1 ଏନ୍‌ଇଡ଼ିଂ ରେମୁଆଁଇଂ ମୋଶା ଆରାତ୍ରା ମାପ୍‌ରୁନେ ଆଦେସ୍‌ ଇସାବ୍‌ରେ ନିଲି ଆରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ସୁତା ଏତେ ପବିତ୍ର ଜାଗାନ୍ନିଆ ସେବା ଡିଂନେସା ସବାକ୍ନେ ପାଟେଇ ଆଃରେଆର୍‌କେ, ଆରି ହାରୋଣ ଆତ୍‌ଲା ପବିତ୍ର ପାଟେଇ ଆଃରେଆର୍‌କେ ।

2 ବାରି ମେଇଂ ସୁନା ଏତେ ବାରି ନିଲି ବାରି କଃଡ଼େଆଁ ବାନା ଆରି ସିନ୍ଦୁର୍‌ ବାନା ଆରି ତୁଲୁଏକ୍ନେ ସୁତା ଏତେ ଏଫୋଦ୍‌ ପାଟେଇ ଆଃରେଆର୍‌କେ । 3 ମେଇଂ ନିଲି, କଃଡ଼େଆଁ ବାନା, ବାରି ସୁନ୍ଦର୍‌ ବାନାନେ ସୁତା ଏତେ ପାଟାଇ ତେନ୍‌ସା ମେଇଂ ସୁନାକେ ମୁଟ୍‌ଲା ଏତେ ବଗ୍‌ଚେ ଆରି ଗୁଆଚେ ସରୁ ଆଃଡିଂଆର୍‌କେ । 4 ମେଇଂ ଏଫଦ୍‌ ଆତ୍‌ଲା ଜେବାନିଆ ଡୁଙ୍ଗ୍‌ନେ ନ୍‌ସାଃ ଆଃରେ ଆର୍‌କେ । ଇଡ଼ିଂ ମେଇଂ ସାପା କନ୍‌ ଏଫଦ୍‌ନେ ମ୍ୱାର୍‌ ବାଆଃ ଏତେ ଜଡ଼େ ବିଃକେ । 5 ମୋଶାନିଆ ମାପ୍‌ରୁନେ ଆଦେସ୍‌ ଅନୁସାରେ ଏଫୋଦନେ ଆରାତ୍ରା ପାକା ଆଣ୍ଡିନେ ଚିତ୍ର ଡିଂବକ୍ନେ ପଟୁକା ଆତ୍‌ଅରିଆନେ ବାଗ୍‌ ଲେଃଗେ, ଆତେନ୍‌ ଡିଗ୍‌ ଆତେନ୍‌ କାମ୍‌ ଇସାବ୍‌ରେ ସୁନା ଏତେ ବାରି ନିଲି ବାରି କଃଡ଼େଆଁ ବାନା ବାରି ସିନ୍ଦୁର୍‌ ବାନା ବାରି ତୁଲୁଏକ୍ନେ ସୁତା ଏତେ ଆଃରେଆର୍‌କେ । 6 ଆରି ମେଇଂ ଏଫଦ୍‌ ଏତେ ଗୋମେଦକ ମଣୀକେ ସୁନା ଏତେ ଗଞ୍ଜେଚେ ବେବଆର୍‌ ଡିଂଆର୍‌କେ । ଆତେନ୍‌ ମଣୀନ୍ନିଆ ଇସ୍ରାଏଲ୍‌ ଗଡ଼େଇଂନେ ମିନି ଗୁଆର୍‌ଆର୍‌କେ । 7 ବାରି ମେଇଂ ମାପ୍‌ରୁନେ ଆଦେସ୍‌ ଅନୁସାରେ ଏଫୋଦ୍‌ନେ ମ୍ୱାକ୍ଲିଗ୍‌ ଜେବା ଆରାତ୍ରା ଇସ୍ରାଏଲ୍‌ ଗଡ଼େଇଂନେ ମନେ ତ୍ଲାଗ୍‌ନେ ମଣୀ ରକମ୍‌ ଆତେନ୍‌ ଆଃକଆର୍‌କେ ।

