1 ଆତେନ୍‌ ବେଲା ମୋଶା ଆରି ଇସ୍ରାଏଲ୍‌ ରେମୁଆଁଇଂ ମାପ୍‌ରୁନେ ମିନିରେ ଆକେନ୍‌ ଅସ୍‌ମାର୍‌ ସାର୍‌ ଆର୍‌କେ ଯେ,

ଦେକ୍‌ରକମ୍‌ ନେ ମାପ୍‌ରୁନେ ମିନିରେ ଅସ୍‌ମାର୍ ନେଃସାର୍‌ପା,

ମେଃଡାଗ୍‌ଲା ମେଁ ଜାବର୍‌ ମ୍ନା କାମ୍‌ ଡିଂବକେ; ମେଁ ଗଡ଼ା ଆରି ଗଡ଼ାଅରିଆ ଡେଃଲାଏଃକ୍ନେ ରେମୁଆଁଇଂକେ କେଣ୍ଡିଆନିଆ ଜଗ୍‌ତ୍ଲାଗ୍‌ବକେ ।

2 ମାପ୍‌ରୁ ନେନେ ବପୁ ଆରି ଅସ୍‌ମାର୍‌, ବାରି ମେଁ ନେନେ ଉଦାର୍‌ ଡିଂଲାଏକେ;

ମେଁ ନେନେ ପର୍‌ମେସର୍‌, ନେ ମେଁନେ ମିନିକେ ନେସାପା;

ମେଁ ନେନେ ନ୍ତାଞ୍ଜାଃ କେଲାନେ ପର୍‌ମେସର୍‌,

ନେ ମେଁନେ ମିନି ନେଃସାପା ।

3 ମାପ୍‌ରୁ ଯୁଦ୍‌ଡିଂନେ ବୀରବାର;

ମାପ୍‌ରୁ ମେଁନେ ମ୍ନି ।

4 ମେଁ ଫାରୋନେ ରଥ୍‌ ଆରି ସନ୍ୟଇଂକେ କେଣ୍ଡିଆନିଆ ଜଗ୍‌ତ୍ଲାଗ୍‌ବକେ;

ବାରି ମେଁନେ ଗୁଲେ ବୀରଇଂ ସୁପ୍‌ କେଣ୍ଡିଆଃ ବିତ୍‌ରେ ଲଗ୍‌ଡ୍ୟା ଲେଃଆର୍‌କେ ।

5 ସ୍ରିଡ଼ିଆ ଆମେଇଂକେ ବାଗୁଏବକେ,

ମେଇଂ ବ୍ରି ସୁଗୁଆ ସ୍ରିଡ଼ିଆଅରିଆ ଲଗ୍‌ଡ୍ୟା ୱେଆର୍‌ଗେ ।

6 ଏ ମାପ୍‌ରୁ, ନାନେ ଇଞ୍ଚଙ୍ଗ୍‌ନ୍ତିନେ ବପୁ ଏଃତେ ଗୌରବ୍‌ ଡିଙ୍ଗ୍‌ଲେ;

ଏ ମାପ୍‌ରୁ, ନାନେ ଇଞ୍ଚଙ୍ଗ୍‌ନ୍ତି ଶତ୍ରୁକେ ଚୁନା ଆଡିଂମିୟାକେ ।

7 ନା ନାନେ ମ୍ନା ମହିମାରେ ନା ଆଡ଼ାତ୍ରା ତଡ଼ିଆମ୍ୟାଃକ୍ନେ ବିରଦିକେ ବାଗୁଏ ନାମ୍ୟାଃକେ;

ନା ନାନେ ରିସାକ୍ନେ ସୁଆ ବେ, ଆତେନ୍‌ ଆମେଇଂକେ ନାଡ଼ା ରକମ୍‌ ଆଗିଃବିଏ ।

8 ନାନେ ମୁଁନେ ପୁଣ୍ଡା ଏଃତେ ଣ୍ଡିଆ ରିସିଙ୍ଗ୍‌କେ;

