1 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, ନା ଫାରୋ ଡାଗ୍ରା ୱେଚେ ଆମେକେ ବାସଙ୍ଗ୍‌, ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ଆନେକେ ସେବା ଡିଂନ୍‌ସା ନେ ରେମୁଆଁକେ ଆନ୍ତାର୍‌ବି । 2 ଅଃନା ଆମେଇଂକେ ଆନ୍ତାର୍‌ବି ନ୍‌ସା ରାଜି ନାଡିଂ ଣ୍ଡୁ, ତେଲା ନାକେଏ, ନେ ଗିଡ଼ିଃ ବେଚେ ନାନେ ସାପା ଦେସ୍‌କେ ଡଣ୍ଡ୍‌ ନେବିଏ । 3 ନିଲ ଲଣ୍ଡିଆଅରିଆ ଗିଡ଼ିଃ ପୁରୁନ୍‌ ଡିଙ୍ଗ୍‌ୱେଆର୍‌ଏ, ଆତ୍‌ବା ଆତେନ୍‌ ସାପା ଗିଡ଼ିଃ ପାଙ୍ଗ୍‌ଚେ ପେ ଡୁଆ ଆରି ଡୁଲେଗ୍‌ନେ ବାକ୍ରା ବିତ୍ରେ ଆରି ଡୁଲେଗ୍‌ନେ ସିଙ୍ଗ୍‌ଲାଅରିଆ ଆରି ପେ ଗୁତିରେଇଂନେ ଡୁଆ ବିତ୍ରେ ବାରି ନା ରେମୁଆଁଇଂନେ ଆଡ଼ାତ୍ରା ବାରି ପେ ତ୍ରୁକ୍‌ସଅରିଆ ଆରି ପେ ଅଟା ଲାଃମାର୍‌ନେ ତାଲିଅରିଆ ଗାଆର୍‌ଏ । 4 ବାରି ନାନେ ଆରି ନା ରେମୁଆଁଇଂନେ ଆରି ଗୁତିରେଇଂନେ ଆଡ଼ାତ୍ରା ଡେଃଆର୍‌ଏ ।

5 ଆରି ମାପ୍‌ରୁ ମୋଶାକେ ବାସଙ୍ଗ୍‌କେ, ହାରୋଣକେ ବାସଙ୍ଗ୍‌, ନା ଲଣ୍ଡିଆ, କେନାଲ୍‌ ବାରି ବନ୍ଦ୍‌ ଆଡ଼ାତ୍ରା ନାନେ ଆତେନ୍‌ ଡୁଡୁକେ ନ୍ତିଅରିଆ ସାଚେ ଆଡ଼ାତ୍ରା ଟେକେଚେ ମିସର୍‌ ଦେସ୍‌ ଆଡ଼ାତ୍ରା ଗିଡ଼ିଃ ରାଙ୍ଗ୍‌ପାଙ୍ଗ୍‌ଲା । 6 ଆତ୍‌ବା ହାରୋଣ ମିସର୍‌ନେ ସାପା ଣ୍ଡିଆ ଆଡ଼ାତ୍ରା ମେଁନି ନ୍ତି ଟେକେଲା, ଗିଡ଼ିଃଇଂ ତାର୍‌ଚେ ମିସର୍‌ ଦେସ୍‌ନେ ସାପା ପାକା ବେପ୍ରେ ୱେକେ । 7 ଆତେନ୍‌ ବେଲା ଡିସାରିଇଂ ମେଙ୍ଗ୍‌ନେ ମାୟାରେ ଦେତ୍‌ରକମ୍‌ ଡିଂଚେ ମିସର୍‌ ଦେସ୍‌ ଗିଡ଼ିଃ ଡୁଙ୍ଗ୍‌ପାଙ୍ଗ୍‌ଆର୍‌କେ ।

