1 ଆରି ଦୁପ୍‌ ଆଡୁଆ ନ୍‌ସା ଶିଟିମ୍‌ ସୁଆନେ ମୁଇଂ ବେଦି ପେରାରେଏ । 2 ଆତେନ୍‌ ମୁଇଂ ନ୍ତି ଚ୍ଲେ ଆରି ମୁଇଂ ନ୍ତି ଅସାର୍‌ ଆରି ଅଁ କନ୍‌ ଡିଂଏ । ବାରି ମ୍ବାର୍‌ ନ୍ତି ଚ୍ଲେ ଡିଂଏ । ଆକ୍ମେନେ ଡିରଙ୍ଗ୍‌ଇଙ୍ଗ୍‌ ବେଦିନିଆ ମିସୁଏ । 3 ଆକେନ୍‌ ବିଦିନେ ଆଡ଼ାତ୍ରା ଆରି ପିତୁର୍‌ପାକା ନିର୍ମଲ୍ ସୁନା ଏତେ ଆଗୁଡ଼େ ବିଃପା ଆରି ପିତୁର୍‌ପାକା ସୁନାନେ ତୁରାଃ ପେତେଏ । 4 ଆରି ତୁରାଃ ଆଲ ମ୍ୱାକ୍ଲିଗ୍‌ ପ୍ଲଗ୍‌ ଆଡିଂପା । ବାରି ଆତ୍‌ଅରିଆ ମ୍ୱାକ୍ଲିଗ୍‌ ସୁନାନେ ଆକସି ଲାଗାପା । ପୁଜା ବେଦିକେ ଡୁଡୁ ଏତେ ଡୁଂ ରାଙ୍ଗ୍‌ୱେଲାପା । 5 ଆକେନ୍‌ ଡୁଡୁ ଡିଗ୍‌ ଶିଟିମ୍‌ ସୁଆ ଏତେ ପେରାରେଏ । ଆକେନ୍‌ ଡୁଡୁକେ ସୁନା ଏତେ ପେରାଗୁଡ଼େଏ । 6 ନେଙ୍ଗ୍‌ ଆନାକେ ମୁଡ଼ି ଜାଗାନ୍ନିଆ ଙ୍କୁଡ଼େଏ, ଆତେନ୍‌ ନିଅମ୍‌ ପେଡ଼ିନେ ସିସେ ଲେଃଏ । ଆଣ୍ଡିନେକି ପର୍‌ଦା ସିସେ ପାକା ନିଅମ୍‌ ସିନ୍ଦୁକ ଆଚ୍ଚାଦକର ସିସେ ଲେଃକେ । 7 "ହାରୋଣ ବାସ୍ନାବିନେ ଦୁପ୍‌ ଆମଃଏ । ମେଁ କାଲାଆଃ ଞ୍ଜିର୍‌ନୁଗ୍‌ କେଲା ଦିପ୍‌ ସପା ଡିଂନେ ବେଲା ଆତେନ୍‌ ଦୁପ୍‌ ଆମଃଏ । 8 ବାରି ହାରୋଣ ଦିପ୍‌ ଆଡୁଆନେ ବେଲା ଦୁପ୍‌ ଆମଃଏ, ଆତ୍‌ଅରିଆ ମେଙ୍ଗ୍‌ନେ ନ୍ତାଞ୍ଜାଇଂନେ ନିଅମ୍‌ ସୁଗୁଆ ମାପ୍‌ରୁନେ ସିସେ ପାକା କାଲାଆଃ ଦୁପ୍‌ ଆମଃଏ । 9 ବିଦେସ୍‌ ଦୁପ୍‌ କି ସୁଆ ବଲି ଣ୍ଡୁଲା କାଦି ବଲି ବେଦି ଆଡ଼ାତ୍ରା ଆବିଃଗ୍‌ପା ଆରି ମେଁ ଆଡ଼ାତ୍ରା ଉଗ୍‌ନେ ବଲି ଆକିଗ୍‌ପା । 