1 ମାପ୍‌ରୁ ମୋଶାକେ ବାସଙ୍ଗ୍‌କେ, "ପବିତ୍ର କୁଡ଼ିଆ କୁବାଙ୍ଗ୍‌କ୍ନେ ଲାଇଲନ୍‌ ସୁତାନେ ଗୁଆକ୍ଲିଗ୍‌ ସୁତା ଏତେ ତିଆର୍‌ ଡିଂଏ । ଆତେନ୍‌ ପର୍‌ଦା ସାପା ନିଲିଆ, କଃଡ଼େଆଁ ବାନା ଆରି ଚିକ୍ନେ ସୁତା ଏତେ ତିଆର୍‌ ଡିଂଏ ଆରି ଆତ୍‌ଅରିଆ କିରୂବ ଦୁତ୍‌ଇଂନେ ରୁପ୍‌ ଲେଃଏ । 2 ସାପା ପର୍‌ଦା ସେଗାର୍‌ଲା ସମାନ୍‌ ରକମ୍‌ ଡିଂଏ । ସାପା ପର୍‌ଦା ଅଟେଇସ୍‌ ନ୍ତି ଚ୍ଲେ, ଅଁ ନ୍ତି ଅସାର୍‌ ଡିଂଏ । 3 ମ୍ୱାର୍‌ ବାଗ୍‌ ଡିଂଚେ ପର୍‌ଦାଇଙ୍ଗ୍‌ନେ ଗଟି ମୁଇଂତୁଗ୍‌ ରାସିଂପା । ସାପା ଗଟି ମାଲ୍‌ ବାଗ୍‌ ଗର୍‌ଣ୍ଡା ବଚେ ମୁଇଂକେ ବାରି ମୁଇଂ ଏତେ ଯଡ଼େ ବିଃପା । 4 ମ୍ୱାର୍‌ ଜାକନେ ପରଦାଇଙ୍ଗ୍‌ନେ ଧଡ଼ି ଜାଲେରି କାମ୍‌ ନ୍‌ସା ନିଲି ପାଟାଇ ବେବଆର୍‌ ଡିଂପା । 5 ପର୍‌ତୁମ୍‌ ଗର୍‌ଣ୍ଡା ଧଡ଼ି ଏତେ ପଚାସ୍‌ ଉନୁଗ୍‌ସିର୍‌ ପେଡିଂଏ । ଯଡ଼ା ଜାଗାନେ ବାରିମୁଇଂ ଗର୍‌ଣ୍ଡା ଧଡ଼ି ଏତେ ପଚାସ୍‌ ଉନୁଗ୍‌ସିର୍‌ ପେଡିଂଏ । ଆତେନ୍‌ ମ୍ୱାକ୍ଲିଗ୍‌ ଉନୁଗ୍‌ସିର୍‌ ଡୁଆ ମ୍ୱାୟା ସାମ୍ନା ସାମ୍ନି ଡିଂଚେ ଲେଆର୍‌ଏ । 6 ବାରି ପଚାସ୍‌ଟା ଆକୁଡ଼ି ଡିଂଚେ ଆକୁଡ଼ିନେ ପର୍‌ଦା ସାପା ଯଡ଼ାଯଡ଼ି ଡିଂଚେ ଲେଃଏ ଆତ୍‌ଅରିଆ ମୁଇଂ ବାସାନେ ଜାଗା ଡିଂଏ ।"

