1 ህንተንቱፐ እት ኡራዉ ባረ እሻና ሞቱ ደእያባ ግዶፐ፥ አማንያዋንቱ ቦላ ፕርደታናዋ ባሺደ፥ አማነናዋንቱ ቦላ ፕርደታናዉ ዋን ጻሊደ ቤዳ? 2 አማንያዋንቱ አላምያ ቦላ ፕርዳናዋ ኤርክቴ? ያትና፥ አላምያ ቦላ ህንተ ፕርዳናዋንታ ግዶፐ፥ ኡባባፐ ጉጽያዋ ፕርዳናዉ ዳንዳይክቴ? 3 ሀ ደኡዋባይ አቶ ሽን፥ አማንያዋንቱ ኪታንቻቱዋ ቦላ ፕርዳናዋ ኤርክቴ? 4 ያትና፥ ህንተንታ ሀ አላምያ ደኡዋባዉ ፕርዳ ጎለ ቡሳይ ኮሾፐ፥ አማንያ አሳይ ካዳ አሳን ፕርድሳናዉ አፊቴ? 5 ታን ህንተንታ ዬላያናዉ ሀዋ ጋይ፤ ሀዋ ግዳናዉ በሲ? ህንተንቱ ግዶን እሻቱዋ ስገናዉ ዳንዳይያ ሎኦ ኤራንቻ አሳይ እቱነ ባዌ? 6 ሽን እት እሻይ የኮ እሻ ፕርዳ ጎለን ሞቲደ፥ ሄ የዉዋ አማነና አሳን ፕርድሲ?

7 ስም እቱ እቱዋ ሞትያዌ ህንተ ግዶን ደኦፐ፥ ሄዌ ህንተ ኩንዴዳዋ በሴ። ሄዋፐ ህንተ ናቀትያዌነ ጭመትያዌ ሎኤኔ? 8 ሽን ህንተ ህንተ ሁጰዉ እቱ እቱዋ ሀራይ አቶ፥ ህንተ እሻቱዋካ ናቂታነ ጭሚታ።

9 ዎይ ማካላንቻቱ ጾሳ ካዉተ ላተናዋ ኤርክቴ? ባሎፕተ። ዎሹማናዉ ቆፕያዋንቱ ዎይ ኤቃዉ ጎይንያዋንቱ ዎይ ዎሹምያዋንቱ ዎይ አቱማዋ ግዲደ፥ አቱማዋና ግስያዋንቱ፥ 10 ዎይ ካይሳቱ ዎይ ሚሻዉ ዮራትያዋንቱ ዎይ ማትያዋንቱ ዎይ አሳ ሱን ባይዝያዋንቱ ዎይ ቦንቂያዋንቱ ጾሳ ካዉተ ላትክኖ። 11 ህንተንቱፐካ እት እት አሳይ ሄዋንቱ ማላ። ሽን ጎዳ የሱስ ክርስቶሳ ሱንንነ ኑ ጾሳ አያናን ህንተ ሜጨቲደ ጌዬድታ፤ ቃይ ጽሌድታ።

12 እት ኡራይ፥ "ታን ኮዬዳባ ኡባ ኦናዉ ዳንዳያይ" ጋና ዳንዳዬ። ሽን ኡባይካ ታና ማደና። ታን ኮዬዳባ ኡባ ኦናዉ ዳንዳያይ። ሽን አዬኔካ ታና ሞደና። 13 ቃይ ሀራይካ፥ "ቁማይ ኡሉዋሳ፤ ኡሉካ ቁማሳ" ጌ። ሽን ጾሳይ ኡሉዋካ ቁማካ ይሳና። አሳ አሳተይ ጎዳ የሱሳሳፐ አትን፥ ዎሹማሳ ግደና። ጎዳ የሱስካ አሳ አሳተሳ። 14 ጾሳይ ጎዳ የሱሳ ሀይቁዋፐ ደንዳ፤ ቃይ ኑናካ ሀይቁዋፐ ባረ ዎልቃን ደንና።

15 ህንተንቱ አሳተይ ክርስቶሳ አሳተና እቱዋ ግድያዋ ህንተ ኤርክቴ? ያትና፥ ታን ክርስቶሳ አሳተና እቱዋ ግዴዳዋ አፋደ፥ ጫራት አሳተና እቱዋ ኦናዉ በሲ? በሰና! 16 ዎይ ጫራትና እትፐተ መያ ኡራይ እዝና እት አሳተ ግድያዋ ኤርክቴ? አያዉ ጎፐ፥ ጾሳ ማጻፋይ፥ "ኡንቱንቱ ላአቱ እት አሾ ግዳና" ያጌ።✝ 17 ሽን ጎዳና እትፐተ መያ ኡራይ አያናን አናና እቱዋ ግዴ።

18 ዎሹማፐ ሃክተ። እት ኡራይ ኦያ ሀራ ናጋራ ኡባይ አ አሳተፐ ካረና ደኤ፤ ሽን ዎሹምያዌ ባረ ቦላን ናጋራ ኦ። 19 ዎይ ህንተ ቦላይ ጾሳይ ህንተንቶ እሜዳ ህንተንቱን ደእያ ጌሻ አያናይ አቅያ ጌሻ ጎልያ ግድያዋ ኤርክቴ? ቃይ ህንተ ህንተ ሁጲያሳ ግድክታ። 20 አያዉ ጎፐ፥ ጾሳይ ህንተንታ ጋትያን ሻሜዳ። ሄዋ ድራዉ፥ ህንተ አሳተን አ ቦንችተ።