1 ମାପ୍‌ରୁ ମୋଶାକେ ବାସଙ୍ଗ୍‌କେ, "ମୁଇଂ ପୁଜା ବେଦି ତିଆର୍‌ ଡିଂନେସା ଶିଟିମ୍‌ ସୁଆ ବେବଆର୍‌ ଡିଂପା । ଆକେନ୍‌ ମୁଇଂ ଅଁକନ୍‌ ଡିଂପଡ଼େଏ । ଆକ୍ମେନେ ଚ୍ଲେ ମାଲ୍‌ ନ୍ତି ଆରି ଅସାର୍‌ ଞ୍ଜି ନ୍ତି ଲାକା ଡିଂନେ ଦର୍‌କାର୍‌ । 2 ବେଦିନେ ଅଁକନ୍‌ ନ୍‌ସା ଡିରଙ୍ଗ୍‌ ତିଆର୍‌ ଡିଂପା । ଆକେନ୍‌ ଡିରଙ୍ଗ୍‌ଇଂ ବେଦିନେ ମୁଇଂ ଅଂଶ ଡିଂନେ ଦର୍‌କାର୍‌ । ଆକେନ୍‌ ପିତଲ୍‌ ଏତେ ତିଆର୍‌ ପେଡିଂଏ । 3 ଉଗ୍‌ସ ସଃନ୍‌ସା ଙ୍କୁଇ ପେରାଃରେଏ, ଆତ୍‌ବାନ୍‌ ବୁର୍‌ୟାଃ ସଃନେ ଚାଟୁ, କୁଣ୍ଡ୍‌, ଟସ ନ୍‌ସା ତିର୍‌ସୁଲ୍‌ ଆରି ବୁର୍‌ୟାଃ ସଃନେ ବେଲ୍‌ଚା ପେରାରେଏ; ଆତ୍‌ବାନ୍‌ ସାପା ଜିନିସ୍‌ ପିତଲ୍‌ ଏତେ ପେରାରେଏ । 4 ପିତଲ୍‌ ଏତେ ମୁଇଂ ଜାଲି ପେଡିଂଏ ଆରି ମେଁ ଆଡ଼ାତ୍ରା ଅଁକନ୍‌ ପାକା ପିତଲ୍‌ନେ ଅଁକିଲିଗ୍‌ ସାଃନେ କାଡ଼ୁ ପେରାରେଏ । 5 ପୁଜା ବେଦିନେ ଆଲ ଲେକ୍ନେ ଦୁଆର୍‌ ବନ୍ଦ୍‌ ଆଲ ଜାଲିକେ ବପା । ଆକେନ୍‌ ପୁଜା ବେଦିନେ ମଜେ ବାଗ୍‌ ଜାକ ଲମ୍ୱେଚେ ଲେଃଏ । 6 ପୁଜା ବେଦିନେ ଟେଙ୍ଗ୍‌ ଶିଟିମ୍‌ ସୁଆ ଏତେ ଆରେଚେ ଆତ୍‌ଅରିଆ ପିତଲ୍‌ ପେୱେଁଏ । 7 ବାରି ଆତେନ୍‌ ବେଦିକେ ଡୁଙ୍ଗ୍‌ନେ ବେଲା ବେଦିନେ ମ୍ୱାର୍‌ ପାଟ୍‌ନେ ଆଡ଼ାତ୍ରା କାଡ଼ୁ ବିତ୍‌ରେ ଆତେନ୍‌ ଟେଙ୍ଗ୍‌ ବପା । 8 ପେ ପୁଜା ବେଦିକେ ପାଙ୍କା ବଚେ ପାଟା ଏତେ ଆତେନ୍‌ ପେଡିଙ୍ଗ୍‌ଏ । କଣ୍ଡାନିଆ ଆପେକେ ଡିରକମ୍‌ ବିମ୍ୱଗେ ଦେତ୍‌ରକମ୍‌ ବାବ୍‌ରେ ବେଦି ତିଆର୍‌ ଡିଂପା ।"

9 ପବିତ୍ର କୁଡ଼ିଆ ନ୍‌ସା ମୁଇଂ ପ୍ଲେଡ଼ିଆ ତିଆର୍‌ ଡିଂପା । ଆତେନ୍‌ ପ୍ଲେଡ଼ିଆନେ ଦକିନ୍‌ ଦିଗ୍‌ ପାକା ୱେଁକ୍ନେ ତୁଲୁଏ ପାତଲ୍‌ ସୁତା ଏତେ ତିଆର୍‌ ଡିଂକ୍ନେ ପର୍‌ଦା ଲେଃଏ ଆକ୍ମେନେ ଚ୍ଲେ, ମୁଇଂ ଶହ ନ୍ତି ଲେପଡ଼େଏ । 10 ଆତ୍‌ଅରିଆ କୁଡ଼ିଏ ଡେଲି ଆରି କୁଡ଼ିଏ କାଡ଼ୁ ପିତଲ୍‌ନେ ଡିଂଏ । ବାରି ଡେଲିନେ ଆକୁଡ଼ି ଆରି ରୁପା ଏତେ ତାର୍‌ଡିଂକ୍ନେ ଜିନିସ୍‌ ଡିଂଏ । 11 କୁଡ଼ିଆନେ ଉତର୍‌ ପାକା ଶହେ ନ୍ତି ଚ୍ଲେକ୍ନେ ପର୍‌ଦା ଡିଂଏ ଆରି ମେଁନେ କୁଡ଼େଟା ଡେଲି ଆରି କୁଡ଼େଟା କାଡ଼ୁ ପିତ୍ତଲ୍‌ନେ ଡିଂଏ । ଆରି ଡେଲିନେ ଆକଡ଼ି ଆରି ରୁପା ଏତେ ତିଆର୍‌ ଡିଂକ୍ନେ ଜିନିସ୍‌ ଡିଂଏ । 