1 "ଏବେ ନେଙ୍ଗ୍‌ ଆନାକେ ମ୍ୱାସଙ୍ଗ୍‌ଏ, ହାରୋଣ ଆରି ମେଁନେ ଉଂଡେଇଂକେ ପୁଜାରି ବାବ୍‌ରେ ନିଯୁକ୍ତି ଡିଂଏ । ମୁଇଂ ନିମାଣ୍ଡାଃକ୍ନେ ବାଚିଗୋଏଃ ଆରି ମ୍ୱାକ୍ଲିଗ୍‌ ଗାଗ୍‌ଡ଼େକ୍ନେ ମେଣ୍ଡା ଡୁଂୱେଲାପା । 2 ଆକେନ୍‌ ପରେ ଖମୀର୍‌ ଆମିସୁଃକ୍ନେ ରୁଟି ଆରି ଞ୍ଚୁ ମିସୁଲେକ୍ନେ କମିର୍‌ ଗହମ୍‌ବାନ୍‌ ତିଆର୍‌ ଡିଂବକ୍ନେ କମିର୍‌ ମିସୁଲେକ୍ନେ ରୁଟିବାନ୍‌ ପେରାରେଏ । 3 ଆକେନ୍‌ ପିଟା ଆରି ରୁଟି ସାପା ଆଣ୍ଡ୍ରାନିଆ ବପା । ଆକେନ୍‌ ପରେ ଆତେନ୍‌ ଆଣ୍ଡ୍ରା ଏତେ ମୁଇଂ ଅରେଃ ଆରି ମ୍ୱାକ୍ଲିଗ୍‌ ମେଣ୍ଡାକେ କୁକପାର୍‌ କୁଡ଼ିଆନିଆ ଡୁଂପେପାଙ୍ଗ୍ଏ ।"

4 "ଆକେନ୍‌ ପରେ ହାରୋଣ ଆରି ମେଁନେ ଉଂଡେଇଂକେ କୁକପାର୍‌ କୁଡ଼ିଆନେ ଜାଗାନେ ପ୍ଲେଡ଼ିଆନିଆ ରାଙ୍ଗ୍‌ପାଙ୍ଗ୍‌ଲାପା । ଆରି ଆମେଇଂକେ ଆକୁମାବିପା । 5 ଆତେନ୍‌ ସାପା ସକା ଡୁଙ୍ଗ୍‌ୱେଚେ ହାରୋଣକେ ଜାମା ଆରି ଏଫୋଦ୍‌ନେ ସକା ଆରି ଏଫୋଦ ଆରି ଗ୍ରିଅରିଆ ସଃନେ ସକା ପେରାଃସ‍ଏ, ବାରି ଏଫୋଦନେ ଚିତ୍ର ଲେଃକ୍ନେ ନ୍‌ସାଃଅରିଆ ମେଁନେ ଗ୍ନେଗ୍‌ସା ପେଗାଗ୍‌ଏ । 6 ମେଁନେ ବାଆଃନିଆ ପାଗ୍‌ ଗାଗ୍‌ଚେ ମେଁ ଆଡ଼ାତ୍ରା ମୁଇଂ ପବିତ୍ର ମୁକୁଟ୍‌ ପେବିଏ । 7 ଆକେନ୍‌ ଇଡ଼ିଂ ମୁଇଂ ପଦ୍‌ଅରିଆ ବନେ ବେଲା ବାଆଃ ଆଡ଼ାତ୍ରା କିଗ୍‌ନେ ଞ୍ଚୁ ରାଙ୍ଗ୍‌ୱେଚେ ମେଁନେ ବାଆ ଆଡ଼ାତ୍ରା କିଗ୍‌ଚେ ଆମେକେ ଆସିର୍ବାଦ୍‌ ପେଡିଂଏ ।"

