1 ଆତ୍‌ବା ମାପ୍‌ରୁ ମୋଶାକେ ବାସଙ୍ଗ୍‌କେ, "ନାନେ ବୟାଁ ହାରୋଣ ଆରି ମେଁନେ ଉଂଡେ ନାଦବ୍‌, ଅବୀହୁ, ଇଲୀୟାସର ଆରି ଇଥାମର୍‌କେ ଇସ୍ରାଏଲ୍‌ ରେମୁଆଁଇଂନେ ବିତ୍‌ରେବାନ୍‌ ଡୁଂପାଙ୍ଗ୍‌ଲା । ମେଇଂ ନେଙ୍ଗ୍‌ନେ ପୁଜାରି ଡିଂଆର୍‌ଏ । 2 ନାନେ ବୟାଁ ହାରୋଣ ସନ୍‌ମାନ୍ ଆରି ସୁନ୍ଦର୍ ନ୍‌ସାଃ ପବିତ୍ର ସକା ତିଆର୍‌ ଡିଂପା । ଆତେନ୍‌ ସକା ସଲା ମେଁ ସନ୍‌ମାନ୍‌ ବାଏ ଆରି ସବା ତ୍ନାଏ । 3 ଆରି ନେ ଜାଣ୍ଡେଇଂକେ ବୁଦି ବିନେ ରେମୁଆଁଇଂକେ ଆତ୍ମାଅରିଆ ବର୍ତି ଆଡିଂନେବକେ, ଆତେନ୍‌ ସାପା ଗିଆନ୍‌ ରେମୁଆଁଇଂକେ ଆଦେସ୍‌ ଡିଂପା; ନେ ମ୍ନିରେ ପୁଜାରି କାମ୍‌ ଡିଂନେସା ହାରୋଣକେ ପବିତ୍ର ଆଡିଂନେସା ମେଇଂ ମେଁ ଆତ୍‌ଲା ସକା ଆରେ ଆର୍‌ଏ । 4 ବାରି, ଗ୍ରିନିଆ ସଃନେ ପାଟା ଆରି ଏଫୋଦ୍‌ ଆରି ଚୋଗା ଆରି ଜେବାବାନ୍‌ ଆଲ ଜାକ ଜାର୍‌ଲେକ୍ନେ ସକା ଆରି ପାଗ୍‌ ଆରି ନ୍ସା ଗାଗ୍‌ନେ, ଆକେନ୍‌ ସାପା ସକା ମେଇଂ ଆରେ ଆର୍‌ଏ । ନେ ମ୍ନିରେ ପୁଜାରି କାମ୍ ଡିଂନେସା ନାନେ ବୟାଁ ହାରୋଣ ଆରି ମେଁନେ ଉଂଡେଇଂନେ ଆତ୍‌ଲା ମେଇଂ ପବିତ୍ର ସକା ଆରେ ଆର୍‌ଏ । 5 ସୁନା ଆରି ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ୱେଁକ୍ନେ ତୁଲୁଏ ପାତଲ୍‌ ସୁତା ରାଙ୍ଗ୍‌ୱେଆର୍‌ଏ ।"

6 "ମେଇଂ ନିଲି, କଃଡ଼େଆଁ ବାନା, ସୁନ୍ଦର୍‌ ବାନା ଆରି ୱେଁକ୍ନେ ତୁଲୁଏ ପାତଲ୍‌ ସୁତା ଏତେ ସୁତା ତଗ୍‌ନେ ଟାଇଲର୍‌ଇଂନେ ସ୍ଲେ ଏତେ ଆତେନ୍‌ ଏଫୋଦ୍‌ ସକା ଆଃରେ ଆର୍‌ଲେ । 