10 ବାରି ହାରୋଣ ମେମୁଆଁକେ ମୁଇଂତର୍‌ ଆତ୍‌ଅରିଆନେ ଡିରଙ୍ଗ୍‌ ଆଡ଼ାତ୍ରା ପାପ୍‌ବାନ୍‌ ସର୍‌ପେ ବିଏ । ଆତେନ୍‌ ସର୍‌ପେବକ୍ନେ ପାପ୍‌ କେମା ଡିଂବକ୍ନେ ବଲିନେ ମିୟାଁ ଏତେ ପେନେ ଅସେନେ ନ୍ତାଞ୍ଜାଇଂନେ ନିଅମ୍‌ ସୁଗୁଆ ମେମୁଆଁକେ ମୁଇଂତର୍‌ ଆତେନ୍‌ସା ସର୍‌ପେପା । ଆକେନ୍‌ ବେଦି ମାପ୍‌ରୁନେ ଆଡ଼ାତ୍ରା ମ୍ନା ପବିତ୍ର ଡିଂଏ ।"

11 ଆରି ମାପ୍‌ରୁ ମୋଶାକେ ଆକେନ୍‌ ସାମୁଆଁ ବାସଙ୍ଗ୍‌କେ, 12 "ପେ ଇସାବ୍‌ ଡିଂପେଲେଃକ୍ନେ ରେମୁଆଁଇଂନେ ସଂକ୍ୟା ଇସାବ୍‌ରେ ଇସ୍ରାଏଲ୍‌ନେ ଗଡ଼େଙ୍ଗ୍‌ଇଂକେ ଇସାବ୍‌ ନାଡିଂଏ । ଆତେନ୍‌ ବେଲା ମେଙ୍ଗ୍‌ନେ ସାପା ରେମୁଆଁ ମାପ୍‌ରୁ ଡାଗ୍ରା ନିଜର୍‌ ନିଜର୍‌ନେ ଜିବନ୍‌ ଆମ୍ବ୍ରନେ କେଲା ଏଜାନେ କେଲା ଏତେଆର୍‌ଏ । ତେଲା ମେଙ୍ଗ୍‌ନେ ବିତ୍‌ରେବାନ୍‌ ଏଜାନେ ବେଲା ମେଃଡିଗ୍‌ ମୁର୍‌ଡ଼ି ଆଡିଂ ଣ୍ଡୁ । 13 ଜାଡିଗ୍ ଏଜାକ୍ନେ ରେମୁଆଁଇଂନେ ବିତ୍ରେ ପାଙ୍ଗ୍‌ଆର୍‌ଏ, ମେଁଇଂ ପବିତ୍ର ଜାଗାନେ ଶେକଲ୍ ଅନୁସାରେ ଅଦା ଶେକଲ୍ ବିଃଏ; ଆତେନ୍ ଅଦା ଶେକଲ୍ ମାପ୍‌ରୁ ବାକ୍ନେ ଇନାମ୍ ଡିଂଏ । 14 କୁଡ଼ିଏ ମୁଆଁ ଣ୍ଡୁଲା ମେଁବାନ୍‌ ଜାବର୍‌ ବୟସ୍‌ରେ ଜାଣ୍ଡେ କି ଏଜାବକ୍ନେ ଇସାବ୍‌ରେ ପାଂଏ, ମେଁ ମାପ୍‌ରୁକେ ଆକେନ୍‌ ଇନାମ୍ ବିଏ । 15 ପେ ନିଜର୍‌ ନିଜର୍‌ ଜିବନ୍‌ ନ୍‌ସାଃ ପାପ୍‌ କେମା ଆତ୍‌ଲା ମାପ୍‌ରୁକେ ଆତେନ୍‌ ଉପହାର୍‌ ବିଃନେ ବେଲା ସାକାର୍‌ ଅଦା ଶେକଲ୍‌ବାନ୍‌ ମାଲେ ଆବିଃ ଣ୍ଡୁ, ବାରି ଦରିଦ୍ର ଆତ୍‌ବାନ୍‌ ଗଣ୍ଡାଃ ଆବିଃ ଣ୍ଡୁ । 16 ଆତେନ୍‌ ଡାବୁକେ ଇସ୍ରାଏଲ୍‌ ରେମୁଆଁଇଂନେ ଡାଗ୍‌ରାବାନ୍‌ ମୁଇଂନୁଗ୍‌ ରାସିଂପା । ଆକେନ୍‌ ଡାବୁକେ କୁକପାର୍‌ କୁଡ଼ିଆନେ କାମ୍‌ ଆତ୍‌ଲା ଲାଗାପା । ଆକେନ୍‌ ବିଃନେ ପେନେ ମାପ୍‌ରୁକେ ମନେ ତ୍ଲାଗ୍‌ ନ୍‌ସା ଆକେନ୍‌ ମୁଇଂ ଗାଲି ରକମ୍‌ ଡିଂଏ । ମେଇଂ ମେଙ୍ଗ୍‌ନେ ଜିବନ୍‌କେ ଅନୁତାପ୍‌ ଆତ୍‌ଲା ଆକେନ୍‌ ଦାନ୍‌ ବିଆର୍‌ଏ ।"

