1 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, ନା ଫାରୋ ଡାଗ୍ରା ୱେଚେ ଆମେକେ ବାସଙ୍ଗ୍‌, ଏବ୍ରୀୟଇଂନେ ମାପ୍‌ରୁ ପର୍‌ମେସର୍‌ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେନେ ସେବା ଡିଂନେସା ନା ନେ ରେମୁଆଁଇଂକେ ଆନ୍ତାର୍‌ବି । 2 ମାତର୍‌ ଜଦି ଅଃନା ଆମେଇଂକେ ୱେନ୍‌ସା ମନା ଡିଂଚେ ଏବେ ଡିଗ୍‌ କସ୍‌ଟ ବିଏ । 3 ତେଲା କେଲା, ନା ଡୁଆ ଲେଃକ୍ନେ ଗଡ଼ା, ଗଦ ଉଂଡେ, ଉଁଟ୍‌, ଅରେଃ ଆରି ମେଣ୍ଡା ଆରି ମେଃ ମେଃନେ ପସୁଇଂ ଆଡ଼ାତ୍ରା ମାପ୍‌ରୁନେ ନ୍ତି ଲାଏକେ, ଆତେନ୍‌ସା ବୟ୍‌ଙ୍କାର୍‌ ମ୍ନାଃ ମ୍ନାଃ ମୁର୍‌ଡ଼ି ପାଙ୍ଗ୍‌ଏ । 4 ମାତର୍‌ ମାପ୍‌ରୁ ଇସ୍ରାଏଲିୟଇଂନେ ଆରି ମିସ୍ରିୟଇଂନେ ପସୁଇଂନେ ବିତ୍‌ରେ ଅଲ୍‌ଗା ଆଡିଙ୍ଗ୍‌ଏ, ଆତ୍‌ବା ଇସ୍ରାଏଲ୍‌ନେ ରେମୁଆଁଇଂନେ ମେଃଡିଗ୍‌ ପଶୁ ଆଗୁଏଃ ଣ୍ଡୁ । 5 ମାପ୍‌ରୁ ବେଲା ଆଃତାର୍‌ଚେ ବାସଙ୍ଗ୍‌ଡିଂକେ, ଞ୍ଜଡ଼େ ମାପ୍‌ରୁ ଆକେନ୍‌ ଦେସ୍‌ଅରିଆ ଆକେନ୍‌ କାମ୍‌ ଡିଂଏ ।

6 ମାର୍‌ତଡ଼େ ମାପ୍‌ରୁ ଆତେନ୍‌ କାମ୍‌ ଡିଂକେ, ଆତ୍‌ବା ମିସ୍ରିୟଇଂନେ ସାପା ପଶୁ ଗୁଏଆର୍‌କେ; ମାତର୍‌ ଇସ୍ରାଏଲ୍‌ ରେମୁଆଁଇଂନେ ପସୁଇଂନେ ମୁଇଂଡିଗ୍‌ ଆଗୁଏକେ ଣ୍ଡୁ । 7 ଆତ୍‌ବା ଫାରୋ ରେମୁଆଁ ବେଚେ ଇସ୍ରାଏଲ୍‌ଇଂନେ ମୁଇଂଡିଗ୍‌ ପସୁ ଆଗୁଏକ୍ନେ କେକେ । ତେଲାଡିଗ୍‌ ଫାରୋନେ ମନ୍‌ ଗରବ୍‌ ଡିଂକେ ଆରି ଏଲେଡିଗ୍‌ ମେଁ ରେମୁଆଁଇଂକେ ଆଆନ୍ତାର୍‌କେ ଣ୍ଡୁ ।