7 ଆକ୍ମେନେ ମ୍ୱାର୍‌ ବାଆଃନିଆ ମ୍ୱାର୍‌ନୁଗ୍‌ ଜାକ ଜଡ଼େଲେଃକ୍ନେ ମ୍ୱାକ୍ଲିଗ୍‌ ଜେବା ଲେଃଏ । ଦେକ୍‌ରକମ୍‌ ବାବ୍‌ରେ ଆତେନ୍‌ ମିସୁଏ । 8 ଏଫୋଦ୍‌ନେ ମୁଡ଼ି ମୁର୍‌ତି ଆରେବଗେ ଆତ୍‌ ଆଡ଼ାତ୍ରା ଲେଃଏ, ଆତେନ୍‌ ଆରେବକ୍ନେ ମୁର୍‌ତି କାମ୍‌ ଆତେନ୍‌ ସକା ଇସାବ୍‌ରେ ଡିଂଏ । ବାରି ସୁନାନିଆ ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ୱେଁକ୍ନେ ତୁଲୁଏ ପାତଲ୍‌ ସୁତା ଏତେ ଡିଂଏ । 9 ମ୍ୱାକ୍ଲିଗ୍‌ ଗୋମେଦକ* ମଣୀ ରାଙ୍ଗ୍‌ୱେଚେ ଆତ୍‌ ଆଡ଼ାତ୍ରା ଇସ୍ରାଏଲ୍‌ନେ ଉଂଡେଇଂନେ ମିନି ପେଗୁଆର୍‌ଏ । 10 ତୁର୍‌କିଲିଗ୍‌ ମିନି ବାରିମୁଇଂ ମଣୀ ଆଡ଼ାତ୍ରା ଆରି ବାକି ତୁର୍‌କିଲିଗ୍‌ ମିନି ବିନ୍ ମଣୀ ଆଡ଼ାତ୍ରା ଲେଃଏ । ଆକେନ୍‌ ସାପା ମିନିଇଙ୍ଗ୍‌ ମେଙ୍ଗ୍‌ନେ ଜନମ୍‌ ଅନୁସାରେ ଆଃଗୁଆର୍‌ ପଡ଼େଏ । 11 ସୁତା ମିସ୍ତୁରିଇଂନିଆ ଡାବୁ ଗଃନେ ନ୍ୟାୟ୍‌ ଆତେନ୍‌ ମ୍ୱାର୍‌ ମଣୀ ଆଡ଼ାତ୍ରା ଇସ୍ରାଏଲ୍‌ନେ ଉଂଡେଇଂନେ ମିନି ତ୍ନାଏ, ବାରି ଆତେନ୍‌ ମ୍ୱାକ୍ଲିଗ୍‌ ସୁନାନେ ସିଲ୍‌ ଏତେ ଡାବିଏ । 12 ଆକେନ୍‌ ଇଡ଼ିଙ୍ଗ୍‌ ଇସ୍ରାଏଲ୍‌ ରେମୁଆଁଇଂକେ ମନେ ତ୍ଲାଗ୍‌ନେସା ପେ ଆତେନ୍‌ ମ୍ୱାକ୍ଲିଗ୍‌ ମଣୀକେ ଏଫୋଦ୍‌ନେ ମ୍ୱାର୍‌ ଜେବାନିଆ ପେବିଏ । ଆତ୍‌ଅରିଆ ହାରୋଣକେ ମନେ ତ୍ଲାଗ୍‌ନେସା ମାପ୍‌ରୁନେ ସାମ୍‌ନେ ମେଁନେ ମ୍ୱାକ୍ଲିଗ୍‌ ଜେବାନିଆ ମେଙ୍ଗ୍‌ନେ ମିନି ଡୁଙ୍ଗ୍‌ଏ । 13 ନିର୍‌ମଲ୍‌ ସୁନା ତ‍ଅଁ ଏତେ ଆକେନ୍‌ ବ୍ରି ଏଫୋଦ୍‌ନିଆ ଡିଂଏ । 14 ମ୍ୱାକ୍ଲିଗ୍‌ ୱେଁଲେଃକ୍ନେ ସୁନାନେ ସିକ୍‌ଲି ଆଡିଂଚେ ଆତେନ୍‌ ଏଫୋଦ୍‌ନିଆ ପେଲାଗାଏ ।"

