1 ይሁዳ ካቲ ዮአቄም ካተቴዳ ሄዘን ላይ፥ ባብሎነ ካቲ ናቡካዳናጾር የሩሳላመ ካታማ ቦላ ደንዲደ፥ ሄ ካታማ ዶዴዳ።✝ 2 ጎዳይ ይሁዳ ካትያ ዮአቄማነ ጾሳ ጌሻ ጎልያን ደእያ ሚሻቱዋፐ ኡንደነዳዋ አ ኩሽያን አደ እሜዳ። እካ ሄ ሚሻቱዋ ባብሎነ ጋድያን ደእያ ባረ ጾሳቱዋ ኤቃ ጎልያ አሄዳ፤ ባረ ጾሳ ሚሻ ምንጅያ ጎልያን ዎዳ።✝

3 ሄዋፐ ጉይያን፥ ካቲ አሽፋናዛ ግያ ባረ ኦሳንቻቱዋ ካፑዋ ሀዋዳን ያጊደ አዛዜዳ፤ "እስራኤልያ አሳ ግዶፐ ካትያ ዛረ ግድያዋንታነ ዎልቃማ አሳቱዋ ዛረ ግድያዋንታ ዶራ። 4 ያላጋቱ አሳተን ፓጫይ ባይናዋንታ፥ ማላንቻቱዋ፥ አያ ታማርሶፐካ ኤራናዉ ዳንዳይያዋንታ፥ አኬክያዋንታ፥ ኤራተይ ኩሜዳዋንታነ ካትያ ጎልያን ኦናዉ ዳንዳይያዋንታ። ኡንቱንታ ባብሎነቱዋ ቃላነ ጽፋትያ ታማርሳ" ያጌዳ። 5 ቃይ ኡንቱንቱ ሀች ሀች ማና ቁማይነ ኡሻና ዎይንያ ኤሳይ ካትያዉ ካኤዳ ቁማፐነ ኡሻፐ ግዳናዳን፥ ካቲ አዛዜዳ። ሄዋዳንካ፥ ሄዙ ላይ ሎሄዳዋፐ ጉይያን፥ ካትያ ስን ሺቂደ፥ ኦሱዋ ዶማናዳን ቃቼዳ።

6 ዶረቴዳዋንቱ ግዶፐ ይሁዳ ዛረ ግድያዋንቱ ዳኔላ፥ ሀናንያ፥ ምሻኤላነ አዛርያ ግያዋንቱ ደኢኖ። 7 ኦሳንቻቱዋ ካፑ ኡንቱንቱ ሱን ላሚደ፥ ዳኔላ ብልጻሶራ፥ ሀናንያ ስድራቃ፥ ምሻኤላ ምሳቃ፥ አዛርያ አብዳናጎ ጊደ ሱንዳ።

8 ዳኔል ካትያ ቁማ ምያዋንነ ዎይንያ ኤሳ ኡሽያዋን ባረና ቱንሰና ማላ፥ ባረ ዎዛናን ቆፋ ቃቼዳ፤ ሄ ቆፋን ማያናዳን፥ ኦሳንቻቱዋ ካፑዋ ዎሴዳ። 9 ሄ ካፑ ዳኔላ ሳባና ማላነ አዉ ቃረታና ማላ፥ ጾሳይ ኦዳ። 10 ግዶ ሽን፥ ኦሳንቻቱዋ ካፑ ዳኔላዉ ኦዲደ፥ "ታን ህንተንቶ ሀ ቁማነ ኡሻ አዛዜዳ ታ ጎዳ ካትያዉ ያያይ። ህንተናና ላገትያ ያላጋቱ ሶምኡዋፐ ህንተ ሶምኢ ግልቂ ቤቶፐ፥ ህንተ ጋሱዋን ካቲ ታና ዎና" ያጌዳ።

11 ሄዋፐ ጉይያን፥ ኦሳንቻቱዋ ካፑ ሱንና ዳኔላ፥ ሀናንያ፥ ምሻኤላነ አዛርያ ሀዳራ አኬዳ ብታንያ ዳኔል ሀዋዳን ያጌዳ፥ 12 "ኑዉ ማናዉ አታክልትያ፥ ኡሻናዉካ ሃ ጻላላ እማደ፥ ኑና ነ ቆማቱዋ ታሙ ጋላሳቱዋን ፓጫ። 13 ሄዋፐ ጉይያን፥ ኑ ሶምኡዋነ ካትያ ቁማ ምያ ያላጋ አሳቱዋ ሶምኡዋ ጌዳራ ጼላደ፥ ኑና ነ ቆማቱዋ ነዉ ማላት ቤቴዳዋዳን ኦ" ያጌዳ።

14 እ ሄዋ ማዪደ፥ ታሙ ጋላሳ ኡንቱንታ ፓጬዳ። 15 ታሙ ጋላሳፐ ጉይያን ኡንቱንቱ፥ ካትያ ቁማ ሜዳ ያላጋቱዋ ኡባፐ ፓጺደነ አንቃሪደ ቤቴድኖ። 16 ያትና፥ ኡንቱንቶ ጊጌዳ ቁማነ ዎይንያ ኤሳ ድጊደ፥ አታክልትያ እሜዳ።

17 ሀ ኦይዱ ያላጋቶ ጾሳይ ኤራነ ኡባ ቆሞ ጽፋቲነ ትምርቲ ገልያ አኬካ እሜዳ። ዳኔል ቃይ ሳጻነ አኩሙዋ ኡባ ብለ ኤሬ።

18 ካቲ ያላጋቱ ባረኮ ገላናዳን አዛዜዳ ዎዲ ፖለትና፥ ኦሳንቻቱዋ ካፑ ኡንቱንታ ናቡካዳናጾረ ስን አዳ። 19 ካቲ ኡንቱንታ ሃሳይሴዳ ዎደ፥ ዳኔላ፥ ሀናንያ፥ ምሻኤላነ አዛርያ ማላ አሳይ ኡንቱንቱ ግዶን ቤትቤና። ያትና፥ ኡንቱንቱ ካትያዉ ኦናዉ ገሌድኖ። 20 ካቲ ኡንቱንታ ኦቼዳ አይ አዳ ኤራተነ አኬካ ኦሻን፥ አ ካዉተን ደእያ ሻሬቾቱዋፐነ ሙሩንያዋንቱ ኡባፐ ኡንቱንቱ ታሙ ኩሽያ አደ ቤቴድኖ። 21 ዳኔል ካቲ ቂሮሰ ካተቴዳ ኮይሮ ላይይ ጋካናዉ ጋምኤዳ።