1 Ivoifosile myaka kumi na nne, nikakwela kaidi Yelusalemu hamwenga na Balinaba na Tito. 2 Nita uko kwavila Mulungu kanilagisa nite uko, na uko nikafikana na vilongozi muhala, niwasimulila Mbuli Idamane ila niigalile kwa want'hu sio Wayahudi. Nitenda ivo ili sank'hano yangu ino huitenda isekwiza kuwa ibule na maana. 3 Wakatogolelana na nie, na hata mbuyangu Tito akalile hamwenga na nie, ingawa kakala Muyahuda, mbali hawamsulutize kuingila ulungwana, 4 vilavila kukala na want'hu wamwenga waitendile wakumtogola Kilisito walondile aingile ulungwana. Want'hu wano waingila kwa ubala ili wapelembe uhulu chili nao kwa kuiyunga na Kilisito Yesu, ili wachitende watwana wa malagilizo ya Musa. 5 Cheye hachitogolelane nao mbwi, ili ukweli wa Mbuli Idamane ugendelele kuwa namweye siku zose. 6 Mbali vilongozi ao wakalile wakutegelezigwa nk'hani, hawakalile na mbuli mpya ya kunilongela. Kweli wategelezigwa nk'hani, mbali kumwangu iyo sio chint'hu, kwavila Mulungu hakubagula. 7 Mbali wakala wakumanya kuwa, Mulungu kanituma nilonge Mbuli Idamane kwa want'hu weli sio Wayahudi, gesa vila Petulo atumigwe alonge Mbuli Idamane kwa Wayahudi. 8 Mulungu amtendile Petulo kuwa mtumigwa kwa Wayahudi nio iyo anitendile nie kuwa mtumigwa kwa want'hu sio Wayahudi. 9 Ivo, Yakobo, Petulo na Yohana, wakalile vilongozi wakulu, ivo wamanyile kuwa Mulungu kanink'ha sank'hano iyo, wakachitogolele, nie na Balinaba gesa wambuya wawe. Cheye chitogolelana chite chikasank'hane kwa want'hu sio Wayahudi na ao wakasank'hane kwa Wayahudi. 10 Mbali wakachilomba chint'hu chimwe, chileke kuwazimiza wachiwa mbuli ila nikala huiyoha nk'hani kuitenda.

11 Petulo ivoafikile kudibululu dya Antiokia kuchilola, akatenda mbuli ikalile iha na nie nikamuhaza halongozi ha want'hu, kwavila kakala akubananga. 12 Want'hu watumigwe na Yakobo ivowakalile hawanafika, Petulo kakala akudya na want'hu sio Wayahudi. Mbali want'hu ao ivowafikile, akaleka kudya na want'hu sio Wayahudi kwavila kawaogoha want'hu wakalile wakuwasulutiza want'hu waingile ulungwana. 13 Na Wayahudi wamwenga watogole, wakaiyunga na Petulo muutapitapi wake, hata Balinaba nae akatenda gesa ivowatendile ao. 14 Ivonionile kuwa hawakutenda ivoikulonda Mbuli Idamane, nikamulongela Petulo halongozi ha want'hu wose, "Weye ni Muyahudi, mbali ukukala gesa mnt'hu sio Muyahudi. Elo ukudahaze kuwalongela want'hu sio Wayahudi wakale gesa Wayahudi?"

15 Cheye chi Wayahudi kwa kuelekigwa, sio gesa want'hu sio Wayahudi wala Wayahudi wakuwatanga watenda zambi. 16 Ivo, chikumanya kuwa mnt'hu akutogoligwa halongozi ha Mulungu kwa kumtogola Yesu Kilisito, sio kwa kutenda vila yakulonda malagilizo, vilavila na cheye Wayahudi chimtogola Yesu Kilisito ili chitogoligwe halongozi ha Mulungu kwa kufosela kumtogola Yesu Kilisito, na sio kutenda vila yakulonda malagilizo. Kwavila habule hata mnt'hu akulonda kutogoligwa halongozi ha Mulungu kwa kukola Malagilizo. 17 Ikawa, chikalonda kutogoligwa halongozi ha Mulungu kwa kuiyunga na Kilisito, cheye chikuoneka kuwa china zambi, vino, mbuli ino ikulagisa kuwa Kilisito akuchitenda kuwa watenda zambi? Bule! 18 Ikawa nanileke kukola Malagilizo ili nidahe kutogoligwa halongozi ha Mulungu, na kamala nikaandusa kuyakola malagilizo, aho naniwe na zambi. 19 Kwavila kwa mbuli ya malagilizo nie nidanganika. Ivo, malagilizo yenyewe yanikoma ili niwe mgima kwaajili ya Mulungu. Nie niwambigwa mumsalaba hamwenga na Kilisito. 20 Haluse nie ni mgima, mbali sio nie kaidi, mbali Kilisito akukala mgati mmwangu. Ukazi uno hukala haluse hukala kwa kumtogola Mwana wa Mulungu, anibwedile hata akatogola kukomigwa kwaajili yangu. 21 Sikulonda kuulema wende wa Mulungu. Ikawa mnt'hu akutendigwa atogoligwe halongozi ha Mulungu kufosela malagilizo, ivo, kudanganika kwa Kilisito kukuwa si chint'hu!