15 "ସାପା ମ୍ୟାଲେକ୍ନେ ମିସ୍ତୁରି ଏତେ ନିମାଣ୍ଡା ବାବ୍‌ରେ ଗ୍ରିନିଆ ତଗଃନେ ପାଟା ଆରେପା । ଗ୍ରିନିଆ ସଃନେ ପାଟା ଏଫୋଦ୍‌ନେ କାମ୍‌ ଇସାବ୍‌ରେ ସୁନାଅରିଆ ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍ ବାନା ଆରି ୱେଁକ୍ନେ ତୁଲୁଏ ପାତଲ୍ ସୁତା ଏଃତେ ମ୍ୟାଃଲାଏଃକ୍ନେ ଟାଇଲର୍‌ନେ କାମ୍ ଏଃତେ ଆତେନ୍ ତିଆର୍ ଡିଂଏ । 16 ଅଁକନ୍‌ ଆରି ଦୋହରା ଡିଂଏ । ଆତେନ୍‌ ଉଚା ମୁଇଂ ବିତା ଆରି ଅସାର୍‌ ମୁଇଂ ବିତା ଡିଂଏ । 17 ଆମେକେ ଅଁ ଦାଡ଼ିନିଆ ମଣୀ ଏତେ ପେପଡ଼େଗ୍‌ଏ । ଆତ୍‌ଅରିଆ ପର୍‌ତୁମ୍‌ ଦାଡ଼ିନିଆ ଚୁଣି ଆରି ପୀତମଣୀ ଆରି ମରକତ ମଣି ପେଡିଂଏ । 18 ଦ୍ୱିତୀୟ ଦାଡ଼ିନିଆ ପଦ୍ମରାଗ ଆରି ନୀଳକାନ୍ତ ଆରି ହିରା, 19 ତୃତୀୟ ଦାଡ଼ିନିଆ ପେରୋଜ, ଯିସ୍ମ ଆରି କଟାହେଳା । 20 ଚତୁର୍ଥ ଦାଡ଼ିନିଆ ବୈଦୂର୍ଯ୍ୟ ମଣୀ, ଗୋମେଦକ ମଣୀ ଆରି ସୁର୍ଯ୍ୟକାନ୍ତ ମଣୀ । ଆକେନ୍‌ ସାପା ସୁନାନିଆ ନିଜର୍‌ ନିଜର୍‌ ଦାଡ଼ିନିଆ ଆଃକଆର୍‌ଏ । 21 ଆକେନ୍‌ ମଣୀ ଇସ୍ରାଏଲ୍‌ ରେମୁଆଁଇଂନେ ମିନି ଆତ୍‌ଲା ମେଙ୍ଗ୍‌ନେ ମିନି ଇସାବ୍‌ରେ ଆତେନ୍‌ ବ୍ରି ଆଡ଼ାତ୍ରା ଗମ୍ୱାର୍‌କିଲିଗ୍‌ ବଂସ ଆତ୍‌ଲା ସାପା ଉଂଡେଇଂନେ ମିନି ଲେଃଏ । 22 ଗ୍ରିନିଆ ସଃନେ ପାଟା ଆତ୍‌ଲା ତ‍ଅଁଇଙ୍ଗ୍‌ ତିଆର୍‌ ଡିଂପା । ଆକେନ୍‌ ତ‍ଅଁ ନିର୍ମଲ୍ ସୁନା ଏତେ ପେମଡ଼େଏ । 23 ଗ୍ରିନିଆ ସଃନେ ପାଟା ଆଡ଼ାତ୍ର ସୁନାନେ ମ୍ୱାର୍‌ କାଡ଼ୁ ଲେଃଏ । ଗ୍ରିନିଆ ସଃନେ ପାଟାନିଆ ମ୍ୱାର୍‌ ପାକା ଆତେନ୍‌ ମ୍ୱାର୍‌ କାଡ଼ୁ ପେଲାଗାଏ । 