12 ଆରି ପଶ୍ଚିମ୍‌ ଦିଗ୍‌ ପାକା ପ୍ଲେଡ଼ିଆନେ ଅସାର୍‌ ପଚାସ୍‌ ନ୍ତି ପର୍‌ଦା, ଆରି ଆତ୍‌ଅରିଆନେ ଗୁଆକିଲିଗ୍‌ ଡେଲି ଆରି ଗୁଆକିଲିଗ୍‌ ଚୁଙ୍ଗୀ* ପେଡିଂଏ । 13 ପୁର୍ବ ଦିଗ୍‌ ପାକାନେ ପ୍ଲେଡ଼ିଆନେ ଅସାର୍‌ ପଚାସ୍‌ ନ୍ତି ଡିଂଏ । 14 ପୁର୍ବ ବାଗ୍‌ ପାକା ଗାନେ ଗାଲିନିଆ ପନ୍ଦର ନ୍ତି ପର୍‌ଦା ଆରି ଞ୍ଜି ଡେଲି ଆରି ଞ୍ଜି ଚୁଙ୍ଗୀ ଡିଂଏ । 15 ବିନ୍‌ ବାଗ୍‌ ପାକା ପନ୍ଦର ନ୍ତି ପର୍‌ଦା ଆରି ଞ୍ଜି ଡେଲି ଆରି ଞ୍ଜି ଚୁଙ୍ଗୀ ଡିଂଏ । 16 "ପ୍ଲେଡ଼ିଆନିଆ ଗାନେ ଗାଲି ଆତ୍‌ଲା ପର୍‌ଦା କୁଡ଼ିଏ ନ୍ତି ଚ୍ଲେ ଡିଂଏ । ଆତେନ୍‌ ପର୍‌ଦା ନ୍‌ସୁଆର୍‌କ୍ନେ ଲାଇଲନ୍‌ ସୁତା ଏତେ ତିଆର୍ ଡିଂପା ଯାହାକି ନିଲି, କଃଡ଼େଆଁ ବାନା, ଚି ରଙ୍ଗ୍‌ନେ ସୁତା ଏତେ ତଗ୍‌ ବଏ । ଆରି ଆକ୍ମେନେ ଅଁକିଲିଗ୍‌ ଡେଲି ଆରି ଅଁକିଲିଗ୍‌ ଚୁଙ୍ଗୀ ଡିଂପଡ଼େଏ । 17 ବାରି ପ୍ଲେଡ଼ିଆନେ ଚାର୍‌ ବେଡ଼୍‌ତିନେ ଡେଲି ସାପା ରୁପା ଏତେ ୱେଁବିଆର୍‌ଏ ଆରି ମେଁନେ ଆକୁଡ଼ି ରୁପାନେ ଆରି ଚୁଙ୍ଗୀ ପିତ୍ତଲ୍‌ନେ ଡିଂଏ । 18 ପ୍ଲେଡ଼ିଆ ମୁଇଂ ଶହ ନ୍ତି ଚ୍ଲେ ଆରି ପଚାସ୍‌ ନ୍ତି ଅସାର୍‌ ଆରି ମାଲ୍‌ ନ୍ତି ତିଆର୍‌ ଡିଂଏ । ଆତେନ୍‌ ୱେଁକ୍ନେ ତୁଲୁଏ ପାତଲ୍‌ ସୁତା ଏତେ ତିଆର୍‌ ଡିଂଚେ ପିତଲ୍‌ନେ ଚୁଙ୍ଗୀ ଡିଂଏ । 19 ଆରି ପବିତ୍ର କୁଡ଼ିଆନେ ସାପା କାମ୍‌ ଡିଂକ୍ନେ ଜିନିସ୍‌ ଆରି ପ୍ଲେଡ଼ିଆନେ ସାପା କୁଟି ପିତଲ୍‌ ଏତେ ତିଆର୍ ଡିଂପଡ଼େଏ ।"

20 "ଆରି କାଲାଆଃ କୁପିସ ଆଡୁଆଚେ ତାରାସ୍‌ ଆଡିଂନେସା ନିର୍‌ମଲ୍‌ ଲୁଏଃକ୍ନେ ଜୀତ ଞ୍ଚୁ ପେ ଡାଗ୍ରା ରାଙ୍ଗ୍‌ପାଂନେସା ଇସ୍ରାଏଲ୍‌ ରେମୁଆଁଇଂକେ ଆଦେସ୍‌ ପେବିଏ । 21 ଆରି କୁକପାର୍‌ କୁଡ଼ିଆନିଆ ସାକି ପିଡ଼ି ସାମ୍‌ନେ ମ୍ୱାର୍‌ ବାଗ୍‌ ଡିଂଲାଏଃକ୍ନେ ପର୍‌ଦା ବାଏରେ ହାରୋଣ ଆରି ମେଁନେ ଉଂଡେଇଂ ଲମ୍‌ଡିଗ୍‌ କେଲାବାନ୍‌ ଞ୍ଜିର୍‌ନୁଗ୍‌ ଜାକ ମାପ୍‌ରୁନେ ସେଃମଁ ଆତେନ୍‌ ସଜେଚେ ବଏ; ଆକେନ୍‌ ଇସ୍ରାଏଲ୍‌ ଗଡ଼େଇଂନେ ନ୍ତାଞ୍ଜାଇଂନେ ବାନ୍‌ ପାଲନ୍‌ ଡିଂନେ ମାଡାନେ ଜୁଗ୍‌ନେ ନିଅମ୍‌ ଡିଂଏ ।"