1 ଆତେନ୍‌ ବେଲା ମାପ୍‌ରୁ ମୋଶାକେ ବାସଙ୍ଗ୍‌କେ, ନେ ଫାରୋ ଆଡ଼ାତ୍ରା ମେଃନେ ନେଡିଂଏ, ଆତେନ୍‌ ନା ଏବେ ନାକେଏ; ମେଃଡାଗ୍‌ଲା ନ୍ତି ବପୁ ଡିଂଲା, ମେଁ ରେମୁଆଁଇଂକେ ଆନ୍ତାର୍‌ବିଏ ବାରି ନ୍ତି ବପୁ ଡିଂଲା, ମେଁନେ ଦେସ୍‌ବାନ୍‌ ଆମେଇଂକେ ନୁଆଁ ବିଏ ।

2 ପର୍‌ମେସର୍‌ ମୋଶା ଏତେ ବାଲିର୍‌ବାତାଚେ ଆରି ବାସଙ୍ଗ୍‌କେ, ନେ ଯିହବା ମାପ୍‌ରୁ; 3 ନେ ଅବ୍ରହାମ, ଇସ୍‌ହାକ୍‌ ବାରି ଯାକୁବକେ ସାପାଟୁ ବପୁନେ ପର୍‌ମେସର୍‌ ଡାଗ୍‌ଚେ ଦର୍ଶନ୍‌ ବିନେବଗେ, ମାତର୍‌ ନେଙ୍ଗ୍‌ ଆପେକେ ଯିହବା ମିନିରେ ପରିଚୟ୍‌ ବିନାବଗେ । 4 ବାରି କିଣାନ ଦେସ୍‌, ବା, ଆତ୍‌ନିଆ ମେଇଂ ବାସା ଆର୍‌କେ, ଆତେନ୍‌ ବାସାକ୍ନେ ଦେସ୍‌ ଡିଗ୍‌ ଆମେଇଂକେ ନେବିଏ ଡାଗ୍‌ଚେ ମେଇଙ୍ଗ୍‌ ଏଃତେ ନିଅମ୍ ଆଃରେନେବଗେ । 5 ଏବେ ମିସ୍ରିୟଇଂ ଜାଣ୍ଡେଇଂକେ ଚାକର୍ ଆଃଡିଙ୍ଗ୍‌ଚେଃ ବଆର୍‌କେ, ଆତେନ୍‌ ଇସ୍ରାଏଲ୍‌ ଗଡ଼େଇଂନେ ଅଃନେ ଦ୍ରିଗ୍‌ଚେ ନେ ନାନେ ଆତେନ୍‌ ନିଅମ୍‌ ମନେ ତ୍ଲାଗ୍‌ନେବକେ । 6 ଆତେନ୍‌ସାଃ ଇସ୍ରାଏଲ୍‌ନେ ଗଡ଼େଇଂକେ ବାସଙ୍ଗ୍‌ପା, ନେ ମାପ୍‌ରୁ, ନେ ଆପେକେ ମିସର୍‌ଣ୍ଡ୍ରେଇଂନେ ଲିଗିଙ୍ଗ୍‌ ଡୁଡୁଙ୍ଗ୍‌ନେବାନ୍‌ ମୁକ୍ତି ନେରାଡିଂଏ ବାରି ନେ ଆପେକେ ମେଙ୍ଗ୍‌ନେ ଗୁତିରେନେବାନ୍‌ ନେରାଆନ୍ତାର୍‌ଏ, ବାରି ନେ ମେଲା ଲାଏକ୍ନେ ନ୍ତି ବାରି ମ୍ନା ମ୍ନା ଡଣ୍ଡ୍‌ବାନ୍‌ ଆପେକେ ଉଦାର୍‌ ଣ୍ଡିଙ୍ଗ୍‌ଏ । 7 ନେ ଆପେକେ ନେଙ୍ଗ୍‌ନେ ରେମୁଆଁ ରକମ୍‌ ଙ୍କେଏ ବାରି ନେ ପେନି ପର୍‌ମେସର୍‌ ନେଡିଙ୍ଗ୍ଏ; ଆଥ୍‌ବା ମିସର୍‌ଣ୍ଡ୍ରେଇଂନେ ଲିଗିଙ୍ଗ୍‌ ଡୁଡୁଂନେବାନ୍‌ ଆପେକେ ଉସାସ୍‌ ଆଡିଙ୍ଗ୍‌ସା ନେଙ୍ଗ୍‌ ଜେ ପେନି ପର୍‌ମେସର୍‌ ମାପ୍‌ରୁ ନ୍ଲାଏକେ, ଆତେନ୍‌ ପେ ପେମ୍ୟାଃଏ । 8 ନେ ଅବ୍ରହାମ ବାରି ଇସ୍‌ହାକ୍‌ ବାରି ଯାକୁବ୍‌କେ ଆଣ୍ଡିନେ ଦେସ୍‌ ବିନ୍‌ସା ନେ ପାର୍‌ମାନ୍‌ ଡିଂନେବକେ, ଆତେନ୍‌ ଦେସ୍‌କେ ନେ ଆପେକେ ରାଙ୍ଗ୍‌ନେୱେଏ; ବାରି ନେ ଅଦିକାର୍‌ରେ ଆତେନ୍‌ ଆପେକେ ନେବିଏ; ନେ ମାପ୍‌ରୁ । 9 ଆତ୍‌ବା ମୋଶା ଇସ୍ରାଏଲ୍‌ନେ ଗଡ଼େଇଂକେ ଆତେନ୍ ଇସା‌ବ୍‌ରେ ବାସଙ୍ଗ୍‌କେ, ମାତର୍ ମେଇଂ ମନ୍‌ ଦୁକ୍‌ ବାରି ଡାଟ୍‌ ଗୁତିରେ ଡିଂଲାଏଗ୍‌ସା ମୋଶାନେ ବ୍ନାଲିର୍‌କେ ଆଦ୍ରିଗ୍‌ଆର୍‌କେ ।