24 ଗ୍ରିନିଆ ସଃନେ ପାଟାନିଆ ମ୍ୱାକ୍ଲିଗ୍‌ ସୁନାନେ କାଡ଼ୁ ବିତ୍‌ରେ ଆତେନ୍‌ ମ୍ୱାକ୍ଲିଗ୍‌ ସୁନାନେ ମାଲି ପେଲାଗାଏ । 25 ମ୍ୱାକ୍ଲିଗ୍‌ ସୁନାନେ ତ‍ଅଁକେ ମ୍ୱାର୍‌ ବାଆଃକେ ଏଫୋଦ୍‌ନେ ଜେବାନିଆ ଗେହେଃ ଏତେ ପେଗାଗ୍‌ଏ । 26 ଆରି ମ୍ୱାକ୍ଲିଗ୍‌ ସୁନାନେ କାଡ଼ୁ ତିଆର୍‌ ଡିଂପା ଆରି ଗ୍ରିନିଆ ସଃନେ ପାଟାନିଆ ଏଫୋଦ୍‌ନେ ବିତ୍‌ରେ ବାଗ୍‌ନେ ମ୍ୱାର୍‌ କନ୍‌ନିଆ ଆମେକେ ଲାଗେପା । 27 ଆରି ମ୍ୱାକ୍ଲିଗ୍‌ ସୁନାନେ କାଡ଼ୁ ଡିଂଚେ ଏଫୋଦ୍‌ ସକାନେ ମ୍ୱାର୍‌ନୁଗ୍ ଜେବା ଆଲ ମେଁନେ ସାମ୍‌ନା ବାଗ୍‌ନେ ଜଡ଼େବକ୍ନେ ଜାଗାନ୍ନିଆ ଏଫୋଦ୍‌ନେ ଚିତ୍ର ଆରେବକ୍ନେ ପଟୁକା ଆଡ଼ାତ୍ରା ଆତେନ୍‌ ପେବଏ ।" 28 ଗ୍ରିନିଆ ସଃନେ ପାଟା ଡିରକମ୍‌ ଏଫୋଦ୍‌ନେ ଚିତ୍ର ଆରେବକ୍ନେ ପଟୁକା ଆଡ଼ାତ୍ରା ଲେଃଚେ ଏଫୋଦ୍‌ବାନ୍‌ ଆୱେ ଆତେନ୍‌ସା ମେଇଂ ଗ୍ରିନିଆ ସଃନେ ପାଟାକେ ନିଜର୍‌ନେ କାଡ଼ୁ ଏତେ ନିଲି ସୁତା ଏତେ ଏଫୋଦ୍‌ନେ କାଡ଼ୁ ଏତେ ଡା ବଏ । 29 ଉଡ଼ିବେଲା ହାରୋଣ ପବିତ୍ର ଜାଗାନ୍ନିଆ ଗାଏ, ଆତେନ୍‌ ବେଲା ମାପ୍‌ରୁନେ ସାମ୍‌ନେ ମନେ ତ୍ଲାଗ୍‌ନେସା ମେଁ ବିଚାର୍‌ ଡିଂନେ ଗ୍ରିନିଆ ସଃନେ ପାଟା ଏତେ ଇସ୍ରାଏଲ୍‌ ଗଡ଼େଇଂନେ ମିନି ସାପା ନିଜେନେ ଉର୍‌ଦୟ୍‌ ଆଡ଼ାତ୍ରା ପେଗୁଆର୍‌ଏ । 30 ଆତେନ୍‌ ବିଚାର୍ ଡିଂନେ ଗ୍ରିନିଆ ସଃନେ ପାଟା ଏତେ ପେ ଉରିମ୍‌* ଆରି ତୁମ୍ମିମ୍‌* ପେବଏ । ଆତ୍‌ଅରିଆ ହାରୋଣ ଉଡ଼ିବେଲା ମାପ୍‌ରୁ ଡାଗ୍ରା ଗାଏ । ଆତେନ୍‌ ବେଲା ହାରୋଣନେ ମନ୍‌ ଆଡ଼ାତ୍ରା ଆତେନ୍‌ ଲେଃଏ, ବାରି ହାରୋଣ ମାପ୍‌ରୁ ଡାଗ୍ରା କାଲାଆଃ ଇସ୍ରାଏଲ୍‌ ଗଡ଼େଇଂନେ ବିଚାର୍‌ ନିଜର୍‌ ମନ୍‌ ଆଡ଼ାତ୍ରା ଡୁଙ୍ଗ୍‌ଏ ।

