1 Ndugu zangu, mkamuona mienu katenda mbuli zihile, mweye mkulongozwa na Muhe wa Mulungu, mkulondigwa mumkanye mnt'hu iyo, mbali tendeni ivo kwa uhole, kuno mkuiteganya ili na mweye msekwiza kugezigwa. 2 Muitaze mweye kwa mweye. Kwa kutenda ivo namuwe mtenda yala yakulondigwa na malagilizo ya Kilisito. 3 Mnt'hu akaiyona kuwa ni chint'hu, kumbe sio chint'hu, iyo akuihunila mwenyewe. 4 Mbali chila mnt'hu alole vila akukala, ikawa yala akutenda yadamana, akudaha kuigoda mgati yake bila kulola icho akuchitenda mnt'hu imwenga. 5 Chila mnt'hu naalamuligwa kwa yala atendile. 6 Ikawa ukufunzigwa nt'hume ya Kilisito, ukulondigwa kumwink'ha ila akukufunza vila vidamane uli navo. 7 Msekuihunila Mulungu hakubezigwa. Kwavila icho ahandile mnt'hu nicho icho akuchipata. 8 Kwavila mnt'hu akatenda kwa kuubwedeza moyo wake, iyo naadanganike, mbali mnt'hu akutenda kwa kumbwedeza Muhe wa Mulungu, naapate ugima wa siku zose bila nk'homelezo. 9 Ivo, msekusoka kutenda mbuli zidamane, kwavila chipindi chikafika nachipate chila chikulondigwa chipate ikawa hachilegele. 10 Ivo, chikawa na nyafasi ya kumtendela mbuli zidamane chila mnt'hu nachitende ivo na hasa ndungu zetu wala wamtogole Yesu gesa vila cheye ivo chimtogole.

11 Loleni ivoniwaandikile kwa helufi nk'hulu kwa mkono wangu mwenyewe. 12 Want'hu wose wakulonda kuoneka wadamana kwa vint'hu va mtufi, ao nio wakulonda mweye muingile ulungwana. Wakutenda ivo ili wasekuhenyezigwa kwaajili ya msalaba wa Kilisito. 13 Kwavila ao wenyewe waingilile ulungwana hawakuyategeleza malagilizo ya Musa, mbali wakuwalonda mweye muingile mulungwana ili waigodele kwa ulungwana utendigwe mmitufi yenu. 14 Mbali nie sikuigodela chint'hu chochote, ila huigodela kudanganika kwa Yesu mumsalaba, kulawana na kudanganika kwake mumsala, mbuli zose za mui isi ino, zibule mana kumwangu. Ukazi wangu wa umwaka udanganika hamwenga nae mumsalaba. 15 Kuingila ulungwana egu kuleka kuingila ulungwana, kumwangu kubule mana, mbali chint'hu chili na mana kumwangu ni kuwa chiumbe chimpya. 16 Utindiwalo uwe kwa wala wose wakuikola kuwa vilumbe vimpya na ubazi wa Mulungu uwe kwa want'hu wake wa isi ya Islaeli. 17 Ivoelo, msekunihenyeza kwa mbuli yoyote, kwavila nie nina nk'hovu mumtufi wangu kwaajili kumsank'hanila Kilisito Yesu. 18 Ndugu zangu, wende wa Mndewa wetu Yesu Kilisito naukale namweye mose. Tawile.