8 ଆରି ମାପ୍‌ରୁ ମୋଶାକେ ଆରି ହାରୋଣକେ ବାସଙ୍ଗ୍‌କେ, ପେ ତୁରୁଗ୍‌ସନେ ଉଗ୍‌ସ ମୁଟା ପୁରୁନ୍‌ ସାଚେ ଡୁଙ୍ଗ୍‌ୱେଲା, ବାରି ମୋଶା ଫାରୋନେ ସାମ୍‌ନେ ଆତେନ୍‌ କିତଂଇନି ଆଡ଼ାତ୍ରା ବିଚେ ବିଃଲେ । 9 ଆତ୍‌ବା ଆତେନ୍ ସାପା ମିସର୍‌ ଦେସ୍‌ ଆଡ଼ାତ୍ରା କେଆୟାକ୍ନେ ଦୁଲି ରକମ୍‌ ଡିଂଚେ ମିସର୍‌ ଦେସ୍‌ନେ ସାପା ରେମୁଆଁଇଂକେ ଆରି ପସୁଇଂନେ ଗାଗ୍‌ଡ଼େଅରିଆ ଇମୁର୍‌ ତାର୍‌ଚେ ସାପାପାକା ଡିଂୱେଏ । 10 ଆତ୍‌ବା ମେଇଂ ତୁରୁଗ୍‌ସବାନ୍ ଉଗ୍‌ସ ରାଙ୍ଗ୍‌ୱେଚେ ଫାରୋନେ ସେନୁଗ୍‌ ତୁଆଁଆର୍‌କେ; ବାରି ମୋଶା କିତଙ୍ଗ୍‌ଇନି ପାକା ଆତେନ୍‌ ବିଚେ ବିକେ, ସାପା ରେମୁଆଁ ଆରି ପସୁଇଂନେ ଗାଗ୍‌ଡ଼େଅରିଆ ଇମୁର୍‌ ଡିଂକେ । 11 ଆତେନ୍‌ ଇମୁର୍‌ ଆତ୍‌ଲା ଡିସାରିଇଂ ମୋଶାନେ ସାମ୍‌ନେ ତୁଆଁ ଆୟାଆର୍‌କେ ଣ୍ଡୁ; ଡିସାରିଇଂ ଆରି ସାପା ମିସ୍ରିୟଇଂନେ ଗାଗ୍‌ଡ଼େ ଇମୁର୍‌ ତାର୍‌କେ । 12 ଏନ୍‌ଇଡ଼ିଂ ମାପ୍‌ରୁ ଫାରୋନେ ମନ୍‌କେ ଅଦିକ୍‌ କଟିନ୍‌ ଆଃଡିଂକେ, ଆତ୍‌ବା ମେଁ ମୋଶା ଆଡ଼ାତ୍ରା ଆତେନ୍‌ ମାପ୍‌ରୁନେ ସାମୁଆଁ ଅନୁସାରେ ମେଙ୍ଗ୍‌ନେ ସାମୁଆଁକେ ଆଅଁକେ ଣ୍ଡୁ ।

13 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, ନା ଞ୍ଜିର୍‌ନୁଗ୍‌ ତଡ଼ିଆଚେ ଫାରୋ ସାମ୍‌ନେ ତୁଆଁଚେ ଆମେକେ ଆକେନ୍‌ ସାମୁଆଁ ବାସଙ୍ଗ୍‌, ଏବ୍ରୀୟଇଂନେ ମାପ୍‌ରୁ ପର୍‌ମେସର୍‌ ବାସଙ୍ଗ୍‌ଡିଂକେ, ନେନେ ସେବା ଡିଂନ୍‌ସା ନେ ରେମୁଆଁଇଂକେ ଆନ୍ତାର୍‌ବି; 14 ଣ୍ଡୁଲା ଏଃତର୍‌ ନେ ନା ମନ୍‌ ବିରଦ୍‌ରେ, ଆରି ନାନେ ଗତିରେକେ ବାରି ରେମୁଆଁଇଂନେ ବିତ୍‌ରେ ନେନେ ସାପା ରକମ୍‌ନେ ମ୍ନାଃ ମ୍ନାଃ ମୁର୍‌ଡ଼ି ନେବେଏ; ତେଲା ସାପା ମଚ୍‌ପୁର୍‌ଅରିଆ ନେଙ୍ଗ୍‌ ରକମ୍‌ ଜା ଣ୍ଡୁ । ଆକେନ୍‌ ପେ ପେମ୍ୟାଃଏ । 