8 ଆତ୍‌ବା ଫାରୋ ମୋଶାକେ ଆରି ହାରୋଣକେ ୱାଚେ ବାସଙ୍ଗ୍‌କେ, ନେବାନ୍‌ ବାରି ନେ ରେମୁଆଁଇଂନେବାନ୍‌ ଆକେନ୍‌ ସାପା ଗିଡ଼ିଃ ନୁଆଁ ବିନ୍‌ସା ମାପ୍‌ରୁ ଡାଗ୍ରା ପାର୍‌ତନା ଡିଙ୍ଗ୍‌; ତେଲା ନେ ମାପ୍‌ରୁନେ ମିନିରେ ବଲି ବିଃନ୍‌ସା ରେମୁଆଁଇଂକେ ଆନ୍ତାର୍‌ ନେବିଃଏ ।

9 ତେଲା ମୋଶା ଫାରୋକେ ବାସଙ୍ଗ୍‌କେ, ନେଙ୍ଗ୍‌ ଆଡ଼ାତ୍ରା ଗର୍ବ ଡିଂପା; ଗିଡ଼ିଃଇଂ ଡିଃଡିକି ନାବାନ୍‌ ବାରି ନା ଡୁଆବାନ୍‌ ତାର୍‌ଚେ ଲଣ୍ଡିଆଃଅରିଆ ଲେଃଆର୍‌ଏ, ଆନାକେ ଆରି ନାନେ ଗୁତିରେଇଂକେ ବାରି ସାପା ରେମୁଆଁ ଆତ୍‌ଲା ମାପ୍‌ରୁ ଡାଗ୍ରା ଅଃନା ଆକେନ୍‌ ପାର୍‌ତନା ଣ୍ଡିଙ୍ଗ୍‌ଏ ?

10 ମେଁ ବାସଙ୍ଗ୍‌କେ, ଞ୍ଜଃଡ଼େ ଡିଙ୍ଗ୍‌ । ଆତେନ୍‌ ବେଲା ମୋଶା ବାସଙ୍ଗ୍‌କେ, ନେନେ ମାପ୍‌ରୁ ପର୍‌ମେସର୍‌ ରକମ୍‌ ଜା ଡିଗ୍‌ ଣ୍ଡୁ, ଆକେନ୍‌ ଡିଃଡିକି ନା ନାମ୍ୟାଃଏ, ଆତେନ୍‌ସା ନା ନାବାଲିର୍‌କ୍ନେ ସାମୁଆଁରେ ଡିଂଲେ । 11 ଗିଡ଼ିଃଇଂ ନାବାନ୍‌ ଆରି ନାନେ ଡୁଆ, ଗୁତିରେଇଂ ଆରି ସାପା ରେମୁଆଁଇଂନେବାନ୍‌ ଲାଗ୍‌ଡଚେ ନିଲ ଲଣ୍ଡିଆଅରିଆ ଲେଃଆର୍‌ଏ । 12 ଆରି ମୋଶା ଆରି ହାରୋଣ ଫାରୋନେବାନ୍‌ ବାଏରେ ୱେକେ; ବାରି ମୋଶା ଫାରୋନେ ବିରଦ୍‌ରେ ଡୁଙ୍ଗ୍‌ପାଂବକ୍ନେ ଗିଡ଼ିଃ ବିସୟ୍‌ରେ ମାପ୍‌ରୁ ଡାଗ୍ରା ପାର୍‌ତନା ଡିଂକେ । 13 ଆତ୍‌ବା ମାପ୍‌ରୁ ମୋଶା ବାସଙ୍ଗ୍‌କ୍ନେ ସାମୁଆଁ ଇସାବ୍‌ରେ ଡିଂକେ, ଡୁଆ ବିତ୍‌ରେ ବାରି ବାଜାର୍‌ଅରିଆ ଆରି ଲିଜଅରିଆ ସାପା ଗିଡ଼ିଃ ଗୁଏଃୱେଆର୍‌କେ । 14 ଆତ୍‌ବା ରେମୁଆଁଇଂ ଆତେନ୍‌ ସାପାକେ ମୁଇଂନୁଗ୍‌ ରାଃସିଂ ଆର୍‌ଲା, ଆତେନ୍‌ ଦେସ୍‌ନେ ସାପା ପାକା ମଃୱେକେ । 15 ମାତର୍‌ ଫାରୋ ବିପଦ୍‌ବାନ୍‌ ରକ୍ୟା ବାନେ କେଚେ ମାପ୍‌ରୁନେ ସାମୁଆଁ ଇସାବ୍‌ରେ ମେଁନେ ମନ୍‌ କଟିନ୍‌ ଆଃଡିଂକେ ଆରି ମେଙ୍ଗ୍‌ନେ ସାମୁଆଁକେ ଆଅଁକେ ଣ୍ଡୁ ।