7 "ବାରି ମୁଇଂ କୁଡ଼ିଆ ତିଆର୍‌ ଡିଂପା, ଆଣ୍ଡିନେକି ଆକେନ୍‌ ପବିତ୍ର ଡୁଆକେ ଡାଚେ ଲେଃଏ । କୁଡ଼ିଆ ଡିଂନେସା ଗିମିନେ ଉକ୍‌ସା ଏତେ ତିଆର୍‌ଡିଂକ୍ନ ଏଗାର୍‌ଟା ପର୍‌ଦା ବେବଆର୍‌ ଡିଂପା । 8 ଆକେନ୍‌ ଏଗାର୍‌ ବାଗ୍‌ ଗର୍‌ଣ୍ଡା ମୁଇଂ ରକମ୍‌ ଡିଂନେ ଦର୍‌କାର୍‌ । ଆକ୍ମେନେ ଚ୍ଲେ ତିରିସ୍‌ ନ୍ତି ଆରି ଅସାର୍‌ ଅଁ ନ୍ତି ଡିଂନେ ଦର୍‌କାର୍‌ । 9 ମାଲ୍‌କିଲିଗ୍‌ ପର୍‌ଦାକେ ଜଡ଼େଚେ ଅଲ୍‌ଗା ବପା ବାରି ବିନ୍‌ ତୁର୍‌କିଲିଗ୍‌ ପର୍‌ଦାକେ ଅଲ୍‌ଗା ପେବେଏ, ବାରି ଆକ୍ମେଇଂନେ ବାନ୍‌ ତୁର୍‌କିଲିଗ୍‌ ପର୍‌ଦା ଜଡ଼େଚେ କୁଡ଼ିଆନିଆ ପେବଏ । 10 ଜଡ଼େବକ୍ନେ ଜାଗାନ୍ନିଆ ପର୍‌ତୁମ୍‌ ବିନ୍‌ ପର୍‌ଦାନେ ଜଡ଼େଚେ ଜଡ଼େକ୍ନେନିଆ ପଚାସ୍‌ ଉନୁଗ୍‌ସିର୍‌ ପେଡିଂଏ । ବାରି ମୁଇଂ ଗର୍‌ଣ୍ଡା ପର୍‌ଦାନେ ଜଡ଼େବକ୍ନେ ଜାଗାନ୍ନିଆ ଜଡ଼େଚେ ପଚାସ୍‌ ଉନୁଗ୍‌ସିର୍‌ ଆଃକପା । 11 ଇଡ଼ିଂ ପିତଲ୍‌ନେ ପଚାସ୍‌ଟା କାଡ଼ୁ ତିଆର୍‌ ଡିଂପା ଆରି ଆତେନ୍‌ କୁଡ଼ିଆନେ ଗର୍‌ଣ୍ଡା ଏତେ ଆକେନ୍‌ କାଡ଼ୁଇଙ୍ଗ୍‌କେ ଯଡ଼େ ବିଃପା, ଆକେନ୍‌ ମୁଇଂ କୁଡ଼ିଆ ଡିଂଏ । 12 ଆତେନ୍‌ କୁଡ଼ିଆନେ ପର୍‌ଦାନେ ଆକୁଡ଼ି ସୁତା, ଡାଗ୍‌ଲା, ଆଣ୍ଡିନେ ଅଦା ପର୍‌ଦା ଉଃଡ଼ି ବାକି ଲେଃଏ, ଆତେନ୍‌ ପବିତ୍ର କୁଡ଼ିଆନେ ପ୍ଲା ପାକା ୱେଜଙ୍ଗ୍‌ଚେ ଲେଃଏ । 13 ଆରି କୁଡ଼ିଆନେ ପର୍‌ଦା ଚ୍ଲେଲେକ୍ନେ ଆଣ୍ଡିନେ ବାଗ୍‌ ଆକ୍‌ଅରିଆ ମୁଇଂ ନ୍ତି ବାରି ଆତ୍‌ଅରିଆ ମୁଇଂ ନ୍ତି ଇକୁଡ଼ା ଲେଃଏ । ଆତେନ୍‌ ପବିତ୍ର କୁଡ଼ିଆନେ ଆଂପାକା ଆରି ଆନ୍ତ୍‌ପାକା ଡାନ୍‌ସା ୱେଜଙ୍ଗ୍‌ ଲେଃଏ ।"

