1 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, 2 "ନା ଇସ୍ରାଏଲ୍‌ ଗଡ଼େଇଂକେ ବାସଙ୍ଗ୍‌, ପେଇଂ ୱେଚେ ପୀହହୀରୋତନେ ପୁରୁବ୍‌ ଦିଗ୍‌ ପାକା ମିଗ୍‌ଦଲ୍‌ ଆରି କେଣ୍ଡିଆଃ ସାମ୍‌ନେ କୁଡ଼ିଆ ଆଃରେପା; ପେ ବାଲ୍‌ସଫୋନ ସିସେ, ଡାଗ୍‌ଲା ମେଁନି ସାମ୍‌ନେ କେଣ୍ଡିଆଃ ଡାଗ୍ରା କୁଡ଼ିଆ ଆଃରେପା ।" 3 ଆତ୍‌ବା ଫାରୋ ଇସ୍ରାଏଲ୍‌ ଗଡ଼େଇଂନେ ବିସ‍ଏରେ ବାସଙ୍ଗ୍‌ଏ, "ମେଇଂ ଦେସ୍‌ ବିତ୍‌ରେ ଆଂକ୍‌ ଆନ୍ତ୍‌ ଡିଂଲେଃଆର୍‌କେ ଆରି ବାଲିଲ ଗାଲି ମେଙ୍ଗ୍‌ନେ ଆତ୍‌ଲା ବନ୍ଦ୍‌ ଆଡିଂବକେ । 4 ଆରି ନେ ଫାରୋନେ ଜିବନ୍‌କେ ଡାଟାମ୍‌ ନେରାଡିଂଏ, ତେଲା ମେଁ ମେଙ୍ଗ୍‌ନେ ପ୍ଲା ପ୍ଲା ୱିର୍‌ଏ; ବାରି ନେ ଫାରୋ ଆରି ମେଁନି ସାପା ସନ୍ୟ ଏତେ ଗୌରବ୍ ବାଏ; ତେଲା ନେ ଜେ ମାପ୍‌ରୁ, ଆକେନ୍‌ ମିସ୍ରିୟ ରେମୁଆଁଇଂ ମ୍ୟାଃଆର୍‌ଏ । ତେଲା ମେଇଂ ଦେତ୍‌ରକମ୍‌ ଡିଂଆର୍‌କେ ।"

5 ଇଡ଼ିଙ୍ଗ୍ ଇସ୍ରାଏଲ୍‌ ରେମୁଆଁଇଂ ଡଲେଃଆର୍‌କେ, ଆକେନ୍‌ କବର୍ ମିସ୍ରିୟ ରାଜାକେ ଆମ୍ୟାଃଆର୍‌ଲା, ରେମୁଆଁଇଂନେ ବିସ‍ଏରେ ଫାରୋନେ ଆରି ମେଁନି ଚାକର୍‌ଇଂନେ ମନ୍‌ ବଦ୍‌ଲେ ୱେଗେ; ଇଡ଼ିଙ୍ଗ୍‌ ମେଇଂ ବାସଙ୍ଗ୍‌ଆର୍‌କେ, "ନେ ଆକେନ୍ ଡିରକମ୍‌ କାମ୍‌ ନେଡିଂକେ ? ମେଃନ୍‌ସା ଇସ୍ରାଏଲ୍‌ ରେମୁଆଁଇଂକେ ନେନେ ଚାକର୍‌ କାମ୍‌ ଡିଂକ୍ନେବାନ୍‌ ଆନ୍ତାର୍‌ ନେବିକେ ?" 6 ଆତ୍‌ବା ରାଜା ରଥ୍‌ ଆର୍ମେକେ ଆରି ମେଁ ରେମୁଆଁଇଂକେ ମେଁ ଏତେ ରାଙ୍ଗ୍‌ୱେକେ । 