31 "ଏଫୋଦ୍‌ ଆତ୍‌ଲା ପୁରାପୁରି ବାବ୍‌ରେ ନିଲି ବାନା ଏତେ ସକା ତିଆର୍‌ ଡିଂପା । 32 ଆକ୍ମେନେ ମଜେ ବାଆ ଗାନ୍‌ସା ମୁଇଂ ପ୍ଲଗ୍‌ ଲେଃଏ । ସାଞ୍ଜୁଆନେ ଗୋଳଦେଶ ନ୍ୟାୟ୍ ଆତେନ୍‌ ପ୍ଲଗ୍‌ନେ ଚାର୍‌ବିଡ଼୍‌ତିନିଆ ତେନ୍ କାମ୍‌ ଡିଂଏ । ତେଲା ଆତେନ୍‌ ଆତେକ୍‌ଚି ଣ୍ଡୁ । 33 ପେ ଆତେନ୍‌ ଏରିଆନେ ଚାର୍‌ବିଡ୍‌ତି ନିଲି, କଃଡ଼େଆଁ ବାନା ଆରି ସିନ୍ଦୁର୍‌ ବାନାନେ ଡାଲିମ୍ବ ରୁପ୍‌ ପେଡିଂଏ । ଆରି ଅଁ ଦିଗ୍‌ନିଆ ଆତ୍‌ ବିତ୍‌ରେ ସୁନା ଗଣ୍ଟା ଲେଃଏ । 34 ଆତେନ୍‌ ସକାନେ ଆଲନେ ଚାର୍‌ବେଡ଼୍‌ତିନିଆ ମୁଇଂ ସୁନା ଗଣ୍ଟା ଆରି ମୁଇଂ ଡାଲିମ୍ବ ବାରି ମୁଇଂ ସୁନା ଗଣ୍ଟା ଆରି ମୁଇଂ ଡାଲିମ୍ବ ଲେଃଏ । 35 ହାରୋଣ ସେବା ଡିଂନେବେଲା ଆତେନ୍‌ ସଃଏ । ମେଁ ଆତ୍‌ଲା ଡିଗ୍‌ ମେଁ ଉଡ଼ିବେଲା ମାପ୍‌ରୁନେ ଡାଗ୍ରା ପବିତ୍ର ଜାଗାନ୍ନିଆ ଗାଏ ଆରି ୱେଏ, ଆତେନ୍‌ ବେଲା ଗଣ୍ଟାନେ ସାମୁଆଁ ଅଁଏ । ଦେକ୍‌ରକମ୍‌ ହାରୋଣ ଆଗୁଏ ଣ୍ଡୁ ।"

36 "ନିର୍‌ମଲ୍‌ ସୁନାନେ ମୁଇଂ ପଟି ଆରେପା ଆରି ଡାଆଁନେ ସିଲ୍‌ ଏତେ ଗୁଆର୍‌କ୍ନେ ସୁଗୁଆ ଆକେନ୍‌ ଆଡ଼ାତ୍ରା ଗୁଆର୍‌ପା; ମାପ୍‌ରୁନେ ଉଦେସ୍‌ରେ ପବିତ୍ର । 37 ବାରି ପାଗ୍‌ ଆଡ଼ାତ୍ରା ଲେଃନ୍‌ସା ଆମେକେ ନିଲି ସୁତା ଏଃତେ ଡାବିଃଚେ ପାଗ୍‌ନେ ସାମ୍‌ନେ ପେବଏ । 38 ଆକେନ୍ ହାରୋଣ୍‌ନେ କାପାଲ୍‌ ଆଡ଼ାତ୍ରା ଲେଃଏ । ଆତ୍‌ବାନ୍‌ ପବିତ୍ର ଜିନିସ୍‌ ସାପା ପାପ୍‌, ଡାଗ୍‌ଲା ଇସ୍ରାଏଲ୍‌ ଗଡ଼େଇଂ ପେନି ପବିତ୍ର ଡିଂଲାଏକ୍ନେ ପବିତ୍ର କାଦି ସାପା ଜିନିସ୍‌ ବିସୟ୍‌ରେ ଆଣ୍ଡିନେ ପାପ୍‌ ଡିଂଆର୍‌ଏ, ଆତେନ୍‌ ହାରୋଣ ଡୁଂଏ ବାରି ମାପ୍‌ରୁନେ ସାମ୍‌ନେ ମେଇଂ ଯେନ୍ତିକି ଗ୍ର‍ଅନ୍‌ ଡିଂଆର୍‌ଏ, ଆତେନ୍‌ସା କାଲାଆଃ ମେଁ କାପାଲ୍‌ନିଆ ଲେଃଏ ।"

