ସୁନାନେ ଉଂତିଆ
1 ଏନ୍ଇଡ଼ିଂ ମୋଶା କଣ୍ଡାବାନ୍ ଜାର୍ନେ ତଙ୍ଗାର୍ନେ କେଚେ ରେମୁଆଁଇଂ ହାରୋଣ ଡାଗ୍ରା ରିସିଂଚେ ଆମେକେ ବାସଙ୍ଗ୍ଆର୍କେ, "ତଡ଼ିଆ, ନେ ଆତ୍ଲା ସିସେ ସିସେ ୱେନ୍ସା ନେ ଆତ୍ଲା ମୁଇଂ ଦେବ୍ତା ଆରେ, ମେଃଡାଗ୍ଲା ମୁଡ଼ି ରେମୁଆଁ ମିସର୍ ଦେସ୍ବାନ୍ ଆନେକେ ଆତାର୍ ଡୁଂପାଂବକେ, ଆତେନ୍ ମୋଶାନେ ଆଡ଼ାତ୍ରା ମେଃ ଗଟେଲେକେ, ଆତେନ୍ ନେ ନେମ୍ୟାଃକେ ଣ୍ଡୁ ।"
2 ଆତ୍ବା ହାରୋଣ ଆମେଇଂକେ ବାସଙ୍ଗ୍କେ, "ତେଲା ପେ ପେନେ ପେକୁନେଃ ଆରି ଉଂଡେଇଂନେ ନ୍ଲୁଗ୍ବାନ୍ ସୁନାବାନା ତଚେ ନେଙ୍ଗ୍ ଡାଗ୍ରା ଡୁଙ୍ଗ୍ପାଂଲାପା ।" 3 ଆତ୍ବା ସାପା ରେମୁଆଁ ନିଜର୍ ନିଜର୍ନେ ନ୍ଲୁଗ୍ବାନ୍ ସୁନାବାନା ସାପା ତଚେ ହାରୋଣ ଡାଗ୍ରା ଡୁଙ୍ଗ୍ପାଙ୍ଗ୍ଆର୍କେ । 4 ମେଁ ମେଙ୍ଗ୍ନେ ନ୍ତିବାନ୍ ଆତେନ୍ ଡୁଙ୍ଗ୍ୱେଚେ ବାଡ଼େଇଂନିଆ ଛଞ୍ଚ୍ ଆରେଚେ ମୁଇଂ ସୁନା ଉଂତ୍ୟା ଆରେଆର୍କେ; ତେଲା ରେମୁଆଁଇଂ ବାସଙ୍ଗ୍ଆର୍କେ, "ଅ ଇସ୍ରାଏଲ୍, ମୁଡ଼ି ଦେବ୍ତା ଆପେକେ ମିସର୍ ଦେସ୍ବାନ୍ ଆତାର୍ ଡୁଂପାଂକେ. ମେଁ କିମେ ।"
5 ଆତ୍ବା ହାରୋଣ ଆତେନ୍ କେଚେ ମେଁ ସାମ୍ନେ ମୁଇଂ ବେଦି ଆରେକେ, ବାରି ଞ୍ଜଡ଼େ ମାପ୍ରୁନେ ମ୍ନିରେ ମୁଇଂ ପାଣ୍ଡୁଏଃ ଡିଂଏ, ଆକେନ୍ ମେଁ ବାସଙ୍ଗ୍କେ । 6 ଆତ୍ବା ରେମୁଆଁଇଂ ଞ୍ଜ ଞ୍ଜିର୍ ତଡ଼ିଆଚେ ସୁଆ ବଲି ବିଃଆର୍କେ ଆରି ସାନ୍ତିନେ ନୈବେଦ୍ୟ ଡୁଂପାଂଆର୍କେ; ଆତ୍ବା ରେମୁଆଁଇଂ ଚଙ୍ଗ୍ଉଗ୍ ନ୍ସା କଆର୍କେ; ଚଙ୍ଗ୍ ଉଗ୍ ଆଡାଚେ ରେମୁଆଁଇଂ କାରାପ୍ କାମ୍ ଡିଂନେ ତଃଡ଼ିଆଆର୍କେ ।
7 ତେଲା ମାପ୍ରୁ ମୋଶାକେ ବାସଙ୍ଗ୍କେ, "ନା ଜିଆ ଜାର୍ଲା, ମେଃଡାଗ୍ଲା ନାନେ ମୁଡ଼ି ରେମୁଆଁଇଂକେ ନା ମିସର୍ ଦେସ୍ବାନ୍ ଆତାର୍ ଡୁଂପାଂନାବକେ, ମେଇଂ ନିଜେ ନିଜେ କାରାପ୍ ଗାଲି ୱେଲେଃଆର୍କେ । 