1 እት እት አሳቱ ይሁዳፐ አንጾክያ ዎደ፥ "ሙሴ ዎጋዳን፥ ህንተ ቃጻረተናዋ ግዶፐ፥ አታናዉ ዳንዳይክታ" ያጊደ እሻቱዋ ታማርሱዋ ዶሜድኖ።✝ 2 ጳዉሎስነ ባርናባስ ኡንቱንቱና ዳርስ ዋላቀቲደ ፓሉመትና፥ አንጾክያን ደእያ እት እት ሀራ አሳቱ ሄ ፓሉማ ድራዉ፥ ጳዉሎሳናነ ባርናባሳና የሩሳላመ ቢደ፥ የሱስ ኪቴዳዋንቱናነ ጭማቱዋና ጋከታናዉ ቆፋይ ቃሸቴዳ።

3 አማንያ አሳቱ ኡንቱንታ ኪቲደ ኦግያን ማድሽን፥ አይሁዳ ግደናዋንቱ ጾሳኮ ስሜዳዋ ኦዲደ፥ ፕንቂያናነ ሳማርያና አድኖ፤ ሄዌ እሻቱዋ ኡባ ሎይ ናሸቼዳ። 4 ኡንቱንቱ የሩሳላመ ጋኬዳ ዎደ፥ አማንያዋንቱ፥ የሱስ ኪቴዳዋንቱነ ጭማቱ ኡንቱንታ ሞኬድኖ፤ ጾሳይ ባረንቱን ኦዳዋ ኡባ ኦዴድኖ። 5 ሽን ፓርሳዋቱዋ ባጋፐ አማኔዳ እት እት አሳቱ ደንድ ኤቂደ፥ "ህንተንቱ ኡንቱንታ ቃጻራናዉነ ሙሴ ህግያ ናጋና ማላ አዛዛናዉ በሴ" ያጌድኖ።

6 የሱስ ኪቴዳዋንቱነ ጭማቱ ሄዋ ዞረታናዉ ሺቄድኖ። 7 ሎይ ሃሳዬዳዋፐ ጉይያን፥ ጰጽሮስ ደንድ ኤቂደ፥ ኡንቱንታ ሀዋዳን ያጌዳ፤ "ታናዳን አማንያዋንቶ፥ አይሁዳ ግደናዋንቱ ዎንጋላ ምሽራቹዋ ቃላ ታ ዶናፐ ስሲደ አማናና ማላ፥ ታና ጾሳይ ህንተ ግዶፐ በን ዶሬዳዋ ህንተንቱ ኤሪታ። 8 አሳ ዎዛና ኤርያ ጾሳይ ጌሻ አያና ኑዉ እሜዳዋዳን፥ ኡንቱንቶካ እሚደ ቱማዬዳ። 9 ኡንቱንቱ አማኔዳ ድራዉ፥ እ ኡንቱንቱ ዎዛና ጌሺደ፥ ኑ ግዱዋንነ ኡንቱንቱ ግዱዋን ዱማተ ዎቤና። 10 ሄዋ ድራዉ፥ ኑ አዎቱነ ኑን ቶካናዉ ዳንዳይቤና ዎልቃማ ቶኩዋ ካልያዋንቱ ሞርግያን ዎደ፥ ሀእ ህንተ አያዉ ጾሳ ፓጪቴ? 11 ሽን ጎዳ የሱስ ክርስቶሳ አ ኬካተን ኡንቱንቱ አቴዳዋዳን፥ ኑንካ አቴዳዋ አማኔቶ" ያጌዳ።

12 አሳይ ኡባይ ጮኡ ጊደ፥ ባርናባስነ ጳዉሎስ አይሁዳ ግደና አሳ ግዶን ባረንቱ ባጋና ጾሳይ ኦዳ ማላታነ ኦራባ ኡባ ኦድሽን ስሴ።