8 ଆକେନ୍‌ ଇଡ଼ିଂ ମେଇଂ ଗ୍ରିନିଆ ସଃନେ ପାଟା ଆଃରେଆର୍‌କେ । ଆକେନ୍‌ କାମ୍‌ ସାପା ମ୍ୟାଃକ୍ନେ ରେମୁଆଁଇଂନେ ବାନ୍‌ ଆଃରେବଗେ । ଆକେନ୍‌ ଟିକ୍‌ ଏଫୋଦ୍‌ ରକମ୍‌ ଲେଃଗେ । ଆକେନ୍‌ ସୁନା ଏତେ ବାରି ନିଲି ବାରି କଃଡ଼େଆଁ ବାନା ବାରି ସିନ୍ଦୁର୍‌ ବାନା ବାରି ୱେଁକ୍ନେ ତୁଲୁଏ ସୁତା ଏତେ ଆଃରେବଆର୍‌ଗେ । 9 ଆତେନ୍‌ ଅଁ କନ୍‌ ଲେଃଗେ, ମେଇଂ ଆତେନ୍‌ ଗ୍ରିନିଆ ସଃନେ ପାଟା ଜଡ଼ା ଆଃଡିଙ୍ଗ୍‌ଚେ ମୁଇଂ ବିତା ଚ୍ଲେ ବାରି ମୁଇଂ ବିତା ଅସାର୍‌ ଆଃରେଆର୍‌କେ । 10 ବାରି, ଆମେକେ ଚାର୍‌ଟା ଜାବର୍‌ ଡାବୁନେ ମଣୀ ଏତେ ଗଞ୍ଜେ ବିଃଆର୍‌କେ । ମେଁନେ ପର୍‌ତୁମ୍‌ ଦାଡ଼ିନିଆ ଚୁଣି ଆରି ପୀତମଣୀ ଆରି ମରକତ ମଣି, 11 ଦୁତିୟ ଦାଡ଼ିନିଆ ପଦ୍ମରାଗ ବାରି ନୀଳକାନ୍ତ ବାରି ହିରା, 12 ତୃତୀୟ ଦାଡ଼ିନିଆ ପେରୋଜ, ଯିସ୍ମ ଆରି କଟାହେଳା, 13 ବାରି ଚତୁର୍ଥ ଦାଡ଼ିନିଆ ବୈଦୂର୍ଯ୍ୟ ମଣୀ ବାରି ଗୋମେଦକ ମଣୀ ବାରି ସୂର୍ଯ୍ୟକାନ୍ତ ମଣୀ ଲେଃଗେ । ଆକେନ୍‌ ସାପା ସୁନାନିଆ ଆଃକଆର୍‌କେ । 14 ବାରି ଇସ୍ରାଏଲ୍‌ ଗଡ଼େଇଂନେ ମିନିଇଂ ଆକେନ୍‌ ସାପା ମଣୀ ଏତେ ମେଇଂନେ ମିନି ଅନୁସାରେ ବାର୍‌ଟା ଡିଂକେ । ସାପା ମଣୀନ୍ନିଆ ଇସ୍ରାଏଲ୍‌ନେ ବାର୍‌ଟା ଡୁଆଣ୍ଡ୍ରେନେ ମୁଇଂ ମୁଇଂ ମିନି ବିଚାର୍‌ ଡିଂନେ ଗ୍ରିନିଆ ସଃନେ ପାଟାନିଆ ଗୁଆର୍‌ବଗେ । 15 ଇଡ଼ିଂ ମେଇଂ ଗ୍ରିନିଆ ସଃନେ ପାଟାନିଆ ନିର୍ମଲ୍ ସୁନା ଏତେ ମାଲି ରକମ୍‌ନେ ମଡ଼େଚେ ଲେକ୍ନେ ସିକ୍‌ଲି ଆଃରେଆର୍‌କେ । 16 ମ୍ୱାକ୍ଲିଗ୍‌ ସୁନାନେ ସାରି ବାରି ମ୍ୱାକ୍ଲିଗ୍‌ ସୁନା ମୁଦି ଆଃରେଚେ ଗ୍ରିନିଆ ସଃନେ ପାଟାନେ ମ୍ୱାର୍‌ ପାକା ଜାକ ଆତେନ୍‌ ମ୍ୱାକ୍ଲିଗ୍‌ କାଡ଼ୁ ଲାଗାଏଆର୍‌କେ । 17 ବାରି ଗ୍ରିନିଆ ସଃନେ ପାଟା ଡାଗ୍ରା ଲେକ୍ନେ ମ୍ୱାର୍‌ କାଡ଼ୁ ଡାଗ୍ରା ଆତେନ୍‌ ମ୍ୱାକ୍ଲିଗ୍‌ ମଡ଼େବକ୍ନେ ସୁନା ଏତେ ଆଃରେକ୍ନେ ଗେହେଃ ଲାଗାଏଆର୍‌କେ । 