ମ୍ୱାକ୍ଲିଗ୍ ବ୍ରି ପାଟା
1 ଏନ୍ଇଡ଼ିଂ ମାପ୍ରୁ ମୋଶାକେ ବାସଙ୍ଗ୍କେ, "ନା ସିସେ ରକମ୍ ମ୍ୱାକ୍ଲିଗ୍ ପାଟା ଆଃରେ । ନା ଆଣ୍ଡିନେ ପାଟା ପାକ୍ଚି ନାବକେ, ଆତ୍ ଆରାତ୍ରା ମେଃ ମେଃ ଗ୍ନୁଆର୍ ଲେଃଗେ, ଆତେନ୍ ସାପା ସାମୁଆଁ ନେ ଆକେନ୍ ମ୍ୱାକ୍ଲିଗ୍ ବ୍ରିନିଆ ନେଗୁଆର୍ଏ । 2 ଆରି ନା ଞ୍ଜିର୍ ତଡ଼ିଆଚେ ତିଆର୍ ଡିଂ ବାରି ଞ୍ଜିର୍ନୁଗ୍ ସୀନୟ କଣ୍ଡା ଡେଃଚେ ଆତ୍ଅରିଆ କଣ୍ଡାନେ ଟିପେ ନେ ଡାଗ୍ରା ପାଂଲା । 3 ମାତର୍ ନା ଏତେ ବାରି ଜା ଆରାତ୍ରା ଆପାଂ ଣ୍ଡୁ, ବାରି ଆକେନ୍ ସାପା କଣ୍ଡାନିଆ ଜା ଆତ୍ନାଆର୍ଲେ ବାରି ଅରେଃ ମେଣ୍ଡା ରାସିଇଂ ଡିଗ୍ ଆକେନ୍ କଣ୍ଡା ସାମ୍ନେ ଆଚଙ୍ଗ୍ଆର୍ଲେ ।" 4 ଆତ୍ତେ ମୋଶା ପର୍ତୁମ୍ ବ୍ରି ରକମ୍ ମ୍ୱାକ୍ଲିଗ୍ ବ୍ରି ପାଟା ତଃକେ; ବାରି ମେଁ ମାପ୍ରୁନେ ଆଦେସ୍ ଅନୁସାରେ ଞ୍ଜିର୍ନୁଗ୍ ତଡ଼ିଆଚେ ସୀନୟ କଣ୍ଡା ଆରାତ୍ରା ୱେକେ ବାରି ଆତେନ୍ ମ୍ୱାକ୍ଲିଗ୍ ବ୍ରିନେ ପାଟା ନ୍ତିନିଆ ସାଚେ ରାଙ୍ଗ୍ୱେକେ ।
5 ତେଲା ମାପ୍ରୁ ତ୍ରିଗ୍ଡିଆ ଏତେ ପାଙ୍ଗ୍ଚେ ଆତେନ୍ ଜାଗାନ୍ନିଆ ମେଁ ଏତେ ତୁଆଁଚେ ମାପ୍ରୁନେ ମିନି ବାସଙ୍ଗ୍କେ । 6 ଆରି ମାପ୍ରୁ ମେଁ ସେଃମଁ ବିଚେ ଅଲେଙ୍ଗ୍କେ ଆରି ଆକେନ୍ ବାସଙ୍ଗ୍କେ, "ମାପ୍ରୁ, ମାପ୍ରୁ ପର୍ମେସର୍ ଆଲାଦ୍ ଡିଂଣ୍ଡ୍ରେ ବାରି କୃପାମୟ, ରିସା ଆଡିଂ ଣ୍ଡୁ, ଦୟା ବାରି ସତ୍ରେ ବର୍ତି ଡିଂଲେଃକେ । 7 ଅଜାର୍ ଅଜାର୍ ନ୍ତାଞ୍ଜା ଜାକ ଦୟା ଡିଂଣ୍ଡ୍ରେ, ରକ୍ୟା ଡିଂଣ୍ଡ୍ରେ, ପାପ୍ ବାରି ଆଦେସ୍ ଅମାନି ବାରି ପାପ୍ କେମା ଡିଂଣ୍ଡ୍ରେ, ଏଲେଡିଗ୍ ଡିଲାଡିଗ୍ ଆକ୍ନେ ଡଣ୍ଡ୍ ବିଣ୍ଡ୍ରେ ପେମ୍ୱାନେ, ପେଉଂନେ, ପେଉଂଇଂନେ ଏଗ୍ଲେଇଂନେ ଆଡ଼ାତ୍ରା ଜାକ ନ୍ତାଞ୍ଜାଇଂ ପାପ୍ ଡିଂବକ୍ନେ ଡଣ୍ଡ୍ ବିଃଣ୍ଡ୍ରେ ।"
