1 ଆକେନ୍‌ ଇଡ଼ିଂ ମେଇଂ ଶିଟିମ୍‌ ସୁଆ ଏତେ ମାଲ୍‌ ନ୍ତି ଚ୍ଲେ ବାରି ମାଲ୍‌ ନ୍ତି ଅସାର୍‌ ବାରି ଞ୍ଜି ନ୍ତି ତିଆର୍‌ନେ ମୁଇଂ ଅଁ କନ୍‌ ସୁଆ ବଲି ବେଦି ଆଃରେଆର୍‌କେ । 2 ବାରି ଆତେନ୍‌ ଅଁ କନ୍‌ ଆଡ଼ାତ୍ରା ଡିରଙ୍ଗ୍‌ ଆଃରେଚେ ପିତ୍ତଲ୍‌ ଏତେ ଲାଦେ ବିଃକେ । ଆତେନ୍‌ ଡିରଙ୍ଗ୍‌ ସାପା ଆତ୍‌ନେ ବାଗ୍‌ ଡିଂକେ । 3 ଆରି ମେଇଂ ବେଦିନେ ସାପା ତାଲି, ଡାଗ୍‌ଲା, ଉକ୍‌ସ ସଃନେ ବେଲ୍‌ଚା ବାରି ତ୍ରୁକ୍‌ସ ଆରି କୁଣ୍ଡ୍‌ ଆରି ତିର୍‌ସୁଲ୍‌ ଆରି ଏଲେଃସ ସଃନେ ବେଲ୍‌ଚା, ଆକେନ୍‌ ସାପା ଜିନିସ୍‌ ପିତ୍ତଲ୍‌ ଏତେ ଆଃରେଆର୍‌କେ । 4 ଆକେନ୍‌ ବେଦି ଆତ୍‌ଲା ପିତ୍ତଲ୍‌ନେ ଜାଲି ଆଃରେଆର୍‌କେ ଆରି ଆତେନ୍‌ ପୁଜା ବେଦିନେ ଆଲ ପାକା ଗାଗ୍‌ଆର୍‌କେ ଆତେନ୍‌ ବେଦିନେ ମଜେ ଜାକ ପାଙ୍ଗ୍‌କେ । 5 ବାରି ଟେଙ୍ଗ୍‌ନେ କାଡ଼ୁ ଆତ୍‌ଲା ଆତେନ୍‌ ପିତ୍ତଲ୍‌ ଜାଲିନେ ଅଁ କନ୍‌ ଅଁକ୍ଲିଗ୍‌ କାଡ଼ୁ କିଗ୍‌ଆର୍‌କେ । 6 ଆରି, ମେଇଂ ଶିଟିମ୍‌ ସୁଆ ଏତେ ଆତେନ୍‌ ଟେଙ୍ଗ୍‌ ଆଃରେଚେ ପିତ୍ତଲ୍‌ ଏତେ ଆଃମଡ଼େଆର୍‌କେ । 7 ବେଦିକେ ଡୁଡୁଂ ନ୍‌ସା ମେଇଂ ବେଦିନିଆ ଲେକ୍ନେ କାଡ଼ୁ ଡାଗ୍ରା ଆତେନ୍‌ ଟେଙ୍ଗ୍‌କେ ଆଃଗାଆର୍‌କେ । ବାରି ଆତେନ୍‌ ବେଦିକେ ଖାଲି ଲେକ୍ନେ ସିନ୍ଦୁକ ରକମ୍‌ ଆଃଡିଂଚେ ପାଟା ଏତେ ଆଃରେଆର୍‌କେ ।

8 ଆରି, ମୁଡ଼ି ସେଲାମ୍ବୁଏଃଇଂ କୁକପାର୍‌ କୁଡ଼ିଆନେ ବାଜାର୍‌ ଡାଗ୍ରା ସେବା ଡିଂଆର୍‌କେ, ଆତେନ୍‌ ସେଲାମ୍ବୁଏଃଇଂ ପିତ୍ତଲ୍‌ ଏତେ ଆଃରେବକ୍ନେ ଦାର୍‌ପନ୍‌ ଏତେ ମେଇଂ ଞ୍ଚ ନ୍ତି ଗୁଏଚଗୁଇତିନେ ମୁତା ବାରି ଆତ୍‌ଅରିଆ କୁକ ନ୍‌ସା ଜାଗା ଆଃରେଆର୍‌କେ ।

