନେ ବିତ୍‌ରେ ବିଚାର୍‌ ଡିଂମ୍ୟାକେ ।" ବାରି ପର୍‌ମେସର୍‌ନେ ନିଅମ୍‌ ଆରି ସାସ୍ତର୍‌ ସାପା ଆମେଇଂକେ ଆମ୍ୟାକେ ।

17 ଏନ୍‌ଇଡ଼ିଂ ମୋଶାନେ ମ୍‌ମଂଡେ ବାସଙ୍ଗ୍‌କେ, "ନାନେ ଆକେନ୍‌ କାମ୍‌ ବଲ୍‌ ଣ୍ଡୁ । 18 ନା ଆରି ନାକୁନେ ଆକେନ୍‌ ରେମୁଆଁଇଂ ମ୍ୱାୟା ଡିଲାଡିଗ୍‌ ବିନାସ୍‌ ଡିଂୱେଆର୍‌ଏ; ମେଃଡାଗ୍‌ଲା ଆକେନ୍‌ କାମ୍‌ ନା ନ୍‌ସା ବଲ୍‌ ଆଡିଂ ଣ୍ଡୁ; ନା ମୁଇଜା ଆକେନ୍‌ ପୁରନ୍‌ ଡିଂ ନାୟା ଣ୍ଡୁ । 19 ଆତେନ୍‌ସା ନେଙ୍ଗ୍‌ ସାମୁଆଁଅରିଆ ମନ୍‌ ବିଃ, ନେଙ୍ଗ୍‌ ଆନାକେ ଗାଲି ନ୍ନାସୁଏଃଏ; ବାରି ପର୍‌ମେସର୍‌ ନା ଡାଗ୍ରା ଲେଃଏ; ପର୍‌ମେସର୍‌ନେ ଡାଗ୍ରା ନା ରେମୁଆଁଇଂନେ ସାପଟ୍‌ ଡିଂଚେ ମେଙ୍ଗ୍‌ନେ ସାମୁଆଁ ପର୍‌ମେସର୍‌ନିଆ ଆଃମ୍ୟାଃ । 20 ବାରି ନା ଆମେଇଂକେ ନିଅମ୍‌ ଆରି ସାସ୍ତର୍‌ନେ ଆଦେସ୍‌ ବିଃ ଆରି ମେଙ୍ଗ୍‌ନେ ୱେନେ ଗାଲି ଆରି ମେଇଂ ଡିଂନେ କାମ୍‌ ଆସୁଏ । 21 ଆରି, ଆକେନ୍‌ ରେମୁଆଁଇଂନେ ବିତ୍‌ରେ କାମ୍‌ଡିଂଣ୍ଡ୍ରେକେ ବାରି ପର୍‌ମେସର୍‌କେ ବୁଟଣ୍ଡ୍ରେକେ, ସତ୍ ବାସଙ୍ଗ୍‌ଣ୍ଡ୍ରେ ଆରି ଅନ୍ୟାୟ୍‌ ବଲ୍‌ବାନେକେ ଗ୍ରୁନା ଡିଂଣ୍ଡ୍ରେକେ ସ୍ରି; ବାରି, ଆମେଇଂକେ ରେମୁଆଁଇଂନେ ଆଡ଼ାତ୍ରା ଅଜାର୍‌ଟା ସନ୍ୟଇଂନେ ସେନାପତି, ସ‍ଏଟା ସନ୍ୟଇଂନେ ସେନାପତି, ପଚାସ୍‌ଟା ସନ୍ୟଇଂନେ ସେନାପତି, ଆରି ଗୁଆ କ୍ଲିଗ୍‌ ସନ୍ୟଇଂନେ ସେନାପତି ବାବ୍‌ରେ ସ୍ରି । 22 ମେଇଂ କାଲାଆଃ ରେମୁଆଁଇଂନେ ବିଚାର୍‌ ଡିଂଆର୍‌ଲେ, ବାରି ମେଃଡିଗ୍‌ ମ୍ନା ସାମୁଆଁ ପେ ଡାଗ୍ରା ଡୁଂପାଂଆର୍‌ଏ; ମାତର୍‌ ଡାଆଁ ସାମୁଆଁ ସାପା ମେଇଂ ନିଜେ ବିଚାର୍‌ ଡିଂଆର୍‌ଲେ, ତେଲା ପେ ନିଜେ ଡିଂକ୍ନେ କାମ୍‌ ଉସାସ୍‌ ଡିଂଏ, ବାରି ମେଇଂ ପେ ଏତେ କାମ୍‌ ଡିଂଆର୍‌ଏ । 23 ପେ ଜଦି ଦେକ୍‌ରକମ୍‌ ପେଡିଂଏ, ବାରି ପର୍‌ମେସର୍‌ ଦେକ୍‌ରକମ୍‌ ଡିଂନେସା ଆଦେସ୍‌ ବିଏ, ତେଲା ପେ ସମ୍ୱାଲେ ପେୟାଏ, ଆରି ଆକେନ୍‌ ସାପା ରେମୁଆଁଇଂ ସାନ୍ତିରେ ନିଜର୍‌ ଜାଗାନ୍ନିଆ ୱେଆର୍‌ଏ ।"

24 ଏନ୍‌ଇଡ଼ିଂ ମୋଶା ମେଁ ମ୍‌ମଂଡେନେ ସାମୁଆଁ ସାଚେ, ମେଁନେ ବ୍ନାଲିର୍‌ ଇସାବ୍‌ରେ ସାପା କାମ୍‌ ଡିଂକେ । 25 ବାରି ମୋଶା ସାପା ଇସ୍ରାଏଲ୍‌ ବିତ୍‌ରେ କାମ୍‌ ଡିଂନେ ରେମୁଆଁକେ ବାଚେଚେ ରେମୁଆଁଇଂନେ ଆଡ଼ାତ୍ରା ମ୍ନା, ବାରି ଅଜାର୍‌ଟା ସନ୍ୟଇଂନେ ସେନାପତି, ସ‍ଏଟା ସନ୍ୟଇଂନେ ସେନାପତି, ପଚାସ୍‌ଟା ସନ୍ୟଇଂନେ ସେନାପତି, ଆରି ଗୁଆକ୍ଲିଗ୍‌ ସନ୍ୟଇଂନେ ସେନାପତି ରେମୁଆଁଇଂକେ ୱାଆର୍‌କେ । 26 ତେଲା ମେଇଂ କାଲାଆଃ ରେମୁଆଁଇଂନେ ବିଚାର୍‌ ଡିଂଆର୍‌କେ; କସ୍‌ଟ ବିଚାର୍‌ ସାପା ମୋଶା ଡାଗ୍ରା ରାଂପାଂଆର୍‌କେ, ମାତର୍‌ ଡାଆଁ ଡାଆଁନେ ସାମୁଆଁ ସାପା ନିଜେ ନିଜେ ବିତ୍‌ରେ ବିଚାର୍‌ ଡିଂଆର୍‌କେ ।

27 ଏନ୍‌ଇଡ଼ିଂ ମୋଶା ମେଁନି ମ୍‌ମଂଡେକେ ବେବିଃକେ, ଆରି ଯିଥ୍ରୋ ନିଜର୍‌ ଦେସ୍‌ ୱିଗ୍‌କେ ।