8 ଆତ୍ବା ମୋଶା ଜିଆ ଜିଆ ତୁବନିଆ ବାଆଃ ଆବ୍ରିଂଚେ ସାର୍ଲଚେ ବାସଙ୍ଗ୍କେ, 9 ଆରି ମେଁ ବାସଙ୍ଗ୍କେ, ମାପ୍ରୁ, ନେଙ୍ଗ୍ ଜଦି ନା ଡାଗ୍ରା ଅନୁଗ୍ରହ ବାନ୍ଲେକେ, ତେଲା ଗୁଆରେ ଣ୍ଡିଂକେ, ମାପ୍ରୁ ନେ ମଜେ ଡିଂଚେ ନା ଅଲେଙ୍ଗ୍; ମେଃଡାଗ୍ଲା କିମେଇଂ ଅବୁଜା ରେମୁଆଁ, ଆରି ନେନେ ଅପରାଦ୍ ଆରି ପାପ୍ କେମା ଡିଂଚେ ନାନେ ଅଦିକାର୍ ଡିଂନ୍ସା ଆନେକେ ଗ୍ରଅନ୍ ଡିଂ ।
ନିଅମ୍କେ ବାର୍ମୁଇଂତର୍ ଗୁଆର୍ନେ
10 ତେଲା ମେଁ ବାସଙ୍ଗ୍କେ, କେଲା, ନେ ମୁଇଂ ନିଅମ୍ ନେଡିଂଏ, ସାପା ପୁର୍ତିବିନିଆ କି ମେଃଡିଗ୍ କୁଟୁମ୍ ବିତ୍ରେ ଜା ଅଃନା ଆଡିଂକେ ଣ୍ଡୁ, ଦେକ୍ରକମ୍ କାବା ରକମ୍ କାମ୍ ନେ ନାନେ ସାପା ରେମୁଆଁନେ ସାମ୍ନାରେ ନେଡିଂଏ; ଆତ୍ବା ଜା ସାପା ରେମୁଆଁଇଂନେ ଡାଗ୍ରା ନା ନାଲେକେ, ମେଇଂ ମାପ୍ରୁନେ ଆତେନ୍ କାମ୍ କେଆର୍ଏ, ମେଃଡାଗ୍ଲା ନା ଡାଗ୍ରା ନେ ମେଃ ନେଡିଂଏ, ଆତେନ୍ ବୟଙ୍କାର୍ । 11 ଏଃକେ ନେ ଆନାକେ ମେଃ ମେଃ ଆଦେସ୍ ନେବିଏ, ଆତ୍ଅରିଆ ମନ୍ଦିଆନ୍ ବିଃ; ନେ ଇମୋରୀୟ ଆରି କିଣାନିୟ ଆରି ହିତ୍ତୀୟ ଆରି ପରିଷୀୟ ଆରି ହିବ୍ବୀୟ ଆରି ଯିବୂଷୀୟ ରେମୁଆଁଇଂକେ ନା ସାମ୍ନେବାନ୍ ନୁଆଁ ନେବିଏ 12 ନା ନାନେ ବିସଏରେ ସାବ୍ଦାନ୍ ଡିଂ, ଆଣ୍ଡିନେ ଦେସ୍ନିଆ ନା ୱେନାଡିଂକେ, ଆତେନ୍ ଦେସ୍ନିଆ ବାସାଡିଂକ୍ନେ ରେମୁଆଁଇଂ ଏତେ ନିଅମ୍ ଆଡିଂଗେ; ଡିଂଲା ଆତେନ୍ ପେ ବିତ୍ରେ ମୁଇଂ ବ୍ନେଗ୍ ରକମ୍ ଡିଂଏ । 13 ମାତର୍ ପେ ମେଙ୍ଗ୍ନେ ପୁଜା ବେଦି ସାପା ପାକ୍ଚି ପେବିଏ ବାରି ମେଙ୍ଗ୍ନେ ଡେଲି ସାପା ପାକ୍ଚି ପେବିଏ ବାରି ଆଶେରାନେ ମୁର୍ତି ସିଃତଗ୍ ପେବିଏ ।
