1 ଏନ୍‌ଇଡ଼ିଂ ମାପ୍‌ରୁ ଆକେନ୍‌ ସାପା ସାମୁଆଁ ବାସଙ୍ଗ୍‌କେ, ତେନ୍‌ଇଂ ଡିଂଡିଂକେ, 2 ଜା ଆପେକେ ଚାକର୍‌ନେ ଡୁଆ ରକମ୍ ମିସର୍‌ ଦେସ୍‌ବାନ୍ ଆତାର୍‌ଚେ ଡୁଂପାଂବକେ, ପେନେ ଆତେନ୍‌ ମାପ୍‌ରୁ ପର୍‌ମେସର୍‌ ନେଙ୍ଗ୍‌ ।

3 ନେଙ୍ଗ୍‌ ଡାଗ୍ରା ପେନେ ଆରି ମେଃଡିଗ୍ ଦେବ୍‌ତା ଆଡିଂ ଣ୍ଡୁ ।

4 ପେ ପେ ନ୍‌ସା ମେଃଡିଗ୍‌ ଆରେବକ୍ନେ ମୁର୍‌ତିକେ ପେରାରେ ଣ୍ଡୁ, କି ସର୍‌ଗେ ଆଡ଼ାତ୍ରା ଲେକ୍ନେ ଆରି ମଚ୍‌ପୁର୍‌ ଆଲ ଲେକ୍ନେ, ବାରି ମଚ୍‌ପୁର୍‌ ବିତ୍‌ରେ ଲେକ୍ନେ ବାରି ଣ୍ଡିଆନିଆ ଲେକ୍ନେ ମେଃଡିଗ୍ ଜିନିସ୍‌ନେ ମୁର୍ତ୍ତି ପେରାରେ ଣ୍ଡୁ । 5 ପେ ଆମେଇଂକେ ପେସାର୍ଲ ଣ୍ଡୁ, କି ମେଙ୍ଗ୍‌ନେ ସେବା ପେଡିଙ୍ଗ୍‌ ଣ୍ଡୁ; ମେଃଡାଗ୍‌ଲା ନେଙ୍ଗ୍‌ ପେନେ ମାପ୍‌ରୁ ପର୍‌ମେସର୍‌ ନିଜର୍‌ ଗୌରବ୍ ରକ୍ୟାଡିଂଣ୍ଡ୍ରେ ପର୍‌ମେସର୍‌, ବାରି ଜାଣ୍ଡେଇଂ ଆନେଙ୍ଗ୍‌କେ ଗୁର୍‌ନା ଡିଂଆର୍‌ଏ, ନେଙ୍ଗ୍‌ ଆମେଇଂକେ ତୃତୀୟ ଆରି ଚତୁର୍ଥ ବଁସ୍‌ ଜାକ ମେଇଂନେ ଗଡ଼େଙ୍ଗ୍‌ଇଂନେ ଆଡ଼ାତ୍ରା ନ୍ତାଞ୍ଜାଇଂ ଅପରାଦ୍‌ ଡିଂବକ୍ନେ ଡଣ୍ଡ୍‌ ଆପେକେ ମ୍ୱିଏ । 6 ମାତର୍‌ ଜାଣ୍ଡେଇଂ ଆନେକେ ବଲ୍‌ ବାଆର୍‌ଏ ଆରି ନେଙ୍ଗ୍‌ନେ ଆଦେସ୍‌ ପାଲେଆର୍‌ଏ, ନେଙ୍ଗ୍‌ ଆମେଇଂକେ ଅଜାର୍‌ ଅଜାର୍‌ ବଁସ୍‌ ଜାକ ଦୟା ଣ୍ଡିଂଏ ।

7 ପେ ପେନେ ମାପ୍‌ରୁ ପର୍‌ମେସର୍‌ନେ ମିନି ମିଚ୍‌ରେ ପେସାଃ ଣ୍ଡୁ; ମେଃଡାଗ୍‌ଲା ଜା ଜଦି ମେଁନେ ମିନି ମିଚ୍‌ରେ ସାଏ, ମାପ୍‌ରୁ ଆମେକେ ନିର୍ଦସି ଡାଗ୍‌ଚେ ଏଜାଏ ।