17 ମାପ୍‌ରୁ ମୋଶାକେ ବାସଙ୍ଗ୍‌କେ, 18 "ଞ୍ଚ ନ୍ତି ଗୁଏଚଗୁଇତି ନ୍‌ସା କୁଣ୍ଡ୍‌ ଆରି ଆକ୍ମେନେ ସାପା ପାକା କଂସା ଏତେ ତିଆର୍‌ ଡିଂପା । ବାରି କୁକପାର୍‌ କୁଡ଼ିଆ ଆରି ପୁଜା ବେଦି ବିତ୍‌ରେ ଞ୍ଚ ନ୍ତି ଗୁଏଚଗୁଇତି ନ୍‌ସା କୁଣ୍ଡ୍‌ ମୁଇଂ ବପା ଆରି ଆତ୍‌ବିତ୍‌ରେ ଣ୍ଡିଆ ତାଃନପା । 19 ହାରୋଣ ଆରି ମେଁନେ ଉଂଡେଇଂ ମେଙ୍ଗ୍‌ନେ ନ୍ତି ଞ୍ଚ ଗୁଏଚଗୁଇତି ଆର୍‌ଏ । 20 ମେଇଂ କୁକପାର୍‌ କୁଡ଼ିଆନିଆ ଗାନେ ବେଲା ମେଇଂ ଗୁଏଚଗୁଇତିନେ ପଡ଼େଏ, ମେଃଡାଗ୍‌ଲା ମେଇଂ ଆଗୁଏଃଆର୍‌ ଣ୍ଡୁ । ଆରି ମେଇଂ ପୁଜାରିନେ କାମ୍‌ ଡିଙ୍ଗ୍‌ ନ୍‌ସା ଉଡ଼ିବେଲା ମାପ୍‌ରୁ ସୁଆ ବଲି ବିଃନ୍‌ସାଃ ବେଦି ଡାଗ୍ରା ୱେଏ, 21 ମେଇଂ ମେଙ୍ଗ୍‌ନେ ନ୍ତି ଆରି ଞ୍ଚ ଗୁଏଚଗୁଇତି ଆର୍‌ଏ, ମେଃଡାଗ୍‌ଲା ଆଗୁଏଆର୍‌ ଣ୍ଡୁ । ହାରୋଣ ଆରି ମେଁନେ ବଂଶଧର ଆତ୍‌ଲା ଆକେନ୍‌ ନିଅମ୍‌ କାଲାଆଃ ନ୍‌ସା ଲେଃଏ ।"

22 ଆକେନ୍‌ ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, 23 "ଆକେନ୍‌ ଅଃକେନ୍‌ ନିମାଣ୍ଡାକ୍ନେ ବାସ୍ନାଚୁ, ଡାଗ୍‌ଲା, ପବିତ୍ର ଜାଗାନେ ସେକଲ୍‌ ଇସାବ୍‌ରେ ମାଲ୍‌ ଶହ ଶେକଲ୍‌ ନିର୍ମଳ ବାସ୍ନା ରସ୍‌ ଆରି ମେଁନେ ଅଦା, ଡାଗ୍‌ଲା, ମ୍ବାର୍‌ ଶହ ପଚାସ୍‌ ଶେକଲ୍‌ ବାସ୍ନା ଡାଲ୍‌ଚିନି ସ୍ଲାଃ ଆରି ମ୍ବାର୍‌ ଶହ ପଚାସ୍‌ ଶେକଲ୍‌ ବାସ୍ନାଚୁ ବଚେ ରାସିଂପା । 