1 Kilisito kachilava muutwana, akalonda chisigale shisekuwa watwana. Ivoelo, timalaleni kidete msekutogola kaidi kuwa watwana wa Malagilizo. 2 Tegelezeni! Nie Paulo huwalongela, mkatogola kuingila ulungwana kwa kutoza malagilizo ya Musa, Kilisito sekeawataze chint'hu chochote. 3 Hubwelela kaidi kulonga, wose wala wakutogola kuingila mulungwana, wakulondigwa kuyatenda malagilizo yose. 4 Mweye mkulonda kutogoligwa halongozi ha Mulungu kwa kukola malagilizo. Muibagula kutali na Kilisito na Mkutali na wende wa Mulungu. 5 Mbali cheye kwa nguvu ya Muhe wa Mulungu, chikulolela kutogoligwa halongozi ha Mulungu kufosela kumtogola Yesu. 6 Ikawa chiiyunga na Kilisito Yesu, kuingila ulungwana egu kuleka kuingila ulungwana kukuwa kubule mana yoyote, mbali mbuli nk'hulu ikulondigwa kutenda kwa ubwedo nio kukulagisa kutogola kwetu. 7 Mkala mkugendelela goya muukutogola! Vino, niani awatendile mleke kukola kweli? 8 Mulungu awatangile, hatendile mbuli izo. 9 Mafuzo yano ya uhuni yakuwa gesa hamila chidogo ikuumua usu wose. 10 Kulawana na kuiyunga kwenu na Mndewa, sekembiduke kukola mafunzo yamwenga. Ivo mnt'hu yoyote akulonda kuwazaganya awe mnt'hu yoyote, iyo naalamuligwe na Mulungu. 11 Ndugu zangu, ikawa nink'hali hugendelela kuwalongela want'hu waingila ulungwana, hangi hugendelela kuhenyezigwa? Ingi iwile ivo, kulonga kwangu mbuli ya kudanganika kwa Yesu mumsalaba hakulondile kuwaihiza Wayahudi. 12 Huona vidamana want'hu ao wakuwazaganyeni kwa mbuli ya kuingila ulungwana, waisonda wenyewe! 13 Ndugu zangu, mweye mtangigwa na Mulungu ili msekuwa watwana. Mbali kuwa sio watwana kusekuwa nzagilo za kutalamilwa na mbuli za mui isi ino, mbali mkulondigwa kutazana kwa ubwedo. 14 Kwavila Malagizo yose ya Musa yakutimia kwa kukola lagilizo dimwe, "Mbwede miago gesa ivo ukuibweda mwenyewe." 15 Mkalumana na kudafunana gesa wanyama, mkulondigwa muiteganye msekwiza kuiangamiza wenyewe kwa wenyewe!

16 Elo, hulonga vino, mlekeni Muhe wa Mulungu awalongoze, mkatenda ivo sekemtende vila mitufi ikulonda. 17 Kwavila mtufi ukulonda kuuhuma Muhe wa Mulungu na Muhe ukulonda kuuhumana na mtufi, kwavila Muhe na mtufi viupingana, mweye hamkudaha kutenda yala mkuyalonda. 18 Mkalongozwa na Muhe wa Mulungu, Malagizo ya Musa hayakudaha kuwalongoza. 19 Ivo, mbuli zikutendigwa na mtufi zikumanyika, nayo ni ugoni, uhank'hu, mbuli zihile, 20 kufugamalila nyank'hiti, usawi, nongwa, migongo, maya, ugila, kumelela mate mbuli zihile, kuiswela, 21 kuihila, ung'waji wa upele, ubafu na mbuli zimwenga gesa izo. Huwakanya gesa ivonilongole kuwakanya, want'hu wakutenda mbuli gesa izo sekewaingile muumwene wa Mulungu. 22 Mbali yala yakulawila mkalongozwa na Muhe wa Mulungu ni ubwedo, denk'ho, tindiwalo, ufinyilizi, unt'hu udamane, moyo udamane na utogofu, 23 uhole na kuitalamila mwenyewe. Mzimbuli izo, kubule malagilizo yakulema mbuli izo. 24 Want'hu wose waiyungile na Kilisito Yesu, wayawamba magesa yawe ya uhasanyi mumsalaba hamwenga na mbuli zake sose zihile. 25 Muhe kachink'ha ugima. Elo, chimuleke Muhe wa Mulungu alongoze ugima wetu. 26 Ivo, chileke kuigoda, chisekusovulana na kuonelana miyongo.