13 ኡንቱንቱ ሃሳያ ዉርሴዳዋፐ ጉይያን፥ ያቆብ ሀዋዳን ያጊደ ዛሬዳ፤ "እሻቶ፥ ታን ግያዋ ስስተ። 14 ጾሳይ አይሁዳ ግደናዋንቱ ግዶፐ ባረዉ ሀንያ አሳ አካናዉ አይሁዳ ግደናዋንቶ ኮይሮ ዎት ቆፔደንቶ ስሞን ኦዴዳ። 15-18 ናብያ ቃላይ ሀዋና ጊጌ፤ ጎዳይ ዳሮ ዎድያፐ ዶሚደ፥ አሳ ሀዋ ኤርሲደ፥ ጾሳ ማጻፋን ሀዋዳን ያጌዳ፤✝

" ‘ሀዋፐ ጉይያን፥ ሳኣን ደእያ ሀራ አሳይ ኡባይ፥

ታዋ ግዳናዉ፥

ታን ጼሴዳ አይሁዳ ግደና አሳይ ኡባይ፥

ጎዳ ኮያና ማላ፥ ታን ስማና።

ታን ኮለቲደ ኩንዴዳ ጎልያዳን፥

ሀኔዳ ዳዊተ ካዉተ ደንና።

ኮለቴዳዋካ ዛራደ ኬጻና፤

ታን ላኤንዋ አ ኤሳና’

ያጌዳ።

19 "ሄዋ ድራዉ፥ ታ ቆፋ ግዶፐ፥ አይሁዳ ግደናዋንቱፐ ጾሳኮ ስምያዋንታ ኑን መቶናዉ ኮሸና። 20 ሽን ኡንቱንቱ ኤቃን ቱኔዳዋ ሜና ማላ፥ ዎሹመና ማላ፥ ባኩቴዳ መህያ አሹዋ ሜና ማላነ ሱ ኡሸና ማላ፥ ኡንቱንቶ ኑን ዳብዳቢያ ጻፋናዉ ኮሼ።✝ 21 አያዉ ጎፐ፥ ሙሴ ህግያ ካሰ የለታፐ ዶሚደ ሳምባታን ሳምባታን አይሁዳ ዎሳ ጎለቱዋን ናባቢደ፥ አ ቃላ ካታማ ኡባን ኦድያዋንቱ ደኢኖ" ያጌዳ።

22 ሄዋፐ ጉይያን፥ የሱስ ኪቴዳዋንቱነ ጭማቱ ዎሳ ጎለ አሳ ኡባና እትፐ ባረንቱ ግዶፐ አማሬዳ አሳቱዋ ዶሪደ፥ ጳዉሎሳናነ ባርናባሳና አንጾክያ የዳናዉ ቆፋ ቃቼድኖ፤ ኡንቱንቱ ዳሮ ቦንቼቴዳ ላኡ አሳቱዋ ባርሳባ ጌተትያ ይሁዳነ ስላሳ ዶሬድኖ። 23 ያቲደ ሀዋዳን ግያ ዳብዳቢያ ጻፊደ፥ ኡንቱንቱ ቦላ ኪቴድኖ፤ "ኑን የሱስ ኪቴዳዋንቱነ ጭማቱ ህንተ እሻቱ፥ አንጾክያን፥ ሶርያንነ ክልቂያን ደእያ አይሁዳ ባጋ ግደና እሻቶ ኑ ሳሮታ ኪቴቶ።

24 "ኑን አዛዝቤና አሳቱ ኑ ግዶፐ ቢደ፥ ‘ህንተንቱ ቃጻረታናዉነ ሙሴ ህግያ ናጋናዉ በሴ’ ጊደ፥ ህንተንታ መቶዳዋነ ይሎዬዳዋ ስሲደ፥ 25,26 ኑ ጎዳ የሱስ ክርስቶሳ ሱን ድራዉ፥ ባረንቱ ሸምፑዋ ኦሌዳ ኑን ሲቅያ ባርናባሳናነ ጳዉሎሳና ዶረቴዳ አሳቱዋ ህንተንቱኮ ኪታናዉ እት ዎዛናን ኑ ቆፋ ቃቼዶ። 27 ሄዋ ድራዉ፥ ኑን ጻፌዳዋ ኡንቱንቱ ባረንቱ ሁጰዉ ባረንቱ ዶናን ህንተንቶ ኦዳና ማላ፥ ይሁዳነ ስላሳ ኪቴዶ።