14 ଆକେନ୍‌ ଇଡ଼ିଙ୍ଗ୍‌ ପେ ମିୟାଁ ଡିଂଲେକ୍ନେ ଉଂମେଣ୍ଡାନେ ଉକ୍‌ସା ଏତେ କୁଡ଼ିଆନେ ମୁଇଂ ସିଲାପ୍‌ ପେଡିଙ୍ଗ୍‌ଏ । ଆରି ମେଁ ଆଡ଼ାତ୍ରା ମୁଇଂ ଡାଆଁ ମେଣ୍ଡାନେ ଉକ୍‌ସା ଏତେ ବାରି ମୁଇଂ ସିଲାପ୍‌ ପେଡିଙ୍ଗ୍‌ଏ ।

15 "ଆତେନ୍‌ସା ପେ ବାସାନ୍‌ସା ଶିଟିମ୍‌ ସୁଆନେ ଞ୍ଚ ପେରାରେଏ । 16 ଆତେନ୍‌ ପାଟାଇଙ୍ଗ୍‌ ଗୁଆ ନ୍ତି ଚ୍ଲେ ମୁଇଂ ନ୍ତି ଅଦା ଅସାର୍‌ ଡିଂଏ । 17 ମ୍ବାର୍‌ ଞ୍ଚ ମ୍ୱାର୍‌ ପାକା ମ୍ୱାକ୍ଲିଗ୍‌ କୁଟି ଏତେ ଯଡ଼େ ବିଃପା । ପବିତ୍ର କୁଡ଼ିଆନେ ସୁଆନେ ମ୍ବାର୍‌ ଞ୍ଚ ସମାନ୍‌ ବାବ୍‌ରେ ଲେଃପଡ଼େଏ । 18 ପବିତ୍ର କୁଡ଼ିଆ ଆଃରେନ୍‌ସା ଦକିନ୍‌ ଦିଗ୍‌ ପାକା କୁଡ଼େଟା ପାଟା ବେବଆର୍‌ ଡିଂପା । 19 ଆତେନ୍‌ କୁଡ଼େଟା ଞ୍ଚ ଆଲ ଚାଲିସ୍‌ଟା ରୁପାନେ ଟେଙ୍ଗ୍‌ ପେରାଃରେଏ; ମୁଇଂ ପାଟା ଆଲ ମ୍ୱାକ୍ଲିଗ୍‌ ତୁଆଁନେ ଞ୍ଚ ଆତ୍‌ଲା ମ୍ୱାକ୍ଲିଗ୍‌ ଟେଙ୍ଗ୍‌ ବାରି ବିନ୍‌ ପାଟା ଆଲ ନ୍‌ସା ଡିଗ୍‌ ମେଙ୍ଗ୍‌ନେ ମ୍ୱାକ୍ଲିଗ୍‌ ମ୍ୱାକ୍ଲିଗ୍‌ ତୁଆଁନେ ଞ୍ଚ ଆତ୍‌ଲା ମ୍ୱାକ୍ଲିଗ୍‌ ଟେଙ୍ଗ୍‌ ଡିଂଏ । 20 ବାରି ପବିତ୍ର କୁଡ଼ିଆନେ ବିନ୍‌ ଗାଲିପାକା ଉତର୍‌ ଦିଗ୍‌ ପାକା କୁଡ଼େଟା ପାଟା ଲାଗେଏ । 21 ସାପା ଟିଆପାଟା ଆଲ ମ୍ୱାକ୍ଲିଗ୍‌ କଟ୍‌ଲା ଲେଃଏ । ଦେକ୍‌ରକମ୍‌ ରୁପାନେ ଚାଲିସ୍‌ଟା କଟ୍‌ଲା ଡିଂଏ । 22 ପବିତ୍ର କୁଡ଼ିଆନେ ପଶ୍ଚିମ୍‌ ଦିଗ୍‌ ପାକାନେ ପ୍ଲା ପାକା ଆତ୍‌ଲା ତୁର୍‌କିଲିଗ୍‌ ପାଟା ଡିଂଏ । 