18 ବାରି ମଡ଼େବକ୍ନେ ଗେହେଃନେ ମ୍ୱାର୍‌ ବାଆଃ ମ୍ୱାର୍‌ ଆଧାରନିଆ ଡାଚେ ଏଫୋଦ୍‌ ପାଟେଇ ସାମ୍‌ନାନିଆ ମ୍ୱାକ୍ଲିଗ୍‌ ଜେବାନେ ଆରାତ୍ରା ବଆର୍‌କେ । 19 ବାରି, ମେଇଂ ମ୍ୱାକ୍ଲିଗ୍‌ ସୁନା ମୁଦି ଆଃରେଚେ ଗ୍ରିନିଆ ସଃନେ ପାଟାନେ ମ୍ୱାର୍‌ପାକା ଏଫୋଦ୍‌ନେ ସାମ୍‌ନାନେ ବିତ୍‌ରେ ବାଗ୍‌ନିଆ ବଆର୍‌କେ । 20 ମେଇଂ ବାରି ମ୍ୱାକ୍ଲିଗ୍‌ ସୁନା ମୁଦି ଆଡିଂଚେ ଏଫୋଦ୍‌ନେ ମ୍ୱାକ୍ଲିଗ୍‌ ଜେବା ଆଲ ଆତେନ୍‌ ସାମ୍‌ନେ ବାଗ୍‌ନେ ଜଡ଼େବକ୍ନେ ଜାଗାନ୍ନିଆ ଏଫଦନେ ଚିତ୍ର ଡିଂବକ୍ନେ ପଟୁକା ଆରାତ୍ରା ଆତେନ୍‌ ବଆର୍‌କେ । 21 ଆରି ଗ୍ରି ସଃନେ ପାଟା ଯେନ୍ତିକି ଏଫୋଦ୍‌ନେ ଚିତ୍ର ଡିଂବକ୍ନେ ପଟୁକା ଆରାତ୍ରା ଲେଃଚେ ଏଫୋଦ୍‌ବାନ୍‌ ରେଃସ ଆଲଃ, ଆତେନ୍‌ସା ମେଇଂ ଗ୍ରିନିଆ ସଃନେ ପାଟାନେ ନିଜେନେ କଡ଼ା ଏତେ ନିଲି ସୁତା ଏତେ ଏଫୋଦ୍‌ନେ କଡ଼ା ଏତେ ଡାଚେ ବଗେ । ମୋଶା ବାନ୍‌ ମାପ୍‌ରୁନେ ଆଦେସ୍‌ ଇସାବ୍‌ରେ ଆକେନ୍‌ ଡିଂଆର୍‌କେ ।

22 ଆକେନ୍‌ ଇଡ଼ିଂ ମେଇଂ ପୁରାପୁରି ବାବ୍‌ରେ ନିଲି ବାନାନେ ପାଟେଇ ଏଫୋଦ୍‌ନେ ସକା ଆଃରେଆର୍‌କେ । ଆକେନ୍‌ ସାପା କାମ୍‌ ଡିଂଣ୍ଡ୍ରେବାନ୍ ତେଆର୍‌କେ । 23 ସକାନେ ମଜେ ଚଞ୍ଚ୍‌ ଏତେ ଲୁଗଃନିଆ ପ୍ଲଗ୍‌ ଲେଃଗେ । ଆତେନ୍‌ ଯେନ୍ତିକି ଟିକ୍‌ଚି ଆୱେ, ଆତେନ୍‌ସା ଆତେନ୍‌ ଲୁଗଃନେ ପିତୁର୍‌ ପାକା ତେବଆର୍‌ଗେ । 24 ମେଇଂ ସକା ଡାଗ୍ରା ପିତୁର୍ ପାକା ନିଲି ବାନା, କଃଡ଼େଆଁ ବାନା ବାରି ସିନ୍ଦୁର୍‌ ବାନା, ତୁଲୁଏକ୍ନେ ସୁତା ଏତେ ଡାଲିମ୍ବ ଆଃରେଆର୍‌କେ । 25 ଆରି ମେଇଂ ଡାଲିମ୍ବ ବିତ୍ରେ ନିର୍ମଲ୍ ସୁନା ଏତେ ଗୁଟି ଆଃଡିଂଚେ ସକା ଡାଗ୍ରା ଲେକ୍ନେ ପିତୁର୍‌ ପାକା ଡାଲିମ୍ୱନେ ମଜେ ବଆର୍‌କେ । 26 ମାପ୍‌ରୁ ମୋଶାକେ ବିଃବକ୍ନେ ଆଦେସ୍‌ ଇସାବ୍‌ରେ । ପାର୍‌ତନା ଡିଂନେସା ସକାନେ ଚାର୍‌ବିଡ୍‌ତି ମେଇଂ ମୁଇଂ ଡାଲିମ୍ବ ପରେ ମୁଇଂ ଗୁଟି, ଦେତ୍‌ରକମ୍‌ ମୁଇଂ ପରେ ମୁଇଂ ଲାଗାଏଆର୍‌କେ ।