8 "ଆକେନ୍‌ ଇଡ଼ିଙ୍ଗ୍‌ ହାରୋଣନେ ଉଂଡେଇଂକେ ଆତେନ୍‌ ଜାଗାନ୍ନିଆ ରାଙ୍ଗ୍‌ପାଙ୍ଗ୍‌ଲାପା । ଆମେଇଂକେ ତୁଲୁଏକ୍ନେ ସକା ପେରାସଏ । 9 ହାରୋଣନେ ଆରି ମେଁନେ ଉଂଡେଇଂନେ ନ୍ସାନିଆ ତୁଆଲ୍‌ ଗାଗ୍‌ବିପା ଆରି ମେଙ୍ଗ୍‌ନେ ବାଆଃନିଆ ପାଗ୍‌ ଗାଗ୍‌ବିପା । ତେଲା ମେଇଂ ବିଶେଷ ବ୍ୟବସ୍ଥା ଅନୁସାରେ କାଲାଆଃ ପୁଜାରି ଡିଂଏ । ଦେକ୍‌ରକମ୍‌ ପେ ହାରୋଣକେ ବାରି ମେଁନେ ଉଂଡେଇଂକେ ପେବାଚେଏ ।"

10 "ଇଡ଼ିଂ ଆତେନ୍‌ ବାଚିକେ କୁକପାର୍‌ କୁଡ଼ିଆ ଡାଗ୍ରା ରାଙ୍ଗ୍‌ପାଙ୍ଗ୍‌ଲା । ହାରୋଣ ଆରି ମେଁନେ ଉଂଡେଇଂ ଆତେନ୍‌ ଉଂଗୁଏଃନେ ବାଆଃନିଆ ନ୍ତି ବଆର୍‌ଏ । 11 ତେଲା ପେ କୁକପାର୍‌ କୁଡ଼ିଆ ଗାଲି ଡାଗ୍ରା ମାପ୍‌ରୁନେ ସେଃମଁ ଆତେନ୍‌ ଉଂଗୁଏଃକେ ପେବାଗୁଏଃଏ । 12 ଆକେନ୍‌ ଇଡ଼ିଂ ଆତେନ୍‌ ଉଂଗୁଏଃନେନେ ଇକୁଡ଼ା ମିୟାଁ ପୁଜା ବେଦି ଡାଗ୍ରା ରାଙ୍ଗ୍‌ୱେଲାପା । ପେନେ ଆରୁଏତିନିଆ ମିୟାଁ ରାଙ୍ଗ୍‌ୱେଚେ ପୁଜା ବେଦିନେ ଡିରଙ୍ଗ୍‌ ଆଡ଼ାତ୍ରା କିଗ୍‌ବିପା ଆରି ବାକି ସାପା ମିୟାଁ ବେଦି ବୁନ୍ଦେ କିଗ୍‌ବିପା । 13 ଇଡ଼ିଂ ମେଁନେ ସୁଲେରେନିଆ ଲେକ୍ନେ ଚର୍‌ବିକେ ବାରି କଲ୍‌ଜାନିଆ ଲେକ୍ନେ ଚର୍‌ବିକେ ବାରି ମ୍ୱାକ୍ଲିଗ୍‌ ଗ୍ରିକେ ବାରି ଆଡ଼ାତ୍ରା ଲେକ୍ନେ ଚର୍‌ବି ଡୁଙ୍ଗ୍‌ୱେଚେ ବେଦିନିଆ ପେସିର୍‌ଏ । 14 ଆକେନ୍‌ ଇଡ଼ିଂ ଉଂଗୁଏଃନେ ଚିଲି, ଉକ୍‌ସା ଆରି ମେଁନେ ଇକ୍‌ତିଆ ରାଙ୍ଗ୍‌ୱେଚେ କୁଡ଼ିଆ ବାଏରେ ବାବିଃପା । ଆକେନ୍‌ ପୁଜାରିଇଂନେ ଆତ୍‌ଲା ବଲି ଡିଂଏ ।"