7 ବାରି ତୁର୍‌ ସ‍ଅ ସ୍ରିକ୍ନେ ରଥ୍‌ ଆରି ମିସ୍ରିୟଇଂନେ ସାପା ରଥ୍‌ ଆରି ସାପା ରଥ୍‌ନେ ମ୍ନା ନେତାଇଂକେ ରାଙ୍ଗ୍‌ୱେକେ । 8 ଆରି ମାପ୍‌ରୁ ମିସ୍ରିୟ ରାଜା ଫାରୋନେ ଜିବନ୍‌ ଡାଟାମ୍‌ ଆଡିଙ୍ଗ୍‌ଲା, ମେଁ ଇସ୍ରାଏଲ୍‌ ଗଡ଼େଇଂନେ ପ୍ଲା ପ୍ଲା ନୁଆଁକେ; ଆତେନ୍‌ ବେଲା ଇସ୍ରାଏଲ୍‌ନେ ରେମୁଆଁଇଂ ଇସ୍‌ପର୍‌ନେ ସାହାସ୍‌ରେ ୱେଆର୍‌ଡିଂଗେ । 9 ଆତ୍‌ବା ମିସ୍ରିୟଇଂ, ଡାଗ୍‌ଲା, ଫାରୋନେ ସାପା ଗଡ଼ା ଆରି ରଥ୍‌ ଆରି ଗଡ଼ାନେ ସନ୍ୟଇଂ ମେଙ୍ଗ୍‌ନେ ପ୍ଲା ପ୍ଲା ୱିର୍‌ଚେ ବାଲ୍‌ସଫୋନ ସିସେ ସିସେ ୱେଚେ ପୀହହୀରୋତ ଡାଗ୍ରା କେଣ୍ଡିଆଃ ଆଡ଼ା ଇସ୍ରାଏଲ୍‌ ରେମୁଆଁଇଂ କୁଡ଼ିଆ ଆଃରେନେ ବେଲା ମେଙ୍ଗ୍‌ନେ ଡାଗ୍ରା ପାଂଆର୍‌କେ ।

10 ଆରି ଫାରୋ ଡାଗ୍ରା ତେୱେଚାକ୍ନେ ବେଲା, ଇସ୍ରାଏଲ୍‌ ଗଡ଼େଇଂ ପ୍ଲେଗ୍‌ଚେ କେକେଲା ମେଙ୍ଗ୍‌ନେ ପ୍ଲା ପ୍ଲା ପାଙ୍ଗ୍‌ନେ ମିସ୍ରିୟଇଂକେ କେଚେ ଜାବର୍‌ ବୁଟଆର୍‌କେ, ବାରି ଇସ୍ରାଏଲ୍‌ ରେମୁଆଁଇଂ ମାପ୍‌ରୁକେ ୱାଆର୍‌କେ । 11 ବାରି ମୋଶାକେ ବାସଙ୍ଗ୍‌ଆର୍‌କେ, "ମିସର୍‌ନିଆ ରାଃଚ୍ୟା ଆଲେଗେ ଡାଗ୍‌ଚେ କି ବାଲିଲ ଡାଗ୍ରା ପେ ଆନେକେ ବାଗୁଏଃ ନ୍‌ସା ଡୁଙ୍ଗ୍‌ନାପାଂକେ ? ନେ ଏତେ ଦେକ୍‌ରକମ୍‌ ବେବଆର୍‌ ଡିଂଚେ ଆନେକେ ମିସର୍‌ବାନ୍‌ ମେଃନ୍‌ସା ଆଃତାର୍‌ ଡୁଂନାପାଂକେ ? 12 ଆନେକେ ଲେଃନ୍‌ସା ଜାଗା ବିଃଲାପା, ନେ ମିସ୍ରିୟଇଂନେ ଗତି କାମ୍‌ ନେଡିଂଏ, ଡାଗ୍ଲା ବାଲିଲନିଆ ଗୁଏଃନେ ବାଦୁଲ୍‌ ମିସ୍ରିୟଇଂନେ ସେବା ଡିଙ୍ଗ୍‌ଲା ନେନେ ବଲ୍ ପାଡିଂ, ନେ କି ମିସର୍‌ନିଆ ଆପେକେ ଆକେନ୍ ସାମୁଆଁ ବାସଙ୍ଗ୍‌ ନେବଗେ ?"