24 କାଶିଆ ମାଲ୍‌ ଶହ ଶେକଲ୍‌ ରାସିଂପା । ଉଡ଼ିବେଲା ଆକେନ୍‌ ସାପା ଅଜନ୍‌ ଡିଂପେଡିଂକେ, ତେଲା କାର୍ଯ୍ୟଳୟ ମାପ ବେବଆର୍‌ ଡିଂପା । ବାରି ମୁଇଂ ହିନ୍‌ ଜୀତ ଞ୍ଚୁ ରାସିଂପା । 25 ଆକେନ୍‌ ସାପା ବାନ୍‌ ନାଁ ମୁଇଂ ପଦ୍‌ଅରିଆ ବନେ ବେଲା ବାଆଃ କିଗ୍‌ନେ ପବିତ୍ର ଞ୍ଚୁ, ଡାଗ୍‌ଲା, ଗନ୍ଧବଣିକନେ କାମ୍‌ ଅନୁସାରେ ଞ୍ଚୁ ତିଆର୍‌ ପେଡିଂଏ, ଆତେନ୍‌ ମୁଇଂ ପଦ୍‌ଅରିଆ ବନେ ବେଲା ବାଆଃ କିଗ୍‌ନେ ପବିତ୍ର ଞ୍ଚୁ ଡିଂଏ । 26 ଆକେନ୍‌ ଡୁଂୱେଚେ ପେ କୁକପାର୍‌ କୁଡ଼ିଆନିଆ ଆରି ନିଅମ୍‌ ପେଡ଼ି ଆଡ଼ାତ୍ରା ଉର୍‌ଚିଗ୍‌ବିପା । 27 ଟେବୁଲ୍‌ ଆରି ଆତ୍‌ଅରିଆ ଲେକ୍ନେ ସାପା ଙ୍କୁଇ ଆରି କୁପି ଆରି ଆତ୍‌ଅରିଆନେ ସାପା ବାଗ୍‌, ଦୁପ୍‌ ବେଦି, 28 ସୁଆ ବଲିନେ ବେଦି ଆରି ଆତ୍‌ଅରିଆନେ ସାପା ବାଗ୍‌, ଞ୍ଚ ନ୍ତି ଗୁଏଚଗୁଇତିନେ ଙ୍କୁଇ ଆରି ଆତ୍‌ଅରିଆନେ ବୈଠିକି ଞ୍ଚୁ କିଗ୍‌ଚେ ଆସିର୍ବାଦ୍‌ ଡିଂ । 29 ଆକେନ୍‌ ସାପା ଜିନିଷ୍‌କେ ପବିତ୍ର ଆଡିଂପା । ତେଲା ଆତେନ୍‌ଇଙ୍ଗ୍‌ ପବିତ୍ର ଡିଂଏ ଆରି ମେଃଡିଗ୍‌ ଆତେନ୍‌ ଲିଗ୍‌ଏ, ଆତେନ୍‌ ସାପା ଡିଲାଡିଗ୍‌ ପବିତ୍ର ଡିଂଏ । 30 ଆକେନ୍‌ ଞ୍ଚୁକେ ହାରୋଣ ଆରି ମେଁନେ ଉଂଡେଇଂନେ ଆଡ଼ାତ୍ରା ତେଚେ ପବିତ୍ର ଆଡିଂପା । ତେଲା ମେଇଂ ନେନେ ପୁଜାରି କାମ୍‌ ଡିଂନେସା ବାଆଃନିଆ ଞ୍ଚୁ କିଗ୍‌ଚେ ପବିତ୍ର ଆଡିଂଆର୍‌ଏ । 31 ଇସ୍ରାଏଲ୍‌ନେ ରେମୁଆଁଇଂକେ ଆକେନ୍‌ ବାଆଃନିଆ କିଗ୍‌ନେ ଞ୍ଚୁ ବିସ‍ଏରେ ବାସଙ୍ଗ୍‌ପା, ଯେ ଆକେନ୍‌ ପବିତ୍ର । ଆକେନ୍‌ ନ୍ତାଞ୍ଜାଃନେ କାଲ୍‌ ଜାକ କାଲାଆଃ ନେ ଆତ୍‌ଲା ବେବଆର୍‌ ଡିଂନେସା । 