14 ମେଃଡାଗ୍ଲା ପେ ବିନ୍ ମେଃଡିଗ୍ ଦେବ୍ତାକେ ପେସାର୍ଲ ଣ୍ଡୁ, ମେଃଡାଗ୍ଲା ମାପ୍ରୁନେ ମିନି ନିଜର୍ ଗୌରବକେ ରକ୍ୟା ଡିଂଣ୍ଡ୍ରେ, ମେଁ ନିଜର୍ ଗୌରବ୍ ରକ୍ୟା ଡିଂୟାନେ ପର୍ମେସର୍ । 15 ଇଙ୍ଗ୍ଚାଃ ପେ ଆତେନ୍ ଦେସ୍ନିଆ ବାସାଲେକ୍ନେ ରେମୁଆଁଇଂ ଏତେ ନିଅମ୍ ପେଡିଂଏ; ଡିଂଲା ଆଣ୍ଡିନେ ବେଲା ମେଇଂ ନିଜର୍ ଦେବତାଇଂନେ ପ୍ଲା ୱେଚେ କରାପ୍ କାମ୍ ଡିଂଆର୍ଏ ବାରି ନିଜର୍ନେ ଦେବ୍ତାଇଂ ଡାଗ୍ରା ମିୟାଁ ବିଃମ୍ୟାକେ, ଆତେନ୍ ବେଲା ଜା ଡିଗ୍ ଆପେକେ ୱାଲା, ପେ ମେଁନି ସିଃବକ୍ନେ ବଲି ଜିନିସ୍ ପେଚଂଏ; 16 ଣ୍ଡୁଲା ପେ ପେନି ଉଙ୍ଗ୍ଇଂନେ ଆତ୍ଲା ମେଙ୍ଗ୍ନେ ସେଲାଇଂକେ ମନ୍ ଡିଂଲା, ମେଙ୍ଗ୍ନେ ସେଲାଇଂ ନିଜେନେ ଦେବ୍ତାଇଂନେ ଗାଲି ପ୍ଲା ସାଚେ ପେଉଙ୍ଗ୍ଇଂକେ ମେଙ୍ଗ୍ନେ ଦେବ୍ତାଇଂନେ ଗାଲି ପାକା ରାଙ୍ଗ୍ୱେଚେ କରାପ୍ କାମ୍ ଆଃଡିଂଆର୍ଏ ।
17 ପେ ପେ ଆତ୍ଲା ମେଃଡିଗ୍ ଦେବ୍ତା ଆରାଃରେଗେପା ।
18 ପେ ଖମୀର୍ ଆମିସୁଃକ୍ନେ ରୁଟିନେ ପାଣ୍ଡୁଏ ପାଲନ୍ ପେଡିଂଏ, ବାରି ମେମୁଆଁନେ ପର୍ତୁମ୍ ଆର୍କେନେ ଆଣ୍ଡିନେ ବେଲା ଡିରକମ୍ ଡିଂନ୍ସା ଆପେକେ ଆଦେସ୍ ବିଃମ୍ୱକେ, ଦେତ୍ରକମ୍ ପେ ଗୁ ଦିନା ଜାକ କମିର୍ ଆମିସୁକ୍ନେ ରୁଟି ପେଚଂଏ; ମେଃଡାଗ୍ଲା ଆତେନ୍ ମେମୁଆଁନେ ପର୍ତୁମ୍ ଆର୍କେ କେଲା ପେ ମିସର୍ ଦେସ୍ବାନ୍ ତାର୍ଚେ ପାଂପେଲେଃକେ ।
19 ଆରି ସାପାନେ ପର୍ତୁମ୍ ଚୁକ୍ନେ ଚୁଚୁ ବାରି ଅରେଃ ମେଣ୍ଡା ଗୁଲୁଏ ରାସିଇଂନେ ବିତ୍ରେ ପର୍ତୁମ୍ କଃକ୍ନେ ଙ୍ଗିର୍ବୁଏ ପସୁ ସାପା ନେନେ । 20 ମାତର୍ ପର୍ତୁମ୍ କଃକ୍ନେ ଗଦ ଉଂଡେନେ ବାଦୁଲ୍ ପେ ଉଂମେଣ୍ଡା ବିଚେ ଆମେକେ ମୁକ୍ତ ପେରାଡିଂଏ; ଜଦି ମୁକ୍ତ ପେରାଡିଂ ଣ୍ଡୁ, ତେଲା ମେଁନେ ଲୁଗ ପେପାକ୍ଚିଏ । ନାନେ ପର୍ତୁମ୍ ଜନମ୍ ଡିଂକ୍ନେ ନାଉଂକେ ନା ମୁକ୍ତ ନାରାଡିଂଏ । ଆରି, ଜା ଡିଗ୍ ସରା ନ୍ତି ନେଡାଗ୍ରା ଆପାଂଆର୍ ଣ୍ଡୁ ।