13 ଆତ୍‌ବା ମୋଶା ରେମୁଆଁଇଂକେ ବାସଙ୍ଗ୍‌କେ, "ପେ ଆବ୍‌ଟଗେପା, ସାନ୍ତିରେ ତୁଆଁ ଲାଲାପା; ମାପ୍‌ରୁ ଏଃକେ ଡିରକମ୍‌ ଆପେକେ ଉଦାର୍‌ ଡିଂଏ, ଆତେନ୍‌ କେଲାପା; ପେ ଏଃକେ ଡିରକମ୍‌ ମିସ୍ରିୟଇଂକେ କିକେ ପେଡିଂକେ, ଦେତ୍‌ରକମ୍‌ ମାଡାନେ କାଲ୍‌ ଜାକ ଆରି ଅଃନା ଡିଗ୍‌ ପେକେ ଣ୍ଡୁ । 14 ପର୍‌ମେସର୍‌ ପେ ଆତ୍‌ଲା ଜୁଜ୍‌ ଡିଂଏ, ପେ ବୁଙ୍ଗ୍‌ ପେଲେଃଏ ।"

15 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, "ନା ଆନେକେ ମେଃନ୍‌ସା ୱାନାଡିଂକେ ? ଇସ୍ରାଏଲ୍‌ ରେମୁଆଁଇଂକେ ବାସଙ୍ଗ୍‌, ମେଇଙ୍ଗ୍‌ ସିସେ ୱେଆର୍‌ଲେ । 16 ବାରି ନା ଡୁଡୁ ଲିଙ୍ଗ୍‌ ଆରି କେଣ୍ଡିଆଃ ଆଡ଼ାତ୍ରା ନ୍ତିକେ ଆତଡ଼ିଆଚେ ମ୍ୱାର୍‌ବାଗ୍‌ ଆଡିଂ; ତେଲା ଇସ୍ରାଏଲ୍‌ ରେମୁଆଁଇଂ ନ୍‌ସୁଆର୍‌କ୍ନେ ଗାଲି ବିଚେ କେଣ୍ଡିଆଃ ବିତ୍‌ରେ ଗାଚେ ୱେଆର୍‌ଏ । 17 ବାରି ନେ, କେଲାପା, ନେ ମିସ୍ରିୟଇଂନେ ମନ୍‌କେ ଡାଟାମ୍‌ ନେରାଡିଂଏ, ମେଇଂ ମେଙ୍ଗ୍‌ନେ ପ୍ଲା ପ୍ଲା ୱେଆର୍‌ଏ, ତେଲା ନେ ଫାରୋ ଆରି ମେଁନି ସାପା ସନ୍ୟ ଆରି ରଥ୍‌ ଆରି ଗଡ଼ା ଆଡ଼ାତ୍ରା ଡେଃକ୍ନେ ରେମୁଆଁଇଂନେ ବାନ୍‌ ଗୌରବ୍ ବାଡିଂଏ । 18 ଆରି ଫାରୋ ଆରି ମେଁନେ ରଥ୍‌ ଆରି ମେଁନି ଗଡ଼ା ଆଡ଼ାତ୍ରା ଡେଃକ୍ନେ ରେମୁଆଁଇଂନେ ବାନ୍ ଗୌରବ୍ ବାକ୍ନେ ଇଡ଼ିଙ୍ଗ୍‌ ନେ ଜେ ମାପ୍‌ରୁ, ଆକେନ୍‌ ମିସ୍ରିୟ ରେମୁଆଁଇଂ ମ୍ୟାଃଆର୍‌ଏ ।"

19 ଆତେନ୍‌ ବେଲା ଇସ୍ରାଏଲ୍‌ ଦଲ୍‌ନେ ସିସେ ୱେନେ ପର୍‌ମେସର୍‌ନେ ଦୁତ୍‌ ଆଙ୍କ୍‌ ଆନ୍ତ୍‌ ଡିଂଚେ ମେଙ୍ଗ୍‌ନେ ଗାଲି ଆଃକେକେ, ବାରି ତ୍ରିଗ୍‌ଡିଆ ମେଙ୍ଗ୍‌ନେ ସିସେ ପ୍ଲା ଡିଂଚେ ମେଙ୍ଗ୍‌ନେ ପ୍ଲା ତୁଆଁକେ । 