15 ମେଃଡାଗ୍‌ଲା ଏବେ ଡିଗ୍‌ ନେ ନେନେ ନ୍ତି ଟେକେଚେ ମ୍ନାଃ ମ୍ନାଃ ମୁର୍‌ଡ଼ି ଏତେ ଆପେକେ ଆରି ପେ ରେମୁଆଁଇଂକେ ନେପାରାଗୁଏ, ବାରି ପେ ମଚ୍‌ପୁର୍‌ବାନ୍‌ ବିନାସ୍‌ ଡିଂପେପାଲେଃ । 16 ମାତର୍‌ ଆନାକେ ନେନେ ବପୁ ଆସୁଏନ୍‌ସା ଆରି ସାପା ଦର୍‌ତନିଅରିଆ ଡିଃଡିକି ନେନେ ମ୍ନି ମ୍ୟାଃଆର୍‌ଏ, ଆତେନ୍‌ସା ନେ ଆନାକେ ଆମ୍ବ୍ରଚେ ନେବକେ । 17 ଏବେ ନା ନେ ରେମୁଆଁକେ ମାଆନ୍ତାର୍‌ଚେ ମେଙ୍ଗ୍‌ନେ ଆଡ଼ାତ୍ରା ଗର୍ବ ଡିଂନାଡିଂକେ ? 18 କେଲା, ନେ ଞ୍ଜଡ଼େ ଅକେନ୍‌ବେଲା ମିସର୍‌ ଦେସ୍‌ଅରିଆ ଦେକ୍‌ରକମ୍‌ ଆରେଣ୍ଡିଆ ନେରାଗୁର୍‌ଏ ଜେ, ମିଶର୍‌ ଦେସ୍‌ ଡିଂକ୍ନେବାନ୍‌ ଏବେ ଜାକ ଦେତ୍‌ରକମ୍‌ ଅଃନା ଆଡିଂକେ ଣ୍ଡୁ । 19 ଆତେନ୍‌ସା ଏବେ ଲିଜଅରିଆ ରେମୁଆଁ ବେଚେ ପେନେ ପସୁ ପ୍ଲିଗ୍‌ଇଂ ଉଡ଼ି ଲେଃକେ, ଆତେନ୍‌ ସାପା ଡୁଆ ରାଙ୍ଗ୍‌ପାଙ୍ଗ୍‌ ନ୍‌ସା ବାସଙ୍ଗ୍‌ପା, ମେଃଡାଗ୍‌ଲା ମୁଡ଼ି ରେମୁଆଁ ଡିଂଲେ କି ପଶୁ ଡିଂଲେ ଲିଜଅରିଆ ଲେଆର୍‌ଏ, ଆରି ଡୁଆ ଆପାଙ୍ଗ୍ଆର୍‌, ମେଙ୍ଗ୍‌ନେ ଆଡ଼ାତ୍ରା ଆରେଣ୍ଡିଆ ଆଃଗୁର୍‌ଚେ ନେରାଗୁଏଃଏ । 20 ଆତେନ୍‌ ବେଲା ଫାରୋନେ ଦାସଇଂନେବାନ୍‌ ମୁଡ଼ି ରେମୁଆଁ ମାପ୍‌ରୁନେ ସାମୁଆଁକେ ବୁଟକେ, ମେଁ ଜିଆଃ ୱେଚେ ଚାକର୍‌ଇଂକେ ଆରି ପସୁଇଂକେ ଡୁଆ ରାଙ୍ଗ୍‌ୱିଗ୍‌କେ । 21 ମାତର୍‌ ଜା ମାପ୍‌ରୁନେ ସାମୁଆଁକେ ଆଅଁକେ, ମେଁ ମେଁନେ ଚାକର୍‌ ଆରି ପସୁଇଂକେ ଲିଜଅରିଆ ଆନ୍ତାର୍‌ଚେ ୱିଗ୍‌କେ ।