16 ଆତ୍‌ବା ମାପ୍‌ରୁ ମୋଶାକେ ବାସଙ୍ଗ୍‌କେ, ହାରୋଣକେ ବାସଙ୍ଗ୍‌, ସାପା ମିସର୍‌ ଦେସ୍‌ ଡିଃଡିକି ଗିସି ଡିଙ୍ଗ୍‌ଏ, ଆତେନ୍‌ସା ନା ନାନେ ଡୁଡୁ ଏତେ ତୁବଃନେ ଦୁଲିଅରିଆ ବଗ୍‌ । 17 ଆତ୍‌ବା ମେଇଂ ଦେତ୍‌ରକମ୍‌ ଡିଂଆର୍‌କେ, ହାରୋଣ ଆତେନ୍‌ ଡୁଡୁକେ ନ୍ତିଅରିଆ ସାଃଚେ ତୁବଃଅରିଆ ବଗ୍‌କେ, ରେମୁଆଁ ଆରି ପସୁଇଂଅରିଆ ଗିସି ଡିଂକେ; ବାରି ମିସର୍‌ ଦେସ୍‌ନେ ତୁବଃଅରିଆ ଲେକ୍ନେ ସାପା ଦୁଲି ଗିସି ଡିଂକେ । 18 ଆତେନ୍‌ ବେଲା ଡିସାରିଇଂ ମେଙ୍ଗ୍‌ ମେଙ୍ଗ୍‌ନେ ମାୟାରେ ଦେତ୍‌ରକମ୍‌ ଗିସି ତିଆର୍‌ ଡିଂନେସା ଚେସ୍‌ଟା ଡିଂଆର୍‌କେ, ମାତର୍‌ ଆୟାଆର୍‌କେ ଣ୍ଡୁ; ଆତ୍‌ବା ରେମୁଆଁ ଆରି ପସୁଇଂନେ ଆଡ଼ାତ୍ରା ଗିସି ଡିଂକେ । 19 ତେଲା ଡିସାରିଇଂ ଫାରୋକେ ବାସଙ୍ଗ୍‌କେ, ଏନ୍‌ ତ ପର୍‌ମେସର୍‌ନେ ନ୍ତିନେ କାମ୍‌; ଏଲେଡିଗ୍‌ ମାପ୍‌ରୁନେ ସାମୁଆଁ ଇସାବ୍‌ରେ ଫାରୋନେ ମନ୍‌ କଟିନ୍‌ ଡିଂକେ, ବାରି ମେଁ ମେଙ୍ଗ୍‌ନେ ସାମୁଆଁଅରିଆ ଦିଆନ୍‌ ଆବିକେ ଣ୍ଡୁ ।