20 ଆତେନ୍‌ ତ୍ରିଗ୍‌ଡିଆ ମିସ୍ରିୟ ଦଲ୍‌ ଆରି ଇସ୍ରାଏଲ୍‌ନେ ଦଲ୍‌ ବିତ୍‌ରେ ପାଙ୍ଗ୍‌କେ, ବାରି ତ୍ରିଗ୍‌ଡିଆ ଆରି ତାଂକିଗ୍‌ ଡିଂଲା ଡିଗ୍‌ ଆତେନ୍‌ ମିଡିଗ୍‌କେ ଆଃତାର୍‌କିଗ୍‌କେ; ଆତେନ୍‌ସା ସାପା ମିଡିଗ୍‌ ମୁଇଂ ଦଲ୍‌ ବାରି ମୁଇଂ ଦଲ୍‌ ଡାଗ୍‌ରା ପାଙ୍ଗ୍‌ ଆୟାଆର୍‌କେ ଣ୍ଡୁ ।

21 ଏନ୍‌ଇଡ଼ିଂ ମୋଶା କେଣ୍ଡିଆଃ ଆଡ଼ାତ୍ରା ମେଁ ନ୍ତି ଟେକେକେ, ମାପ୍‌ରୁ ଆତେନ୍‌ ସାପା ମିଡିଗ୍‌ବ ବୟଙ୍କାର୍‌ ପୁରୁବ୍‌ ଦିଗ୍‌ନେ ୱେଡ଼ିୟା ଏତେ କେଣ୍ଡିଆଃକେ ମ୍ୱାର୍‌ ବାଗ୍‌ ଆଡିଂଚେ ଆଃନ୍‌ସୁଆର୍‌କେ ଆରି ଣ୍ଡିଆ ମ୍ୱାର୍‌ ବାଗ୍‌ ଡିଂକେ । 22 ଆତ୍‌ବା ଇସ୍ରାଏଲ୍‌ନେ ରେମୁଆଁଇଂ ନ୍‌ସୁଆର୍‌କ୍ନେ ଗାଲି ବିଚେ କେଣ୍ଡିଆଃ ବିଃଚେ ୱେଆର୍‌କେ, ବାରି ମେଙ୍ଗ୍‌ନେ ଇଞ୍ଚଙ୍ଗ୍‌ତି ଆରି ବେଃସ୍ୟାଃତି ପାକା ଣ୍ଡିଆ କାନ୍ତି ସୁଗୁଆ ତୁଆଁକେ । 23 ଏନ୍‌ଇଡ଼ିଂ ମିସ୍ରିୟଇଂ, ଡାଗ୍‌ଲା, ଫାରୋନେ ସାପା ଗଡ଼ା, ରଥ୍‌ ଆରି ଗଡ଼ାନିଆ କଲେଃକ୍ନେ ରେମୁଆଁଇଂ ସାପାରେ ୱିର୍‌ ୱିର୍‌ଚେ ମେଙ୍ଗ୍‌ନେ ପ୍ଲା ପ୍ଲା କେଣ୍ଡିଆଃନିଆ ଗାଆର୍‌କେ । 24 ମାତର୍‌ ଞ୍ଜିର୍‌ନୁଗ୍‌ ମାପ୍‌ରୁ ସୁଆ ଆରି ତ୍ରିଗ୍‌ଡିଆ ବିଚେ ମିସ୍ରିୟଇଂନେ ସନ୍ୟକେ କେକେ ଆରି ମିସ୍ରିୟଇଂନେ ସନ୍ୟକେ ତେରେପେତେ ଆଡିଂକେ । 25 ମେଁ ମେଙ୍ଗ୍‌ନେ ରଥ୍‌ନେ ଚକ୍‌କେ ତଃ ବିଃଲା, ମେଇଂ ଜାବର୍‌ କଷ୍ଟରେ ରଥ୍‌ ଆଃଚାଲେଆର୍‌କେ; ଆତ୍‌ବା ମିସ୍ରିୟନେ ରେମୁଆଁଇଂ ବାସଙ୍ଗ୍‌ଆର୍‌କେ, "ଏଃଲାପା, ନେ ଇସ୍ରାଏଲ୍‌ ଡାଗ୍ରାବାନ୍‌ ଲାଗ୍‌ନେଡପା; ମେଃଡାଗ୍ଲା ମାପ୍‌ରୁ ମେଙ୍ଗ୍‌ ଏତେ ଲେଃଚେ ମିସ୍ରିୟଇଂନେ ବିରଦ୍‌ରେ ଜୁଜ୍‌ ଡିଂଡିଂକେ ।"

