1 ଆତ୍‌ବା ମୋଶା ବାରି ହାରୋଣ ଗାଚେ ଫାରୋକେ ବାସଙ୍ଗ୍‌କେ, "ଇସ୍ରାଏଲ୍‌ନେ ମାପ୍‌ରୁ ପର୍‌ମେସର୍‌ ବାସଙ୍ଗ୍‌ଡିଂକେ, ବାଲିଲଃ ଆଃଡ଼ାଃ ନେଙ୍ଗ୍‌ ମ୍ନିରେ ପାଣ୍ଡୁଏ ଡିଂନ୍‌ସା ନେ ରେମୁଆଁଇଂକେ ଆନ୍ତାର୍‌ ବିଃ ।"

2 ଆତ୍‌ବା ଫାରୋ ବାସଙ୍ଗ୍‌କେ, ମାପ୍‌ରୁ ଜାଣ୍ଡେ, ଜେ ନେ ମେଁନେ ସାମୁଆଁ ମାନେଚେ ଇସ୍ରାଏଲ୍‌ ଦେସ୍‌ନିଆ ୱେନ୍‌ସା ଆନ୍ତାର୍‌ ନେବିଏ ? ନେ ମାପ୍‌ରୁକେ ନେସାମୁଁଆଃକେ ଣ୍ଡୁ ବାରି ଇସ୍ରାଏଲ୍‌କେ ନେ ନେଆନ୍ତାର୍‌ ଣ୍ଡୁ ।

3 ମେଇଂ ବାସଙ୍ଗ୍‌କେ, ଏବ୍ରୀୟଇଂନେ ପର୍‌ମେସର୍‌ ଆନେକେ ଦର୍ଶନ୍‌ ବିଃବକେ; ଆତେନ୍‌ସା ନେ ସାର୍‌ଲ ଡିଂନେଡିଂକେ, ମାପ୍‌ରୁ ପର୍‌ମେସର୍‌ନେ ମ୍ନିରେ ବଲି ବିନ୍‌ସା ଆନେକେ ବାଲିଲ ଆଃଡ଼ା ୱେନ୍‌ସା ଜିର୍‌ସି ୱେନେ ଗାଲି ବିଲା; ଣ୍ଡୁଲା ମେଁ ଆନେକେ ମୁର୍‌ଡିବାନ୍‌ ଣ୍ଡୁଲା କାଣ୍ଡା ଏତେ ବାଗୁଏଃଏ ।

4 ଆତ୍‌ବା ମିସର୍‌ନେ ରାଜା ଆମେଇଂକେ ବାସଙ୍ଗ୍‌କେ, ଅ ମୋଶା ବାରି ହାରୋଣ, ପେ ରେମୁଆଁଇଂକେ ମେଃନ୍‌ସା ସ୍ଲେବାନ୍‌ ବୁଙ୍ଗ୍‌ ଲେଃନ୍‌ସା ବାସଙ୍ଗ୍‌ପେଡିଂକେ ? ପେ ପେନି ଲିଗିଙ୍ଗ୍‌ ଡୁଙ୍ଗ୍‌ନେ କାମ୍‌ଅରିଆ ୱେଲାପା । 5 ଫାରୋ ବାରି ବାସଙ୍ଗ୍‌କେ, କେଲାପା, ଏବେ ଆକେନ୍‌ ଦେସ୍‌ନିଆ ଆକେନ୍‌ ରେମୁଆଁ ଜାବର୍‌, ବାରି ପେ ଆମେଇଂକେ ଲିଗିଙ୍ଗ୍‌ ଡୁଙ୍ଗ୍‌ନ୍‌ସା ମନା ଡିଂପେଡିଂକେ ।