ୱେନେ ଣ୍ଡିଆଃ ମୁଣ୍ଡାରକମ୍‌ ଡିଙ୍ଗ୍‌ଚେ ତୁଆଁଚେ ଲେଃଗେ ।

କେଣ୍ଡିଆ ମଜେନିଆ ସ୍ରିଡ଼ିଆ ଜମା ଡିଂକେ ।

9 ସତ୍ରୁ ବାସଙ୍ଗ୍‌କେ, "ନେ ପ୍ଲା ପ୍ଲା ନେନୁଆଏ,

ନେ ଆମେଇଂକେ ନେସାଏ, ନେ ଡଙ୍ଗାକ୍ନେ ଜିନିସ୍‌ ମ୍ୱାର୍‌ବାଟା ଆଡିଂଚେ ରାଙ୍ଗ୍‌ନେଡଏ ।

ମେଙ୍ଗ୍‌ନେ ଆଡ଼ାତ୍ରା ନେଙ୍ଗ୍‌ନେ ଆସା ପୁରନ୍‌ ଡିଂଏ; ନେଙ୍ଗ୍‌ ନେଙ୍ଗ୍‌ନେ କାଣ୍ଡାକେ ଜଗ୍‌ନେତ୍ଲାଗ୍‌ଏ, ନେଙ୍ଗ୍‌ନେ ନ୍ତି ଆମେଇଂକେ ବିନାସ୍‌ ଆଡିଂଏ ।

10 ମାତର୍‌ ନା ନାନେ ପୁଣ୍ଡା ଏଃତେ ଉମ୍‌ପାର୍‌ ନାବିକେ, ଆରି କେଣ୍ଡିଆ ଆମେଇଂକେ ଆରିଙ୍ଗ୍‌ଡିଆ ବିକେ ।

ମେଇଙ୍ଗ୍‌ ସିସୁଆ ରକମ୍‌ ସ୍ରିଡ଼୍ୟାଃ ବିତ୍‌ରେ କେଣ୍ଡିଆନିଆ ଲଗ୍‌ଡିଆ ୱେଆର୍‌ଗେ ।

11 ଏ ମାପ୍‌ରୁ, ନା ରକମ୍ ଆରି ମେଃଡିଗ୍ ଦେବ୍‌ତା ଲେଃକେ ଲେଃ ?

ଣ୍ଡୁ, ନା ରକମ୍‌ ଆରି ଜାଡିଗ୍ ଣ୍ଡୁ । ନା ପବିତ୍ର ।

ନା କାବା ରକମ୍‌ ସକ୍‌ତିନେ ପୁରୁନ୍‌ ଡିଂନାଲେ, ନା ବଡ଼େ ବୟଙ୍କାର୍‌ କାମ୍‌ ଡିଂନାମ୍ୟାଃକେ !

12 ନା ନାନେ ଇଞ୍ଚଙ୍ଗ୍‌ନ୍ତି ନାଟେକେଲା

ପୁର୍‌ତିବି ଆମେଇଂକେ ଡାବିକେ ।

13 ମାତର୍‌ ନା ଦୟାରେ ଉଦାର୍‌ ଡିଂନାବକ୍ନେ ରେମୁଆଁଇଂକେ ସିସେ ୱା ରାଙ୍ଗ୍‌ନାୱେକେ ।

ନା ନାନେ ମ୍ନାସକ୍ତିରେ ଆମେଇଂକେ ନାନେ ପବିତ୍ର ଜାଗାନ୍ନିଆ ରାଙ୍ଗ୍‌ୱେ ନାବକେ ।

14 ରେମୁଆଁଇଂ ଆକେନ୍‌ ଦ୍ରିଗ୍‌ଲାଏକେ, ମେଇଙ୍ଗ୍‌ ବୁଟଆର୍‌କେ ।

ପଲେଷ୍ଟୀୟନିଆ ବାସାଲେକ୍ନେ ରେମୁଆଁଇଂ ବୁଟଚେ ଜୁଜୁର୍‌ଆର୍‌କେ ।

15 ଆତେନ୍‌ ବେଲା ଇଦୋମନେ ନେତାଇଂ ବୁଟଆର୍‌କେ ।

ମୋୟାବନେ ସାଆସ୍‌ ଆରି ସକ୍‌ତିସାଲି ରେମୁଆଁଇଂ ଡିଗ୍‌ ବୁଟଚେ ଜୁଜୁର୍‌ଆର୍‌କେ ।

କିଣାନ୍‌ନିଆ ବାସା ଲେଃଆର୍‌କ୍ନେ ରେମୁଆଁ ସାପାରେ ଦାଡ଼୍‌କେ ୱେଲେଃଆର୍‌କେ ।

16 ବୁଟମେଗ୍‌ ଆରି ଚିନ୍ତା ମେଙ୍ଗ୍‌ନେ ଆଡ଼ାତ୍ରା ଲଃଡିଂକେ;