10 ଆତ୍‌ବା ମାପ୍‌ରୁ ମୋଶାକେ ବାଲିର୍‌କେ, 11 ନା ୱେଚେ ମିସର୍‌ନେ ରାଜା ଫାରୋକେ ବାସଙ୍ଗ୍‌, ନା ଦେସ୍‌ବାନ୍‌ ଇସ୍ରାଏଲ୍‌ନେ ରେମୁଆଁଇଂକେ ନୁଆଁବି ।

12 ଆତ୍‌ବା ମୋଶା ମାପ୍‌ରୁନେ ସାମ୍ନେ ବାଲିର୍‌କେ, କେଲା, ଇସ୍ରାଏଲ୍‌ନେ ରେମୁଆଁଇଂ ନେଙ୍ଗ୍‌ ସାମୁଆଁକେ ଆଦ୍ରିଗ୍‌ଆର୍‌କେ; ତେସାଃ ନିମାଣ୍ଡା ବାବ୍‌ରେ ସାମୁଆଁ ବାସଙ୍ଗ୍‌ ମାୟାନେ ରେମୁଆଁ ଯେ ନେଙ୍ଗ୍‌, ନେଙ୍ଗ୍‌ ସାମୁଆଁ ଫାରୋ ଡିଡିରକମ୍‌ ଅଁଏ ?

13 ଦେତ୍‌ରକମ୍‌ ମାପ୍‌ରୁ ମୋଶା ବାରି ହାରୋଣ ଏତେ ଆଲାଦ୍‌ ଡିଂକେ, ବାରି ଇସ୍ରାଏଲ୍‌ନେ ରେମୁଆଁଇଂକେ ମିସର୍‌ ଦେସ୍‌ବାନ୍ ଆଃତାର୍‌ ଡୁଂପାଙ୍ଗ୍‌ନେସା ମିସର୍‌ନେ ରାଜା ଫାରୋଅରିଆ ବାରି ଇସ୍ରାଏଲ୍‌ ରେମୁଆଁଇଂଅରିଆ ମାନେଃନେ ସାମୁଆଁ ଆମେଇଂକେ ଆଦେସ୍‌ ବିକେ ।