6 ବାରି ଫାରୋ ଆତେନ୍‌ ଦିନା ରେମୁଆଁଇଂନେ ଆସ୍ଲେନେ ରେମୁଆଁ ବାରି ନେତାଇଂକେ ଆକେନ୍‌ ଆଦେସ୍‌ ବିକେ, 7 ପେ ଇଟା ଆଃରେ ନ୍‌ସା ସିସେ ରକମ୍‌ ଆକେନ୍‌ ରେମୁଆଁଇଂ ବାରି ପିଆଲ୍‌ ଆବିଃଗ୍‌ପା; ମେଇଂ ୱେଚେ ନିଜର୍‌ ଆତ୍‌ଲା ପିଆଲ୍‌ ରାଃସିଂଆର୍‌ଲେ । 8 ବାରି ସିସେ ମେଙ୍ଗ୍‌ନେ ଆଡ଼ାତ୍ରା ଉଃଡ଼ି ଇଟା ଆଃରେନେ କାମ୍‌ ବିଃବଗେ, ଏବେ ଆତେନ୍‌ କାମ୍‌ ବିଃପା; ଆତ୍‌ବା ଇକୁଡ଼ା ଡିଗ୍‌ ଉନା ଆରାଡିଙ୍ଗ୍‌ପା; ମେଃଡାଗ୍‌ଲା ମେଇଂ ଅଲ୍‌ସୁଆ; ତେନ୍‌ସା ଆନେକେ ପର୍‌ମେସର୍‌ନେ ମ୍ନିରେ ବଲି ବିଃନ୍‌ସା ଆନ୍ତାର୍‌ ବିଃପା ଡାଗ୍‌ଚେ ୱାଡିଂଆର୍‌କେ; 9 ମେଃଡାଗ୍‌ଲା କିମେଇଂ କାମ୍‌ ଲିଗିଙ୍ଗ୍‌ନିଆ ଲିଗିଙ୍ଗ୍‌ ଡୁଙ୍ଗ୍‌ଚେ ଆତ୍‌ନିଆ ତାନ୍ଦ୍ରା ଲେଃଆର୍‌ଲେ; ମିଚ୍‌ ସାମୁଆଁଅରିଆ ଦିଆନ୍‌ ଆବିଃଆର୍‌ଲେ ।

10 ଆତ୍‌ବା ରେମୁଆଁଇଂକେ ଆସ୍ଲେନେ ରେମୁଆଁ ବାରି ନେତାଇଂ ବାଏରେ ୱେଚେ ଆମେଇଂକେ ବାସଙ୍ଗ୍‌କେ, ଫାରୋ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେ ଆପେକେ ଆରି ପିଆଲ୍‌ ନେବି ଣ୍ଡୁ 11 ପେ ଆଣ୍ଡିଅରିଆ ପିଆଲ୍‌ ବା ପେୟାଏ, ଆତ୍‌ଅରିଆ ୱେଚେ ପେ ଆତ୍‌ଲା ପିଆଲ୍‌ ରାସିଂପା; ମାତର୍‌ ପେନି କାମ୍‌ ଇକୁଡ଼ା ଡିଗ୍‌ ଆଗଣ୍ଡା ଣ୍ଡୁ । 12 ଆତ୍‌ବା ରେମୁଆଁଇଂ ପିଆଲ୍‌ ଆନ୍ତାର୍‌ଚେ ନାଡ଼ା ତୁର୍‌ ଅଲେଙ୍ଗ୍‌ନେସା ସାପା ମିସର୍‌ ଦେସ୍‌ନିଆ କ୍ଲିଗ୍‌ ପାକା ଡିଙ୍ଗ୍‌ୱେଆର୍‌ଗେ । 13 ଏଲେଡିଗ୍‌ ଆସ୍ଲେରେଇଂ ବାଦ୍ୟ ଆଡିଂଚେ ବାସଙ୍ଗ୍‌ଆର୍‌କେ, ପିଆଲ୍‌ ବାନେ ବେଲା ଡିଡିରକମ୍‌ କି ପେ ସ୍ଲେ ପେଡିଂଗେ, ଦେତ୍‌ରକମ୍‌ ଏବେ ଡିଗ୍‌ ମୁଇଂ ଦିନ୍‌କେ ଉଃଡ଼ି ଡିଂପେଡିଙ୍ଗ୍‍କେ ଅଃତେନ୍‌ କାଲାଆଃ ଡିଙ୍ଗ୍‌ପା । 14 ଫାରୋନେ କାମ୍‌ ଆଃଡିଂନେ ନେତାଇଂ ଇସ୍ରାଏଲ୍‌ ବଂସନେ ଆଣ୍ଡିନେ କାମ୍‌ ଆଃଡିଂନେ ନେତାଇଂକେ ବଗେ; ଆମେଇଂକେ ବଗ୍‌ଚେ ବାସଙ୍ଗ୍‌କେ, "ପେ ସିସେ ରକମ୍‌ ଇଟା ଆଃରେନେ କାଲାଆଃ ଡିଂନେ କାମ୍‌ ମେଃନ୍‌ସା ଆଜିକାଲି ଆଃଡା ପେଡିଂକେ ?"