ଏ ମାପ୍‌ରୁ, ଉଡ଼ିପର୍‌ ଜାକ ପେ ରେମୁଆଁଇଂ ଆୱେଆର୍‌,

ଉଡ଼ିପର୍‌ ଜାକ ନାନେ ସେବକ ରେମୁଆଁଇଂ ଆୱେଆର୍‌,

ଆତାନ୍‌ପର୍‌ ଜାକ ନା ବପୁ ଏତେ ମେଇଂ ବ୍ରିନେ ନ୍ୟାୟ୍‌ ରକମ୍‌ ବୁଙ୍ଗ୍‌ଚେ ଲେଃଆର୍‌କେ ।

17 ଏ ମାପ୍‌ରୁ, ନା ବାସାନ୍‌ସା ଆଣ୍ଡିନେ ଜାଗା ଆରେ ନାବ,

ପ୍ରବୁ, ନାନେ ନ୍ତି ଆଣ୍ଡିନେ ଧର୍ମଜାଗା ଆରେ ବକେ,

ନା ଆମେଇଂକେ ଡୁଙ୍ଗ୍‌ପାଂଚେ ନିଜେ ବାସାନେ ଜାଗା‍ଅରିଆ ଆଃରେ ।

18 ମାପ୍‌ରୁ ମାଡାନେ କାଲ୍‌ ଜାକ ସାସନ୍‌ ଡିଂଏ ।"

19 ମେଃଡାଗ୍‌ଲା ଫାରୋନେ ଗଡ଼ା ଆରି ରଥ୍‌ ଆରି ଗଡ଼ାନିଆ ଲେକ୍ନେ ରେମୁଆଁଇଂ କେଣ୍ଡିଆନିଆ ଗାଆର୍‌କେ, ମାପ୍‌ରୁ ମେଙ୍ଗ୍‌ନେ ଆଡ଼ାତ୍ରା ବାର୍‌ମୁଇଂତର୍‌ କେଣ୍ଡିଆ ଣ୍ଡିଆ ବେକେ; ମାତର୍ ଇସ୍ରାଏଲ୍‌ନେ ରେମୁଆଁଇଂ ନ୍‌ସୁଆର୍‌ ଗାଲି ବିଚେ କେଣ୍ଡିଆ ବିତ୍ରେ ଅଲେଙ୍ଗ୍‌ଆର୍‌କେ ।

20 ଏନ୍‌ଇଡ଼ିଂ ହାରୋଣନେ ତନାଡ଼େ ବବିସତ୍‌ ସାମୁଆଁ ବାସଙ୍ଗ୍‌ମ୍ୟାକ୍ନେ ମରିୟମ୍‌ନେ ନ୍ତିବାନ୍‌ ଜୁମ୍‌କା ରାଙ୍ଗ୍‌ୱେଆର୍‌କେ ଆରି ମେଁନେ ପ୍ଲା ପ୍ଲା ବିନ୍‌ ସେଲାମ୍ବୁଏଃଇଂ ଜୁମ୍‌କା ରାଙ୍ଗ୍‌ୱେଚେ ୱାଡ଼େଙ୍ଗ୍‌ ୱା ୱାଚେ ତାର୍‌ଆର୍‌କେ । 21 ଆତେନ୍‌ ବେଲା ମରିୟମ୍‌ ରେମୁଆଁଇଂକେ ସାଲିଆକୁକେ,

"ପେଇଂ ମାପ୍‌ରୁନେ ମିନିରେ ଅସ୍‌ମାର୍‌ ସାର୍‌ପା; ଡାଗ୍ଲା ମେଁ ଜାବର୍‌ ମ୍ନା କାମ୍‌ ଡିଂବକେ;