9 ଆକେନ୍‌ ଇଡ଼ିଂ ମେଇଂ ବାଜାର୍‌ ଆଃରେଆର୍‌କେ । ବାଜାର୍‌ନେ ଦକିନ୍‌ ପାକା ୱେଁକ୍ନେ ତୁଲୁଏ ସୁତା ଏତେ ଶହେ ନ୍ତି ରକମ୍‌ ପରଦା ଆଃରେଆର୍‌କେ । 10 ଆକ୍ମେନେ କୁଡ଼େଟା ଡେଲି ଆରି କୁଡ଼େଟା କଟ୍‌ଲା ପିତ୍ତଲ୍‌ନେ, ବାରି ଆତେନ୍‌ ଡେଲିନେ ଆକଡ଼ି ବାରି ବନ୍ଦ୍‌ନି ରୁପାନେ ଲେଃଗେ । 11 ଉତ୍ତର ଦିଗ୍‌ନେ ପର୍‌ଦା ସ‍ଏ ନ୍ତି, ବାରି ଆତ୍‌ଅରିଆନେ କୁଡ଼ିଏ ଡେଲି ଆରି କୁଡ଼ିଏଟା କଟ୍‌ଲା ପିତ୍ତଲ୍‌ନେ ବାରି ଡେଲିନେ ଆକଡ଼ି ଆରି ବନ୍ଦ୍‌ନି ରୁପାନେ ଲେଃଗେ । 12 ପଶ୍ଚିମ୍‌ ପାକାନେ ପର୍‌ଦା ପଚାସ୍‌ ନ୍ତି ଲେଃଗେ, ଆତ୍‌ଅରିଆନେ ଗୁଆକିଲିଗ୍‌ ଡେଲି ଆରି ଗୁଆକିଲିଗ୍‌ କଟ୍‌ଲା, ବାରି ଡେଲିନେ ଆକଡ଼ି ବାରି ବନ୍ଦ୍‌ନି ରୁପାନେ ଲେଃଗେ । 13 ପୁର୍ବ ଦିଗ୍‌ ପାକା ପୁର୍ବ ପାକା ଆତ୍‌ଲା ପଚାସ୍‌ ନ୍ତି ଲେଃଗେ । 14 ବାଜାର୍‌ନେ ମୁଇଂ ପାକା ଆତ୍‌ଲା ପନ୍ଦ୍‌ର ନ୍ତି ପର୍‌ଦା ଆରି ଆତ୍‌ଅରିଆନେ ଞ୍ଜିକିଲିଗ୍‌ ଡେଲି ଆରି ଞ୍ଜିକିଲିଗ୍‌ କଟ୍‌ଲା ଲେଃଗେ । 15 ବିନ୍‌ ଦିଗ୍‌ ପାକା ଆତ୍‌ଲା ପରଦାନେ କାନ୍ଥ ପନ୍ଦ୍‌ର ନ୍ତି ଚ୍ଲେ ଲେଃଗେ । ପ୍ଲେଡ଼ିଆନେ ବାଜାର୍‌ ଡାଗ୍ରା ମୁଇଂ ପାକା ଆରି ବିନ୍‌ ପାକା ପନ୍ଦ୍‌ର ନ୍ତି ପରଦା ଲେଃଗେ । ଆକ୍ମେନେ ଞ୍ଜିକିଲିଗ୍‌ ଡେଲି ଆରି ଞ୍ଜିକିଲିଗ୍‌ କଟ୍‌ଲା ଲେଃଗେ । 16 ପ୍ଲେଡ଼ିଆନେ ପିତୁର୍‌ ପାକାନେ ସାପା ପରଦା ୱେଁକ୍ନେ ତୁଲୁଏ ସୁତା ଏତେ ତିଆର୍‌ ଡିଂଲେଃଗେ । 17 ବାରି ଡେଲିନେ କଟ୍‌ଲା ସାପା ପିତ୍ତଲ୍‌ନେ ଲେଃଗେ । ଡେଲିନେ ଆକଡ଼ି ଆରି ବନ୍ଦ୍‌ନି ରୁପାନେ ଲେଃଗେ । ଆକେନ୍‌ ଡେଲିନେ ଆରାତ୍ରା ରୁପାନେ ସ୍ଲାପ୍‌ ଡିଂଲାଏଗେ । ଆରି ବାଜାର୍‌ନେ ସାପା ଡେଲିନେ ବନ୍ଦ୍‌ନି ସାପା ରୁପା ଏତେ ତିଆର୍‌ ଡିଂଲାଏଗେ । 