14 ଆକେନ୍‌ ସାପା ରେମୁଆଁ ମେଙ୍ଗ୍‌ନେ ନ୍ତାଞ୍ଜାଇଂନେ ବଁସ୍‌ ବିତ୍‌ରେ ମ୍ନା ଲେଃଆର୍‌କେ । ଇସ୍ରାଏଲ୍‌ନେ ମ୍ନା ଉଂଡେ ରୁବେନ୍‌ନେ ଉଂଡେ ହନୋକ ବାରି ପଲ୍ଲୁ ବାରି ହିଷ୍ରୋଣ ବାରି କର୍ମି; କିମେଇଂ ରୁବେନ୍‌ନେ ବଂଶଇଂ । 15 ବାରି ଶିମୀୟୋନନେ ଉଂଡେ ଯିମୂୟେଲ ବାରି ଯାମୀନ୍‌ ବାରି ଓହଦ୍‌ ବାରି ଯାଖୀନ୍‌ ବାରି ସୋହର ବାରି କିଣାନିୟନେ ସେଲାମ୍ବୁଏଃନେ ଉଂଡେ‍ ଶୌଲ; କିମେଇଂ ଶିମିୟନ୍‌ନେ ବଁସ୍‌ । 16 ବଁସ୍‌କୁଲ୍‌ ଇସାବ୍‌ରେ ଲେବୀୟ ଉଂଡେଇଂନେ ମ୍ନି ଗେର୍ଶନ୍‌ ଆରି କହାତ୍‌ ଆରି ମରାରି; ଲେବୀନେ ବୟସ୍‌ ଶଏ ସଇଁତିରିସ୍‌ ବରସ୍‌ ଡିଂଲାଏଗେ । 17 ବାରି ନିଜର୍‌ ନିଜର୍‌ ବଁସ୍‌କୁଲ୍‌ ଇସାବ୍‌ରେ ଗେର୍ଶନ୍‌ନେ ଉଂଡେ ଲିବ୍‌ନି ବାରି ଶିମୀୟି । 18 ବାରି କହାତନେ ଉଂଡେ ଅମ୍ରମ୍‌ ବାରି ଯିଷ୍‌ହର ବାରି ହିବ୍ରଣ ବାରି ଉଷୀୟଲ୍‌; ଆତେନ୍‌ କହାତନେ ଶଏ ତେତିସ୍‌ ବରସ୍‌ ଡିଂଲାଏଗେ । 19 ମରାରିନେ ଉଂଡେ ମହଲି ବାରି ମୁଶି; କିମେଇଂ ବଁସ୍‌କୁଲ୍‌ ଇସାବ୍‌ରେ ଲେବୀନେ ବଂଶଇଂ ।

20 ବାରି ଅମ୍ରମ୍‌ ନିଜର୍‌ ଆତାଡ଼େ ଯୋକେବଦକେ ବିବା ଡିଂକେ, ମେଁ ମେଁନି ଗର୍ବେବାନ୍‌ ହାରୋଣକେ ଆରି ମୋଶାକେ ଜନମ୍‌ ବିକେ; ଆତେନ୍ ଅମ୍ରମ୍‌ନେ ବଏସ୍‌ ଶଏ ସଇଁତିରିସ୍‌ ବରସ୍‌ ମ୍ବ୍ରଲାଏଗେ । 21 ଯିଷ୍‌ହରନେ ଉଂଡେ କୋରହ ଆରି ନେପଗ ବାରି ସିଖ୍ରୀ । 22 ବାରି ଉଷୀୟଲ୍‌ନେ ଉଂଡେ ମିଶାୟେଲ୍‌ ଆରି ଇଲୀଷାଫନ୍‌ ବାରି ସିଥ୍ରି ।

