ଯାତ୍ରା 13

ପର୍‌ତୁମ୍‌ ଜନ୍‌ମେକ୍ନେକେ ବଲି

1 ଆକେନ୍‌ ପରେ ମାପ୍‌ରୁ ମୋଶାକେ ବାସଙ୍ଗ୍‌କେ, 2 "ଇସ୍ରାଏଲ୍‌ ଗଡ଼େଙ୍ଗ୍‌ନେ ବିତ୍‌ରେ ରେମୁଆଁ ଡିଂଲେ କି ପଶୁ ଡିଂଲେ, ଜା ଡିଗ୍‌ ପର୍‌ତୁମ୍ ଜନମ୍‌ ଡିଂଏ, ଆତେନ୍‌ ପର୍‌ତୁମ୍‌ ଜନମ୍‌ ଡିଂକ୍ନେ ସାପାରେକେ ନେ ଡାଗ୍ରା ରାଙ୍ଗ୍‌ପାଙ୍ଗ୍‌ଲେ, ଆତେନ୍‌ ସାପା ନେନେ ।"

ଖମୀର ଆମିସୁଃକ୍ନେ ରୁଟି ପାଣ୍ଡୁଏଃ

3 ଏନ୍‌ଇଡ଼ିଂ ମୋଶା ରେମୁଆଁଇଂକେ ବାସଙ୍ଗ୍‌କେ, "ଆକେନ୍‌ ଦିନ୍‌କେ ମନେ ବପା, ମେଃଡାଗ୍‌ଲା ଆକେନ୍‌ ଦିନା ପେ ବାସା ପେଲେକ୍ନେ ରକମ୍‌ ମିସର୍‌ବାନ୍‌ ପେତାର୍‌କେ, ଆରି ମାପ୍‌ରୁନେ ବପୁରେ ଆତ୍‌ବାନ୍‌ ଆପେକେ ଆତାର୍‌ଚେ ଡୁଂମ୍ପାଂକେ; ଆକ୍‌ଅରିଆ ଖମୀର ମିସୁକ୍ନେ ରୁଟି ପେଚଙ୍ଗ୍‌ ଣ୍ଡୁ । 4 ପେ ଆବୀବ୍‌*13:4 ଇସ୍ରାଏଲ୍‌ନେ କେଲେଣ୍ଡେର୍‌ ଅନୁସାରେ ପର୍‌ତୁମ୍‌ ଆର୍କେନେ ମ୍ନି ଆବୀବ୍‌ ମ୍ନିକ୍ନେ ପର୍‌ତୁମ୍‌ ଆର୍କେନେ ଆକେନ୍‌ ଦିନା ପେତାର୍‌କେ । 5 ଆରି କିଣାନିୟ ଆରି ହିତ୍ତୀୟ ଆରି ଇମୋରୀୟ ଆରି ହିବ୍ବୀୟ ଆରି ଯିବୂଷୀୟ ରେମୁଆଁଇଂନେ ମୁଃଡ଼ିନେ ଦେସ୍‌ ଆପେକେ ବିଃନ୍‌ସା ମାପ୍‌ରୁ ପେନି ଅସେନେ ନ୍ତାଞ୍ଜାଇଂକେ ପାର୍‌ମାନ୍‌ ଡିଂବଗେ, ଆତେନ୍‌ ତ୍ରାଃଡ଼ିଆ ଆରି ଞ୍ଜୁଙ୍ଗ୍‌ ତାର୍‌ନେ ଦେସ୍‌ନିଆ ଅଃନା ମେଁ ଆପେକେ ଡୁଂପାଙ୍ଗ୍‌ଏ, ଆତେନ୍‌ ବେଲା ପେ ଆକେନ୍‌ ଆର୍କେ ଆକେନ୍‌ ସେବା କାମ୍‌ ପୁରନ୍‌ ପେଡିଂଏ । 6 ମୁଇଂ ସାନ୍ତା ଜାକ ଖମୀର ଆମିସୁଃକ୍ନେ ରୁଟି ପେଚଙ୍ଗ୍‌ଏ ଆରି ଗୁ ଦିନା ମାପ୍‌ରୁ ମିନିରେ ପାଣ୍ଡୁଏଃ ପେଡିଂଏ । 7 ବାରି ଆତେନ୍‌ ସାନ୍ତା ଜାକ ଖମୀର ଆମିସୁଃକ୍ନେ ରୁଟି ପେଚଙ୍ଗ୍‌ଏ ବାରି ପେ ଡାଗ୍‌ରା ଖମୀର ମିସୁକ୍ନେ ରୁଟି ଆତ୍ନା ଣ୍ଡୁ, ବାରି ପେନି ସାପା ଦେସ୍‌ ବିତ୍‌ରେ ଆତ୍ନା ଣ୍ଡୁ । 8 ବାରି ଆତେନ୍‌ ଦିନା ପେ ପେନି ଉଙ୍ଗ୍‌ଇଂକେ ପେବାସଙ୍ଗ୍‌ଏ, ମିସର୍‌ବାନ୍‌ ନେ ତାର୍‌ନେ ବେଲା ମାପ୍‌ରୁ ନେ ଆଡ଼ାତ୍ରା ମେଃ ମେଃନି କାମ୍‌ ଡିଂବଗେ, ଆତେନ୍‌ ସାପାନେ ମନେ ବନ୍‌ସା ଆକାନ୍‌ ଡିଂପଡ଼େଏ । 9 ବାରି ମାପ୍‌ରୁନେ ନିଅମ୍‌ ଯେନ୍ତିକି ପେ ମନ୍‌ ବିତ୍‌ରେ ଲେଃଏ, ଆତେନ୍‌ସା ଆକେନ୍‌ ଚିନ୍‌ ରକମ୍‌ ପେ ନ୍ତିନିଆ ଆରି ମନେ ବନେ ରକମ୍‌ ପେନେ ମ୍‌ମୁଁଆଃଅରିଆ ମନେ ଲେଃଏ; ମେଃଡାଗ୍‌ଲା ମାପ୍‌ରୁନେ ବପୁନେ ନ୍ତି ଏତେ ମିସର୍‌ବାନ୍‌ ଆପେକେ ଆତାର୍‌ ଡୁଂପାଙ୍ଗ୍‌ବକେ । 10 ଆତେନ୍‌ସା ବେଲା କେଚେ ପେ ବରସ୍‌କେ ବରସ୍‌ ଆକେନ୍‌ ନିଅମ୍‌ ପାଲନ୍‌ ପେଡିଂଏ ।"