18 ଆରି, ପ୍ଲେଡ଼ିଆ ବାଜାର୍‌ନେ ଗୁଡ଼େବକ୍ନେ ପାଟେଇ ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ୱେଁକ୍ନେ ତୁଲୁଏ ସୁତା ଏତେ ତିଆର୍‌ ଡିଂଣ୍ଡ୍ରେଇଂବାନ୍‌ ଆଃରେବଗେ ଆରି ପ୍ଲେଡ଼ିଆନେ ପର୍‌ଦା ଡିଂଚେ ଲେଃକ୍ନେ କୁଡ଼ିଏ ନ୍ତି ଚ୍ଲେ ଆରି ମାଲ୍‌ ନ୍ତି ଅସାର୍‌ ଲେଃଗେ । 19 ବାରି ଆତ୍‌ଅରିଆ ପିତ୍ତଲ୍‌ନେ ଅଁକ୍ଲିଗ୍‌ ଡେଲି ଅଁକ୍ଲିଗ୍‌ କଟ୍‌ଲା ରୁପାନେ ଆକୁଡ଼ି ମେଁ ବାଆଃ ଆରାତ୍ରାନେ ଆଡ଼ା ଆଡ଼ା ରୁପାନେ ସ୍ଲାପ୍‌ ଡିଂବଗେ ଆରି ଡୁଡୁ ରୁପା ଏତେ ତିଆର୍‌ ଡିଂଲେଗ୍ନେ ଲେଃଗେ । 20 ବାରି ପବିତ୍ର କୁଡ଼ିଆ ଆରି ପ୍ଲେଡ଼ିଆନେ ପିତୁର୍ ପାକାନେ କୁଟି ସାପା ପିତ୍ତଲ୍‌ନେ ଲେଃଗେ ।

21 ଲେବୀୟ ରେମୁଆଁଇଂନେ କାମ୍‌ ଆତ୍‌ଲା ହାରୋଣ ପୁଜାରିନେ ଉଂଡେ ଇଥାମର୍‌ ବାନ୍‌ ମୋଶାନେ ଆଦେସ୍‌ ଇସାବ୍‌ରେ ପବିତ୍ର କୁଡ଼ିଆନେ, ଡାଗ୍‌ଲା, ସାକି ରକମ୍‌ ଲେଃକ୍ନେ କୁଡ଼ିଆନିଆ ବେବଆର୍‌ ଡିଂମ୍ୟାଃକ୍ନେ ଜିନିସ୍‌ଇଂକେ ଏଜା ଆର୍‌କେ ।

22 ମାପ୍‌ରୁ ମୋଶାବାନ୍‌ ଆଣ୍ଡିନେ ଆଦେସ୍‌ ବିଃବଗେ, ଆତେନ୍‌ ଇସାବ୍‌ରେ ଯିହୁଦା ବଂସନିଆ ଜନମ୍‌ ଡିଂଲାଏକ୍ନେ ହୂରନେ ଏଗ୍‌ଲେଣ୍ଡେ ଊରିନେ ଉଂଡେ ବତ୍ସଲେଲ୍‌ ଆତେନ୍‌ ସାପା ଆଃରେବଗେ । 23 ଆରି ନିଲି ବାରି କଃଡ଼େଆଁ ବାନା ବାରି ସିନ୍ଦୁର୍‌ ବାନା ବାରି ୱେଁକ୍ନେ ତୁଲୁଏ ସୁତା ଏତେ ଆଃରେଣ୍ଡ୍ରେଇଂ ବାରି ଗଦେନେ ରେମୁଆଁଇଂ ବାରି ପାଟେଇ ତେନେ ମ୍ୟାଃଲେଃକ୍ନେ ରେମୁଆଁଇଂ ଦାନ ବଂସନିଆ ଜନମ୍‌ ଡିଂଲେକ୍ନେ ଅହୀଷାମକନେ ଉଂଡେ ଅହଲୀୟାବ ସାଇଜ ଡିଂଣ୍ଡ୍ରେ ଲେଃଗେ ।