8 ପୁଣ୍ଡେନେ ଦିନ୍‌କେ ପବିତ୍ର ବାବ୍‌ରେ ପାଲେନେସା ମନେ ତ୍ଲାଗ୍‌ପା । 9 ତୁର୍‌ ଦିନ୍‌ ଜାକ ପେସ୍ଲେଏ ବାରି ଆତେନ୍‌ ଦିନା ପେନେ ସାପା କାମ୍‌ ପେଡିଂଏ । 10 ମାତର୍‌ ଗୁ ଦିନା ପେନେ ମାପ୍‌ରୁ ପର୍‌ମେସର୍‌ନେ ପୁଣ୍ଡେନେ ଦିନ୍‌ ଲେଃକେ, ଆତେନ୍‌ ଦିନା ପେ ଣ୍ଡୁଲା ପେନେ ପେଉଂ, କି ପେନେ ସେଲା, କି ପେନେ ଚାକର୍‌, କି ଚାକର୍‌ବୁଏଃ, କି ପେନେ ପଶୁ, କି ପେ ଇନିନିଆ ଲେକ୍ନେ ବିଦେସ୍‌ ରେମୁଆଁ, ଜା ମେଃଡିଗ୍‌ ଆସ୍ଲେଆର୍‌ ଣ୍ଡୁ । 11 ମେଃଡାଗ୍‌ଲା ମାପ୍‌ରୁ କିତଙ୍ଗ୍‌ଇନି ଆରି ମଚ୍‌ପୁର୍‌ ଆରି କେଣ୍ଡିଆଃ ଆରି ଆତ୍‌ନିଆ ଲେକ୍ନେ ସାପା ଜିନିସ୍‌ ତୁର୍‌ ଦିନା ବିତ୍‌ରେ ଆରେଚେ ଗୁ ଦିନା ପୁଣ୍ଡେକେ; ଆତେନ୍‌ସା ମାପ୍‌ରୁ ପୁଣ୍ଡେନେ ଦିନ୍‌କେ ଆସିର୍ବାଦ୍‌ ଡିଂଚେ ପବିତ୍ର ଆଡିଂବକେ ।

12 ପେ ପେନେ ପେମ୍ୱାକେ ଆରି ପେୟାଙ୍ଗ୍‌କେ ସନ୍‌ମାନ୍‌ ଡିଂପା; ତେଲା ପେନେ ମାପ୍‌ରୁ ପର୍‌ମେସର୍‌ ଆପେକେ ଆଣ୍ଡିନେ ଦେସ୍‌ ବିଏ, ଆତେନ୍‌ ଦେସ୍‌ନିଆ ପେ ବ୍ରୁଆନେ ଆୟୁଷ୍‌ ଜାବର୍‌ ଡିଂଏ ।

13 ପେ ରେମୁଆଁକେ ପେବାଗୁଏ ଣ୍ଡୁ ।

14 ପେ ଦାରି କାମ୍‌ ପେଡିଂ ଣ୍ଡୁ ।

15 ପେ ପେଡଙ୍ଗା ଣ୍ଡୁ ।

16 ପେ ପେ ଡାଗ୍ରାଡୁଆଣ୍ଡ୍ରେନେ ବିରୁଦ୍‌ରେ ମିଚ୍‌ ସାକି ପେବାସଙ୍ଗ୍‌ ଣ୍ଡୁ ।

17 ପେ ନିଜର୍‌ ଡାଗ୍ରାଡୁଆଣ୍ଡ୍ରେନେ ଡୁଆକେ ଲବ୍‌ ଆଡିଂଗ୍‌ପା, ପେ ନିଜର୍‌ ଡାଗ୍ରାଡୁଆନେ ସେଲାମ୍ବୁଏଃକେ, କି ଗତିରେକେ, କି ଚାକର୍‌ବୁଏଃକେ, କି ମେଁନେ ଅରେଃ, କି ଗଦ, କି ପେ ଡାଗ୍ରାଡୁଆଣ୍ଡ୍ରେନେ ମେଃଡିଗ୍‌ ଜିନିସ୍‌କେ ଲବ୍‌ ଆଡିଂଗେପା ।

18 ଆତେନ୍‌ ବେଲା ସାପା ରେମୁଆଁ ତ୍ରିଗ୍‌ଡିଆ ଗର୍ଜେନେ ଆରି ବିଜ୍‌ଲି ଆରି ପ୍ନିଃ ସବ୍‌ଦ ଡିଂନେ ଆରି ମାଃସ ଡିଂକ୍ନେ କଣ୍ଡାକେ କେଆର୍‌କେ । ବାରି ଆତେନ୍‌ କେଚେ ମେଙ୍ଗ୍‌ ବୁଟଚେ ସୁଲ ତୁଆଁଆର୍‌କେ । 19 ଆରି ମେଇଂ ମୋଶାକେ ବାସଙ୍ଗ୍‌ଆର୍‌କେ, "ପେ ନେ ଏତେ ସାମୁଆଁ ବାସଙ୍ଗ୍‌, ନେ ନେଅଁଏ; ମାତର୍‌ ପର୍‌ମେସର୍‌ ନେ ଏତେ ସାମୁଆଁ ଆବାଇର୍‌ଲେ, ଣ୍ଡୁଲା ନେ ନେଗୁଏଃଏ ।"