23 ପବିତ୍ର ତମ୍ୱୁନେ ପ୍ଲା ପାକା ସାପା କନ୍‌ କନ୍‌ ଡାଗ୍ରା ମ୍ୱାର୍‌ ବାଗ୍‌ କଟ୍‌ଲା ଲେଃଏ । 24 ଆତେନ୍ ଆଲ ଜଡ଼େଚେ ଆରି ଦେତ୍‌ରକମ୍‌ ଆତେନ୍‌ ବାଆଃନିଆ ପର୍‌ତୁମ୍‌ କାଡ଼ୁ ଡାଗ୍ରା ପେଜଡ଼େଏ, ଦେତ୍‌ରକମ୍‌ ମ୍ୱାର୍ ତର୍‌ ଡିଂଏ । ଆତେନ୍‌ ସାପା ମ୍ୱାର୍ କନ୍ ଆତ୍‌ଲା ଡିଂଏ । 25 କୁଡ଼ିଆନେ ପଶ୍ଚିମ୍‌ ବାଆଃନ୍‌ସା, ପାକାପାକି ତ୍ମାକିଲିଗ୍‌ ବାଗ୍‌ କଟ୍‌ଲା ଲେଃଏ । ସଉଲଟା ରୁପା ଟେଙ୍ଗ୍‌ ଡିଂଏ, ମ୍ୱାକ୍ଲିଗ୍‌ କଟ୍‌ଲାନିଆ ସାପା ଟେଙ୍ଗ୍‌ ଆଲ ।"

26 "ଗାଡ଼ା ଆଃରେନ୍‌ସା ପେ ଶିଟିମ୍‌ ସୁଆ ବେବଆର୍‌ ପେଡିଂଏ । ପବିତ୍ର କୁଡ଼ିଆ ନ୍‌ସା ମାଲିକିଲିଗ୍‌ ଗାଡ଼ା ତିଆର୍‌ ପେଡିଂଏ ମୁଇଂ ପାକା । 27 ବାରି ମୁଇଂ ପାକା ମାଲିକିଲିଗ୍‌ ଗାଡ଼ା ତିଆର୍‌ ଡିଂପା ଆରି ପଶ୍ଚିମ୍ ଦିଗ୍‌ନେ ପ୍ଲା ପାକା ଆଃରେପା । 28 ବାରି ମଜାମଜି ଗାଡ଼ା ପାଟାନେ ଡିଗ୍‌ ଦେସ୍‌ନେ ଆକାନ୍‌ ବାଆଃବାନ୍‌ ଆତାନ୍‌ ବାଆଃ ଜାକ ପେବାଏ । 29 ଆରି ଆତେନ୍‌ ସାପା ପାଟା ସୁନା ଏଃତେ ପେମଡ଼ାଏ ଆରି ଗାଡ଼ାନେ ଘରା ନ୍‌ସା ସୁନାନେ କଡ଼ା ପେଡିଂଏ, ବାରି, ଗାଡ଼ା ସାପା ସୁନା ଏତେ ପେମଡ଼ାଏ । 30 ନେଙ୍ଗ୍‌ କଣ୍ଡା ଆଡ଼ାତ୍ରା ବିମ୍ୱକ୍ନେ ଜଜ୍‌ନା ଅନୁସାରେ ପବିତ୍ର କୁଡ଼ିଆକେ ତିଆର୍‌ ଡିଂପା ।"

