1 Mweye Wagalatia, muwa gesa wahenye. Vino, niani awalogile mkawa ivo? Kwavila Mbuli ya kuwambigwa Yesu Kilisito mumsalaba niwafunza bila kuwafisa. 2 Hulonda kumanya mbuli imwe kulawa kumwenu. Vino, muhokela Muhe wa Mulungu kwavila mkala mtenda vila yakulonda malagilizo? Egu kwavila mkala muhulika na kuitogola Mbuli Idamane ya Yesu? 3 Vino, mkudahaze kuwa wahenye chiyasi chino? Mweye mwandusa ukazi wenu mpya kwa kutazigwa na Muhe wa Mulungu, na haluse mkulonda kukomeleza kwa nguvu zenu wenyewe? 4 Vino, mahenyeko yose muyapatile yakala bule? Bule! Haikudahika! 5 Vino, Mulungu akuwenk'ha want'hu Muhe wake na kutenda uzonza kwavila mtenda yala yakulondigwa na malagilizo, egu kwavila muitegeleza Mbuli Idamane ya Yesu na kuitogola? 6 Muloleni Ibulahimu kuwa, "Ibulahimu kakala kamtogola Mulungu, na kwa kutogola kwake, Mulungu akamtogola halongozi hake." 7 Ivo, mmanye kuwa wala wose wakumtogola Mulungu, ao nio wana wa Ibulahimu. 8 Maandiko ya Mulungu yalagisa tangu umwaka kuwa, Mulungu naawatende want'hu sio Wayahudi, watogolwe halongozi hake kufosela utogozi wao. Ivo, Maandiko ya Mulungu yalongola kumulongela Ibulahimu Mbuli Idamane, hala yalongile kuwa, "Kufosela weye, want'hu wose nawatendelwe mbuli zidamane." 9 Ivo, wala watogole, nawatendelwe mbuli zidamane hamwenga na Ibulahimu ila atogole. 10 Mbali wala wose wakutenda vila yakulonda malagilizo, ao wakutalamilwa na lana. Kwavila kuandikigwa Mmaandiko ya Mulungu, "Wala wose wakusegamila kuhonyigwa kwa kutenda yala yakulondigwa na Malagilizo ya Musa, ao walanigwa na Mulungu." 11 Ivo, ikumanyika kuwa, kubule mnt'hu naatogoligwe halongozi ha Mulungu, kwa kutenda vila yakulonda malagilizo, kwavila kuandikigwa Mmaandiko ya Mulungu, "Mnt'hu adamane kwa Mulungu, naakale kwa kulongozwa kwa kutogola." 12 Mbali malagilizo hayakusegamila utogozi, mbali Kuandikigwa Mmaandiko ya Mulungu, "Mnt'hu ila akutenda yose yakulondigwa na Malagilizo, naawe na ugima kwa kusegamila Malagilizo." 13 Kilisito kachigombola kulawa mui laana ya Malagilizo kwa kuisola laana iyo kwaajili yetu, kwavila maandiko yakulonga, "Mnt'hu yoyote awambigwe mumsalaba kalanigwa." 14 Mbuli ino itendeka ili mbuli zila zidamane atendeligwe Ibulahimu ziwafikile want'hu sio Wayahudi kufosela Yesu Kilisito, ili kwa nzila ya kutogola, chimuhokele Muhe ila Mulungu alongile naachink'he kufosela kumtogola Yesu Kilisito.

15 Watogozi wayangu, hulonda niwenk'he mlingano kulawa muukazi wetu wa siku zose. Geseni lagano dya want'hu waidi dikaikigwa seke kuwe na mnt'hu akudaha kudisegeza egu kuongezela chint'hu mudilagano diikige kale. 16 Ivo, Mulungu kaika malagano kwa Ibulahimu na weleko wake. Maandiko ya Mulungu hayakulonga, "Weleko wake" kulagisa want'hu wengi mbali yakulonga, "Mwelekwa wake" kulagisa mnt'hu imwe, mnt'hu iyo nio Kilisito. 17 Mbuli hulonda kuilonga nio ino. Mulungu kadiika lagano dyake myaka mia nne na selasini, chipindi icho malagilizo ya Musa yakala yank'hali hayaneza. Ivo, Malagilizo ayo hayakudaha kusegeza lagano idyo wala kubidula chila alongile Mulungu. 18 Ikawa chitumetume cha Mulungu chikupatika kwa kuyategeleza malagilizo, ivo, hachikudaha kupata kaidi yala Mulungu alongile naachitendele, mbali Mulungu kwa wende wake kamtendela Ibulahimu mbuli idamane kufosela chila alongile naamtendele. 19 Ivoelo, malagilizo yana sank'hano gani? Malagilizo yagaligwa kwaajili ya kulagisa zambi zila wakuzitenda want'hu hadi hala akulonda kwiza ila weleko wa Ibulahimu, ila alongile Mulungu naeze. Mulungu kamwink'ha Musa Malagilizo kufosela msank'hani wake wa kuulanga, nae Musa akawenk'ha want'hu. 20 Kweli mgala nt'hume hakulondigwa ikawa mbuli yenyewe ni ya mnt'hu imwe. Mbali Mulungu ni imwe, yeye kaika lagano na Ibulahimu bila kutumia magala nt'hume.

21 Vino, Malagilizo yakukinzana na chila alongile Mulungu naachink'he? Bule! Ikawa malagilizo aink'higwe Musa ingi yadahile kuchink'ha ugima, ivo, ingi chitogoligwe halongozi ha Mulungu kufosela Malagilizo. 22 Mbali maandiko ya Mulungu yalonga kale kuwa isi yose ikutalamilwa na zambi. Ivo wala wose wakumtogola Yesu Kilisito, nawahokele chila alongile Mulungu. 23 Tangu want'hu hawanamtogola Kilisito, Malagilizo yachitenda kuwa watwana. Chikala chikugozela kuikwa kwa kutogola ukoka. 24 Ivo, Malagilizo yakala chilongozi hadi ivoezile Kilisito, ili chidahe kutogoligwa halongozi ha Mulungu kwa kufosela kumtogola Yesu Kilisito. 25 Elo, kutogola kufika. Ivo Malagilizo hayakudaha kuchitalamila kaidi. 26 Kwa nzila ya kutogola, mweye mose muwa wana wa Mulungu kwa kuiyunga na Kilisito Yesu. 27 Mweye mose mbatizigwe, muiyunga na Kilisito. Ivo, muwa gesa Kilisito. 28 Ivo, habule chint'hu chikubagula hagati ya Wayahudi na want'hu sio Wayahudi, habule chint'hu chikubagula hagati ya watwana na sio watwana, na habule chin'thu chikubagula hagati ya wanawalume na wanawachike. Kwavila mweye mose muwa chint'hu chimwe kwa kuiyunga na Kilisto Yesu. 29 Mweye ni want'hu wake kilisto. Ivo muwa weleko wa Ibulahimu, namweye namuhokele yala yose ayalongile Mulungu naawenk'he.