8 ନେ ଆମେଇଂକେ ଆଣ୍ଡିନେ ଗାଲି ୱେନ୍ସା ଆଦେସ୍ ନେବିକେ," ମେଇଂ ଦାପ୍ରେ ଆତେନ୍ ଗାଲିବାନ୍ ଆଣ୍ଡେ ୱେଆର୍ଗେ; ମେଇଂ ମେଙ୍ଗ୍ ଆତ୍ଲା ମୁଇଂ ଚଞ୍ଚ୍ନିଆ ଢଲା ଉଂତ୍ୟା ଆରେଚେ ଆମେକେ ପୁଜା ଡିଂଆର୍କେ, ବାରି ମେଁ ଡାଗ୍ରା ମିୟାଁ ବିଚେ ବାସଙ୍ଗ୍କେ, "ଅ ଇସ୍ରାଏଲ୍, ଆଣ୍ଡିନେ ଦେବ୍ତା ଆପେକେ ମିସର୍ ଦେସ୍ବାନ୍ ଆତାର୍ ଡୁଂପାଂବକେ, ମେଁ ଆକେନ୍ ।" 9 ମାପ୍ରୁ ମୋଶାକେ ବାରି ବାସଙ୍ଗ୍କେ, "ନେ ଏନ୍ ରେମୁଆଁଇଂକେ ନେକେକେ, କେଲା, ମେଇଂକେ ଉଡ଼ି ବାଲିର୍ଲା ଡିଗ୍ ଅବୁଜା ରେମୁଆଁ ଡିଂଲେଃଆର୍କେ । 10 ଆତେନ୍ସା ନା ଏବେ ଆନେକେ ଆନ୍ତାର୍ବି, ନେନେ ରିସା ମେଙ୍ଗ୍ନେ ଆଡ଼ାତ୍ରା ସୁଆ ରକମ୍ ଡୁଆଡିଂକେ, ତେସା ନେ ଆମେଇଂକେ ବିନାସ୍ ନେରାଡିଂଏ; ମାତର୍ ନେ ଆନାକେ ମ୍ନା ଜାତି ନେରାଡିଂଏ ।"
11 ଆତ୍ବା ମୋଶା ମେଁନେ ମାପ୍ରୁ ପର୍ମେସର୍କେ ଗୁଆରେଚେ ବାସଙ୍ଗ୍କେ, "ଅ ମାପ୍ରୁ, ନା ନାନେ ମୁଡ଼ି ରେମୁଆଁଇଂକେ ନାନେ ମ୍ନା ବପୁନେ ନ୍ତି ଏତେ ବାରି ନ୍ତି ବପୁ ଏତେ ମିସର୍ ଦେସ୍ବାନ୍ ଆତାର୍ ଡୁଂପାଂନାବକେ, ମେଙ୍ଗ୍ନେ ଆଡ଼ାତ୍ରା ନାନେ ରିସା ମେଁସା ଡିଂଏ ? 12 ମେଁ କଣ୍ଡା ଡାଗ୍ରାନେ ଏରିଆ ପାକା ଆମେଇଂକେ ବିନାସ୍ ଆଡିଂଚେ ପୁର୍ତିବିବାନ୍ ଲପ୍ ଆଡିଂ ନ୍ସା, ବିନାସ୍ ଡିଂନ୍ସା ଆତାର୍ ଡୁଂପାଂକେ, ଦେକ୍ରକମ୍ ସାମୁଆଁ ମିସ୍ରିୟଇଂ ମେଁସା ବାସଙ୍ଗ୍ଆର୍ଏ ? ନା ନାନେ ରିସା ଆନ୍ତାର୍ଚେ ବାରି ନାନେ ରେମୁଆଁ ଡାଗ୍ରା ଦେକ୍ରକମ୍ ବିନାସ୍ ଆଡିଂନେ ସାମୁଆଁବାନ୍ ବୁଙ୍ଗ୍ ଲାଲା । 13 ନାନେ ସେବକ ଅବ୍ରହାମ୍ ଆରି ଇସ୍ହାକ୍ ବାରି ଇସ୍ରାଏଲ୍ନେ ଉଂଡେଇଂକେ ମନେ ତ୍ଲାଗ୍, ନା ନାନେ ନିଜର୍ ମିନିରେ ପାର୍ମାନ୍ ଡିଂଚେ ଆମେଇଂକେ ବାସଙ୍ଗ୍ନାବକେ, ନେ କିତଂଇନିନେ ଚାଙ୍କୁଆଇଂ ରକମ୍ ପେନି ବଁସ୍ ଜାବର୍ ନେରାଡିଂଏ ଆରି ଆଣ୍ଡିନ୍ ସାପା ଦେସ୍ନେ ସାମୁଆଁ ନେବାସଙ୍ଗ୍କେ, ଆତେନ୍ ନାନେ ବଂଶକେ ନେବିଏ,ମେଇଂ ମାଡାନେ କାଳ ଜାକ ଆତେନ୍ ଅଦିକାର୍ ଡିଂଆର୍ଏ ।" 