27 ଆକେନ୍‌ ପରେ ମୋଶା ଆରାତ୍ରା ମାପ୍‌ରୁନେ ଆଦେସ୍‌ ଅନୁସାରେ ମେଇଂ ହାରୋଣ ବାରି ମେଁନେ ଉଂଡେଇଂନେ ଆତ୍‌ଲା କଃଡ଼େଆଁ, ତୁଲୁଏକ୍ନେ ସୁତା ଏତେ ସୁତାବାନ୍‌ ଆଃରେବକ୍ନେ ସକା ଆଃରେଆର୍‌କେ । 28 ଆରି ତୁଲୁଏ ବାନାନେ ପାତଲ୍‌ ସୁତା ଏଃତେ ଆଃରେବ୍ନ ପାଗ୍‌ ଆରି ତୁଲୁଏ ବାନାନେ ସୁତା ଏଃତେ ଆଃରେବ୍ନ ବାଆଃ ସାଜ ଆରି ତୁଲୁଏ ବାନାନେ ସୁତା ଏଃତେ ଆଃରେବ୍ନ ତୁଲୁଏ ସେକ୍‌ପୁଆ ଆଃରେଆର୍‌କେ । 29 ଆରି ତୁଲୁଏକ୍ନେ ସୁତା ବାରି ନିଲି ବାରି କଃଡ଼େଆଁ ବାନା ବାରି ସିନ୍ଦୁର୍‌ ବାନାନେ ସୁତା ଏତେ ତେନ୍ କାମ୍‌ ଡିଂନେ ମୁଇଂ ନ୍‌ସାଃ ଗାଗ୍‌ନେ ଆଃରେଆର୍‌କେ । 30 ଆକେନ୍‌ ଇଡ଼ିଂ ମୋଶାନେ ଆରାତ୍ରା ମାପ୍‌ରୁନେ ଆଦେସ୍‌ ଅନୁସାରେ ମେଇଂ ନିର୍‌ମଲ୍‌ ସୁନା ଏତେ ପବିତ୍ର ମୁକୁଟ୍‌ନେ ତାଲି ଆଃରେଆର୍‌କେ । ଆରି ଗଦେବକ୍ନେ ସିଲ୍‌ ଆରାତ୍ରା, "ମାପ୍‌ରୁନେ ଉଦେସ୍‌ରେ ପବିତ୍ର" ଡାଗ୍‌ଚେ ଗୁଆର୍‌ଆର୍‌କେ । 31 ବାରି ପାଗ୍‌ନେ ଆରାତ୍ରା ବନ୍‌ସା ଆତେନ୍‌ ନିଲି ବାନା ସୁତା ଏତେ ଗାଗ୍‌ଆର୍‌କେ ।

32 ଦେକ୍‌ରକମ୍‌ କୁକପାର୍‌ କୁଡ଼ିଆ ରକମ୍‌ ପବିତ୍ର କୁଡ଼ିଆନେ ସାପା କାମ୍‌ ଇସ୍ରାଏଲ୍‌ନେ ଉଂଡେଇଂ ଡିଂଆର୍‌କେ । ମୋଶା ଆରାତ୍ରା ମାପ୍‌ରୁନେ ଆଦେସ୍‌ ଅନୁସାରେ ମେଇଂ ସାପା କାମ୍‌ ଡିଂଆର୍‌କେ । 33 ଆକେନ୍‌ ପରେ ମେଇଂ ମୋଶାକେ ପବିତ୍ର କୁଡ଼ିଆ ଆଃକେକେ । ବାରି କୁଡ଼ିଆ ଆରି ଆତ୍‌ଅରିଆନେ ତାଲିଇଂ, ଆକଡ଼ି, ପଟା, ଗାଡ଼ା, ଆରି ଡେଲି ଆରି ବୁନ୍ଦ୍‌ କଟ୍‌ଲା । 