20 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, ନା ଞ୍ଜିର୍‌ନୁଗ୍‌ ତଡ଼ିଆଚେ ଫାରୋ ଡାଗ୍ରା ତୁଆଁ; କେଲା, ମେଁ ଣ୍ଡିଆ ଡାଗ୍ରା ପାଙ୍ଗ୍‌ଲା, ନା ଆମେକେ ଆକେନ୍‌ ସାମୁଆଁ ନାବାସଙ୍ଗ୍‌ଏ, ମାପ୍‌ରୁ ବାସଙ୍ଗ୍‌ଡିଂକେ, ନେନେ ସେବା ଡିଂନେସା ନେ ରେମୁଆଁଇଂକେ ଆନ୍ତାର୍‌ବି । 21 ବାରି ଅଃନା ନେ ରେମୁଆଁକେ ନ୍ନାଆନ୍ତାର୍‌ ଣ୍ଡୁ, ତେଲା ନେ ନା ଆଡ଼ାତ୍ରା ଆରି ନା ଚାକର୍‌ଇଂନେ ଆଡ଼ାତ୍ରା ଆରି ନା ରେମୁଆଁଇଂନେ ଆଡ଼ାତ୍ରା ଆରି ନା ଡୁଆ ବିତ୍‌ରେ ଦେକ୍‌ରକମ୍‌ ଣ୍ଡ୍ରୁଏ ନେବେଏ ଜେ, ଆତ୍‌ବା ମିସ୍ରିୟଇଂନେ ଡୁଆ ଆରି ବାସା ଲେକ୍ନେ ଜାଗା ପୁରୁନ୍‌ ଡିଂଏ । 22 ବାରି ମଚ୍‌ପୁର୍‌ ବିତ୍‌ରେ ନେ ମାପ୍‌ରୁ ନେଲାଏକେ, ଆକେନ୍‌ ଆନାକେ ଆମ୍ୟାଃ ନ୍‌ସା ଆତେନ୍‌ ଦିନା ନେ ରେମୁଆଁ ବାସା ଲାଏକ୍ନେ ଗୋଶନ୍‌ ଦେସ୍‌ ବିନେ ନେରାଡିଂଏ; ଆତ୍‌ଅରିଆ ଣ୍ଡ୍ରୁଏ ଆଡିଙ୍ଗ୍‌ ଣ୍ଡୁ । 23 ନେ ନିଜର୍‌ ରେମୁଆଁଇଂକେ ଆରି ନା ରେମୁଆଁଇଂନେ ବିତ୍‌ରେ ଅଲ୍‌ଗା ନେରାଃଡିଂଏ; ଞ୍ଜଃଡ଼େ ଆକେନ୍‌ ଚିନ୍‌ ଡିଂଏ । 24 ଏନ୍‌ଇଡ଼ିଂ ମାପ୍‌ରୁ ଦେତ୍‌ରକମ୍‌ ଡିଂକେ; ଆତ୍‌ବା ଫାରୋନେ ଆରି ମେଁନେ ଚାକର୍‌ଇଂନେ ଡୁଆକେ ଣ୍ଡ୍ରୁଏ ପାଙ୍ଗ୍‌କେ; ବାରି କ୍ଲିଗ୍‌ ମିସର୍‌ ଦେସ୍‌ ଣ୍ଡ୍ରୁଏ ଡିଂକ୍ନେବାନ୍‌ ନସ୍‌ଟ ଡିଂୱେକେ ।

25 ଆତେନ୍‌ ବେଲା ଫାରୋ ମୋଶା ଆରି ହାରୋଣକେ ୱାଚେ ବାଲିର୍‌କେ, ପେ ୱେଚେ ମିସର୍‌ ଦେସ୍‌ ବିତ୍ରେ ପେନେ ପର୍‌ମେସର୍‌ନେ ମ୍ନିରେ ବଲି ବିଃପା ।