14 ତେଲା ମାପ୍ରୁ ମେଁନେ ରେମୁଆଁଇଂନେ ଆଡ଼ାତ୍ରା ଆଣ୍ଡିନେ ସାପା ବିନାସ୍ ଡିଂନେ ସାମୁଆଁ ବାସଙ୍ଗ୍ବଗେ, ଆତ୍ବା ବୁଙ୍ଗ୍ ବିଃକେ ।
15 ଏନ୍ଇଡ଼ିଂ ମୋଶା ଆଣ୍ଡେ ୱେଚେ ସାକି ବିନେ ମ୍ୱାକ୍ଲିଗ୍ ବ୍ରି ପାଟା ନ୍ତିନିଆ ସାଚେ କଣ୍ଡାବାନ୍ ଜାର୍କେ; ଆତେନ୍ ବ୍ରି ପାଟାନେ ମୁଇଂ ପାକା ଆରି ବାର୍ମୁଇଂ ପାକା ମ୍ୱାର୍ପାକା ଜାକ ଗୁଆର୍ବଗେ । 16 ଆତେନ୍ ବ୍ରି ପାଟା ପର୍ମେସର୍ ଆରେବଗେ; ବାରି ଆତ୍ଅରିଆ ଗଦେଚେ ଗୁଆର୍କ୍ନେ ବ୍ରି ପର୍ମେସର୍ ନିଜେ ଗୁଆର୍ବକେ ।
17 ଏନ୍ଇଡ଼ିଂ ରେମୁଆଁଇଂ ଜାବର୍ ୱାସାର୍ ଆର୍କେ, ଯିହୋଶୂୟ ରେମୁଆଁଇଂନେ ୱାସାର୍ନେ ଅଁଚେ ମୋଶାକେ ବାସଙ୍ଗ୍କେ, "କୁଡ଼ିଆବାନ୍ ଜୁଜ୍ନେ ସବଦ୍ ଡିଂଡିଂକେ ।"
18 ଆତ୍ବା ମେଁ ବାସଙ୍ଗ୍କେ, "ଆକେନ୍ ଜିତେନେ ସବଦ୍ ଣ୍ଡୁ କି ଆରେନେ ସବଦ୍ ଣ୍ଡୁ, ମାତର୍ ନେଙ୍ଗ୍ ଅସ୍ମାର୍ ସାର୍ନେ ସବଦ୍ ଅଁଣ୍ଡିଂକେ ।"
19 ଆତ୍ବା ମେଁ କୁଡ଼ିଆ ଡାଗ୍ରାଡିଂକ୍ନେ ଦାପ୍ରେ ଆତେନ୍ ଉଂତ୍ୟାକେ ଆରି ୱାଃଡ଼େଙ୍ଗ୍ ୱାଃନେ କେକେ; ଆତ୍ବା ମୋଶା ଜାବର୍ ରିସା ଡିଂକେ; ଆତେନ୍ସା ମେଁ ମେଁନେ ନ୍ତିବାନ୍ ଆତେନ୍ ମ୍ୱାକ୍ଲିଗ୍ ବ୍ରି ପାଟାକେ ଜଗ୍ତ୍ଲିଗ୍ଚେ କଣ୍ଡା ଆଲ ଆତେନ୍ ପାକ୍ଚି ବିକେ । 20 ବାରି ମେଇଂ ଆରେବକ୍ନେ ଉଂତ୍ୟାକେ ରାଙ୍ଗ୍ୱେଚେ ସୁଆନିଆ ତ୍ଲାଗ୍ବିକେ ବାରି ଆମେକେ ବଗ୍ ବଗ୍ଚେ ଗୁଣ୍ଡ୍ ଆଡିଂବିକେ, ଆରି ଣ୍ଡିଆ ଆଡ଼ାତ୍ରା ବିଚେ ବିଃଚେ ଇସ୍ରାଏଲ୍ନେ ରେମୁଆଁଇଂକେ ଆଃଉଗ୍କେ । 21 ଆତ୍ବା ମୋଶା ହାରୋଣକେ ବାଲିର୍କେ, "ଆକେନ୍ ରେମୁଆଁଇଂ ନା ଆଡ଼ାତ୍ରା ମେଃ ଡିଂକେ ଯେ, ନା ମେଙ୍ଗ୍ନେ ଆଡ଼ାତ୍ରା ଦେକ୍ରକମ୍ ମ୍ନା ପାପ୍ ନାରାଡିଂକେ ?"