28,29 "አያዉ ጎፐ፥ ኤቃዉ ያርሼዳዋ ሞፕተ፤ ሱ ኡሾፕተ፤ ባኩቴዳ መህያ አሹዋ ሞፕተ፤ ዎሹሞፕተ። ሀ ኮሽያዋንቱፐ አትን፥ ሀራ ዴጽያ የዉዋ ህንተንታ ቶሰና ማላ፥ ኑንነ ጌሻ አያናይ የዉዋ ኤኖ ጊደ አኬዶ፤ ሀ ኡባባፐ ህንተ ሁጲያ ናጎፐ፥ ህንተንቱ ሎኦባ ኦታ። ስም ሳሮ ደእተ" ያጌድኖ።

30 ሄዋ ድራዉ፥ ኪተቴዳዋንቱ ሞይዘት፥ አንጾክያ ዎደ፥ አማንያ አሳ ሺሺደ፥ ዳብዳቢያ አሳዉ እሜድኖ። 31 ኡንቱንቱ ሄ ምንስያ ዳብዳቢያ ናባቤዳ ዎደ፥ ናሸቴድኖ። 32 ቃይ ይሁዳይነ ስላሰ ባረንቱ ሁጰዉ ናባቱዋ ግድያ ድራዉ፥ እሻቱዋ ሎይ ማቂደ ምንሴድኖ። 33 ኡንቱንቱ አንጾክያን አማሬዳ ጋላሳ ኡቴዳዋፐ ጉይያን፥ እሻቱ ሳሮተን ሞይዝና፥ ባረንታ ኪቴዳዋንቱኮ ስሜድኖ። 34 ሽን ስላሰ ያን አታናዉ ባረ ቆፋ ቃቼዳ።*

35 ቃይ ጳዉሎስነ ባርናባስ ሀራ ጮራ አሳቱዋና እትፐ ጎዳ ቃላ ታማርሲደነ ዎንጋላ ምሽራቹዋ ኦዲደ፥ አንጾክያን ኡቴድኖ።

36 አማሬዳ ጋላሳፐ ጉይያን፥ ጳዉሎስ ባርናባሳ፥ "ኑን ጎዳ ቃላ ኦዴዳ ካታማ ኡባን ኑ እሻቱ ዎት ደኢኖንቶ፥ ጉየ ስሚደ፥ ጾሞስ በኦይተ" ያጌዳ። 37 ሄዋፐ ጉየ ባርናባስ ማርቆሳ ጌተትያ ዮሃንሳ ባረንቱና አፋናዉ ኮዬዳ። 38 ሽን ጳዉሎስ ማርቆሳ ባረንቱና አፋናዉ ኮይቤና፤ አያዉ ጎፐ፥ እ ኡንቱንቱፐ ጵንፍልያን ሻከቴዳ፤ ቃይ ኡንቱንቱና ኦሶ ብቤና። 39 ኡንቱንቱ ግዱዋን ሎኤና ዋላሳይ ከስና፥ እቱ እቱዋፐ ሻከቴዳ፤ ባርናባስ ማርቆሳ አኪደ፥ ማርካብያን ቆጲሮሳ ቤዳ። 40 ሽን ጳዉሎስ ስላሳ አክና፥ እሻቱ አ ሀዳራ ጾሳ አ ኬካተዉ እሜዳዋፐ ጉይያን ቤዳ። 41 ያቲደ አማንያ አሳቱዋ ምንሲደ፥ ሶርያናነ ክልቂያና አዳ። ጳዉሎሳ ላኤን ኦጊያ