32 ମୁଃଡ଼ି ରେମୁଆଁ ଡିଗ୍‌ ଆକ୍ମେକେ ନିଜର୍‌ନେ କାମ୍‌ନ୍ନିଆ ସାଦାରନ୍ ଞ୍ଚୁ ରକମ୍‌ ବେବଆର୍‌ ଡିଂଆୟାଆର୍‌ ଣ୍ଡୁ । ସାଦାରନ୍ ଞ୍ଚୁକେ ଆରେକେ ରକମ୍‌ ବିନ୍‌ ବାସ୍ନା ଞ୍ଚୁକେ ଆରାରେଗ୍‌ପା । ଆକେନ୍‌ ଞ୍ଚୁ ପବିତ୍ର ଆରି ପେ ଆତ୍‌ଲା ପବିତ୍ର ଡିଂ ପଡ଼େଏ । 33 ଜଦି ମୁଇଂ ରେମୁଆଁ ଆକେନ୍‌ ଞ୍ଚୁ ରକମ୍‌ ବାସ୍ନା ଞ୍ଚୁ ଆରେଏ, ଆରି ଜଦି ଜଗ୍ୟ ଣ୍ଡୁନେ ରେମୁଆଁକେ ବିଏ, ଆମେକେ ଆକେନ୍‌ ରେମୁଆଁଇଂନେବାନ୍‌ ଅଲ୍‌ଗା ଆଡିଂବିଏ ।"

34 ଆକେନ୍‌ ଇଡ଼ିଙ୍ଗ୍‌ ମାପ୍‌ରୁ ମୋଶାକେ ବାସଙ୍ଗ୍‌କେ, "ନା ନା ଡାଗ୍ରା ବାସ୍ନାଚୁ ବାରି ଗୁଗ୍‌ଗୁଲ୍‌ ଆରି ସମ୍ପ୍‌, ଦୁପ୍‌ ଆରି ନିର୍ମଲ୍ ଲୋବାନ୍‌ । ଆକେନ୍‌ ସାପା ବାସ୍ନାଚୁ ସମାନ୍‌ ବାଗ୍‌ରେ ରାସିଂପା । 35 ଆକେନ୍‌ ସାପାକେ ଆମିସୁଚେ ବାସ୍ନାଚୁ ତିଆର୍‌ ଡିଂନେସା ମୁଇଂ ଦୁପ୍‌ ଆରେଣ୍ଡ୍ରେକେ ଡୁଂପାଂଲାପା । ଆକ୍‌ଅରିଆ ବିତିଗ୍‌ ଡିଗ୍‌ ଆମିସୁପା । ଆକେନ୍‌ ପେ ଆତ୍‌ଲା ନିର୍‌ମଲ୍‌ ଆରି ପବିତ୍ର ଡିଂଏ । 36 ଆତ୍‌ବାନ୍‌ ଇକୁଡ଼ା ଗୁଣ୍ଡ୍‌ ଆଡିଂଚେ ଆଣ୍ଡିନେ କୁକପାର୍‌ କୁଡ଼ିଆନିଆ ନେ ପେ ଏତେ ନେକୁଡ଼େଏ, ଆତ୍‌ଅରିଆ ନିଅମ୍‌ କୁଡ଼ିଆନିଆ ଲେଃଏ । ଆତେନ୍‌ ପେ ଆତ୍‌ଲା ମ୍ନା ପବିତ୍ର ଡିଂଏ । 37 ପେ ଆଣ୍ଡିନେ ବାସ୍ନାନେ ଦୁପ୍‌ ପେଡିଂଏ, ଆତ୍‌ଅରିଆ ଆମିସୁବକ୍ନେ ଜିନିସ୍‌ନେ ପରିମାନ୍‌ ଇସାବ୍‌ରେ ନିଜେନେ ଆତ୍‌ଲା ଆଡିଂଗ୍‌ପା । ଆତେନ୍‌ ପେ ଆଡ଼ାତ୍ରା ମାପ୍‌ରୁନେ ମ୍ନିରେ ପବିତ୍ର ଡିଂଏ । 38 ଜଦି ଜାଣ୍ଡେଃ ଡିଗ୍‌ ନିଜର୍‌ନେ ଆତ୍‌ଲା ଦେତ୍‌ରକମ୍‌ ବାସ୍ନାବିନେ ଦୁପ୍‌ ଆରେଏ । ତେଲା ମେଁ ରେମୁଆଁଇଂନେବାନ୍‌ ଅଲ୍‌ଗା ଡିଂଏ ।"