15 "ଆକେନ୍‌ ପରେ ହାରୋଣ ମେଁନେ ଉଂଡେଇଂକେ ବାସଙ୍ଗ୍‌ପା, ମେଇଂ ମେଙ୍ଗ୍‌ନେ ନ୍ତି ମୁଇଂ ମେଣ୍ଡାନେ ବାଆ ଆଡ଼ାତ୍ରା ବଆର୍‌ଏ । 16 ଆତେନ୍‌ ମେଣ୍ଡାକେ ବାଗୁଏପା ଆରି ମେଁନେ ମିୟାଁକେ ରାସିଂପା । ଆତେନ୍‌ ମିୟାଁକେ ପୁଜା ବେଦିନେ ପିତୁର୍‌ପାକା ଉର୍‌ଚିଗ୍‌ପା । 17 ଆକେନ୍‌ ଇଡ଼ିଂ ମେଣ୍ଡାକେ ଗନ୍ଦା ଗନ୍ଦା ଆଡିଙ୍ଗ୍‌ଚେ ଗୁଆଃପା । ମେଁନେ ସୁଲେରେ ଆରି ଞ୍ଚକେ ଗଡ଼ିଆଚେ ଆତେନ୍‌ ଗନ୍ଦା ଆଡିଂକ୍ନେ ସାପାକେ ମେଁନେ ବାଆଃ ଏତେ ପେବଏ । 18 ଆକେନ୍‌ ପରେ ମୁଇଂ ମେଣ୍ଡାକେ ପୁଜା ବେଦି ଆଡ଼ାତ୍ରା ପେସିର୍‌ଏ । ଆତେନ୍‌ ମାପ୍‌ରୁନେ ଆତ୍‌ଲା ସୁଆ ବଲି ଆରି ମନ୍‌କେ ୱେକେ ରକମ୍‌ ବାସ୍‌ନାକ୍ନେ ସୁଆ ଆଡ଼ାତ୍ରା ଆଃଗିନେ ଉପହାର୍‌ ଡିଂଏ ।"

19 "ହାରୋଣକେ ଆରି ମେଁନେ ଉଂଡେଇଂକେ ବିନ୍‌ ମେଣ୍ଡାନେ ବାଆ ଆଡ଼ାତ୍ରା ନ୍ତି ବନ୍‌ସା ବାସଙ୍ଗ୍‌ପା । 20 ଆତେନ୍‌ ମେଣ୍ଡାକେ ବାଗୁଏପା ଆରି ମେଁନେ ଇକୁଡ଼ା ମିୟାଁ ରାସିଂପା । ଆତେନ୍‌ ମିୟାଁକେ ହାରୋଣନେ ଞ୍ଚଙ୍ଗ୍‌ନ୍ତିନେ ନ୍ଲୁଗ୍‌ପାକା ଆରି ମେଁନେ ଉଂଡେଇଂନେ ଞ୍ଚଙ୍ଗ୍‌ନ୍ତିନେ ନ୍ଲୁଗ୍‌ପାକା ଲାଗାଏବିପା । ମେଙ୍ଗ୍‌ନେ ଞ୍ଚଙ୍ଗ୍‌ନ୍ତିନେ ବଟା ଆରୁଏତି ଆଡ଼ାତ୍ରା ଆରି ଞ୍ଚଙ୍ଗ୍‌ନ୍ତି ଞ୍ଚନେ ବଟା ଆରୁଏତି ଆଡ଼ାତ୍ରା ଆକେନ୍‌ ଲାଗାଏବିପା । ବାରି ପୁଜା ବେଦିନେ ପିତୁର୍‌ପାକା ମିୟାଁ ଉର୍‌ଚିଗ୍‌ ବିଃପା । 21 ଆକେନ୍‌ ଇଡ଼ିଂ ପୁଜା ବେଦିନେ ଆଡ଼ାତ୍ରା ଲେକ୍ନେ ମିୟାଁବାନ୍‌ ଆରି ଆସିର୍ବାଦ୍‌ ଡିଂନେ ଞ୍ଚୁବାନ୍‌ ଇକୁଡ଼ା ରକମ୍‌ ରାଙ୍ଗ୍‌ୱେଚେ ହାରୋଣ ଆଡ଼ାତ୍ରା ଆରି ମେଁନେ ସକା ଆଡ଼ାତ୍ରା, ବାରି ମେଁ ଏତେ ମେଁନେ ଉଂଡେଇଂନେ ଆଡ଼ାତ୍ରା ଆରି ମେଙ୍ଗ୍‌ନେ ସକା ଆଡ଼ାତ୍ରା ଉର୍‌ଚିଗ୍‌ ପେବିଏ ବାରି ମେଙ୍ଗ୍‌ନେ ସକା ପବିତ୍ର ଡିଂଏ ।"