26 ଆତ୍‌ବା ମୋଶା ବାସଙ୍ଗ୍‌କେ, ଆତେନ୍‌ ବାସଙ୍ଗ୍‌ନେ ଟିକ୍‌ ଣ୍ଡୁ; ମେଃଡାଗ୍‌ଲା ଆତେନ୍‌ ଡିଂଲା, ନେନେ ମାପ୍‌ରୁ ପର୍‌ମେସର୍‌ ମ୍ନିରେ ମିସ୍ରିୟଇଂ ଗୁର୍‌ନା ଡିଂମ୍ୟାଃକ୍ନେ ବଲି ଡିଂନେ ପଡ଼େଏ; କେଲା, ମିସ୍ରିୟଇଂନେ ମ୍‌ମୁଁଆଃ ସାମ୍‌ନେ ମେଙ୍ଗ୍‌ନେ ଗ୍ରୁନା ଡିଂମ୍ୟାଃକ୍ନେ ବଲି ଡିଂଲା, ମେଇଂ କି ଆନେକେ ବ୍ରି ଟୁଚେ ଆବାଗୁଏଆର୍‌ ? 27 ଆତେନ୍‌ସା ନେ ଞ୍ଜି ଦିନ୍‌ନେ ଗାଲି ବାଲିଲ ପାକା ୱେଚେ ନେନେ ମାପ୍‌ରୁ ଆଣ୍ଡିନେ ଆଦେସ୍‌ ବିଏ, ଆତେନ୍ ଇସାବ୍‌ରେ ମେଁ ମ୍ନିରେ ବଲି ନେଃବିଃ ।

28 ଆତ୍‌ବା ଫାରୋ ବାସଙ୍ଗ୍‌କେ, "ନେ ଆପେକେ ଆନ୍ତାର୍‌ ନେବିଏ, ପେ ବାଲିଲ ପାକା ୱେଚେ ମାପ୍‌ରୁ ପର୍‌ମେସର୍‌ନେ ମ୍ନିରେ ବଲି ବିଃପା; ମାତର୍‌ ଜାବର୍‌ ସୁଲ ଆୱେଗ୍‌ପା, ବାରି ନେ ଆତ୍‌ଲା ପାର୍‌ତନା ଡିଂପା ।"

29 ଏନ୍‌ଇଡ଼ିଂ ମୋଶା ବାସଙ୍ଗ୍‌କେ, କେଲା, ନେଙ୍ଗ୍‌ ନା ଡାଗ୍ରା ୱେଚେ ମାପ୍‌ରୁ ଡାଗ୍ରା ପାର୍‌ତନା ଣ୍ଡିଙ୍ଗ୍ଏ, ଆତ୍‌ବା ନାନେ ଆରି ନାନେ ଚାକର୍‌ଇଂନେ ବାରି ନାନେ ରେମୁଆଁଇଂନେ ଡାଗ୍ରା ଞ୍ଜଡ଼େ ସାପା ଣ୍ଡ୍ରୁଏ ସୁଲ ଡିଂଏ; ମାତର୍‌ ମାପ୍‌ରୁ ମ୍ନିରେ ବଲି ବିନ୍‌ସା ରେମୁଆଁଇଂକେ ଆନ୍ତାର୍‌ ବିନେ ବିସଏରେ ଫାରୋ ବାର୍‌ମୁଇଂତର୍ ମିଚ୍‌ ଆବାସଙ୍ଗ୍‌ ଣ୍ଡୁ ।

30 ଆତ୍‌ବା ମୋଶା ଫାରୋ ଡାଗ୍ରାବାନ୍‌ ସୁଲ ୱେଚେ ମାପ୍‌ରୁ ଡାଗ୍ରା ପାର୍‌ତନା ଡିଂକେ । 31 ଆତ୍‌ବା ମାପ୍‌ରୁ ମୋଶା ପାର୍‌ତନା ଡିଂକ୍ନେ ଇସାବ୍‌ରେ ଫାରୋବାନ୍‌ ମେଁନି ଚାକର୍‌ଇଂନେବାନ୍ ବାରି ରେମୁଆଁବାନ୍‌ ସାପା ଣ୍ଡ୍ରୁଏ ନୁଆଁକେ; ଆରି ଆତ୍‌ଅରିଆ ମୁଇଂଡିଗ୍‌ ଆଲେଗେ ଣ୍ଡୁ । 32 ଏଲେ ଡିଗ୍‌ ଫାରୋ ମେଁନେ ମନ୍‌ କଟିନ୍‌ ଆଡିଂକେ ଆରି ରେମୁଆଁଇଂକେ ଆଆନ୍ତାର୍‌କେ ଣ୍ଡୁ ।