31 ପେ ନିଲି ବାନା ଆରି ସିନ୍ଦୁର୍‌ ବାନା, କଃଡ଼େଆଁ ବାନା, ୱେଁକ୍ନେ ତୁଲୁଏ ପାତଲ୍‌ ସୁତା ଏତେ ମୁଇଂ ପର୍‌ଦା ପେରାଃରେଏ । ଆତ୍‌ଅରିଆ କିରୂବ ଦୁତ୍‌ଇଂନେ ମୁର୍‌ତି ରକମ୍‌ ପେଡିଂଏ । 32 ପେ ଆତେନ୍‌ ପର୍‌ଦାକେ ଶିଟିମ୍‌ ସୁଆନେ ଅଁ ସ୍ତମ୍ଭ ଆଡ଼ାତ୍ରା ପେବଏ ଆରି ଆତେନ୍‌ଇଙ୍ଗ୍‌ ସୁନା ଏତେ କଲର୍‌ ପେବଗ୍‌ଏ । ସୁନାନେ ଆକୁଡ଼ି ଏତେ ସ୍ତମ୍ଭ ଆଡ଼ାତ୍ରା ରୁପାନେ ଆଧାର୍‌ ବେବଆର୍‌ ଡିଂପା । 33 ସୁନା କଡ଼ା ଏତେ ଆତେନ୍‌ ପର୍‌ଦାକେ ଆୱେଜଙ୍ଗ୍‌ ବିଃପା । ଇଡ଼ିଂ ପର୍‌ଦାନେ ପ୍ଲା ପାକା ନିଅମ୍‌ ପେଡ଼ି ବପା । ଆତେନ୍‌ ପର୍‌ଦା ପବିତ୍ର ଜାଗାବାନ୍‌ ମହା ପବିତ୍ର ଜାଗାକେ ଅଲ୍‌ଗା ଆଡିଂ ପଡ଼େଏ । 34 ପେ ନିଅମ୍‌ ପେଡ଼ିନେ ପାପ୍‌ ବୁଃଡ଼ିନେ ଡାବ୍‌ନା ମହା ପବିତ୍ର ଜାଗା ବିତ୍‌ରେ ପେବଏ । 35 "ପର୍‌ଦାନେ ବାଏରେ ପାକା ଟେବୁଲ୍‌ ବନେ ପଡ଼େଏ ଆରି ଟେବୁଲ୍‌ନେ ଉଲ୍‌ଟା ପାକା ପବିତ୍ର କୁଡ଼ିଆନେ ଦକିନ୍‌ ପାକା ଆତେନ୍‌ କୁପିସକେ ବନେ ପଡ଼େଏ । ପବିତ୍ର କୁଡ଼ିଆନେ ଉତର୍‌ ପାକା ଟେବୁଲ୍‌ ପେବଏ ।"

36 "ପବିତ୍ର କୁଡ଼ିଆନେ ବାଜାର୍‌ ଆତ୍‌ଲା ମୁଇଂ ନିଲି ପର୍‌ଦା ତିଆର୍‌ ଡିଂପା । ଆକେନ୍‌ କଃଡ଼େଆଁ ବାନା ଆରି ସିନ୍ଦୁର୍‌ ବାନା ତୁଲୁଏ ପାତଲ୍‌ନେ ସୁତା ଏତେ ଆରେବକ୍ନେ କାବ୍ରାଚିତ୍ରାନେ ମୁଇଂ ଡାନେ ପାଟାଇ ପେରାଃରେଏ । 37 ଆତେନ୍ ୱେଁବକ୍ନେ ପାଟାଇ ଆତ୍‌ଲା ମାଲିକିଲିଗ୍‌ ଶିଟିମ୍‌ ସୁଆନେ ଡେଲି ଆରେଚେ ସୁନା ପେୱେଁଏ । ବାରି ସୁନା ଏତେ ଆତ୍‌ନେ ଆକୁଡ଼ି ପେରାଡିଙ୍ଗ୍‌ଏ । ଆତ୍‌ନେସା ପିତଲ୍‌ନେ ମାଲିକିଲିଗ୍‌ ମୁଟ୍‌ଲା ପେବଏ ।"