22 ଆତ୍ବା ହାରୋଣ ବାସଙ୍ଗ୍କେ, "ନେ ମାପ୍ରୁନେ ରିସା ନେ ଡାଗ୍ରା ଆଡିଂଲେ; ପେ ମ୍ୟାଃପେଲେକେ ଯେ, ଆକେନ୍ ରେମୁଆଁଇଂ କାରାପ୍ କାମ୍ରେ ବେସ୍ତ ଡିଂଲେଃଆର୍କେ । 23 କିମେଇଂ ଆନେଙ୍ଗ୍କେ ବାସଙ୍ଗ୍ଆର୍କେ, ନେନେ ସିସେ ସିସେ ୱେନ୍ସା ନେ ଆତ୍ଲା ଦେବ୍ତା ଆଃରେ; ମେଃଡାଗ୍ଲା ମୁଡ଼ି ରେମୁଆଁ ଆନେକେ ମିସର୍ ଦେସ୍ବାନ୍ ଆତାର୍ ଡୁଂପାଂକେ, ଆତେନ୍ ମୋଶାନେ ମେଃ ଡିଂଲେଃକେ, ଆତେନ୍ ନେ ନେମ୍ୟାଃକେ ଣ୍ଡୁ । 24 ତେଲା ନେଙ୍ଗ୍ ମ୍ୱାସଙ୍ଗ୍କେ, ପେ ବିତ୍ରେ ଜାନେ ଜଦି ସୁନା ଲେଃକେ, ଆତେନ୍ ମେଇଂ ତଃଆର୍ଲେ; ଆତ୍ବା ମେଇଂ ଆନେଙ୍ଗ୍ ଆତାନ୍ ବିଃଆର୍କେ; ନେଙ୍ଗ୍ ଆତେନ୍ ଡୁଂୱେଚେ ସୁଆନିଆ ନ୍ତ୍ଲାଗ୍କେ, ଆତ୍ବା ଆକେନ୍ ଉଂତ୍ୟା ତିଆର୍ ଡିଂକେ ।"
25 ଆରି ମୋଶା ରେମୁଆଁଇଂକେ ନିଜର୍ କାମ୍ ଡିଂନେ କେକେ, ମେଃଡାଗ୍ଲା ହାରୋଣ ଆମେଇଂକେ ଶତ୍ରୁଇଂନେ ବିତ୍ରେ ଲୁଆଃକେ ରକମ୍ ନିଜର୍ ଇକ୍ଚାରେ କାମ୍ ଡିଂଚେ ଆନ୍ତାର୍ ବଆର୍ଗେ । 26 ଆତ୍ବା ମୋଶା କୁଡ଼ିଆନେ ବାଜାର୍ନିଆ ତୁଆଁଚେ ବାସଙ୍ଗ୍କେ, "ମାପ୍ରୁ ପାକା ଜାଣ୍ଡେ ଲାଏକେ ? ମେଁ ନେଙ୍ଗ୍ ଡାଗ୍ରା ପାଂଲେ"; ଆତ୍ବା ଲେବୀନେ ଉଂଡେଇଂ ମେଁ ଡାଗ୍ରା ମୁଇଂନୁଗ୍ ରିସିଂଆର୍କେ । 27 ଆତ୍ବା ମେଁ ଆମେଇଂକେ ବାସଙ୍ଗ୍କେ, "ଇସ୍ରାଏଲ୍ନେ ମାପ୍ରୁ ପର୍ମେସର୍ ଆକେନ୍ ସାମୁଆଁ ବାସଙ୍ଗ୍ମ୍ୟାକେ, ପେ ସାପାରେ ନିଜର୍ ନିଜର୍ ବୁଲୁନିଆ କାଣ୍ଡା ଗାଗ୍ଚେ କୁଡ଼ିଆନେ ମଜେ ବିଚେ ମୁଇଂ ଗାଲିବାନ୍ ବାରିମୁଇଂ ଗାଲି ବିଚେ ୱେଲାପା ବାରି ସାପାରେ ନିଜର୍ ନିଜର୍ନେ ବୟାଁ, ସାଙ୍ଗ ଆରି ଡାଗ୍ରାଡୁଆଣ୍ଡ୍ରେକେ ବାଗୁଏପା ।" 28 ଆତ୍ବା ଲେବୀନେ ଉଂଡେଇଂ ମୋଶାନେ ସାମୁଆଁରେ ଦେତ୍ରକମ୍ ଡିଂକେ, ଆତେନ୍ ଦିନା ରେମୁଆଁଇଂନେ ବିତ୍ରେବାନ୍ ବେସି ଡିଂଲା ଞ୍ଜି ଅଜାର୍ ରେମୁଆଁ ଗୁଏକେ । 