1 ଏନ୍‌ଇଡ଼ିଂ ମାପ୍‌ରୁ ମୋଶାକେ ଆକେନ୍‌ ସାମୁଆଁ ବାସଙ୍ଗ୍‌କେ, 2 "କେଲା, ନେ ଯିହୁଦା ବଂସନେ ହୂରନେ ଏଗ୍‌ଲେଣ୍ଡେ ହୂରନେ ଉଙ୍ଗ୍‌ଡେ ବତ୍ସଲେଲକେ ମିନି ସାଚେ ନେୱାକେ । 3 ବାରି ସାପା ରକମ୍‌ନେ କାମ୍‌ ଡିଂନେ, ଡାଗ୍‌ଲା, ସୁନା, ରୁପା ବାରି ପିତ୍ତଲ୍‌ ଏତେ ଗଗ୍‌ନେ ଆରି ସୁନ୍ଦର୍‌ ଆଡିଂନେ ମଣି ଗଗ୍‌ଗଗ୍‌ଚେ ଆରି ସୁଆକେ ଗଗ୍‌ନେ ଗୁଲୁଏ, 4 ସାପା ରକମ୍‌ନେ କାମ୍‌ ଡିଂନେସା । 5 ଆମେକେ ଜ୍ଞାନ୍‌, ବୁଦି, ବିଦ୍ୟା ବାରି କାମ୍‌ ବିତ୍‌ରେ ସାପା ମ୍ୟାଃକ୍ନେ ଡିଂନ୍‌ସା ପର୍‌ମେସର୍‌ନେ ଆତ୍ମାଅରିଆ ବର୍ତି ଆଡିଂନେବକେ । 6 ଆରି କେଲା, ଦାନ ବଂସନ୍ନିଆ ଜନମ୍‌ ଡିଂଲାଏଃକ୍ନେ ଅହୀଷାମକନେ ଉଂଡେ ଅହଲୀୟାବକେ ଆମେକେ ସାଇଜ ଡିଂନ୍‌ସା ନେୱାକେ: ବାରି ସାପା ଗିଆନ୍‌ ଆଲେକ୍ନେ ରେମୁଆଁଇଂନେ ମନ୍‌ଅରିଆ ଜ୍ଞାନ୍‌ ନେବିକେ; ଆତେନ୍‌ସା ନେ ଆପେକେ ମେଃ ସାପା ଆଦେସ୍‌ ବିନେବକେ, ଆତେନ୍‌ ସାପା ମେଇଂ ଆରେ ୟାଆର୍‌ଏ । 7 ବାରି, କୁକପାର୍‌ କୁଡ଼ିଆ ଆରି ନିଅମ୍‌ ପେଡ଼ି ଆରି ମେଁ ଆଡ଼ାତ୍ରା ଲାଏକ୍ନେ ପାପ୍ ଡିଡାନେ ଡାବ୍‌ନା ଆରି କୁଡ଼ିଆନେ ସାପା ମୁତା, 8 ଆରି ଟିବୁଲ୍‌ ଆରି ଆତ୍‌ଅରିଆନେ ମୁତାଇଂ ଆରି ନିର୍ମଲ୍ ଦିପ୍‌ ଆରି ଆତ୍‌ଅରିଆନେ ସାପା ମୁତା ଆରି ଦୁପ ବେଦି । 9 ଆରି ସୁଆ ବଲି ବେଦି ଆରି ଆତ୍‌ଅରିଆନେ ସାପା ତାଲି ଆରି ଞ୍ଚ ନ୍ତି ଗୁଏଚଗୁଏତିନେ ମୁତା ଆରି ଆତ୍‌ଅରିଆନେ ଙ୍କୁଇ, 10 ବାରି ନିମାଣ୍ଡା ବାବ୍‌ରେ ତେବକ୍ନେ ପାଟାଇ ବାରି ପୁଜାରି କାମ୍‌ ଡିଂନ୍‌ସା ହାରୋଣ ପୁଜାରିନେ ପବିତ୍ର ପାଟାଇ ଆରି ମେଁନେ ଉଂଡେଇଂନେ ପାଟାଇ, 11 ବାରି ବାଆଃ କିଗ୍‌ନେ ଞ୍ଚୁ ଆରି ପବିତ୍ର ଜାଗା ଆତ୍‌ଲା ବାସ୍ନା ଦୁପ୍‌, ଆକେନ୍‌ ସାପା ଆଦେସ୍‌ ନେ ଆପେକେ ନେବିକେ, ଆତେନ୍‌ ଇସାବ୍‌ରେ ମେଇଂ ଡିଂଆର୍‌ଏ ।"