11 ମାପ୍‌ରୁ ଆପେକେ ଆରି ପେନି ନ୍ତାଞ୍ଜାଇଂନେ ଡାଗ୍‌ରା ମେଃନେ ପାର୍‌ମାନ୍‌ ଡିଂବକେ, ଆତେନ୍‌ ଇସାବ୍‌ରେ ମେଁ ଉଃଡ଼ିବେଲା କିଣାନୀୟ ରେମୁଆଁଇଂନେ ଦେସ୍‌ନିଆ ରାଙ୍ଗ୍‌ୱେଚେ ଆପେକେ ଆତେନ୍ ବିଃଏ, 12 ଆତେନ୍‌ ବେଲା ପେ ପର୍‌ତୁମ୍‌ ଜନମ୍‌ ଡିଂକ୍ନେ ସାପା ଉଂକେ ଆରି ପେନି ପସୁବାନ୍‌ ପର୍‌ତୁମ୍‌ ଜନମ୍‌ ଡିଂକ୍ନେ ସାପା ଉଂଇଂ ମାପ୍‌ରୁନେ ମିନିରେ ଅଲ୍‌ଗା ପେରାଃଡିଂଏ; ଙ୍ଗିର୍‌ବୁଏଃଉଂ ସାପା ମାପ୍‌ରୁନେ ଡିଂଏ । 13 ବାରି ପେ ମେଣ୍ଡା ଉଂଡେକେ ବିଚେ ସାପା ପର୍‌ତୁମ୍‌ ଜନମ୍‌ ଡିଂକ୍ନେ ଗଦ ଉଂଡେକେ ପେଆନ୍ତାର୍‌ଏ; ଜଦି ପେଆନ୍ତାର୍‌ ଣ୍ଡୁ, ତେଲା ମେଁନେ ଲୁଗଃ ପେଆଲିଃଏ; ମାତର୍‌ ପେ ଉଙ୍ଗ୍‌ଇଂନେ ବିତ୍‌ରେ ରେମୁଆଁନେ ପର୍‌ତୁମ୍‌ ଜନମ୍‌ ଡିଂକ୍ନେ ସାପାରେକେ ଆନ୍ତାର୍‌ନେ ପଡ଼େଏ । 14 ଆରି ଇଡ଼ିଂଡେ ପେଉଂଇଂ ଜଦି ସାଲ୍ୟାଃକୁଆର୍‌ଏ, "ଆକେନ୍ ମେଃନି ?" ତେଲା ପେ ପେବାସଙ୍ଗ୍‌ଏ, "ମାପ୍‌ରୁ ଉଃଡ଼ିବେଲା ଆନେକେ ମେଁନି ମ୍ନା ବପୁରେ ଚାକର୍‌ କାମ୍‌ ଡିଂନେ ଡୁଆ ରକମ୍‌ ଆନେକେ ମିସର୍‌ ଦେସ୍‌ବାନ୍‌ ଆଃତାର୍‌ ଡୁଂପାଂକେ । 15 ଆତେନ୍‌ ବେଲା ଫାରୋ ଆନେକେ ଆନ୍ତାର୍‌ ବିନ୍‌ସା ଇକ୍‌ଚା ଡିଂଏ, ମାପ୍‌ରୁ ମିସର୍‌ନିଆ ଲେକ୍ନେ ରେମୁଆଁ ଆରି ପସୁଇଂନେ ସାପା ପର୍‌ତୁମ୍‌ ଜନମ୍‌ ଡିଂକ୍ନେ ଉଂଇଂକେ ବାଗୁଏ ବଗେ; ଆତେନ୍‌ସା ନେ ପର୍‌ତୁମ୍‌ ଜନମ୍‌ ଡିଂକ୍ନେ ଉଂଇଂକେ ମାପ୍‌ରୁନେ ମିନିରେ ବଲି ନେଃଡିଂପା । ମାତର୍‌ ନେନେ ପର୍‌ତୁମ୍‌ ଜନମ୍‌ ଡିଂକ୍ନେ ଉଂ ସାପାରେକେ ଆନ୍ତାର୍‌ ନେଃବି । 16 ଆକେନ୍‌ ଚିନା ରକମ୍‌ ପେ ନ୍ତିନିଆ ଲେଃଏ ଆରି ଚିନ୍‌ ରକମ୍‌ ପେ ମ୍ୱାର୍‌ ମ୍‌ମୁଆଃ ମଜେ ଲେଃଏ; ମେଃଡାଗ୍‌ଲା ମାପ୍‌ରୁନେ ମ୍ନା ବପୁରେ ଆନେକେ ମିସର୍‌ ଦେସ୍‌ବାନ୍‌ ଆଃତାର୍‌ ଡୁଂପାଂକେ ।"

