1 ମାପ୍‌ରୁ ମୋଶାକେ ବାସଙ୍ଗ୍‌କେ, "ନେ ଫାରୋ ଆରି ମିସର୍‌ ଆଡ଼ାତ୍ରା ଆରି ମୁଇଂ ଡଣ୍ଡ୍‌ ନେରାଗଟେଏ; ତେଲା ମେଁ ଆପେକେ ଏନ୍‌ ଜାଗାବାନ୍‌ ଆନ୍ତାର୍‌ବିଏ, ବାରି ଆନ୍ତାର୍‌ନେ ବେଲା ମେଁ ଆପେକେ ଡିଲାଡିଗ୍‌ ନୁଆଁଏ । 2 ଆତେନ୍‌ସା ଏବେ ରେମୁଆଁଇଂନେ ନ୍ଲୁଗ୍‌ନିଆ ବାସଙ୍ଗ୍‌ପା, ସାପା ଙ୍ଗିର୍‌ବୁଏଃ ନିଜର୍‌ ନିଜର୍‌ ଡାଗ୍ରାଡୁଆଣ୍ଡ୍ରେବାନ୍‌ ବାରି ସାପା ସେଲାମ୍ବୁଏଃ ନିଜର୍‌ ନିଜର୍‌ ଡାଗ୍ରାଡୁଆନେ ସେଲାମ୍ବୁଏବାନ୍‌ ରୁପା ଆରି ସୁନା ସର୍ସ୍ୟା ସାଲ୍ୟାଃ ରାଙ୍ଗ୍‌ୱିଗ୍‌ଆର୍‌ଲେଃ ।" 3 ଆରି ମାପ୍‌ରୁ ମିସ୍ରିୟଇଂନେ ସାମ୍‌ନେ ରେମୁଆଁଇଂକେ ଦୟା ଆସୁଏକେ । ବାରି ମିସର୍‌ ଦେସ୍‌ନିଆ ଫାରୋନେ ଗୁତିରେଇଂକେ ଆରି ରେମୁଆଁଇଂନେ ସାମ୍‌ନେ ମୋଶା ସାପାବାନ୍‌ ମ୍ନା ରେମୁଆଁ ଡିଂକେ ।

4 ଆତ୍‌ବା ମୋଶା ବାସଙ୍ଗ୍‌କେ, "ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେ ମଜେ ମିଡିଗ୍‌ ମିସର୍‌ ବିଚେ ନେୱେଏ ।" 5 ଆତ୍‌ବା ସିଂଆଁସନ୍‌ ଡାଗ୍ରା କଲେଃକ୍ନେ ଫାରୋନେ ପର୍‌ତୁମ୍‌ ଜନମ୍‌ ଡିଂକ୍ନେ ଗଡ଼େଅବାନ୍‌ ଉଃଡିର୍‌ନେ ଚାକର୍‌ବୁଏଃନେ ପର୍‌ତୁମ୍‌ ଜନମ୍‌ ଡିଂକ୍ନେ ଗଡ଼େଅ ଜାକ ମିସର୍‌ ଦେସ୍‌ନେ ସାପା ପର୍‌ତୁମ୍‌ ଜନମ୍‌ ଡିଂକ୍ନେ ଗଡେଅଇଂ ବାରି ପର୍‌ତୁମ୍‌ ଜନମ୍‌ ଡିଂକ୍ନେ ପସୁଇଂ ଗୁଏଆର୍‌ଏ । 6 ଆତେନ୍‌ସା ସାପା ମିସର୍‌ ଦେସ୍‌ନିଆ, ଦେକ୍‌ରକମ୍‌ ଅଃନା ଆଡିଂକେ କି ଅଃନା ଆଡିଂ ଣ୍ଡୁ, ଦେକ୍‌ରକମ୍‌ ବଡ଼େ ବୟଙ୍କାର୍‌ ଅଃନେ ଦିନ୍‌ ପାଙ୍ଗ୍‌ଏ । 7 ମାତର୍‌ ମାପ୍‌ରୁ ମିସ୍ରିୟ ରେମୁଆଁଇଂନେବାନ୍‌ ଇସ୍ରାଏଲ୍‌ ରେମୁଆଁଇଂକେ ବିନେ ଆଃଡିଂକେ, ଆକେନ୍‌ ଯେନ୍ତିକି ପେ ପେମ୍ୟାଃଏ, ଆତେନ୍‌ସା ଇସ୍ରାଏଲ୍‌ ରେମୁଆଁଇଂନେବାନ୍‌ ରେମୁଆଁ ଡିଂଲେ କି ପଶୁ ଡିଂଲେ କି ମୁଇଂ ଗୁସୁଃ ଡିଗ୍‌ ଆବାଃ ଣ୍ଡୁ । 8 ଆତ୍‌ବା ନାନେ ଆକେନ୍‌ ସାପା ଚାକର୍‌ଇଂ ନେଙ୍ଗ୍‌ଡାଗ୍ରା ଆଲ ଡିଂଚେ ପାଙ୍ଗ୍‌ଆର୍‌ଏ ବାରି ଆନେଙ୍ଗ୍‌କେ ସାର୍‌ଲଚେ ବାସଙ୍ଗ୍‌ଆର୍‌ଏ, ନା ଆରି ନା ପ୍ଲା ପାଙ୍ଗ୍‌ଡିଂକ୍ନେ ସାପା ରେମୁଆଁଇଂ ତାର୍‌ୱେଲାପା; ତେଲା ନେଙ୍ଗ୍‌ ତାର୍‌ଉଁୱେଏ । ଆତ୍‌ବା ମେଁ ରିସା ଡିଂଚେ ଫାରୋନେ ସାମ୍‌ନାବାନ୍‌ ତାର୍‌ୱେକେ ।

9 ମାପ୍‌ରୁ ମୋଶାକେ ବାସଙ୍ଗ୍‌ବଗେ, ନେ ଡିରକମ୍‌ ମିସର୍‌ ଦେସ୍‌ନିଆ ନେନେ କାବା କାମ୍‌ ଜାବର୍‌ ନେଡିଂଏ, ଏଲେଡିଗ୍‌ ଫାରୋ ପେ ସାମୁଆଁକେ ଆଦ୍ରିଗ୍‌ ଣ୍ଡୁ । 10 ବାରି ମୋଶା ଆରି ହାରୋଣ ଫାରୋନେ ସାମ୍‌ନେ ଆକେନ୍‌ ସାପା କାବା କାମ୍‌ ଡିଂବଗେ, ଏଲେଡିଗ୍‌ ମାପ୍‌ରୁ ଫାରୋନେ ମନ୍‌କେ ଡାଟ୍‌ ଆଃଡିଂକେ, ମେଁ ମେଁନି ଦେସ୍‌ବାନ୍‌ ଇସ୍ରାଏଲ୍‌ ରେମୁଆଁଇଂକେ ଆଆନ୍ତାର୍‌କେ ଣ୍ଡୁ ।