12 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାଲିର୍‌କେ, 13 ନା ବାରି ଇସ୍ରାଏଲ୍‌ନେ ଗଡ଼େଇଂକେ ଆକେନ୍‌ ସାମୁଆଁ ବାସଙ୍ଗ୍‌, ଡିଲାଡିଗ୍‌ ପେ ନେନେ ପୁଣ୍ଡେନେ ଦିନ୍‌ ପାଲନ୍‌ ପେଡିଂଏ; ମେଃଡାଗ୍‌ଲା ନେ ଯେ ପେନି ପବିତ୍ର ଡିଂନେ ମାପ୍‌ରୁ, ଆକେନ୍‌ ଯେନ୍ତିକି ପେ ପେମ୍ୟାଃଏ, ଆତେନ୍‌ସା ପେନି ନ୍ତାଞ୍ଜା ଜାକ ନେ ଆରି ପେ ବିତ୍‌ରେ ଆକେନ୍‌ ଚିନ୍‌ ଡିଂଏ । 14 ଆତେନ୍‌ସା ପେ ପୁଣ୍ଡେନେ ଦିନ୍‌କେ ପାଲନ୍‌ ପେଡିଂଏ; ମେଃଡାଗ୍‌ଲା ଆତେନ୍‌ ପେ ଆଡ଼ାତ୍ରା ପବିତ୍ର; ଜା ଜଦି ଆତେନ୍‌କେ ଅପବିତ୍ର ଆଡିଂଏ, ଡିଲାଡିଗ୍‌ ଆମେକେ ଗୁଏନେ ଡଣ୍ଡ୍‌ ଡିଂଏ; ବାରି ମୁଡ଼ି ରେମୁଆଁଲା ଡିଗ୍‌ ଆତେନ୍‌ ଦିନା କାମ୍‌ ଡିଂଏ, ମେଁ ମେଙ୍ଗ୍‌ନେ ରେମୁଆଁଇଂନେବାନ୍‌ ଅଲ୍‌ଗା ଡିଂଏ । 15 ତୁର୍‌ ଦିନା ଜାକ କାମ୍‌ ପେଡିଂଏ, ମୁଇଂ ଦିନା ମାପ୍‌ରୁନେ ମ୍ନିରେ ପବିତ୍ର ମ୍ନା ପୁଣ୍ଡେନେ ଦିନ୍‌ ଡିଂଏ; ଆତେନ୍‌ ପୁଣ୍ଡେନେ ଦିନ୍‌ ଜଦି ଜା ଡିଗ୍‌ ସ୍ଲେଏ, ଡିଲାଡିଗ୍‌ ମେଁ ଗୁଏଃଏ । 16 ଆତେନ୍‌ସା ଇସ୍ରାଏଲ୍‌ ରେମୁଆଁଇଂ ନ୍ତାଞ୍ଜାଇଂନେ ନିଅମ୍‌ ରକମ୍‌ ନ୍ତାଞ୍ଜା ଜାକ ମାନେଃନ୍‌ସା ପୁଣ୍ଡେନେ ଦିନ୍‌ ପାଲନ୍‌ ଡିଂଆର୍‌ଏ । 17 ଆତେନ୍‌ ନେ ଆରି ଇସ୍ରାଏଲ୍‌ ଗଡ଼େଇଂନେ ବିତ୍‌ରେ ମୁଇଂ ଜୁଗ୍‌ ଜୁଗ୍‌ନେ ଚିନ୍‌ ଡିଂଏ, ମେଃଡାଗ୍‌ଲା ମାପ୍‌ରୁ ତୁର୍‌ ଦିନା କିତଙ୍ଗ୍‌ଇନିକେ ଆରି ପୁର୍‌ତିବିକେ ଆରେଚେ ଗୁ ଦିନା ପୁଣ୍ଡେଚେ ସାନ୍ତିରେ ଲେଃୱେକେ ।

18 ଆତେନ୍‌ସା ମେଁ ସୀନୟ୍‌ କଣ୍ଡାନିଆ ମୋଶା ଏତେ ବାଲିର୍‌ବାତାଚେ ସାକି ରକମ୍‌ ମ୍ୱାକ୍ଲିଗ୍‌ ବ୍ରିନେ ପାଟା, ପର୍‌ମେସର୍‌ନେ ଆରୁଏତି ଏତେ ଗୁଆର୍‌କ୍ନେ ମ୍ୱାକ୍ଲିଗ୍‌ ପାଟା ଆମେକେ ବିକେ ।