21 ପେ ତୁର୍ ଦିନା ପେସ୍ଲେଏ, ମାତର୍ ଗୁ ଦିନା ପେପୁଣ୍ଡେଏ; ଚାସ୍ ଆରି କିଆଉଁଆଃ ୱେଃ ବେଲା ଡିଗ୍ ପେପୁଣ୍ଡେଏ ।
22 ପେ ମୁଇଂ ସାନ୍ତାନେ ପାଣ୍ଡୁଏ, ଗୁଆଃକ୍ନେ ଗହମ୍ନେ ପର୍ତୁମ୍ ଚୁଚୁନେ ପାଣ୍ଡୁଏ ବାରି ମେମୁଆଁନେ ସାରାସାରି କେଲା ଚୁଚୁ ରାଃସିଂନେ ପାଣ୍ଡୁଏଃ ପେପାଲେଏ ।
23 ପେନି ସାପା ଙ୍ଗିର୍ବୁଏ ମେମୁଆଁ ବିତ୍ରେ ଞ୍ଜି ତର୍ ଇସ୍ରାଏଲ୍ନେ ମାପ୍ରୁ, ମାପ୍ରୁ ପର୍ମେସର୍ ଡାଗ୍ରା ୱେଆର୍ଏ । 24 ମେଃଡାଗ୍ଲା ନେ ନା ସାମ୍ନେବାନ୍ ବିନ୍ ଦେସ୍ନେ ରେମୁଆଁଇଂକେ ନୁଆଁ ନେବିଏ ବାରି ନାନେ ଏରିଆ ନେରାମ୍ନାଏ, ବାରି ନା ମେମୁଆଁ ବିତ୍ରେ ଞ୍ଜି ତର୍ ମାପ୍ରୁ ପର୍ମେସର୍ ଡାଗ୍ରା ୱେଚାନ୍ସା ଅଲେଙ୍ଗ୍କେ, ନାନେ ତୁବକେ ଜାଡିଗ୍ ଲବ୍ ଆଡିଂଆର୍ ଣ୍ଡୁ ।
25 ପେ ଆନେକେ ଅପେବକ୍ନେ ଗିମିଃନେ ମିୟାଁ କମିର୍ ମିସୁଲେକ୍ନେ ଜିନିସ୍ ଏତେ ପାଣ୍ଡୁଏଃ ପେଡିଂ ଣ୍ଡୁ ବାରି ନିସ୍ତାର୍ ପାଣ୍ଡୁଏଃନେ ବଲି ଜିନିସ୍ ଞ୍ଜିର୍ ଜାକ ପେବ ଣ୍ଡୁ ।
26 ନା ନାନେ ଲିଜନ୍ନିଆ ପର୍ତୁମ୍ ଚୁକ୍ନେ ଅଗ୍ରୀମାଂଶ ନାନେ ମାପ୍ରୁ ପର୍ମେସର୍ନେ ଡୁଆନିଆ ରାଙ୍ଗ୍ନାପାଂଏ । ବାରି ନା ଉଂମିଃକେ ମେଁନେ ଇୟାଙ୍ଗ୍ଡେନେ ତ୍ରାଡ଼ିଆ ଏତେ ପେଡୁଏ ଣ୍ଡୁ ।
27 ବାରି ମାପ୍ରୁ ମୋଶାକେ ବାସଙ୍ଗ୍କେ, ନା ଆକେନ୍ ସାପା ବ୍ନାଲିର୍ ଗୁଆର୍, ମେଃଡାଗ୍ଲା ନେ ଆକେନ୍ ବ୍ନାଲିର୍ ଇସାବ୍ରେ ନା ଏତେ ବାରି ଇସ୍ରାଏଲ୍ ଏତେ ନିଅମ୍ ନେଡିଂକେ । 28 ଆତେନ୍ ବେଲା ମୋଶା ମାପ୍ରୁ ଏତେ ଆତେନ୍ ଜାଗାନ୍ନିଆ ଚାଲିସ୍ ଦିନ୍ ଞ୍ଜିର୍ ମିଡିଗ୍ ଆତ୍ ଲେଆର୍ଗେ; ମେଁ କାଦି ଲେଃ ଣ୍ଡିଆ ମେଃଡିଗ୍ ଆଉଗ୍କେ ଣ୍ଡୁ । ମେଁ ଆତେନ୍ ମ୍ୱାକ୍ଲିଗ୍ ବ୍ରି ପାଟାନିଆ ନିଅମ୍ ସାମୁଆଁ, ଗୁଆକିଲିଗ୍ ଆଜ୍ଞା ଗୁଆର୍କେ ।