24 ପବିତ୍ର ଜାଗା ଆଃରେବକ୍ନେ ସାପା କାମ୍‌ନ୍ନିଆ ଏନ୍‌ ସାପା ସୁନା ଲାଗେଲାଏକେ, ଦେକ୍‌ରକମ୍‌, ନୈବେଦ୍ୟନେ ସାପା ସୁନା, ପବିତ୍ର ଜାଗାନେ ଶେକଲ୍‌ ଇସାବ୍‌ରେ ଅନ୍‌ତିରିସ୍‌ ମହଣା ସାତ୍‌ ଶହ ତିରିସ୍‌ ଶେକଲ ସୁନା ଲେଃଗେ । 25 ବାରି ଏଜାବକ୍ନେ ମଣ୍ଡଲି ରେମୁଆଁଇଂନେ ରୁପା ପବିତ୍ର ଶେକଲ୍‌ ଇସାବ୍‌ରେ ଶହେ ମହଣା ମୁଇଂ ଅଜାର୍‌ ସାତ୍‌ ଶହ ପଞ୍ଚସ୍ତୁରି ଶେକଲ ଲେଃଗେ । 26 ଉଡ଼ିରୁଆକେ ଏଜାବଗେ, ମେଙ୍ଗ୍‌ନେ ବଏସ୍‌ ଲେଃଗେ କୁଡ଼ିଏ ମୁଆଁ କି ମେଁବାନ୍‌ ଜବର୍‌ । ମେଙ୍ଗ୍‌ନେ ସଂଖ୍ୟା ଲେଃଗେ ଛଅ ଲକ୍ଷ ଞ୍ଜି ଶହ ପଚାସ୍‌ । ମେଇଂ ସାପାରେ ମୁଇଂ ମ୍ୱାର୍‌ ବେକା, ଡାଗ୍‌ଲା, ପବିତ୍ର ଜାଗାନେ ଶେକଲ୍‌ ଇସାବ୍‌ରେ ଅଦା ଅଦା ଶେକଲ ବିଃନ୍‌ସା ଡିଂଲେଃଗେ । 27 ଆତେନ୍‌ସା ଆତେନ୍‌ ଶହେ ମହଣ ରୁପା ଏତେ ପବିତ୍ର ଜାଗାନେ ଆରି ପର୍‌ଦାନେ କଟ୍‌ଲା ଆଃରେବଗେ । ଶହେ କଟ୍‌ଲା ଆତ୍‌ଲା ଶହେ ମହଣ, ବାରି ମୁଇଂ ମୁଇଂ କଟ୍‌ଲା ଆତ୍‌ଲା ମୁଇଂ ମୁଇଂ ମହଣା କର୍ଚ ଡିଂକେ । 28 ବାରି ଆତେନ୍‌ ମୁଇଂ ଅଜାର୍‌ ସାତ୍‌ ଶହ ପଞ୍ଚସ୍ତୁରି ଶେକଲ୍‌ ରୁପା ଏତେ ମେଇଂ ଡେଲି ଆତ୍‌ଲା ଆକଡ଼ି ଆଃରେଆର୍‌କେ ବାରି ଟିପେ ଲାଗେନ୍‌ସା କିପ୍ରି ବାରି ବନ୍ଦ୍‌ନିନିଆ ଆଃମିସୁକେ । 29 ବାରି ପିତ୍ତଲ୍‌ନେ ନୈବେଦ୍ୟ ସତୁରି ମହଣ ମ୍ବାର୍‌ ଅଜାର୍‌ ଅଁ ଶହ ଶେକଲ୍ ଲେଃଗେ । 30 ଆତେନ୍‌ସା ମେଇଂ ଆତେନ୍‌ ଏତେ କୁକପାର୍‌ କୁଡ଼ିଆ ବାଜାର୍‌ନେ କଟ୍‌ଲା ଆରି ପିତ୍ତଲ୍‌ନେ ବେଦି ଆରି ଆତ୍‌ଅରିଆନେ ପିତ୍ତଲ୍‌ନେ ଜାଲି ବାରି ବେଦିନେ ସାପା ଜିନିସ୍‌, 31 ବାରି ପ୍ଲେଡ଼ିଆନେ ପିତୁର୍‌ ପାକାନେ କଟ୍‌ଲା ଆରି ପ୍ଲେଡ଼ିଆ କାପାଟ୍‌ନେ କଟ୍‌ଲା ବାରି ପବିତ୍ର କୁଡ଼ିଆନେ ସାପା କୁଟି ବାରି ପ୍ଲେଡ଼ିଆନେ ପିତୁର୍‌ ପାକାନେ କୁଟି ସାପା ଆଃରେଆର୍କେ ।