15 ଆତ୍‌ବା ଇସ୍ରାଏଲ୍‌ ବଂସନେ ଆସ୍ଲେନେ ନେତାଇଂ ପାଙ୍ଗ୍‌ଚେ ଫାରୋ ଡାଗ୍ରା ଅଃଚେ ବାସଙ୍ଗ୍‌କେ, "ନା ମେଃନ୍‌ସାଃ ନାନେ ଗୁତିରେଇଂ ଏତେ ଦେକ୍‌ରକମ୍‌ ବେବଆର୍‌ ଡିଙ୍ଗ୍‌ନାଡିଂକେ ? 16 ନାନେ ଦାସଇଂକେ ପିଆଲ୍‌ ବିଃଆଡିଂଆର୍‌କେ, ତେଲାଡିଗ୍‌ ମେଇଂ ବାସଙ୍ଗ୍‌ଡିଂଆର୍‌କେ, ଇଟା ଆଃରେପା; ବାରି କେଲାପା, ନାନେ ଦାସଇଂ ମାଡ଼୍‌ ଚଙ୍ଗ୍‌ଡିଂଆର୍‌କେ, ମାତର୍‌ ଦସ୍‌ ନାନେ ନିଜର୍‌ ରେମୁଆଁଇଂନେ ।"

17 ବାରି ମେଁ ବାସଙ୍ଗ୍‌କେ, "ପେ ଜାବର୍‌ ଅଲ୍‌ସୁଆ, ଆତେନ୍‌ସା ବାସଙ୍ଗ୍‌ପେଡ଼ିଂ, ମାପ୍‌ରୁନେ ମ୍ନିରେ ବଲି ବିଃନ୍‌ସା ଆନେକେ ଆନ୍ତାର୍‌ବି । 18 ଏବେ ୱେଲାପା, ସ୍ଲେପା, ଆପେକେ ପିଆଲ୍‌ ଆବିଆର୍‌ ଣ୍ଡୁ, ଏଲେଡିଗ୍‌ ଆପେକେ ଇଟାନେ ସାପା ଇସାବ୍‌ ବିନେ ପଡ଼େଏ । 19 ଆତ୍‌ବା ପେ କାଲାଆଃ ଆଃରେନେ ଇଟାବାନ୍‌ ମେଃଡିଗ୍‌ ଆଗଣ୍ଡା ଣ୍ଡୁ; ଆକେନ୍‌ ସାମୁଆଁରେ ଇସ୍ରାଏଲ୍‌ ବଂସନେ ଆସ୍ଲେନେ ନେତାଇଂ କେଆର୍‌କେ ଜେ, ମେଙ୍ଗ୍‌ନେ କସ୍‌ଟ ଅମଙ୍ଗଲ୍‌ ଚିନ୍‌ ରକମ୍‌ ।"

20 ଏନ୍‌ଇଡ଼ିଂ ମେଇଂ ଫାରୋ ଡାଗ୍ରା ପାଙ୍ଗ୍‌ ବେଲା ମୋଶା ବାରି ହାରୋଣକେ ଅବାକେ, ମେଇଂ ଗାଲିବ ତୁଆଁ ଲେଃଆର୍‌ଗେ; 21 ଆତେନ୍‌ସା ଆମେଇଂକେ ବାସଙ୍ଗ୍‌କେ, ମାପ୍‌ରୁ ପେ ଆଡ଼ାତ୍ରା କେଚେ ବିଚାର୍‌ ଡିଙ୍ଗ୍‌ଲେ; ମେଃଡାଗ୍‌ଲା ପେ ଫାରୋ ବାରି ମେଁନେ ଦାସିଇଂନେ ସାମ୍‌ନେ ଆନେକେ ଗିନ୍‌ ଡିଂଚେ ଆନେକେ ବାଗୁଏ ନ୍‌ସା ମେଙ୍ଗ୍‌ନେ ନ୍ତିନିଆ କାଣ୍ଡା ନାବିକେ ।

22 ଆତ୍‌ବା ମୋଶା ମାପ୍‌ରୁ ଡାଗ୍‌ରା ୱେଚେ ବାସଙ୍ଗ୍‌କେ, ଅ ମାପ୍‌ରୁ, ନା ଏନ୍‌ ରେମୁଆଁଇଂନେ ଅମଙ୍ଗଲ୍‌ ମେଃନ୍‌ସା ନାଡିଂକେ ? ଆନେଙ୍ଗ୍‌ ବାରି ମେଃନ୍‌ସା ନାବେକେ ? 23 ମେଃଡାଗ୍‌ଲା ଆଣ୍ଡିନେ ଦିନ୍‌ବାନ୍‌ ନେଙ୍ଗ୍‌ ନା ମିନିରେ ସାମୁଆଁ ବାସଙ୍ଗ୍‌ ନ୍‌ସା ଫାରୋ ଡାଗ୍ରା ମ୍ପାଙ୍ଗ୍‌କେ, ଆତେନ୍‌ ଦିନାବାନ୍‌ ମେଁ ଏନ୍‌ ରେମୁଆଁଇଂନେ ଅମଙ୍ଗଲ୍‌ ଡିଂଡିଂକେ, ବାରି ନା ନାନେ ରେମୁଆଁଇଂକେ ଇତୁଡ଼ା ଡିଗ୍‌ ଉଦାର୍‌ ନାଡିଂକେ ଣ୍ଡୁ ।