22 "ଆରି ପେ ଆତେନ୍‌ ବିଃପେବକ୍ନେ ମେଣ୍ଡାନେ ଚର୍‌ବି ଆରି ଚର୍‌ବି ଡିଂକ୍ନେ ପ୍ଲା ଆରି ସୁଲେରେ ଆଡ଼ାତ୍ରାନେ ଚର୍‌ବି ଆରି ଯକୃତନେ ଆଡ଼ାତ୍ରା ବାଗ୍‌ନେ ସୁଲେରେ ଆରି ମ୍ୱାକ୍ଲିଗ୍‌ ଗୁରୁଦା ଆରି ଆତେନ୍‌ ଆଡ଼ାତ୍ରା ଲେକ୍ନେ ଚର୍‌ବି ଆରି ଇଞ୍ଚଙ୍ଗ୍‌ତି ପାକାନେ ବୁଲୁ ଞ୍ଚିୟା ରାଙ୍ଗ୍‌ୱେଲାପା । ମେଃଡାଗ୍‌ଲା ଆତେନ୍‌ ମୁଇଂ ଅପେଃବକ୍ନେ ମେଣ୍ଡା । 23 ଆକେନ୍‌ ପରେ ଖମୀର୍‌ ଆମିସୁଃକ୍ନେ ରୁଟି ଆଣ୍ଡ୍ରାଃ ରାଙ୍ଗ୍‌ୱେଚେ ଆତେନ୍‌ ଆଣ୍ଡ୍ରାଃକେ ମାପ୍‌ରୁନେ ସାମ୍‌ନେ ପେବଏ । ଆତେନ୍‌ ଆଣ୍ଡ୍ରାଃବାନ୍‌ ମୁଇଂ ରୁଟି ଞ୍ଚୁ ମିସୁକ୍ନେ ମୁଇଂ ପିଟା ଆରି ମୁଇଂ ପାତଲ୍‌ ଚକୁଲି ରାଙ୍ଗ୍‌ପେୱେଏ । 24 ଆକେନ୍‌ ସାପା ରାଙ୍ଗ୍‌ୱେଚେ ହାରୋଣ ଆରି ମେଁନେ ଉଂଡେଇଂନେ ନ୍ତିନିଆ ପେବିଏ । ଆମେକେ ପେବାସଙ୍ଗ୍‌ଏ ମେଇଂ ଆକେନ୍‌ ସାପା ମାପ୍‌ରୁ ସାମ୍‌ନେ ପେଚକ୍‌ଟେଏ । ବାରି ଆକେନ୍‌ ମାପ୍‌ରୁନେ ମ୍ନିରେ ମ୍ନା ବଲି ଡିଂଏ । 25 ଆକେନ୍‌ ପରେ ହାରୋଣ ଆରି ମେଁନେ ଉଂଡେଇଂନେ ନ୍ତିବାନ୍‌ ଆକେନ୍‌ ପୁଜା ତାଲି ରାଙ୍ଗ୍‌ୱେଚେ ପୁଜା ବେଦିନେ ସୁଆ ବଲି ଆଡ଼ାତ୍ରା ଆଗିବିପା । ଆକେନ୍‌ ମାପ୍‌ରୁନେ ଆତ୍‌ଲା ମୁଇଂ ମୁଇଂ ବାସ୍‌ନା ବିନେ ପୁରୁସ୍‌କାର୍‌ ଡିଂଏ ।"

26 "ହାରୋଣ ବିବକ୍ନେ ମେଣ୍ଡାନେ ଗ୍ରି ରାଙ୍ଗ୍‌ୱେଲାପା ଆରି ଆକ୍ମେକେ ମ୍ନା ବଲି ରକମ୍‌ ମାପ୍‌ରୁନେ ସାମ୍‌ନେ ଆକେନ୍‌ ସାପା ପେନେ ମୁଇଂ ବାଗ୍‌ ଡିଂଚେ ଲେଃଏ ।"