22 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, "ନା କିତଙ୍ଗ୍‌ଇନି ଆଡ଼ାତ୍ରା ନ୍ତି ଆଃଚ୍ଲେ, ଆତ୍‌ବା ମିସର୍‌ନେ ସାପା ରେମୁଆଁ ଆରି ପସୁ ଆରି ଲିଜଅରିଆ ଲେକ୍ନେ ଚେଃମୁଁଆ ସାପା ଆଡ଼ାତ୍ରା ଆରେଣ୍ଡିଆ ଗୁର୍‌ଏ । 23 ଆତ୍‌ବା ମୋଶା ମେଁନେ ଡୁଡୁକେ କିତଙ୍ଗ୍‌ଇନି ଆଡ଼ାତ୍ରା ଆତଡ଼ିଆକେ, ମାପ୍‌ରୁ ତ୍ରିଗ୍‌ଡ଼ିଆ ଆଃଅଃଚେ ଆରି ଆରେଣ୍ଡିଆ ଆଗୁର୍‌କେ; ବାରି, ବିଜ୍‌ଲି ପୁର୍‌ତିବି ଆଡ଼ାତ୍ରା ଦାପ୍ରେ ପାଙ୍ଗ୍‌କେ; ଦେକ୍‌ରକମ୍‌ ମାପ୍‌ରୁ ମିସର୍‌ ଦେସ୍‌ଅରିଆ ଆରେଣ୍ଡିଆ ଆଗୁର୍‌କେ । 24 ଆତ୍‌ବା ଆରେଣ୍ଡିଆ ଗୁର୍‌କେ ଆରି ସାଙ୍ଗେ ସାଙ୍ଗେ ବିଜ୍‌ଲି ବଗ୍‌କେ; ଦେକ୍‌ରକମ୍‌ ଇନସ୍ତା ସୁଗୁଆ ଆରେଣ୍ଡିଆ ମିସର୍‌ ଦେସ୍‌ଅରିଆ ରାଇଜ ଡିଂକ୍ନେବାନ୍‌ ଅଃନା ଡିଂଆଲେଃଗେ । 25 ଆତ୍‌ବା ସାପା ମିସର୍‌ ଦେସ୍‌ନେ ଲିଜଅରିଆ ରେମୁଆଁଅରିଆ ଆରି ପସୁ ସାପାରେ ଆରେଣ୍ଡିଆବାନ୍‌ ଗୁଏଆର୍‌କେ ଆରି ଲିଜନେ ସାପା ଚେଃମୁଁଆ ଆରେଣ୍ଡିଆ ଲଃଚେ ନଷ୍ଟ ଆଡିଙ୍ଗ୍‌ବିକେ, ଲିଜଅରିଆ ଲେକ୍ନେ ସାପା ସ୍ଲାଃ ପାକ୍‌ଚି ୱେଗେ । 26 ମାତର୍‌ ଇସ୍ରାଏଲ୍‌ ରେମୁଆଁଇଂନେ ବାସାନେ ଜାଗା ଗୋଶନ୍‌ ଦେସ୍‌ଅରିଆ ଆରେଣ୍ଡିଆ ଆଲଃକେ ଣ୍ଡୁ ।

27 ଏନ୍‌ଇଡ଼ିଂ ଫାରୋ ରେମୁଆଁ ବେଚେ ମୋଶା ଆରି ହାରୋଣକେ ଡୱାଚେ ବାସଙ୍ଗ୍‌କେ, ଏତର୍‌ ନେଙ୍ଗ୍‌ ପାପ୍‌ ଡିଂମ୍ବକେ, ମାପ୍‌ରୁ ଦରମ୍‌, ମାତର୍‌ ନେ ଆରି ନେ ରେମୁଆଁଇଂ ଆଃ ବୁଲ୍‌ । 28 ମାପ୍‌ରୁ ଡାଗ୍ରା ପାର୍‌ତନା ଡିଂପା; ମେଃଡାଗ୍ଲା ପର୍‌ମେସର୍ ଡିଂବକ୍ନେ ଗଡ଼୍‌ଗଡ଼ି ବାରି ଆରେଣ୍ଡିଆ ଜାବର୍‌ ଗୁର୍‌ବକେ; ନେ ଆପେକେ ୱେନ୍‌ସା ଆନ୍ତାର୍‌ ନେବିଏ, ପେନେ ଆରି ତଙ୍ଗାର୍‌ ଆଡିଂଣ୍ଡୁ ।