ତ୍ରିଗ୍‌ଡିଆ ଆରି ସୁଆନେ ଡେଲି

17 ଏନ୍‌ଇଡ଼ିଂ ଫାରୋ ରେମୁଆଁଇଂକେ ଆନ୍ତାର୍‌ ବିଃଲା, ପଲେଷ୍ଟୀୟ ରେମୁଆଁଇଂନେ ଦେସ୍‌ନିଆ ୱେନେ ଗାଲି ଡାଗ୍‌ରା ୱେଚାଆର୍‌କେ, ଏଲେଡିଗ୍‌ ପର୍‌ମେସର୍‌ ଆତେନ୍‌ ଗାଲି ପାକା ୱାରାଙ୍ଗ୍‌ଆୱେକେ ଣ୍ଡୁ; ମେଃଡାଗ୍‌ଲା ପର୍‌ମେସର୍‌ ବାସଙ୍ଗ୍‌କେ, "ଜୁଜ୍‌ ଡିଂନେ କେଲା ଇଡ଼ିଙ୍ଗ୍‌ ରେମୁଆଁଇଂ ମନ୍‌ ବଦ୍‌ଲେଚେ ମିସର୍‌ ପାକା ଆଣ୍ଡେ ୱେୟାଆର୍‌ଏ ।" 18 ଆତେନ୍‌ସା ପର୍‌ମେସର୍‌ ଆମେଇଂକେ ସୁପ୍‌ କେଣ୍ଡିଆଃନେ ବାଲିଲ ପାକା ଆଃଅଲେଙ୍ଗ୍‌କେ ଆରି ଇସ୍ରାଏଲ୍‌ନେ ଉଂଇଂ ଜୁଜ୍‌ ଡିଂନେ ସକା ସଃଚେ ମିସର୍‌ବାନ୍‌ ୱେଆର୍‌କେ ।

19 ବାରି ମୋଶା ଯୋଷେଫ୍‌ନେ ଞ୍ଚିୟାକେ ମେଁ ଏତେ ରାଙ୍ଗ୍‌ୱେକେ; ମେଃଡାଗ୍‌ଲା ମେଁ ଇସ୍ରାଏଲ୍ ଉଂଇଂକେ ଡାଟାମ୍‌ ବାବ୍‌ରେ ପାର୍‌ମାନ୍‌ ଆଡିଂଚେ ବାସଙ୍ଗ୍‌ବଗେ, "ପର୍‌ମେସର୍‌ ଡିଲାଡିଗ୍‌ ଆପେକେ ସାଇଜ ଡିଂଏ; ଆତେନ୍‌ ବେଲା ପେ ପେ ଏତେ ନେନେ ଞ୍ଚିୟା ଆକେନ୍‌ ଜାଗାବାନ୍ ରାଙ୍ଗ୍‌ପେୱିଗ୍‌ଏ ।"

20 ଏନ୍‌ଇଡ଼ିଂ ମେଇଂ ସୁକ୍‌କତାବାନ୍‌ ଅଲେଙ୍ଗ୍‌ଚେ ବାଲିଲ ପାକା ଲେକ୍ନେ ଏତମ୍‌ନିଆ କୁଡ଼ିଆ ଗାଗ୍‌ଆର୍‌କେ । 21 ମେଇଂ ଡିରକମ୍‌ ସ୍ମି ଆରି ମିଡିଗ୍‌ ବେଲା ୱେୟାଆର୍‌ଏ, ଆତେନ୍‌ସା ମାପ୍‌ରୁ ସ୍ମି ଗାଲି ଆଃଅଲେଙ୍ଗ୍‌ ନ୍‌ସା ତ୍ରିଗ୍‌ଡ଼ିଆ ଡେଲିବାନ୍ ଆରି ମିଡିଗ୍‌ ବେଲା ତାରାସ୍‌ ବିଃନ୍‌ସା ସୁଆ ଡେଲିନିଆ ଲେଃଚେ ମେଙ୍ଗ୍‌ନେ ସିସେ ସିସେ ୱେକେ । 22 ମେଁ ରେମୁଆଁଇଂନେ ସେନୁଗ୍‌ ସ୍ମି ବେଲା ତ୍ରିଗ୍‌ଡିଆ ଆରି ମିଡିଗ୍‌ ବେଲା ସୁଆକେ ଆରାଃଗୁଚେକେ ଣ୍ଡୁ ।