27 ବିବକ୍ନେ ମେଣ୍ଡା ଗ୍ରି ଆରି ଞ୍ଚକେ ରାଙ୍ଗ୍‌ୱେଲାପା ଆରି ଆକ୍ମେକେ ପବିତ୍ର ଆଡିଂଚେ ଅଲ୍‌ଗା ଆଡିଂପା । ଆକେନ୍‌ ସାପା ଦାନ୍‌କେ ହାରୋଣ ଆରି ମେଁନେ ଉଂଡେଇଂକେ ବିଃପା । 28 ତେଲା ମାଡାନେ କାଲ୍‌ନେ ନିଅମ୍‌ବାନ୍‌ ଇସ୍ରାଏଲ୍‌ ରେମୁଆଁଇଂନେବାନ୍‌ ଆତେନ୍‌ ହାରୋଣନେ ଆରି ମେଁନେ ଉଙ୍ଗ୍‌ଡେଇଂନେ ଅଦିକାର୍‌ ଡିଂଏ, ମେଃଡାଗ୍‌ଲା ଆତେନ୍‌ ଅପେଃକ୍ନେ ଉପହାର୍‌; ଇସ୍ରାଏଲ୍‌ ରେମୁଆଁଇଂନେ ଆକେନ୍‌ ଅପେଃକ୍ନେ ଉପହାର୍‌ ମେଇଂନେ ମଙ୍ଗଲ୍‌ ନ୍‌ସାଃ ବଲି ବିଃନେ ପଡ଼େଏ; ଆକେନ୍‌ ମାପ୍‌ରୁନେ ମ୍ନିରେ ମେଇଂନେ ଅପେଃକ୍ନେ ଉପହାର୍‌ ।

29 ବାରି ହାରୋଣ ଗୁଏଃକ୍ନେ ଇଡ଼ିଂ ମେଁନେ ପବିତ୍ର ସକାପାଟାଇ ସାପା ମେଁନେ ଉଙ୍ଗ୍‌ଡେଇଂନେ ଡିଂଏ; ଆସିର୍ବାଦ୍ ଆରି ପଦ୍ ବାନେ ବେଲା ମେଇଂ ଆତେନ୍ ସଃଆର୍‌ଏ । 30 ମେଁନେ ଉଙ୍ଗ୍‌ଡେଇଂନେ ବିତ୍ରେବାନ୍‌ ମୁଃଡ଼ି ରେମୁଆଁ ମେଁନେ ଞ୍ଚ‍ଅରିଆ ପୁଜାରି ଡିଂଚେ ପବିତ୍ର ଜାଗା‍ଅରିଆ ସେବା ଡିଂ ନ୍‌ସାଃ କୁକପାର୍‌ କୁଡ଼ିଆନ୍ନିଆ ପାଙ୍ଗ୍‌ଏ, ମେଁ ଆତେନ୍‌ ସକା ଗୁ ଦିନ୍‌ ସଃଏ ।

31 "ଆକେନ୍‌ ଇଡ଼ିଂ ପେ ଆତେନ୍‌ ବିବକ୍ନେ ମେଣ୍ଡାନେ ଚିଲି ଡୁଙ୍ଗ୍‌ୱେଚେ ମୁଇଂ ପବିତ୍ର ଜାଗାନ୍ନିଆ ପେଡୁଏଏ । 32 ଆତେନ୍‌ ପରେ ହାରୋଣ ଆରି ମେଁନେ ଉଂଡେଇଂ କୁକପାର୍‌ କୁଡ଼ିଆନେ ପ୍ଲେଡ଼ିଆନିଆ ଆତେନ୍‌ ମେଣ୍ଡା ଚିଲି ଆରି ବାରି ଆଣ୍ଡ୍ରାନିଆ ଲେକ୍ନେ ଆତେନ୍‌ ରୁଟି ଚଙ୍ଗ୍‌ଆର୍‌ଏ । 33 ଆମେଇଂକେ ପଦବିନିଆ ସ୍ରିଚେ ଆରି ପବିତ୍ର ଆଡିଂନେସା ଜା ଏତେ ଡିଂକେ, ଆତେନ୍‌ ମେଇଂ ଚଙ୍ଗ୍‌ଆର୍‌ଏ ମାତର୍‌ ମେଃଡିଗ୍‌ ବିନ୍‌ ବଂସନେ ରେମୁଆଁ ଆତେନ୍‌ ଆଚଙ୍ଗ୍‌ଆର୍‌ ଣ୍ଡୁ । ଡାଗ୍‌ଲା ଆତେନ୍‌ ସାପା ପବିତ୍ର ଜିନିସ୍‌ । 