29 ଆତେନ୍‌ ବେଲା ମୋଶା ଆମେଇଂକେ ବାସଙ୍ଗ୍‌କେ, ନେଙ୍ଗ୍‌ ଇନିବାନ୍‌ ତାର୍‌ୱେକ୍ନେ ଦାପ୍ରେ ମାପ୍‌ରୁ ଡାଗ୍ରା ନେଙ୍ଗ୍‌ନି ନ୍ତିକେ ଆରାତ୍ରା ଣ୍ଡ୍ରାତଡ଼ିଆଏ, ଆତ୍‌ବା ଗଡ଼୍‌ଗଡ଼ି ବଗ୍‌ନେ ଚୁପ୍‌ ଡିଂୱେଏ ଆରି ଆରେଣ୍ଡିଆ ଗୁର୍‌ନେ ବନ୍ଦ୍‌ ଡିଂୱେଏ; ବାରି ଆକେନ୍‌ ଦର୍‌ତନି ଜେ ମାପ୍‌ରୁନେ, ଆତେନ୍‌ ପେ ପେମ୍ୟାଃଏ । 30 ମାତର୍‌ ନେଙ୍ଗ୍‌ ମ୍ୟାଃନ୍ଲେକେ, ନା ଆରି ନାନେ ଚାକର୍‌ଇଂ ଏଃ ଜାକ ମାପ୍‌ରୁ ପର୍‌ମେସର୍‌କେ ବୁଟ ଆଡିଂଆର୍‌କେ ।

31 ଆତେନ୍‌ ବେଲା ଫେସି* ଆରି ଗହମ୍‌ ସାପା ନଷ୍ଟ ଡିଂକେ, ମେଃଡାଗ୍‌ଲା ଗହମ୍‌ କେଡ଼୍‌ ଡିଂଚେ ତାର୍‌ଲେଃଗେ ଆରି ଫେସି ସାରି ଡିଂଲାଏଗେ । 32 ମାତର୍‌ ଗହମ୍‌ ଆରି କଣ୍ଡାନେ ଗହମ୍‌ ମ୍ନା ଆଲେଃଗେସାଃ ନଷ୍ଟ ଆଡିଂକେ ।

33 ଏନ୍‌ଇଡ଼ିଂ ମୋଶା ଫାରୋ ବାନ୍‌ ଇନି ବାଏରେ ୱେଚେ ମାପ୍‌ରୁଅରିଆ ମେଁନେ ନ୍ତି ଆତଡ଼ିଆକେ, ତ୍ରିଗ୍‌ଡ଼ିଆ ଗର୍‌ଜେନେ ଆରି ଆରେଣ୍ଡିଆ ଲନେ ବନ୍ଦ୍‌ ଡିଂୱେକେ, ତୁବଃଅରିଆ ଆରି ଣ୍ଡିଆ ଆଗୁର୍‌କେ ଣ୍ଡୁ । 34 ଆତେନ୍‌ ବେଲା ଣ୍ଡିଆ ଗୁର୍‌ନେ ଆରି ଆରେଣ୍ଡିଆ ଲଃନେ ଆରି ତ୍ରିଗ୍‌ଡ଼ିଆ ଗର୍‌ଜେନେ ବୁଙ୍ଗ୍‌ଡିଂକ୍ନେ କେଚେ ଫାରୋ ଆରି ପାପ୍‌ ଡିଂକେ, ବାରି, ମେଁ ଆରି ମେଁନେ ଚାକର୍‌ଇଂ ନିଜର୍‌ ନିଜର୍‌ ମନ୍‌କେ ଗରବ୍‌ ଆଡିଂଆର୍‌କେ । 35 ଏଲେଡିଗ୍‌ ଫାରୋନେ ମନ୍‌ କଟିନ୍‌ ଆଃଡିଂଚେ ଲେଃଗେ; ଆତେନ୍‌ସା ମୋଶାବାନ୍‌ ବାସଙ୍ଗ୍‌ବକ୍ନେ ମାପ୍‌ରୁନେ ସାମୁଆଁ ଅନୁସାରେ ମେଁ ଇସ୍ରାଏଲ୍‌ ରେମୁଆଁଇଂକେ ୱେନ୍‌ସା ଆନ୍ତାର୍‌ ଆବିକେ ଣ୍ଡୁ ।