23 ବାରି ହାରୋଣ ହମିନାଦବନେ ସେଲାମ୍ବଃଅ ନହଶନନେ ବାଇଡ଼େ ଇଲୀଶେବାକେ ବିବା ଡିଂକେ; ଆତ୍‌ବା ମେଁ ମେଁନି ଗର୍ବେବାନ୍‌ ନାଦବ୍‌ ଆରି ଅବୀହୁ ବାରି ଇଲୀୟାସର ବାରି ଇଥାମରକେ ଜନମ୍ ବିକେ । 24 ବାରି କୋରହନେ ଉଂଡେ ଅସିର୍‌ ଆରି ଇଲ୍‌କାନା ଆରି ଅବିୟାସପ୍‌; କିମେଇଂ କୋରହନେ ବଂସଇଂ । 25 ବାରି ହାରୋଣନେ ଉଂଡେ ଇଲୀୟାସର ପୁଟିୟେଲ୍‌ନେ ମୁଇଂ ସେଲାମ୍ବଃଅକେ ବିବା ଡିଂକେ, ମେଁ ମେଁନି ଗର୍ବେବାନ୍‌ ପୀନହସ୍‌କେ ଜନମ୍‌ ବିକେ, କିମେଇଂ ଲେବୀୟଇଂନେ ବଁସ୍‌ ଇସାବ୍‌ରେ ମେଙ୍ଗ୍‌ନେ ନ୍ତାଞ୍ଜାଇଂନେ ବିତ୍‌ରେ ମୁକିଆ ଲେଆର୍‌ଗେ ।

26 ଆକେନ୍‌ ହାରୋଣ ବାରି ମୋଶା, ଆକ୍ମେଇଂକେ ମାପ୍‌ରୁ ବାସଙ୍ଗ୍‌କେ, ପେ ସନ୍ୟରକମ୍‌ ଡିଙ୍ଗ୍‌ଚେ ଲେଆର୍‌କ୍ନେ ଇସ୍ରାଏଲ୍‌ନେ ରେମୁଆଁଇଂକେ ମିସର୍‌ ଦେସ୍‌ବାନ୍‌ ଆଃତାର୍‌ ଡୁଙ୍ଗ୍‌ପାଙ୍ଗ୍‌ଲା । 27 କିମେଇଂ ମିସର୍‌ବାନ୍‌ ଇସ୍ରାଏଲ୍‌ ରେମୁଆଁଇଂକେ ଆତାର୍‌ ଡୁଙ୍ଗ୍‌ପାଙ୍ଗ୍‌ନେସା ମିସର୍‌ନେ ରାଜା ଫାରୋ ଏତେ ବାଲିର୍‌ବାତା ଡିଙ୍ଗ୍‌ବଗେ । କିମେଇଂ ଆତେନ୍‌ ମୋଶା ଆରି ହାରୋଣ ।

28 ଆଣ୍ଡିନେ ଦିନା ମାପ୍‌ରୁ ମିସର୍‌ ଦେସ୍‌ନିଆ ମୋଶା ଏତେ ବାଲିର୍‌ବାତାକେ, 29 ଆତେନ୍ ଦିନା ମାପ୍‌ରୁ ମୋଶାକେ ଆକେନ୍‌ ସାମୁଆଁ ବାସଙ୍ଗ୍‌କେ, ନେ ମାପ୍‌ରୁ ନେ ଆନାକେ ମେଃ ମେଃନି ନେବାସଙ୍ଗ୍ଏ; ଆତେନ୍‌ ସାପା ମିସ୍ରିୟନେ ରାଜା ଫାରୋକେ ବାସଙ୍ଗ୍‌ ।

30 ଆତ୍‌ବା ମୋଶା ମାପ୍‌ରୁନେ ସାମ୍‌ନେ ବାସଙ୍ଗ୍‌ବଗେ, "ନେଙ୍ଗ୍‌ ଜେ ନିମାଣ୍ଡା ବାବ୍‌ରେ ବାସଙ୍ଗ୍‌ ନ୍ନାୟା ଣ୍ଡୁ, ନେଙ୍ଗ୍ ସାମୁଆଁ ଫାରୋ ଡିଡିରକମ୍‌ ଦ୍ରିଗ୍‌ଏ ?"