34 ଜଦି ପଦ୍‌ ବାଚେନେ ବେଲାନେ ଚିଲିନେ ଇକୁଡ଼ା ରକମ୍‌ ଚିଲି ବାରି ରୁଟି ଞ୍ଜିର୍‌ନୁଗ୍‌ ଜାକ ଲେଃୱେଏ, ତେଲା ଆମେକେ ସୁଆଅରିଆ ବାବିଃପା । ପେ ଜାଡିଗ୍‌ ଆତେନ୍ ଚଙ୍ଗ୍‌ନେ ବଲ୍‌ ଣ୍ଡୁ, ମେଃଡାଗ୍‌ଲା ଆତେନ୍‌ ପବିତ୍ର ଜିନିସ୍‌ ।"

35 "ପେ ଆତେନ୍‌ ଡିଲାଡିଗ୍‌ ପେଡିଂଏ, ହାରୋଣ ଆରି ମେଁନେ ଉଂଡେଇଂନେ ଆତ୍‌ଲା ନେ ଆପେକେ ବିଃନେବକ୍ନେ ଆଦେସ୍‌ ଅନୁସାରେ ପେଡିଂଏ । ମେଁନେ ପଦ୍‌ ବାଚେଲେଏ, ତେଲା ଡିଲାଡିଗ୍‌ ଗୁ ଦିନା ନ୍‌ସା ଲାଗେଏ । 36 ଆର୍‌ମେନେ ଆରି ପୁଜା ବେଦିକେ ପବିତ୍ର ଆଡିଂନେସା ପେ ଗୁ ଦିନା ନ୍‌ସା କାଲାଆଃ ମୁଇଂ ଅରେଃ ବାଚିକେ ବଲି ପେବିଏ । ବିନ୍‌ସା ମେଁ ଆଡ଼ାତ୍ରା ଞ୍ଚୁ କିଗ୍‌ଚେ ପବିତ୍ର ପେରାଡିଂଏ । 37 ଗୁ ଦିନା ଜାକ ପୁଜା ବେଦିକେ ଆର୍‌ମେପା । ଦେକ୍‌ରକମ୍‌ ପୁଜା ବେଦି ଜାବର୍‌ ପବିତ୍ର ଡିଂଏ । ଜା ଡିଗ୍‌ ପୁଜା ବେଦିକେ ଲିଗ୍‌ଏ, ଡିଲାଡିଗ୍‌ ଆତେନ୍‌ ସର୍‌ତେ ପବିତ୍ର ଡିଂଏ ।"

38 "କାଲାଆଃ ଆତେନ୍‌ ପୁଜା ବେଦି ଆଡ଼ାତ୍ରା ପେ ବଲି ପେବିଏ । ଆତେନ୍‌ ବଲି ନ୍‌ସା ମୁଇଂ ମୁଆଁନେ ମେଣ୍ଡା ଡିଂଲେଃଏ, ଆରି କାଲାଆଃ ମ୍ୱାକ୍ଲିଗ୍‌ ଲାକା ବଲି ବିଃପଡ଼େଏ । 39 ପର୍‌ତୁମ୍‌ ମେଣ୍ଡା ଞ୍ଜିର୍‌ନୁଗ୍‌ କେଲା ଆରି ବାରି ମୁଇଂ ମେଣ୍ଡା ଲମ୍‌ଡିଗ୍‌ କେଲା ପେବିଏ । 