20 ଆତ୍‌ବା ମୋଶା ରେମୁଆଁଇଂକେ ବାସଙ୍ଗ୍‌କେ, "ଆବ୍‌ଟଗେପା ନାମ; ମେଃଡାଗ୍‌ଲା ଆପେକେ ପରିକ୍ୟା ଡିଂନେସା ଆରି ପେ ଡିରକମ୍‌ କି ପାପ୍‌ ପେଡିଂ ଣ୍ଡୁ, ଆତେନ୍‌ସା ପେ ବୁଟନେ ପେ ମ୍‌ମୁଆଃ ସାମ୍‌ନେ ଆଃସୁଏ ନ୍‌ସା ପର୍‌ମେସର୍‌ ପାଂଲାଏଃକେ ।" 21 ଆତେନ୍‌ସା ରେମୁଆଁଇଂ ସୁଲ ତୁଆଁଚେ ଲେଃଆର୍ଗେ; ମାତର୍‌ ଆଣ୍ଡିଅରିଆ ପର୍‌ମେସର୍‌ ଲେଃଗେ, ମୋଶା ଆତେନ୍‌ ଜାବର୍‌ ତାଙ୍ଗ୍‌କିଗ୍‌ ଡାଗ୍ରା ଅଲେଙ୍ଗ୍‌କେ ।

22 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, "ପେ ଇସ୍ରାଏଲନେ ଉଂଡେଇଂକେ ଆକେନ୍‌ ସାମୁଆଁ ବାସଙ୍ଗ୍‌, ନେ ସର୍‌ଗେବାନ୍‌ ଲେଃଚେ ପେ ଏତେ ମ୍ୱାଇର୍‌ମ୍ୱାତାକେ, ଆକେନ୍‌ ପେ ନିଜେ ପେକେକେ । 23 ଆତେନ୍‌ସା ପେ ନେ ରେମୁଆଁଇଂ ଆତ୍‌ଲା, ବିନ୍‌ ଦେବ୍‌ତାଇଂନେ ମୁର୍‌ତି ତିଆର୍‌ ପେଡିଂ ଣ୍ଡୁ, ପେ ଆତ୍‌ଲା ରୁପାନେ ଦେବ୍‌ତା ଆରି ସୁନାନେ ଦେବ୍‌ତା ପେରାରେ ଣ୍ଡୁ । 24 ପେ ନେ ଆତ୍‌ଲା ମୁଇଂ ତୁବନେ ବେଦି ପେରାରେଏ, ଆରି ମେଁ ଆଡ଼ାତ୍ରା ପେନେ ଅରେଃ ଗିମିଃ ସୁଆ ବଲି* ଆରି ସାନ୍ତି ଡିଂନେ ନ୍‌ସାଃ ବଲି ପେବିଏ; ନେ ଆଣ୍ଡିନେ ଜାଗାନ୍ନିଆ ନା ମିନି ମନେ ନେତ୍ଲାଗ୍‌ଏ, ଆତେନ୍‌ ସାପା ଜାଗାନ୍ନିଆ ନେ ନା ଡାଗ୍ରା ପାଙ୍ଗ୍‌ଚେ ଆପେକେ ଆସିର୍ବାଦ୍‌ ନେଡିଂଏ । 25 ଅଃନା ନେ ନା ଆତ୍‌ଲା ବ୍ରିନେ କୁଡ଼ିଆ ନେରାଃରେଏ, ତେଲା ଆତେନ୍‌ ଅସ୍ତର୍‌ ଏଃତେ ଆଃରେନାବକ୍ନେ ବ୍ରି ଏଃତେ ଆତେନ୍‌ ତିଆର୍‌ ପେଡିଂ ଣ୍ଡୁ; ମେଃଡାଗ୍‌ଲା ଆତେନ୍‌ ଆଡ଼ାତ୍ରା ନାନେ ଗ୍ନଗ୍‌ ଲିଙ୍ଗ୍‌ଲା, ଆତେନ୍‌ ଅପବିତ୍ର ଡିଂଏ । 26 ଆରି ନା ଡିକ୍‌ଚା ନାଲେଃକ୍ନେ ନେ ବେଦି ଆଡ଼ାତ୍ରା ଯେନ୍ତିକି ଆତ୍ନା ଣ୍ଡୁ, ଆତେନ୍‌ସା ପେ ପିଣ୍ଡଲି ବିଚେ ନେ ବେଦି ଆଡ଼ାତ୍ରା ପେପାଙ୍ଗ୍‌ ଣ୍ଡୁ ।"