29 ଆରି ମୋଶା ବାସଙ୍ଗ୍କେ, ପେ ସାପାରେ ନିଜର୍ ନିଜର୍ନେ ଉଂଡେ ଆରି ବୟାଁଇଂନେ ବିପକ୍ଷ ଡିଂଚେ ମାପ୍ରୁନେ ମ୍ନିରେ ପେ ନିଜେକେ ଅଲ୍ଗା ଆଃଡିଂପା, ଆତ୍ବା ମେଁ ଆକେନ୍ ଦିନା ଆପେକେ ଆସିର୍ବାଦ୍ ଡିଂଏ ।
30 ତେନ୍ ମାର୍ତଡ଼େ ମୋଶା ରେମୁଆଁଇଂକେ ବାସଙ୍ଗ୍କେ, ପେ ମ୍ନା ପାପ୍ ଡିଂପେବକେ, ଏବେ ନେଙ୍ଗ୍ ମାପ୍ରୁ ଡାଗ୍ରା ଡେଃଣ୍ଡିଂକେ; ଅଃନା ଡିଂପାରେ, ତେଲା ନେଙ୍ଗ୍ ପେନେ ପାପ୍ କେମା ନ୍ସାଃ ପାର୍ତନା ଣ୍ଡିଂଏ । 31 ଏନ୍ଇଡ଼ିଂ ମୋଶା ମାପ୍ରୁ ଡାଗ୍ରା ୱେଚେ ବାସଙ୍ଗ୍କେ, "ହାୟ, ହାୟ, ଆକେନ୍ ରେମୁଆଁଇଂ ମ୍ନା ପାପ୍ ଡିଂଚେ ମେଙ୍ଗ୍ ଆତ୍ଲା ସୁନାନେ ଦେବତା ଆରେ ବଆର୍କେ । 32 ଏଲେଡିଗ୍ ଏବେ, ନା ଜଦି ମେଙ୍ଗ୍ନେ ପାପ୍ କେମା ନାଡିଂଏ, ଅଃନା ନାଡିଂ ଣ୍ଡୁ, ତେଲା ନେଙ୍ଗ୍ ଗୁଆରି ଡିଂଣ୍ଡିଂକେ, ନା ଗୁଆର୍ନାବକ୍ନେ ବଇବାନ୍ ନେଙ୍ଗ୍ନେ ମିନି କାଟେ ବିଃ ।"
33 ଆତ୍ବା ମାପ୍ରୁ ମୋଶାକେ ବାସଙ୍ଗ୍କେ, "ମୁଡ଼ି ରେମୁଆଁ ନେ ବିରୁଦ୍ରେ ପାପ୍ ଡିଂବକେ, ନେ ନେନେ ବଇବାନ୍ ମେଁନେ ମିନି କାଟେ ନେବିଏ । 34 ଏବେ ୱେଲା, ନେ ଆଣ୍ଡିନେ ଦେସ୍ ବିସଏରେ ଆନାକେ ବାସଙ୍ଗ୍ନେବ, ଆତେନ୍ ଦେସ୍ନିଆ ରେମୁଆଁଇଂକେ ରାଙ୍ଗ୍ୱେଲା; କେଲା, ନେନେ ଦୁତ୍ ନା ସିସେ ସିସେ ଅଲେଙ୍ଗ୍ଏ; ମାତର୍ ନେ ଚୁଚୁ ବାଦୁଲ୍ ଚୁଚୁ ବିଃନେ ଦିନା ମେଙ୍ଗ୍ନେ ପାପ୍ନେ ଡଣ୍ଡ୍ ଆମେଇଂକେ ନେବିଏ ।"
35 ବାରି ମାପ୍ରୁ ରେମୁଆଁଇଂକେ ବଗ୍କେ, ମେଃଡାଗ୍ଲା ହାରୋଣ ଆଃରେବକ୍ନେ ଉଂତ୍ୟାକେ ଆମେଇଂକେ ବାସଙ୍ଗ୍କେସାଃ ଆଃରେବଗେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)