39 "ପେ ସକାକେ ବିତ୍ରେ ସଃନେ ସକା ତୁଲୁଏ ସକା‍ଅରିଆ ଆରି ପାଗ୍‌କେ ତୁଲୁଏ ସୁତା ଗର୍‌ଣ୍ଡା ଏତେ ତିଆର୍ ପେଡିଂଏ । ବାରି ନ୍‌ସା ଗାଗ୍‌ନେ ତୁଆଲ୍‌ ସୁଜି ଏତେ ଚିନ୍‌ବିନ୍‌ ପେଡିଂଏ ।"

40 ହାରୋଣନେ ଉଂଡେଇଂନେ ଆତ୍‌ଲା ବଡ଼୍‌ଗାକ୍ନେ ସକା, ନ୍‌ସା ଗାଗ୍‌ନେ ଆରି ଫାଗ୍‌ ଆରେପା । ଆକେନ୍‌ ଗର୍‌ଣ୍ଡାଇଙ୍ଗ୍‌ ଆମେଇଂକେ ସନ୍‌ମାନ୍‌ ଆରି ସବା ବିଏ । 41 ବାରି ନାନେ ବୟାଁ ହାରୋଣକେ ଆରି ମେଁନେ ଉଂଡେଇଂକେ ଆତେନ୍‌ ସାପା ପାଟାଇ ଆଃସପା । ଇଡ଼ିଂ ଆମେଇଂକେ ପଦ୍‌ଅରିଆ ବଚେ ଆସିର୍ବାଦ୍‌ ଡିଂ, ଇଡ଼ିଂ ଆମେଇଂକେ ପୁଜାରି ରକମ୍‌ ନେଙ୍ଗ୍‌ନେ ସେବା ଡିଂନେସା ଆନ୍ତାର୍‌ବି । 42 "ମେଙ୍ଗ୍‌ନେ ଡିଗ୍‌ଚା ଲାଏଃକ୍ନେ ଡିଡାନ୍‌ସାଃ ନ୍‌ସାଃବାନ୍‌ ବୁଲୁ ଜାକ ତୁଲୁଏକ୍ନେ ସେକ୍‌ପୁଆ ପେରାଃସଏ । 43 ଆରି ଉଡ଼ିବେଲା ହାରୋଣ ଆରି ମେଁନେ ଉଂଡେଇଂ କୁକପାର୍‌ କୁଡ଼ିଆନିଆ ଗାଆର୍‌ଏ ଣ୍ଡୁଲା ପବିତ୍ର ଜାଗାନ୍ନିଆ ସେବା ଡିଂନେସା ପୁଜା ବେଦି ଡାଗ୍ରା ଡିଂଆର୍‌ଏ, ଆତେନ୍‌ ବେଲା ମେଇଂ ଆକେନ୍‌ ସକା ସଃପଡ଼େଏ, ତେଲା ମେଇଂ ଦସି ଆଡିଂଆର୍ ଣ୍ଡୁ । ଆରି ଆଗୁଏଆର୍‌ ଣ୍ଡୁ । କାଲାଆଃ ମେଇଂ ପୁଜାରି ରକମ୍‌ ଡିଂଆର୍‌ଲେ ଆକେନ୍‌ ହାରୋଣନେ ଆରି ମେଁନେ ଇଡ଼ିଂଡେନେ ବଂଶଧରଇଂନେ ଆତ୍‌ଲା ମାଡାନେ କାଲ୍‌ ଜାକ ଆକେନ୍‌ ନିଅମ୍‌ ପାଲେଆର୍‌ଏ ।"