40 ଉଡ଼ିବେଲା ପେ ପର୍‌ତୁମ୍‌ ମେଣ୍ଡା ଏଃତେ ଗୁଆ ବାଗ୍‌ବାନ୍‌ ମୁଇଂ ବାଗ୍‌ ଆଲୁଏକ୍ନେ ଞ୍ଚୁ ଏତେ ମିସୁଲେକ୍ନେ ମୁଇଂ କେଜି ମଇଦା ଆରି ଉଗ୍‌ନେ ବଲି ଆତ୍‌ଲା ହିନ୍‌ନେ ଗୁଆ ବାଗ୍‌ବାନ୍‌ ମୁଇଂ ବାଗ୍‌ ଦ୍ରାକ୍ଷା ରସ୍‌ ଅପେଃପା । 41 ଲମ୍‌ଡିଗ୍‌ ବେଲା ଉଡ଼ିବେଲା ଦୁତିୟ ମେଣ୍ଡାକେ ପେଅପେଃଏ, ବାରି ଞ୍ଜିର୍‌ନୁଗ୍‌ କେଲା ଚଙ୍ଗ୍‌ନେ ବଲି ଆରି ଉଗ୍‌ନେ ବଲି ଆତ୍‌ଲା ମନ୍‌କେ ୱେକେ ରକମ୍‌ ବାସ୍‌ନାକ୍ନେ ମାପ୍‌ରୁନେ ମ୍ନିରେ ସୁଆ ବଲି ରକମ୍‌ ଆତେନ୍‌ ପେଅପେଃଏ । 42 ଆକେନ୍‌ କୁକପାର୍‌ କୁଡ଼ିଆନେ ପ୍ଲେଡ଼ିଆ ଡାଗ୍ରା ମାପ୍‌ରୁନେ ସାମ୍‌ନେ ପେନେ ନ୍ତାଞ୍ଜାଇଂନେ ମିନି ସାଚେ ଆକ୍‌ଅରିଆ ସୁଆ ବଲି ପେଡିଂଏ । ଆତେନ୍‌ ଜାଗାନ୍ନିଆ ନେଙ୍ଗ୍‌ ପେ ଏତେ ବାଲିର୍‌ବାତା ଣ୍ଡିଙ୍ଗ୍‌ଏ ବାରି ଆପେକେ ଙ୍କୁଡ଼େଃଏ । 43 ଆତେନ୍ ଜାଗାନ୍ନିଆ ନେଙ୍ଗ୍‌ ଇସ୍ରାଏଲ ରେମୁଆଁଇଂ ଏତେ ଙ୍କୁଡ଼େଃଏ । ନେଙ୍ଗ୍‌ନେ ଗୌରବ୍‌ ଏତେ କୁଡ଼ିଆ ପବିତ୍ର ଡିଂଏ । 44 ନେଙ୍ଗ୍‌ କୁକପାର୍‌ କୁଡ଼ିଆ ଆରି ପୁଜା ବେଦିକେ ପବିତ୍ର ନାଡିଂଏ ବାରି ହାରୋଣ ଆରି ମେଁନେ ଉଂଡେଇଂକେ ପୁଜାରି ରକମ୍‌ ନେଙ୍ଗ୍‌ନେ ସେବା ଡିଂନେସା ପବିତ୍ର ନେରାଡିଙ୍ଗ୍‌ଏ । 45 ନେଙ୍ଗ୍‌ ଇସ୍ରାଏଲ୍‌ ରେମୁଆଁଇଂନେ ବିତ୍‌ରେ ମ୍ୱାସାଏ ବାରି ମେଙ୍ଗ୍‌ନେ ପର୍‌ମେସର୍‌ ଣ୍ଡିଙ୍ଗ୍‌ଏ । 46 ତେଲା ନେ ଯେ ମାପ୍‌ରୁ ମେଙ୍ଗ୍‌ନେ ପର୍‌ମେସର୍‌ ଆତେନ୍‌ ମେଇଂ ମ୍ୟାଃଆର୍‌ଏ । ମେଙ୍ଗ୍‌ନେ ବିତ୍‌ରେ ବାସାନେ ନ୍‌ସା ନେ ମିସର୍‌ ଦେସ୍‌ବାନ୍ ଆମେଇଂକେ ଆଃତାର୍‌ ଡୁଂପାଙ୍ଗ୍‌ନେବକେ, ଆତେନ୍‌ ମେଇଂ ମ୍ୟାଆର୍‌ଏ । ନେଙ୍ଗ୍‌ ମାପ୍‌ରୁ ମେଙ୍ଗ୍‌ନେ ପର୍‌ମେସର୍‌ ।"