34 ବାରି ସିନ୍ଦୁର୍‌ ବାନାନେ ମେଣ୍ଡା ଉକ୍‌ସା ଏତେ ତିଆର୍‌ ଡିଂକ୍ନେ ସ୍ଲାପ୍‌ ବାରି ଉଂମିଃ ଉକ୍‌ସା ଏତେ ଡିଂକ୍ନେ ସ୍ଲାପ୍‌ ବାରି ଆମେକେ ଡାନ୍‌ସା ପର୍‌ଦା ପାଟେଇ । 35 ନିଅମ୍‌ ପେଡ଼ି ବାରି ଆତ୍‌ଅରିଆନେ ଟେଙ୍ଗ୍‌ ବାରି ପାପ୍‌କେ ଡିଡାନେ ଡାବ୍‌ନା, 36 ଟେବୁଲ୍‌, ଆତ୍‌ଅରିଆନେ ସାପା ମୁତାଇଂ ବାରି ଦର୍ସନ୍ ଡିଂନେ ରୁଟି । 37 ନିର୍ମଲ୍ ସୁନାନେ କୁପି ସ୍ଟାଣ୍ଡ୍‌, ଆତ୍‌ଅରିଆନେ ଦିପ୍‌, ଡାଗ୍‌ଲା, ଦିପ୍‌ଇଂ ବାରି ଆତ୍‌ଅରିଆନେ ସାପା ମୁତାଇଂ ବାରି ଦିପ୍‌ ଆତ୍‌ଲା ଞ୍ଚୁ, 38 ବାରି ସୁନାନେ ବେଦି ବାରି ବାଆଃନିଆ କିଗ୍‌ନେ ଞ୍ଚୁ ବାରି ଦୁପ୍‌ ଆମଃନେ ବାସ୍ନାବିଃନେ ଜିନିସ୍‌ ବାରି ପବିତ୍ର କୁଡ଼ିଆ ପ୍ଲେଡ଼ିଆକେ ଡାନେ ପାଟେଇ, 39 ପିତ୍ତଲ୍‌ନେ ବେଦି ବାରି ଆତ୍‌ଅରିଆନେ ପିତ୍ତଲ୍‌ନେ ସିକ୍‌ଲି, ଆତ୍‌ଅରିଆନେ ଟେଙ୍ଗ୍‌ ବାରି ସାପା ମୁତା, ଞ୍ଚ ନ୍ତି ଗୁଏଚଗୁଇତିନେ ମୁତା ବାରି ଆତ୍‌ଅରିଆ ବାଲା, 40 ପ୍ଲେଡ଼ିଆନେ ପରଦା, ଆତ୍‌ଅରିଆନେ ଡେଲି ବାରି ବୁନ୍ଦ୍‌ ମୁଟ୍‌ଲା ବାରି ପ୍ଲେଡ଼ିଆ ବାଜାର୍‌କେ ଡାଃନେ ପାଟେଇ, ଆତ୍‌ଅରିଆନେ ଗେହେଃ ବାରି କୁଟି ବାରି କୁକପାର୍‌ କୁଡ଼ିଆ ଆତ୍‌ଲା ପବିତ୍ର ଡୁଆ ଆତ୍‌ଲା ସାପା ଜିନିସ୍‌, 41 ପୁଜାରି ରକମ୍‌ ସେବା ଡିଂକେଲା ହାରୋଣ ବାରି ମେଁନେ ଉଂଡେଇଂ ଆଣ୍ଡିନେ ସବାକ୍ନେ ପାଟେଇ ସଃଲେଆର୍‌ଗେ ଆତେନ୍‌ ମେଇଂ ଆଃକଆର୍‌କେ । 42 ମେଁ ମେଃନି ଡିଂନ୍‌ସା ମାପ୍‌ରୁ ମୋଶାକେ ଆଦେସ୍‌ ବିଃବଗେ । ଇସ୍ରାଏଲ୍‌ନେ ରେମୁଆଁଇଂ ଆତେନ୍‌ ସାପା କାମ୍‌ ଆଃଡାଆର୍‌କେ । 43 ଆକ୍‌ବାନ୍‌ ମୋଶା ଆତେନ୍‌ ସାପା କାମ୍‌ ଆରାତ୍ରା କେକେ, ଆରି କେଲା, ମେଇଂ ସାପା ଡିଂବକେ, ମାପ୍‌ରୁ ଡିରକମ୍‌ ଆଦେସ୍‌ ବିଃବଗେ, ମେଇଂ ଦେତ୍‌ରକମ୍‌ ସାପା କାମ୍‌ ଡିଂବଆର୍‌ଗେ । ତେନ୍‌ଇଡ଼ିଂ ମୋଶା ଆମେଇଂକେ ଆସିର୍ବାଦ୍‌ ଡିଂକେ ।