ମୋଶାନେ ତାର୍କିଗ୍ ସାର୍ମୁଆଃ
29 ଏନ୍ଇଡ଼ିଂ ମୋଶା ସୀନୟ କଣ୍ଡାବାନ୍ ଜାର୍ନେ ବେଲା ସାକି ରକମ୍ ମ୍ୱାର୍ବାଗ୍ ଡିଂକ୍ନେ ଆତେନ୍ ବ୍ରି ପାଟା ନ୍ତିନିଆ ସାଚେ କଣ୍ଡାବାନ୍ ଜାର୍କେ, ମାତର୍ ମାପ୍ରୁ ଏତେ ବାଲିର୍ବାତା ଡିଂଲେଗ୍ସା ମେଁନେ ସାର୍ମୁଆଃ ଯେ ତାର୍କିଗ୍ ଡିଂଲାଏଗେ, ଆତେନ୍ ମୋଶା ମ୍ୟାଃଆଲେଗେ । 30 ବାରି ଉଡ଼ିବେଲା ହାରୋଣ ବାରି ଇସ୍ରାଏଲ୍ନେ ଗଡ଼େଇଂ ମୋଶାକେ କେକେ, ଆତେନ୍ ବେଲା ସାର୍ମୁଆଃନେ ଉକ୍ସା ତାର୍କିଗ୍ ଲେଃଗେ; ଆତେନ୍ସା ମେଇଂ ମେଁ ଡାଗ୍ରା ୱେନ୍ସା ବୁଟଆର୍କେ । 31 ମାତର୍ ମୋଶା ଆମେଇଂକେ ୱାକେ, ହାରୋଣ ବାରି ମଣ୍ଡଲିନେ ନେତାଇଂ ମେଁ ଡାଗ୍ରା ୱେଆର୍କେ; ବାରି ମୋଶା ମେଙ୍ଗ୍ ଏତେ ବାଲିର୍ବାତା ଡିଂକେ । 32 ତେନ୍ ଇଡ଼ିଂ ଇସ୍ରାଏଲ୍ନେ ରେମୁଆଁଇଂ ମେଁ ଡାଗ୍ରା ୱେଆର୍କେ; ଆତ୍ବା ମାପ୍ରୁ ସୀନୟ କଣ୍ଡାନିଆ ଆମେକେ ମେଃ ମେଃ ବାସଙ୍ଗ୍ବଗେ, ଆତେନ୍ ସାପା ମେଁ ଆଦେସ୍ ରକମ୍ ଆମେଇଂକେ ଆଃମ୍ୟାଃକେ । 33 ଆରି, ମୋଶା ମେଙ୍ଗ୍ ଏତେ ବାଲିର୍ବାତା ଆଃଡାକ୍ନେ ଇଡ଼ିଂ ମେଁନେ ସାର୍ମୁଆଃନିଆ ଗର୍ଣ୍ଡା ଡାବିଃକେ । 34 ଉଡ଼ିବେଲା ମୋଶା ମାପ୍ରୁ ଏତେ ବାଇର୍ବାଃତା ନ୍ସା ବିତ୍ରେ ୱେକେ । ମେଁ ଆତେନ୍ ଡାକ୍ନେ ତଃ ବଗେ, ଇଡ଼ିଂ ମେଁ ବାଏରେ ପାଙ୍ଗ୍କେ ବାରି ମାପ୍ରୁ ଆଣ୍ଡିନେ ଆଦେସ୍ ବିଃକେ, ବାଏରେ ତାର୍ଚେ ଇସ୍ରାଏଲ୍ ରେମୁଆଁଇଂକେ ବାସଙ୍ଗ୍କେ । 35 ରେମୁଆଁଇଂ କେଆର୍କେ ଯେ, ମୋଶାନେ ସାର୍ମୁଆଃ ତାର୍କିଗ୍ ତ୍ନାଡିଂକେ । ଆତେନ୍ସା ମୋଶା ମେଁନେ ସାର୍ମୁଆଃନିଆ ଡା ବିଃକେ । ମୋଶା ମାପ୍ରୁ ଏତେ ବାଲିର୍ବାତା ଡିଂ ଜାକ ମେଁନେ ସାର୍ମୁଆଃକେ ଡାଚେ ବଗେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)