ମେଁ ଗଡ଼ା ଆରି ଗଡ଼ାସାଲେକ୍ନେ ରେମୁଆଁଇଂକେ କେଣ୍ଡିଆନିଆ ଜଗ୍‌ତ୍ଲାଗ୍‌ବକେ ।

22 ଏନ୍‌ଇଡ଼ିଂ ମୋଶା ଇସ୍ରାଏଲ୍‌ନେ ରେମୁଆଁଇଂକେ ସୁପ୍‌ କେଣ୍ଡିଆବାନ୍‌ ଆଉଲେଙ୍ଗ୍‌କେ, ବାରି ମେଇଂ ଶୂର ଆଡ଼ା ପାକା ଅଲେଙ୍ଗ୍‌ଆର୍‌କେ, ମେଇଂ ବାଲିଲ ଆଡ଼ାନିଆ ଜିର୍‌ସି ଅଲେଙ୍ଗ୍‌ଚେ ଣ୍ଡିଆ ଆଅବାଆର୍‌କେ । 23 ଆତ୍‌ବା ମେଇଂ ମାରାଡାଗ୍ରା ୱେଚାଆର୍‌କେ, ବ୍ସେ ଲେଗ୍‌ସା ମାରାନେ ଣ୍ଡିଆ ଉଗ୍‌ ଆୟାଆର୍‌କେ ଣ୍ଡୁ; ଆତେନ୍‌ସା ମେଁନେ ମିନି ମାରା ବିଃଆର୍‌କେ । 24 ଆତେନ୍‌ ବେଲା ରେମୁଆଁଇଂ ମୋଶାନେ ବିରୁଦ୍‌ରେ କୁଟ୍‌ ଡିଂଚେ ବାସଙ୍ଗ୍‌ଆର୍‌କେ, ନେ ମେଃନେ ନେଉଗ୍ଏ ?" 25 ଆତ୍‌ବା ମେଁ ମାପ୍‌ରୁଡାଗ୍ରା ପାର୍‌ତନା ଡିଂକେ, ମାପ୍‌ରୁ ଆମେକେ ମୁଇଂ ସୁଆ ଆକେକେ, ମେଁ ଆତେନ୍ ଡୁଙ୍ଗ୍‌ୱେଚେ ଣ୍ଡିଆନିଆ ତ୍ଲାଗ୍‌ଲା, ଣ୍ଡିଆ ମ୍ବ୍ରେକେ । ଆତେନ୍‌ ଜାଗାନ୍ନିଆ ମାପ୍‌ରୁ ମେଙ୍ଗ୍‌ନେସା ନିଅମ୍‌ ଆରି ଆଦେସ୍‌ ଆରେ ଆର୍‌କେ, ବାରି ଆମେଇଂକେ ପରିକ୍ୟା ଡିଂଚେ ବାସଙ୍ଗ୍‌କେ, 26 "ନା ଜଦି ମାପ୍‌ରୁ ପର୍‌ମେସର୍‌ନେ ବାକ୍ୟକେ ନାଦ୍ରିଗ୍‌ଏ ଆରି ମେଁନି ସାର୍‌ମୁଆଃଅରିଆ ମେଃନେ ନିମାନ୍‌, ଆତେନ୍‌ ନାଡିଂଲା ଆରି ମେଁନି ଆଦେସ୍‌ରେ ଦିଆନ୍‌ ନାବିଃଲା ଆରି ମେଁନି ନିଅମ୍‌ ସାପା ପାଲନ୍‌ ନାଡିଂଲା, ତେଲା ନେ ମିସ୍ରିୟ ରେମୁଆଁଇଂକେ ଆଣ୍ଡିନେ ରଗ୍ ଆବଗେ ନେବକେ, ଆତେନ୍‌ ସାପା ଆପେକେ ବଗେନ୍‌ସା ନେବି ଣ୍ଡୁ; ଡାଗ୍ଲା ନେ ମାପ୍‌ରୁ ଆପେକେ ନିମାଣ୍ଡାଃ ନେରାଡିଂଏ ।" 27 ଏନ୍‌ଇଡ଼ିଂ ମେଇଂ ଏଲିମ୍‌ଡାଗ୍ରା ୱେଚାଆର୍‌କେ; ଆତ୍‌ଅରିଆ ଣ୍ଡିଆନେ ଗମ୍ୱାର୍‌କ୍ଲିଗ୍‌ ଜଲା ଆରି ସତୁରିଟା କଜ୍‌ରି ସ୍ଲାଃ ଲେଃଗେ; ଇଡ଼ିଙ୍ଗ୍ ମେଇଂ ଆତେନ୍‌ ଣ୍ଡିଆଡାଗ୍ରା କୁଡ଼ିଆ ଆରେଆର୍‌କେ ।