26 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, "ନା କେଣ୍ଡିଆଃ ଆଡ଼ାତ୍ରା ନାନେ ନ୍ତି ଲିଗ୍‌; ତେଲା ମିସ୍ରିୟଇଂ ଆରି ମେଙ୍ଗ୍‌ନେ ରଥ୍‌ ଆରି ଗଡ଼ାନିଆ କଲେଃକ୍ନେ ରେମୁଆଁଇଂନେ ଆଡ଼ାତ୍ରା ବାର୍‌ ମୁଇଂତର୍‌ ଣ୍ଡିଆ ପାଙ୍ଗ୍‌ଏ ।" 27 ତେଲା ମୋଶା କେଣ୍ଡିଆଃ ଆଡ଼ାତ୍ରା ନ୍ତି ଲିଗ୍‌ ବିକେ, ବାରି ଞ୍ଜିର୍‌ ଡିଂଲା କେଣ୍ଡିଆଃ ବାର୍‌ମୁଇଂତର୍‌ ଯେନ୍ତିନେ ସେନ୍ତି ଡିଂୱେକେ; ଇଡ଼ିଙ୍ଗ୍‌ ମିସ୍ରିୟଇଂ ଡନେ ଗାଲି ତୁର୍‌ଆର୍‌କେ, ମାପ୍‌ରୁ କେଣ୍ଡିଆଃ ମଜେ ଆମେଇଂକେ ଆଲଗ୍‌ଡ୍ୟା ବିଃକେ । 28 ବାରି ଣ୍ଡିଆ ବାର୍‌ମୁଇଂତର୍‌ ପାଙ୍ଗ୍‌ଚେ ମେଙ୍ଗ୍‌ନେ ରଥ୍‌ ଆରି ଗଡ଼ାନିଆ ଲେକ୍ନେ ରେମୁଆଁଇଂକେ ବାରି କେଣ୍ଡିଆଃ ବିତ୍‌ରେ ମିଗ୍‌ ବିକେ; ଇଡ଼ିଙ୍ଗ୍‌ ଫାରୋନେ ଉଃଡ଼ି ସାପା ସନ୍ୟ ମେଙ୍ଗ୍‌ନେ ପ୍ଲା ପ୍ଲା କେଣ୍ଡିଆ ବିତ୍‌ରେ ଗାଲେଃଆର୍‌ଗେ, ମେଙ୍ଗ୍‌ନେ ବିତ୍ରେବାନ୍ ମୁଇଂଜା ଡିଗ୍‌ ଆମ୍ବ୍ରଆର୍‌କେ ଣ୍ଡୁ । 29 ମାତର୍‌ ଇସ୍ରାଏଲ୍‌ନେ ରେମୁଆଁଇଂ ନ୍‌ସୁଆର୍‌କ୍ନେ ଗାଲି ବିଚେ କେଣ୍ଡିଆ ବିତ୍‌ରେ ଅଲେଙ୍ଗ୍ଆର୍‌କେ; ବାରି ଣ୍ଡିଆ ମେଙ୍ଗ୍‌ନେ ବେଃସ୍ୟାତି ଆରି ଇଞ୍ଚଙ୍ଗ୍‌ତି ପାକା କାନ୍ତି ଡିଙ୍ଗ୍‌ଚେ ତୁଆଁକେ ।

30 ଦେକ୍‌ରକମ୍‌ ଆତେନ୍‌ ଦିନା ମାପ୍‌ରୁ ମିସ୍ରିୟଇଂନେ ନ୍ତିବାନ୍‌ ଇସ୍ରାଏଲ୍‌ ରେମୁଆଁଇଂକେ ରକ୍ୟା ଡିଂକେ ଆରି ଇସ୍ରାଏଲ୍‌ଇଂ ମିସ୍ରିୟ ରେମୁଆଁକେ କେଣ୍ଡିଆ ଆଡ଼ା ଗୁଏଲେଃକ୍ନେ କେଆର୍‌କେ । 31 ମାପ୍‌ରୁ ମିସ୍ରିୟଇଂନେ ବିରଦ୍‌ରେ ମୁଃଡ଼ିନେ ମ୍ନାଃ କାମ୍‌ ଡିଂକେ, ଆତେନ୍‌ ଇସ୍ରାଏଲ୍‌ନେ ରେମୁଆଁଇଂ କେକେ; ଇଡ଼ିଙ୍ଗ୍ ରେମୁଆଁଇଂ ମାପ୍‌ରୁକେ ବୁଟଚେ ମାପ୍‌ରୁ ଡାଗ୍‌ରା ଆରି ମେଁନି ସେବକ ମୋଶା ଡାଗ୍‌ରା ବିସ୍‌ବାସ୍‌ ଡିଂଆର୍‌କେ ।